2 Timotiu 4:1 - ꞌRe Ihâimana Uꞌâsi Mono Zadawa Wasuꞌu

^1-2 Wa za oto marĩ hã aima waihu'u, 'Re ihâimana u'âsi mono nho'a, Cristu Zezusihi nho'a zama. Nimahã bâtâ na te za Cristu Zezusi hã dahâimanazém na da'awaihu'u, dawasété na, dawẽ na zama. Taha zarina, te za aihĩni norĩ ma dama arowairébé, dahâiba ré norĩ ma, duré adâ'â norĩ ma zama. Wanhib'apito hã te za wei mo apâ, Danhib'apito uptabi na oto dama 're sãmra mono da. Ãne wa, wa za aima ti'ru. Ma'ãpé, Wanhib'apito wasu'uwẽ na dama 're rowasu'u u'âsi mono za. Asô danhimiparizém na, duré asô danhimipari õ zém na zama, te za Wanhib'apito wasu'uwẽ na 're ida'apo're pu'u u'âsi mo. Da'ãma aiwa'a ãna, te za asimiroti na 're ida'apawapto mo, dawasété na 'râwi 're dasisãmri za'ra mono da, dawasédé hã da te 're rẽme pese za'ra mono da, dawẽ na si oto 're dahâimana za'ra mono da.

2 Timotiu 4:1 ပူးပေါင်းရင်းမြစ်များ

Mateu 16:27

Ti'ai ãma Dasiré Ipodo, niwapsi te za wei mo apâ, Timama zadawa para, hâiwa ãma tãma iromhuri'wa norĩ siré. Tamep si uburé marĩ hã da te 're i'manharĩ za'ra mono zéb zarina, te za dama hã arowairébé, iwẽ norĩ ma, duré iwasété norĩ ma.

Luca 19:12

Tahawa, te ãma simiré'é Zezusi hã, ãne: — Aibâ hã dama ipire hã darob amoi u ma tô mo, tinhib'apito hã te te sabu da. Isib'apito hã te za pisutu, apito na dama 're hâimana mono da, irob ãma. Taha da, te za mo, si'apito da. Taha parip si, te za wei mo apâ, tirob u.

Luca 19:15

— Tane nherẽ, ma tô aibâ hã isib'apito hã pisutu, dama si'apito da. Tahawa, ma tô wi apâ, tirob u. Wisi wi, ma tô sitẽme sô tihârâ za'ra, tãma iromhuri'wa norĩ zô hã, niha ãma isitob za'ra zé, te te waihu'u da.

Luca 23:42

Tahawa, te Zezusihi ma tinha, ãne: — Zezusi, ĩ'ãma aipo're pu'u za, Danhib'apito na apâ we aimorĩ wamhã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:42

Tahawa, ma tô wama pisutu za'ra, iwasu'uwẽ na wa te dama 're rowasu'u za'ra mono da. Ma tô duré wapisutu za'ra, Zezusi hã 'Re ihâimana u'âsi mono te te ipisutu na, wa te dama 're wasu'u u'âsi za'ra mono da, da'ãma rowairébé'wa da hã. Tawamhã dahâiba ré 're idahâimana za'ra mono norĩ ma, te za te te dama 're arowairébé, duré 're idadâ'â za'ra mono norĩ ma zama.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:31

Bâdâ hã ma tô sima pisutu siro, romhâ ré, danho'a te te dama i'arowairébézéb da hã. Tahawa, te ãne dama roti, 're dasipizari za'ra mono da. Ni'wa hã ma tô pisutu, sena na da'ãma rowairébé'wa da hã. Dâ'â uptabi nherẽ, apâ te te ihâiwa'udu, ma tô pisutu, 'Re ihâimana u'âsi mono hã. Apâ te te ihâiwa'utuzéb zarina, ma tô ãne hã dama waihu'u za'ra, õ hã da'ãma rowairébé'wa na hã.

Roma 2:16

Ãne hã iwasu'uwẽ na te dama 're irowasu'u mono zéb zarina, te za tô nimahã na tiromhâiba, 'Re ihâimana u'âsi mono nhimipisutuzéb zarina, Zezu Cristu hã da'ãma isipo'ozéb da hã. 'Râwi dasima si da te 're irosa'rata za'ra mono na te za oto da'awaihu'u. Taha zarina te za dama arowairébé oto, Cristu hã.

Colosu 3:4

Cristuhu ãma si tô sena 're wahâimana za'ra mono wamhã, taha na si ãma 're iwanomro mono zép té, te wama wasu'u za'ra. Ta hã nimahã na tinhimirowa'a na ti'ai u apâ wei morĩ wamhã, a norĩ wa'wa hã te za duré danho'a isiré aihâimana za'ra wa'wa, isine aiwẽ uptabi na 're aihâimana za'ra wa'aba mono na, da te oto ãma 're i'aiwaihu'u za'ra wa'aba mono zéb da hã.

2 Tesalonita 2:8

Tawamhã iwasété uptabi hã te za we sihâi'ré oto, danho'a te te romhuri da. Tane nherẽ, Wanhib'apito Zezusi hã wei morĩ wamhã, tizadawa wa'u'u na te za tiwĩ. Rowa'a za'ẽtẽ ré wei wisi wamhã, taha wamhã iwasété uptabi hã tâibâ za oto.

1 Timotiu 5:21

Da'madâ'â'wa hã aima sawi uptabi nherẽ, te za danho'a tãma iroti, tiwasété na te te ãma sahu tõ da. Asimiroti na 're da'mairẽme mono õ di za. 'Re ihâimana u'âsi mono hã te we te te 're wa'ab'madâ'â, Cristu Zezusihi me. Hâiwa ãma romhuri'wa, 'Re ihâimana u'âsi mono te te ipisutu za'ra norĩ zama, te duré te te we 're wa'madâ'â za'ra. Tahawa, ta norĩ nho'a 're wanomro mono wa, da'madâ'â'wa norĩ ãma te aima iroti mono zé hã te za 're i'madâ'â pese mo.

2 Timotiu 1:10

Wanho'reptui'wa Cristu Zezusi we datẽme iwisizém na, ma tô oto wama sihâi'ré za'ra, tinhimipawaptobzém na. 'Re idadâ'â za'ra mono zé hã, siptete nherẽ, ma tô wama uprosi za'ra. Duré Wanho'reptui'wai wasu'uwẽ hã wa te 're isaze za'ra mono zéb zarina, ma tô wama waihu'u za'ra, rowẽ na 're idahâimana u'âsi za'ra mono zé wasu'u na hã.

2 Timotiu 2:14

Ãhã wasu'u na te za asimi'madâ'â norĩ hã ãma 're ipo're pu'u za'ra mo. Te za duré aihâimana prédup sina tãma 're i'aroti mo, 'Re ihâimana u'âsi mono nho'a 're wahâimana za'ra mono nherẽ, taré marĩ wasu'u na 're sisada'âbâ za'ra mono tõ da. Dasisada'âbâzé hã wẽ õ wa, taha zarina 're dahâimana za'ra mono wamhã, te za dawi 're si'utõrĩ za'ra, dahâimana wẽ zé hã.

2 Timotiu 4:18

Tane te za Wanhib'apito hã duré rowasété hawi ĩnho'reptu, hâiwa u te te ĩ'ãwisi wẽ da, tinhib'a'uwẽ norĩ te te 're i'ab'madâ'â mono zéb u hã. Ta hã si wẽ uptabi wa, aihĩni wa za ãma 're wawata u'âsi za'ra.

Titu 2:13

Ãne wa za 're wanomro, Wa'anho'reptui'wa zô wanhimipari sina. Wa za rowẽ u'âsi 're wahâimana za'ra, wasina 're wanhimipari za'ra mono sina. Rowa'a za'ẽtẽ ré, apâ wei morĩ wapsi, wa za watõmo na 'madâ'â za'ra ni, danhipai u 're ihâimana mono hã, Wanhib'apito Zezu Cristu hã.

1 Pedru 1:7

Wanhib'apito umnhasi sina 're aihâimana za'ra wa'aba mono zô, te za rowasédé hã asada 're hâimana za'ra wa'wa. Wanhib'apito Zezu Cristuhu ma, wẽ di, Wanhib'apito umnhasi sina 're i'aihâimana za'ra wa'aba mono zé hã. Ẽtẽ waipo pré oru hã dama isawi pese zém nhipai u, tãma wẽ di. Ẽtẽ waipo pré oru hã wa'âbâ za'ẽtẽ wa, dama sawi pese di, ta hã dama 're hâimana u'âsi mono dai õ nherẽ. Zata õ zô, te za unhama wa hiri ni, zata õ wa, da te iwaihu'uzéb da hã, oru uptabi na. Tane, a norĩ wa'wa hã rowasédé hã asada 're hâimana za'ra wa'aba mono nherẽ, Wanhib'apito umnhasi sina 're aihâimana u'âsi za'ra wa'aba mono wamhã, apâ wei morĩ wapsi, te za danho'a ai'ãma tiwata za'ra wa'wa, õhõ umnhasi sina ãma 're i'aihâimana u'âsi za'ra wa'aba mono zém na. Tame te za duré marĩ hã iwẽ hã aima sõmri za'ra wa'wa. Rowẽ uptabi hã te za duré aima pisutu za'ra wa'wa. Tawapsi, aima 're rowẽ uptabi za'ra wa'aba mono di za oto.

1 Pedru 4:5

Tane nherẽ, nimahã na ta norĩ hã 're ihâimana wasété za'ra mono zém na te te iwaihu'u za'ra zéb zarina, te za ta norĩ ma arowairébé, 'Re ihâimana u'âsi mono hã. Te te ida'awaihu'uzéb zarina, te za romhutu na uburé norĩ ma rowairébé, ihâiba ré norĩ ma, duré 're idâ'â za'ra mono norĩ ma zama.

1 Pedru 5:4

Tawamhã Da'madâ'â'wai uptabi hã apâ wei morĩ wapsi, tãma 're idapawapto wẽ za'ra wa'aba mono zé wa'rãmi, te za oto aima wa'âbâ za'ra wa'wa, iwẽ uptabi na, si'utõrĩ'õ na oto aima 're hâimana u'âsi za'ra wa'aba mono da.

2 Pedru 1:11

Taha zarina, te za 'Re ihâimana u'âsi mono hã to sina te te 're ai'a'mazasi 'wa hâiwa u, Wanho'reptui'wa, Wanhib'apito Zezu Cristuhu u, Danhib'apito uptabi na dama 're ihâimana u'âsi mono u.

2 Pedru 1:17

I'rata wa tô aimasam ni, Imama ãma wata wamhã, 'Re ihâimana u'âsi mono hã. Hâiwa hawi te we tãma tinha, rowẽ uptabi hawi, ãne: “Ã hã ĩ'ra, te 're isawi pese mono, tãma 're ĩto za'ẽtẽ mono.” Ãne te we tãma tinha. Wa norĩ hã wa tô ãne na hã wapari za'ra ni, 'Re ihâimana u'âsi mono hâiwa hawi we te te tãma inharĩ na, ẽtẽ 'rãihâ iwazéb zahi ãma, Wanhib'apito Zezusihi 'rata wasimasab ré.

1 Zuwã 2:28

Ĩ'ra norĩ, ãne wa za oto aima roti za'ra wa'wa. Zezusi hã apâ wei morĩ õ ré, ma'ãpé õhõ ãma si 're anomro u'âsi aba mono, niwa apâ za wei morĩ wa, tãma aipahi za'ra wa'aba tõ da, duré rowazép te, tãma ai'rãpo za'ra wa'aba tõ da.

Apocalipsi 1:7

Ma'ãpé, asiwi waihu'u pese za'ra wa'aba. Zezusi hã te za wei mo, hâiwa'a na. Wei morĩ wamhã, uburé te za dasiwi 'madâ'â za'ra ni. I'a're wi, siwi iwa'ré'wa norĩ hã te za duré 'madâ'â za'ra, siwi iwĩrĩ'wa norĩ hã. Tawamhã da'upsãtã mono bâ te za sô aiwa'õ za'ra ni, daro mono bâ. Tô sena te za ãne hã tiromhâiba.