2 Timotiu 4:5 - ꞌRe Ihâimana Uꞌâsi Mono Zadawa Wasuꞌu

⁵ Ta norĩ ne 're aihâimana mono õ di za. Asimiza'rese te za 're aihâimana mo. Te za duré aihâimanazém na ãma 're ipibui pese mo. Duré, Wanhib'apito zazei'wa 're aimorĩ 'ru te, da te dasiwi aima 're rob'manharĩ wasété mono nherẽ, 're asisawi mono õ di za, 're robzépata mono tõ da. Te za duré Wanhib'apito wasu'uwẽ na 're ida'apo're pu'u u'âsi mo, 'Re ihâimana u'âsi mono te te aima ipisutuzéb zarina, asimiromhuri na tãma ãma 're uwaimrami mono da.

2 Timotiu 4:5 ပူးပေါင်းရင်းမြစ်များ

Mateu 25:16

Tawamhã tãma iromhuri'wa hã, 5 miu na rob'uiprazé isapotore te te i'âri ma hã õne haré ma tô tãma sina hâ, te te ãma iromhuri wẽ zéb zarina. Tawamhã 5 miu na nherẽ, ma tô duré 5 miu na tãma ihâimana amo na oto ãma ato, isib'apito te te tãma isõmri na. Uburé hã oto tawamhã 10 miu na, rob'uiprazé isapotore hâiba hã, ãma sito wamhã.

Marcu 13:34

Romnhimiré'é na, wa za marĩ hã aima waihu'u siromo za'ra wa'wa. Ãté aibâ hã te za tinhorõwa hawi watobro, romhâ na 're morĩ da. Tawamhã sisõ'a ré, tãma iromhuri'wa norĩ ma, te za romhuri hã te te tãma pisutu. Duré 'ridawa 'madâ'â'wai ma zama te za roti, te te sô 're rob'madâ'â pese mono da.

Marcu 13:37

Ãne hã aima si, te waihu'u za'ra wa'aba õ di. Uburé ĩzazei'wa norĩ udâna zama, wa aima waihu'u siromo za'ra wa'wa, asimiza'rese, ĩzô 're asimipari za'ra wa'aba mono da.

Luca 12:37

Tãma iromhuri'wa norĩ hã sõtõ ãna, sô simipari za'ra wamhã, tãma rowẽ za'ra di za. Tawamhã ãté mara wa'wa, te za apâ wi, isib'apito za'ra hã. Ãté si'a hârâ wi, te za apâ wi. Hâimana nhimiza'rese sina, sô 're simipari za'ra mono ré, apâ wisi wamhã, tãma rowẽ za'ra di za, tãma iromhuri'wa norĩ ma hã. Tawamhã apito nherẽ, sai õ ré, te za a'â ti'uza na ãma saprĩ, isa te te tãma sõmri mono da, tãma iromhuri'wa norĩ ma. Te za duré tãma nharĩ za'ra, tisai ma, si'ubumro da. Taha pari, te za duré tãma sõmri za'ra, isa hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:8

Tawamhã awẽm na si, wa tô ai'aba'ré ni, Sézaréa u. Tame wa tô asimro ni, Filipihi nhorõwa ãma. Filipi hã Zezusihi wasu'uwẽ na isazei'õ'wa norĩ ma rowasu'u'wa. 7 na isazei'wa norĩ pawapto'wa da, da te ipisutu za'ra norĩ me, aré 're ihâimana mono, Zeruzalẽ ãma.

Roma 15:19

'Re ihâimana u'âsi mono pẽ'ẽzani hã tiwaihu'u pese na te te 're ĩpawapto mono zém na si, wa tô marĩ dama i'manharĩ waihu'u'õ hã te dama 're ab'manharĩ, zudeu'õ norĩ hã tô sena te te 're saze za'ra mono da, ta norĩ hã. Zeruzalẽ hawi, Iliriza u 're ĩmorĩ ré, wa tô daza'rui mono bâ te dama 're rowasu'u, Cristuhu wasu'uwẽ na hã.

Éfézu 4:11

Cristu hã ma tô ni'wam norĩ hã pisutu za'ra, isadawa wasu'u'wa 're nomro mono da. Ni'wam norĩ ma, ma tô duré pisutu za'ra, marĩ te te tãma iwaihu'u za'ra zéb zarina, 'Re ihâimana u'âsi mono te te 're sadawa wasu'u za'ra mono da, isazei'wa norĩ ma. Duré ni'wam norĩ hã ma tô pisutu za'ra, iwasu'uwẽ na te te 're dapo're pu'u za'ra mono da. Duré ni'wam norĩ hã ma tô pisutu za'ra, dama rowahutu'wa da, isimiroti na te te 're dapawaptob za'ra mono da, ãma 're dahâimana wẽ za'ra mono da.

Éfézu 4:12

Ãne ma tô Cristu hã da'apisutu, 'Re ihâimana u'âsi mono nhib'a'uwẽ norĩ te te 're pawaptob za'ra mono da, taha zarina 're sipawapto pese za'ra mono wa, siptete sina duré oto 're hâimana za'ra mono da.

Colosu 1:25

'Re ihâimana u'âsi mono hã ma tô ĩpisutu, isib'a'uwẽ norĩ te tãma 're apawapto mono da. Ai'udâna za'ra wa'aba te 're romhuri mono da, ma tô romhuri hã ĩma tisõ, uburé isadawa wasu'uwẽ na te aima 're rowasu'u za'ra wa'aba mono da.

Colosu 4:17

Arquipuhu ma, ma'ãpé ãne hã 'maiwaihu'u aba za: “'Re ihâimana u'âsi mono, romhuri te te aima ipisudu hã 'mairẽme õ di za. Uburé te za tãma ãma i'a'uwaimrami mo.” Ãne hã te za tãma i'maiwaihu'u 'wa, Arquipuhu ma hã.

1 Tesalonita 5:6

Tahawa, 're idanhotõ za'ra mono ne, wanhimiza'rese ãna 're wahâimana za'ra mono tõ da, wa za sô 're wanhopré u'âsi.

1 Timotiu 4:12

Aihâiba prédu pese õ nherẽ, te za 're aimorĩ wẽ, aihâiba prédu pese õ wa, asimiroti na isazei'wa norĩ hã te te 're aiwẽ'õ za'ra mono tõ da. Te za dama 're asanho mo, aimreme wẽ na, duré dama aihâimana wẽ na, duré asimizawi pese na, duré asimirosa'rata wẽ na. Taha na, te za dama 're asanho u'âsi mo, asirã zarina 're nomro wẽ mono da, isazei'wa norĩ hã.

1 Timotiu 4:15

Uburé te aima i'awaihu'u mono zéb zarina, te za asina 're i'madâ'â u'âsi mo. Õhõ si te za asima 're ipisutu pese mo, asina 're i'uwaimrami mono zéb da si. Ãne wamhã, dapawaptom na rowaihu hã asima ãma 're isa'ẽtẽ mono na te za da te ai'ãma 're waihu'u za'ra.

2 Timotiu 1:8

Ãne wamhã, 're asisé mono õ di za, Wanhib'apito wasu'uwẽ hã dama 're wasu'u tõ mono da hã. Duré 're asisé mono õ di za, ĩwasu'u na. Wanhib'apito wasu'uwẽ na te dama 're rowasu'u mono 'ru te, ma tô dasiwi ĩnherẽ ni, dazazéb 're. Tahawa, wa oto te 're robzépata. Ãne wa, ma'ãpé 'Re ihâimana u'âsi mono hã tinhiptede te te aima isõmri na, sada 're asiptete mono, ĩsine 're robzépata mono da.

2 Timotiu 2:10

Te irobzépata da hã ĩma pire nherẽ, ĩsisawi õ di, te robzépata tõ da hã. Te 're robzépata mono nherẽ, 'Re ihâimana u'âsi mono hã tinhib'a'uwẽ da, te te sima ipisutu za'ra norĩ hã wa za te 're apawaptob u'âsi, Cristu Zezusi hã te te 're saze za'ra mono da, taha zarina tinho'reptuzé hã te te sina 're uwaimrami za'ra mono da, rowẽ na i'rata 're hâimana u'âsi za'ra mono da.

2 Timotiu 2:3

Da'wapéi'wa dama i'umnha dasi'wapéi 're, dame 're hâimana mono wamhã, te te 're robzépata tõ mono da hã, 're sisawi mono õ di za. Tane a hã, Cristu Zezusihi nhib'a'uwẽ na 're aihâimana mono wa, te za asina 're isazei u'âsi mo, asisawi ãna ĩsine 're robzépata mono da.

2 Timotiu 4:17

Da te ĩrẽme za'ra nherẽ, ma tô Wanhib'apito hã ĩ'rata tihâiba, te te ĩnhiptete da, 'ri para zudeu'õ norĩ ma, te rowasu'u da, Wanhib'apito wasu'uwẽ na. Ãhã wamhã, ma tô Wanhib'apito hã ĩnho'reptu, ĩdâ'â tõ da a'â.

Hebreu 13:17

Asiré isazei'wa 'madâ'â'wa norĩ nhimiroti hã te za 're iwapari pese za'ra wa'aba mo. Te te aima 're iroti za'ra wa'aba mono zéb zarina, te za marĩ hã 're i'manharĩ za'ra wa'aba mo. Ta norĩ hã niwapsi te za 'Re ihâimana u'âsi mono ma siwasu'u za'ra, te te ai'ãma 're iromhuri za'ra wa'aba mono zém na hã. Tahawa, te ta norĩ hã ai'ãma 're hâtâ'â u'âsi za'ra wa'wa, te te 're i'ai'madâ'â za'ra wa'aba mono zém na hã, Cristuhu zazei'wa 're ihâimana za'ra mono zém na si 're anomro aba mono da. Ta norĩ nhimiroti hã 're wapari pese za'ra wa'aba mono wamhã, to sina te za tô ta norĩ hã te te ai'ãma 're romhuri za'ra wa'wa. Tane nherẽ, 're wapari za'ra wa'aba mono õ wamhã, robzei ãna te za te te 're romhuri za'ra. Ãne wamhã, te te 're aipawapto waihu'u za'ra wa'aba mono õ di za, ta norĩ hã.

1 Pedru 1:13

Zezu Cristu hã nimahã na te za wei mo apâ. Tahawa, te za aihâimana nhimiza'rese 're aihâimana za'ra wa'aba mo. Aihâiba na te za 'râwi 're asi'madâ'â za'ra wa'aba mo. Zezu Cristu hã apâ wei morĩ wapsi, te za aima 're irowẽ za'ra wa'aba mono zé hã aima pisutu za'ra wa'wa, hâiwa ãma. Taha zô si te za asina 're asimipari u'âsi za'ra wa'aba mo.

Apocalipsi 3:2

Ĩ'ãma 're anomro zei wa'aba mono da, Ĩnhib'apito 'Re ihâimana u'âsi mono te te aima ipisutu za'ra wa'aba zéb zarina, ĩ'ãma 're anomro aba mono õ di. Tahawa, ma'ãpé ãma asipo're pu'u za'ra wa'aba. Marĩ hã 're i'manharĩ wẽ za'ra wa'aba mono zé hã, aiwi si'utõrĩ pese za'ra aba õ ré, ma'ãpé apâ ĩ'ãma romhuri wẽ zé hã asiwi sa'ẽtẽ aba.