Tawamhã Zaco te uburé isõrõwa 're, 're ihâimana za'ra mono norĩ ma nharĩ za'ra, ãne: — Wasiré a'uwẽ'õ norĩ te, ihâiba'õ norĩ ma, romhâibarĩ na ãma 're idawata za'ra mono hã aima ihâimana za'ra wa'wa hã, te za asiwi isãmra 'wa. Ma'ãpé asipese za'ra wa'aba. Duré da'uza ihâi uptob'õ na te za asi'uza za'ra wa'wa.
Zezusihi zadawa wasuꞌuꞌwa norĩ nhimiromhuri na robꞌuiꞌéré 15:20 - ꞌRe Ihâimana Uꞌâsi Mono Zadawa Wasuꞌu20 Ãne si wa za 'manharĩ za'ra ni. Wa za tãma rob'ui'éré za'ra ni, marĩ iwasété uptabi si, wa te tiwi sawi za'ra da, romhâiba 'manharĩ ãma 're idawata za'ra mono zéb da, abaze da te 're simroi mono wamhã, taha nhi hã te te 're huri tõ mono da, duré siwa'ru tihâimanazé iwasédé hã te te 're 'manharĩ za'ra mono tõ da, pi'õ na aibâ na zama, duré danhimizama hã da te 're isõ'reti za'ra mono nhi hã waprui ré te te 're huri tõ mono da, duré danhimizama wapru hã te te duré 're âhuri tõ mono da. Ãne si wa za dawi sawi za'ra ni. အခန်းကိုကြည့်ပါ။ |
Zezusihi zadawa wasuꞌuꞌwa norĩ nhimiromhuri na robꞌuiꞌéré 15:20
47 ပူးပေါင်းရင်းမြစ်များ
Tawamhã Daniéu, apito sazém na za 're isai mono na, duré uwa 'rãi wa'u isé na tisa te te 're isimihâri mono zém na, ãma 're sihâiba wamnarĩ mono tõ da, ma tô 'râwi sima waihu'u. Tahawa ma tô Apenasihi wi rowaptẽ, te te tãma rowairébé da, apito sa te te upi tõ da, duré ite rob'rãi wa'u zama te te upi tõ da.
‘Danhimizama hã romhâiba 'manharĩ ãma 're dawata za'ra mono da, da te 're isimroi mono nhi hã 're huri aba mono õ di za. Duré iwapru hã 're âhuri aba mono õ di za. Duré danhimizama da te 're isõ'reti za'ra mono nhi hã 're huri aba mono õ di za. Duré siwa'ru aihâimanazé iwasédé hã 're 'manharĩ za'ra wa'aba mono õ di za, pi'õ na aibâ na zama.’ Ãne na si wanhimiroti za'ra hã, aima za'ra wa'aba hã. Ãne na wanhimiroti zarina 're anomro aba mono wamhã, aima 're rowẽ za'ra wa'aba mono di za. Wa ãma asawi za'ra wa'aba ni, irẽme ma.”
E niha tawamhã zudeu'õ nherẽ, isazei'wa norĩ 're ihâimana za'ra mono zéb da hã. Ãne wa tô tãma roti pari za'ra ni: “Danhimizama hã romhâiba 'manharĩ ãma 're dawata za'ra mono da, da te 're isimroi mono nhi hã 're huri aba mono õ di za. Duré iwapru hã 're âhuri aba mono õ di za. Duré danhimizama da te 're isõ'reti za'ra mono nhi hã 're huri aba mono õ di za. Duré aihâiba na asiwi 're asipsaihuri za'ra wa'aba mono õ di za.” Ãne wa tô tãma rob'ui'éré za'ra ni.
Ãne si, wa tô aima roti za'ra wa'wa, ni'wam norĩ hã Zezusihi zazei'wa na dama 're siwasu'u za'ra mono nherẽ, 're hâimana wasété za'ra mono wamhã, ta norĩ hâimanazém na ãma 're asapa'a za'ra wa'aba mono tõ da. Ãté isazei'wa na dama 're siwasu'u za'ra mono nherẽ, te pi'õi hâiba na tiwasédé te te 're 'manharĩ za'ra, aibâ wamhã. Duré pi'õi wamhã, ãté aibâ hâiba na te tiwasédé te te 're 'manharĩ za'ra. Duré ãté 're simarĩ ahâ za'ra mono da si, te danhibrom na te te 're da'ruiwapari za'ra. Duré ãté 'Re ihâimana u'âsi mono upana, te romhâiba 'manharĩ ãma si 're wata za'ra. Duré ãté dawasédé hã taré te te da'ãma 're isa'ra mono na, te ta norĩ hã te te dama 're rowasu'u wasété za'ra. Ãté âzézei'wa te duré 're hâimana za'ra. Ãté danhibrom na te duré dawi 're sipsaihuri za'ra. Ãne hã ni'wam norĩ hã zahadu tihâimana wasété na 're hâimana u'âsi za'ra mono nherẽ, asiré isazei'wa na aima 're siwasu'u za'ra wa'aba mono wamhã, ihâimanazém na ãma 're asapa'a za'ra wa'aba mono õ di za. Duré nimahã bâtâ na isiré 're asaihuri aba mono da hã, mare di za.
Ni'wam norĩ hã te duré ãne na te te sima 're nharĩ za'ra: “Wasa hã wadub 'reb da si, te wama 're hâimana za'ra. Duré wadu hã wasai ubumrozéb da si, te wama 're hâimana za'ra. Tane, te duré wahâiba hã misi wama 're hâimana za'ra wahâiba mono bâ, uburé marĩ hã siwa'ru wa te ãma 're i'manharĩ za'ra mono zéb da hã.” Ãne te ni'wam norĩ hã 'râwi te te si'ãma 're rosa'rata wasété za'ra, tihâiba na hã. Tane nherẽ, dasa hã duré dadu hã niwapsi te za 'Re ihâimana u'âsi mono hã uprosi zahuré si'uiwa na. Dasa hã da te 're huri mono wamhã, dawasédé, da te ãma 're 'manharĩ za'ra mono õ di. Tane nherẽ aihâiba na asiwi 're asimisaihuri za'ra wa'aba mono zéb da hã, aihâiba aimawi hã aima 're hâimana za'ra wa'aba mono õ di. Wanhib'apito ma, wa te ãma 're iromhuri pese za'ra mono zéb da si, te wahâiba hã wama 're hâimana za'ra. Taha si te wahâiba hã te te wama 're ab'madâ'â pese, Wanhib'apito hã.
Tahawa, ma'ãpé, dahâiba na dawasédé, da te 're i'manharĩ za'ra mono wi, asina 're asiptete u'âsi za'ra wa'aba mono. Dawasédé aimawi hã da te 're 'manharĩ za'ra mono wamhã, ãma 're dasihâiba wasété za'ra mono õ di. Aibâ norĩ hã pi'õ na tiwasédé te te 're 'manharĩ za'ra mono wapsi, te za ãma 're sihâiba wasété za'ra. Duré, pi'õ norĩ hã aibâ na tiwasédé te te 're 'manharĩ za'ra mono wapsi, te za duré ta norĩ hã ãma 're sihâiba wasété za'ra aiwa.
Tiwasété si te te 're i'manharĩ u'âsi za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zé hã te te dame sina 're uwaimrami za'ra mono õ di za. E ãne hã, zahadu waihu'u za'ra wa'aba õ di bété. Ãne na hã taré 'râwi asima 're asadawa nhipese za'ra wa'aba mono õ di za. Dahâiba na dawasédé te te 're i'manharĩ za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zém na, dame 're hâimana za'ra mono õ di za, duré 'Re ihâimana u'âsi mono upana, romhâiba 'manharĩ ãma 're iwata za'ra mono norĩ hã, duré damro na dawi 're isimisaihuri za'ra mono norĩ hã, duré aibâ si'uiwa na si'ãma 're iwasété za'ra mono norĩ hã, duré danhibrom na dawi 're isipsaihuri za'ra mono norĩ hã, duré danhibrom na te te 're ida'ruiwapari za'ra mono norĩ hã, duré âzézei'wa 're ihâimana za'ra mono norĩ hã, duré te te da'ãma 're iwasété za'ra mono norĩ hã, duré danhibrob zô dapãrĩ'wa norĩ hã. Ta norĩ hã dasiré 're hâimana za'ra mono õ di za, 'Re ihâimana u'âsi mono, da'ãma 're isib'a'uwẽ mono zéb ãma hã.
Tane nherẽ, aibâ norĩ hã mro ãna 're hâimana za'ra mono nherẽ, pi'õ na tiwasédé te te 're i'manharĩ za'ra mono zé hã, ahâ uptabi di. Duré pi'õ norĩ hã mro ãna 're hâimana za'ra mono nherẽ, aibâ na tiwasédé te te duré 're i'manharĩ za'ra mono zé hã, ahâ uptabi di. Tahawa, aibâ norĩ hã te za tô 're mro za'ra, timro me si 're hâimana za'ra mono da. Ãne hã wẽ uptabi di, pi'õ aimawi na tiwasédé te te 're 'manharĩ za'ra mono tõ da. Duré pi'õ norĩ hã te za tô 're mro za'ra aibâ na, timro me si 're hâimana za'ra mono da, ta norĩ zama, aibâ aimawi na tiwasédé te te 're 'manharĩ za'ra mono tõ da.
Rob'ui'éré na we asiwi ĩzadanharĩ za'ra wa'aba zém na, wa za duré aima ãma roti za'ra wa'wa, waihu'u pese newa romhâiba 'manharĩ ãma 're idawata za'ra mono zéb da, dasa hã da te tãma 're isõmri za'ra mono zém na, romhâiba 'manharĩ ma hã. Ãne ma tô we ĩma asiwasu'u za'ra wa'wa, rob'ui'éré na hã: “Wa norĩ hã isazei'wa oto 're wanomro mono wa, wama waihu'u pese za'ra di, 'Re ihâimana u'âsi mono nhimiroti hã. Taha zarina, wa za marĩ hã dasiré, wa te 're 'manharĩ za'ra, wa te wasima 're iwẽ za'ra mono zéb zarina.” Ãne na ma tô we ĩma asiwasu'u za'ra wa'wa. Tane tô. Uburé wa norĩ ma hã wama waihu'u pese za'ra di tô, 'Re ihâimana u'âsi mono nhimiroti hã. Tane nherẽ, marĩ hã da te 're waihu'u pese za'ra mono wẽ te, te za 're dasi'madâ'â ze za'ra, 'râwi. Tane nherẽ, isazei'wa norĩ hã 're isisawi pese za'ra mono zéb zarina si, te za 're sipawaptob u'âsi za'ra, siptete sina siré ãma 're hâimana u'âsi za'ra mono da.
Ãma atẽme ĩwisi aba wamhã, ãté ĩpẽ'ẽzé te, wa za aiwa'õ, ai'ãma ĩpẽ'ẽzé uptabi za'ra wa'aba wa. Duréihã ai'ahâ na ma tô aiwasédé hã 're i'manharĩ za'ra wa'aba mo aré. Ma tô duré asina 're asimisaihuri za'ra wa'aba mo, pi'õ na, aibâ na zama. Asiséb ãna, ma tô duré marĩ iwasétére zô si asima 're asõpré wa'aba mo. Ãne na aiwasédé hã 're 'manharĩ za'ra wa'aba mono nherẽ, aiwasété wi 're aipizari za'ra wa'aba mono õ wa, ãté te za ĩwi tirobzei'õ pese. Tahawa, ãté ĩnhiséb di za, Ĩnhib'apito ma hã, duré 'Re ihâimana u'âsi mono ma hã, ai'u'âbâ za'ra wa'aba hã.
Dasi'uihâ na danhimirosa'rata wasété zarina 're idanomro mono zé wasu'u hã, wa tô waihu'u za'ra ni. Ãne te 're danomro wasété. Siwa'ru te tiwasédé hã pi'õ na, duré aibâ na zama te te 're 'manharĩ u'âsi za'ra. Siwa'ru te dasina 're dahâimana za'ra. Danhiséb ãna, te marĩ iwasédé hã da te 're 'manharĩ za'ra.
A norĩ wa'wa hã 'Re ihâimana u'âsi mono nhib'a'uwẽ 're anomro aba mono nherẽ, siwa'ru aiwasédé hã 're 'manharĩ za'ra wa'aba mono õ di za, pi'õ na, duré aibâ na zama. Duré aihâimana nhiséb'õ na 're anomro aba mono õ di za. Duré danhibrom na 're da'ruiwapari za'ra wa'aba mono õ di za, ta hã i'uwaibaba õ wa 're idahâimana wasété za'ra mono zé hã.
Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.
Duréihã Ezau hã tãma mrab uptabi wa, ma tô tino nhipi hã tiwi waptẽ, Zacoho wi. Tawamhã imama ma ipoto'rata zarina, uburé marĩ hã imama te te tãma ipisudu hã, duré 'Re ihâimana u'âsi mono, iwazéb zahi te te tãma ipisudu hã i'upana inoi ma 're hâimana mono da, ma tô tinoi ma ti'ru, isipi wa'rãmi Ezau hã, taha na sai õ ré. Ãne hã Ezau hã 're ihâimana wasété mono ne, te duré ni'wam norĩ hã asiré 're hâimana wasété za'ra wa'wa. Ta norĩ wi, te za 're asi'madâ'â pese za'ra wa'aba mo, sina 're isipsaihuri za'ra mono norĩ wi, 'Re ihâimana u'âsi mono hâimanazé te te 're iwazéb za'ra mono õ norĩ wi hã.
Imro ré norĩ hâimanazé hã te za 're iwazé pese za'ra wa'aba mo, 'Re ihâimana u'âsi mono ma, ta hã pire uptabi wa. Aimro si te za asima 're i'madâ'â u'âsi za'ra wa'aba mo. E marĩ wa. Ni'wam norĩ hã tihâiba na tiwasédé te te 're 'manharĩ za'ra mono wamhã, 'Re ihâimana u'âsi mono hã te za ta norĩ te te 're hâ za'ra. Duré ni'wam norĩ hã mro ré nherẽ, imro'õ hâiba na 're sipsaihuri za'ra mono wamhã, te za ta norĩ hã duré te te 're ahâ za'ra, 'Re ihâimana u'âsi mono hã.
Wahub ahâ na hã ma tô ai'ãma 're si'utõrĩ za'ra wa'wa, 'Re ihâimana u'âsi mono nhimiroti waihu'u'õ'wai hâimanazém na, 're aihâimana wasété za'ra wa'aba mono ré hã. Ma tô asisô 're irowasutu za'ra wa'aba mo aré. Âzézei'wa te aré 're anomro aba mo. Duré dato iwẽ'õre hã 're 'manharĩ za'ra wa'aba mono ré, ma tô asina 're asipsaihuri za'ra wa'aba mo aré. Duré âzézei'wa 're aihâimana za'ra wa'aba mono wa, ma tô ai'rã siwamnarĩ na 're aihâimana za'ra wa'aba mo. Duré 'Re ihâimana u'âsi mono upana, ma tô romhâiba 'manharĩ ãma 're aiwata za'ra wa'aba mo, ta hã waihu'u pese newa rob'manharĩ hã.
Tane nherẽ, te duré marĩ hã ĩwi ro'wa'ré, te ai'ãma iwaihu'u za'ra wa'wa hã. Ni'wam norĩ hã ma tô aibâ nhimiroti na 're hâimana za'ra, Balaã na aibâ nhisi hã. Ta hã ma tô duréihã Baraquihi ma te te 're roti, Izaraéu nhihudu norĩ ma, sadawa nhipese na te te 're roti wasété za'ra mono da, simiroti wẽ newa, isine 're hâimana wasété za'ra mono da. 'Re ihâimana u'âsi mono upana, romhâiba 'manharĩ ãma 're dawata za'ra mono da, danhimizama da te tãma 're isõmri za'ra mono hã, ma tô Baraqui hã te te 're a'ru, Izaraéu nhihudu norĩ ma, te te 're huri mono da. Ma tô duré te te tãma 're roti pese za'ra, pi'õ, mro ré nherẽ, aibâ aimawi na 're simisaihuri za'ra mono da, duré aibâ, mro ré nherẽ, pi'õ aimawi na 're simisaihuri za'ra mono da.
Tane nherẽ, marĩ hã misi te ĩwi ro'wa'ré, te ai'ãma iwaihu'u za'ra wa'wa hã. Pi'õ iwasédé hã te ai'rata 're hâimana za'ra wa'wa, Zézabéu na isisi hã. Ta hã 'Re ihâimana u'âsi mono zadawa 'mahârâ'wa na te dama 're siwasu'u, taré. Ãne dama 're siwasu'u mono nherẽ, te ĩzazei'wa norĩ ma, simiroti wasété na te te 're roti. Taha zarina, te ta norĩ hã pi'õ aimawi na mro ré nherẽ, ãma dawi 're simisaihuri za'ra. Duré pi'õ, mro ré nherẽ, aibâ aimawi na te ãma dawi 're simisaihuri za'ra. Duré romhâiba 'manharĩ ãma 'Re ihâimana u'âsi mono upana 're dawata za'ra mono da, danhimizama da te tãma 're isõmri za'ra mono hã te duré te te 're huri. Ta hã, pi'õ hã e niha te simiroti wasété nherẽ, ai'rata 're hâimana za'ra wa'wa. E asiwi wẽ'õ za'ra wa'aba ãna.
Tawamhã dahâiba ré idasi'atarẽme mono hã idadâ'â mono õ hã, 'râwi dasi'uihâ na 're dasisãmri za'ra mono õ di. Zahadu te wa'uburé norĩ ãma si 're dawata za'ra. Te duré zahadu ropoto hâiba 'manharĩ ãma si 're dawata za'ra, danhib'manharĩ nhipese na da te 're irob'manharĩ za'ra mono ãma, ẽtẽ waipo pré oru 'manharĩ ãma, duré ẽtẽ waipo prã prata 'manharĩ ãma, duré ẽtẽ topsada brõzi 'manharĩ ãma, duré ẽtẽ 'manharĩ ãma, duré wede 'manharĩ ãma. Zahadu da te rẽme mono õ di. Ropoto hâiba 'manharĩ hã te te rob'madâ'â õ nherẽ, duré simipari õ nherẽ, duré morĩ õ nherẽ, te zahadu ãma 're dawata za'ra, 'Re ihâimana u'âsi mono upana.
Ãne wa, ma tô Sau u hã 'maimo, te te tãma 'mairowasu'u da hã ãne: — Ma'ãpé 'madâ'â za'ra na! Izaraéu nhihudu norĩ hã ma tô tiwasédé hã 'Re ihâimana u'âsi mono wi hã 'manharĩ za'ra. Imorĩ'rata na abaze te te sima iwapru pu'u õ za'ra nhi hã ma tô siwi ti'rẽ, wapru pu'u õ nherẽ. Tahawa Sau, mreme 'rãihâ na ma tô tinha ãne: — E niha ma tô aiwasété za'ra wa'wa. Ẽtẽ tõmo wawẽ, we ĩma asiwi pizari aba mono ãwa.
ကြော်ငြာတွေ