Zezusihi zadawa wasuꞌuꞌwa norĩ nhimiromhuri na robꞌuiꞌéré 12:11 - ꞌRe Ihâimana Uꞌâsi Mono Zadawa Wasuꞌu

¹¹ Tahawa, Pedru hã ma tô 'râwi sina rosa'rata, ãne: — E niha. Te rosawẽrẽ newa. Tane nherẽ, tô sena ma tô Wanhib'apito hã we ĩtẽme satõ, hâiwa ãma tãma iromhuri'wa hã Erodihi wi, te te ĩnho'reptu da, zudeu norĩ te te sima iwẽ za'ra zéb zarina, ĩdâ'â tõ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 12:11 ပူးပေါင်းရင်းမြစ်များ

Zenezi 15:13

Tawamhã Uburé Danhib'apito te tãma tinha ãne: — Ma'ãpé waihu'u. Sena na te za asihudu norĩ tisiré a'uwẽ'õ norĩ te ti'ai wa'õtõ nho'õmo ãma 're hâimana za'ra. Tame te za pawa'âbâ ãna te te dama 're romhuri za'ra. Tahawa, te za da te tãma 're rob'manharĩ wasété za'ra, 400 wahub 'remhã.

Zenezi 18:13

Tawamhã Uburé Danhib'apito, te Abra'ã hã sadanha ãne: — E marĩ wa, te Sara hã aihâ. E marĩ da, te tinha, ihi wa, za oto i'ra waihu'u õ na hã.

Zenezi 26:9

Tahawa, Izaquihi zô hârâ wamhã, ma tô sadanha ãne: — Sena õ hã tô aimro. E marĩ da, ma tô bété aihidiba na iwasu'u. — Wa hã te rosa'rata wa ãne, ĩmro na te aima wasu'u za'ra wa'aba wamhã, asiwi ĩwĩrĩ aba õ'umnhasite. — Ãne Izaqui ma te asa ãma tãma wa'rã.

Salmu 34:22

Uburé Danhib'apito, te tinhib'a'uwẽ norĩ pẽ'ẽzani hã te te 're anho'reptu. Duré i'wawi 're isimapa za'ra mono zéb zô 're isõpré mono norĩ si, te za tinhimihâzé hã te te tãma 're aba'a.

Salmu 34:7

Hâiwa ãma Uburé Danhib'apito ma, Romhuri'wa te uburé te te 're iwazéb za'ra mono norĩ 'wawimhã 're hâimana, marĩ isimimnhasi wi, te te 're a'madâ'â mono da.

Salmu 41:2

Uburé Danhib'apito, te za i'wawib za'ra hã 're simapa. Te za hâiba ré 're ihâimana za'ra mono zé hã te te tãma 're apibui pese. Te za duré rowẽ hã te te tãma 're anhomri, daro 're ihâimana za'ra mono zéb ãma. Isitob'ru norĩ nhiptetezé ma, te te rẽme za'ra õ di za.

Daniéu 3:25

Tahawa apito te duré ãma sadanharĩ za'ra ãne: — E niha bété maparane si'uiwa na aibâ norĩ, pawasisi ãna sima iwẽ na unhama wa'wa 're inomro mono na hã wa 'madâ'â za'ra. Unhama wa'wa hâtoi ãna te sima iwẽ na i'remhã 're nomro. Misi maparane si'uiwa na ãma aibâ te te ihâiba waptob za'ra hã aiwa ihâiba'õ ne hã.

Daniéu 3:28

Tahawa, te apito hârâ 'rãihâ na tinha ãne: — Sadraqui norĩ te, 'Re ihâimana u'âsi mono ãma ma'ãpé wawata za'ra wa'aba! Ta hã ma tô tite hâiwa ãma romhuri'wa hã we satõ. Ma tô duré tinhib'a'uwẽ norĩ sõ'reptu za'ra, te te sina 're i'umnhasi za'ra mono hã. Ta norĩ hã te ĩsima iwẽ te te ĩma ãma uwaimrami za'ra õ di. Taha wa'rãmi ma tô tidâ'â za'ra zép si sima pisutu za'ra, hi'rãtitõ sisimro õ nhowa're're, duré aimawi ihâiba'õ ãma wata za'ra tõ da.

Daniéu 6:22

Ĩte 'Re ihâimana u'âsi mono, tite hâiwa ãma romhuri'wa we te te isatõrĩ hã ma tô te te siwi ĩ'u'a tõ da, sadawa nhiptob za'ra, hu'u zérépa norĩ hã. 'Re ihâimana u'âsi mono ma, wa hã marĩ iwasédé te tiwi i'manharĩ õ na hã tãma ĩwaihu'u pese wa, ma tô ãne hã ĩma 'manha. Duré niwamhã aiwi zama marĩ te aiwi 'manharĩ wasété õ di.

Luca 15:17

Tahawa, ma tô sima tinha ãne: “Ĩmama ma, romhuri'wa norĩ hã ahâ nherẽ, ma tô dasa hã 're si'azahâri. Wa hã wa ãme mra hã te 're sépata za'ẽtẽ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 12:7

Tawamhã hâiwa ãma Wanhib'apito ma, romhuri'wa hã awa'awi ma tô itẽme wi, mara wa'wa. Ãhã wamhã, mara wa'wam nherẽ, dazazéb 'remhã ma tô tirowa'a pese, 'ri 're wa'wa ãma hã. Hâiwa hawi romhuri'wa hã ma tô Pedru hã rési isisé ãma, utu da. Tawamhã te tãma tinha, ãne: — Ai'aba'ré na aiwahutu. Tahawa, ipawasisizé hã si'uihâ na ma tô tãma asisina, isi'uwazi nhorõ rudu hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 24:27

Tawamhã maparane ma tô ãma tiwahu, Sezariza ãma sãmra ré, dazazéb 're, Paulu hã. Tawamhã Posiu Festu hã te za oto si'apito, Peresihi nhowa're're. Tahawa, apito Peresi hã sisa'u ma tô tizadawa ãma tirẽ, dazazéb 're, hâimana u'âsi da Paulu hã, isa'u. Zudeu norĩ ma, rowẽzéb da, ma tô ãne hã tizadawa hã ãma tirẽ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 25:9

Tawamhã apito Festu hã ãne te sadanha, zudeu norĩ ma, imreme te te tãma ãma uwaimrami za'ra da, tãma irowẽ za'ra zéb da: — E Zeruzalẽ u aimorĩ da hã, aima wẽ di, tame da te dasiwi asadanharĩ za'ra da, ĩnho'a.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:19

Tawamhã bara na hã Wanhib'apito ma, hâiwa ãma romhuri'wa hã ma tô itẽme si'ra za'ra, te te tãma 'ridawa za'ra da. Ta hã te te tãma 'ridawa za'ra wamhã, ma tô sani za'ra, rob u. Ãne te ãhã wamhã tãma nharĩ za'ra:

Hebreu 1:14

E niha tawamhã, hâiwa ãma romhuri'wa norĩ 're ihâimana za'ra mono zé hã. Ta norĩ hã ihâiba'õ, 'Re ihâimana u'âsi mono ma, romhuri'wa norĩ. Ta norĩ si ma tô 'Re ihâimana u'âsi mono hã te te 're satõrĩ za'ra ti'ai u, za te te isõ'reptu za'ra norĩ hã te te 're pawaptob za'ra mono da, ti'ab ré. Taha na si, ta norĩ nhimiromhurizé hã te tãma 're hâimana za'ra.

2 Pedru 2:9

'Re ihâimana u'âsi mono ma, waihu'u pese di, Lo hã te te isõ'reptuzéb da hã. Tane duré, Wanhib'apito ma waihu'u pese di, ro'wa'rutu hawi te te 're i'anho'reptui mono zéb da hã, isimiroti 'madâ'â pese 'wa norĩ hã. Duré tãma waihu'u pese di, te te 're ida'ahâ za'ra mono zéb da hã, 're idanomro wasété mono norĩ hã, bâdâ iwa iwaptã'ãzéb u hã, dahâimanazém na te te ida'awaihu'uzéb da hã. Tawapsi te za dahâimanazéb zarina te te dama 're arowairébé, rob'rãsutuzéb ãma.