Zezusihi zadawa wasuꞌuꞌwa norĩ nhimiromhuri na robꞌuiꞌéré 11:28 - ꞌRe Ihâimana Uꞌâsi Mono Zadawa Wasuꞌu

²⁸ Agabu na aibâ nhisi hã te ime timorĩ za'ra, tisiré isadawa wasu'u'wa norĩ me. Tawamhã Ãtioquia u sihutu wamhã, Agabu hã ma tô hâiwi za. 'Re ihâimana u'âsi mono pẽ'ẽzani te te tãma iwaihu'uzéb zarina, ma tô dama waihu'u siro romhâ ré, amnho hã daro mono bâ za dawi isi'utõrĩ mono na hã. (Roma ãma danhib'apito Claudiu hã te te dama 're roti mono ré, ma tô ãne hã tô da'ãma tiromhâiba, amnho õ na hã.)

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:28 ပူးပေါင်းရင်းမြစ်များ

Zenezi 41:38

Tahawa te apito, tite romhuri'wa norĩ ma nharĩ za'ra ãne: — Ni'wa hã wa te wasiwi sãmri õ di, aibâ Zuzéhé ne hã, 'Re ihâimana u'âsi mono pẽ'ẽzani ré 're ihâimana mono hã, wate ti'ai wa'õtõ nho'õmo 're, dama isi'rãnho'õmo da hã.

Mateu 24:14

'Re ihâimana u'âsi mono, da'ãma 're isib'a'uwẽ mono zé wasu'u hã iwẽ uptabi hã, ĩzazei'wa norĩ hã te za daro mono bâ te te dama 're wasu'u za'ra, daro mono bâ da te oto 're wapari za'ra mono da, da te ãma 're isaze za'ra mono zéb da hã. Tame te za oto tirob'rãsutu.

Mateu 24:7

Danhipti'ai amoi u te za dasisô 're dapra, 're dasi'wapé za'ra mono da. Tawamhã daro mono bâ te za tô 're dasiwasutu za'ra. Nima niwĩmhã danho õ wa, te za duré da te 're robzépata za'ra, dasa surure wa. Nima niwĩm norĩ ré hã te za duré ti'a hã iré 're popo'o za'ra.

Luca 2:1

Tawamhã Zuwã hã waptã'ã wamhã, ma tô Roma ãma danhib'apito Agustu hã dama ti'ru, uburé danhisi na, da te daza'rata za'ra da. Dahâiba te te waihu'u da, ma tô dama ti'ru, daza'ratazé hã. Daza'rui mono bâ danhib'apito uptabi, apito Agustu hã. Tawamhã ma tô dahâiba za'rata na sãna'rata za'ra ni, Sireniu hã, isadawa para te te dama 're roti mono ré, Siria na ti'a nhisi ãma.

Luca 3:1

Tawamhã 15 na ma tô ãma tiwahu, Tibériuhu ãma, danhib'apito na 're hâimana mono ré, Roma ãma hã. Isadawa para, te Põsiu Pilatu hã te te dama 're roti, Zudéa ãma. Duré Erodi hã te te dama 're roti isadawa para, Galiléa ãma. Duré Erodihi no hã Filipi hã te te dama 're roti, isadawa para, Itureza na danhipti'a nho'õmo nhisi ãma, duré Taraconiti na danhipti'a nho'õmo nhisi ãma. Duré Risãniza hã te te dama 're roti, isadawa para, Abireni na danhipti'a nho'õmo nhisi ãma.

Zezusihi zadawa wasuꞌuꞌwa norĩ nhimiromhuri na robꞌuiꞌéré 18:2

Tawamhã Corĩtu u wisi wamhã, ma tô zudeu norĩ siré hã aibâ hã sõpẽtẽ, mro ré. Aquira na aibâ nhisi hã. Põtu na danhipti'a nho'õmo nhisi ãma iwaptã'ãzé, ta hã. Roma na 'ri nho'õmo nhisi hawi ma tô iwana aimasisi zahuré, timro me, Italia na danhipti'a nho'õmo nhisi hawi. Pi'õ nhisi hã Prisila na. Claudiu na danhib'apito uptabi nhisi hã ma tô zudeu norĩ hã satõrĩ za'ra, Roma hawi, isiti si'aba'ré da. Tahawa, ma tô Corĩtu u aimasisi zahuré, Aquira norĩ hã. Ta norĩ hã te te sabu zahuré da, ma tô itẽme timorĩ zahuré, Paulu hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:10

Tame tawamhã ma tô bâdâ hã nasi wa'ãma si'utõrĩ za'ra. Tawamhã aibâ hã ma tô watẽme tiwisi za'ra, Zudéa na danhipti'a nho'õmo nhisi hawi. Aibâ hã 'Re ihâimana u'âsi mono zadawa 'mahârâ'wa, Agabu na isisi hã.