2 Timotiu 3:8 - ꞌRe Ihâimana Uꞌâsi Mono Zadawa Wasuꞌu

⁸ Duréihã ma tô aibâ norĩ hã Mozésihi nhimiroti da, sada 're hâimana zahuré, Zanesi norĩ hã Zãbri me. Tane ãhã na senai'õ na rowasu'u'wa norĩ hã te tô sena roti zada 're hâimana za'ra. Ta norĩ nhimirosa'rata wẽ za'ra hã hâimana õ di. Duré Wanhib'apito ãma isimirowasu'u za'ra hã tô senai õ di. Tahawa, te za 'Re ihâimana u'âsi mono hã ta norĩ hã te te siwi 're awẽ'õ.

2 Timotiu 3:8 ပူးပေါင်းရင်းမြစ်များ

Ezodu 7:11

Tawamhã apito, rowaihu'u pese 'wa norĩ zô duré romhõsi'wa norĩ zô zama ma tô sô tihârâ za'ra, tô isine marĩ hã te te tãma 'manharĩ za'ra da.

Ezodu 7:22

Tawamhã Ezitu ãma marĩ 'manharĩ waihu'u nhipese'wa norĩ hã ma tô õne hã duré siwi 'manha. Tahawa apito Fara'o pẽ'ẽ tete na hã ma tô duré a'â tihâiba. Uburé Danhib'apito te te inharĩzéb zarina, Mozési norĩ Arãhã me, te te tiwi irowaptẽrẽ zahuré zé hã te te wapari õ di.

Ezodu 8:18

Tawamhã marĩ 'manharĩ waihu'u nhipese'wa norĩ, ma tô aré da'u na asa te te rob'manharĩ za'ra da hã siwi pibu. Tane nherẽ, te te oto tawamhã siwi ãma uwaimrami õ di, tinhimiromhõsi na hã. Tawamhã te zahadu a'uwẽ norĩ hã, duré danhimizama norĩ hã, da'u te te isuwa za'ra na hã tihâimana za'ra.

Ezodu 8:7

Tane nherẽ, marĩ 'manharĩ waihu'u nhipese'wa norĩ, tô õne tinhimiromhõ hã ma tô siwi 'manha, Ezitu ti'ai u uti zarãpré iwairébé da hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:24

Wa norĩ hã wa tô romreme hã wapari za'ra ni. Aibâ norĩ hã, aré wasiré 're isi'ubumroi mono hã ma tô, u, ãma ai'aba'ré, atẽme za'ra wa'aba, wazadawa para õ nherẽ. Si'uihâ na ma te u, tinhimirowasu'u na aiwi ro'wa'rutu za'ra wa'wa. Ma duré asimirosa'rada hã aiwi 'wa'rutu za'ra wa'wa.

Roma 1:28

Dapo're'õ na 're idanomro mono norĩ hã, 'Re ihâimana u'âsi mono nhimiroti tô sena hã te te siwi 're wẽ'õ pese za'ra mono wa, te za 'Re ihâimana u'âsi mono hã te te 're arẽme, si'uihâ na te te sima 're irosa'rata wasété za'ra mono zéb uwaibaba si, tiwasédé hã te te 're 'manharĩ u'âsi za'ra mono da.

Roma 16:18

Ta norĩ hã Wanhib'apito Cristuhu ma, te te 're romhuri za'ra mono õ di. Te te sima 're iwẽ za'ra mono zéb zarina si, te marĩ iwasétére zô si hã sima 're sõpré. Ta norĩ hã sadawa nhipese nherẽ, te isimiroti hã sena newa da te 're wapari ze za'ra, danhimirosa'rata nhib'uware na 're idahâimana za'ra mono norĩ hã. Mreme wapari zei wa, duré asa imreme hã da te dasima 're wẽ za'ra mono da, te taré timreme amo na te te dama 're rowasu'u za'ra, da'ãma 're wata za'ra mono sina. Tawamhã taha zarina, te za awa'awi imreme na da te 're saze za'ra.

Éfézu 4:14

Ãne wamhã, ai'uté ne wanhimiza'rese ãna 're wanomro mono õ di za oto. Tawamhã dazadawa nhipese na da te wama 're roti za'ra mono nherẽ, roti tô senai'õ hã wa te 're wapari za'ra mono õ wa, roti tô senai'õ niwĩ 're wasipizari za'ra mono õ di za.

1 Timotiu 4:2

Wa'uburé nhimiroti hã te za te te datẽme 're ropé, aibâ norĩ zadawa hawi. Aibâ norĩ hã roti tô sena na te te dama 're rowasu'u za'ra mono newa, te sadawa nhipese na te te dama 're rowasu'u za'ra. Tane nherẽ, ta norĩ hã 'râwi 're siwaihu'u za'ra mono õ di, tizadawa nhipese na hã.

2 Timotiu 4:15

Taha aibâ hã ma tô wanhimirowasu'u na hã wazada tihâiba, sahi sina. Ma'ãpé tiwi 're asi'madâ'â pese mono za.

Titu 1:10

Ãhã na te aibâ norĩ hã ahâ na 're hâimana za'ra, isazei'wa nherẽ, Wanhib'apito nhimiroti na te te 're iwawapari za'ra mono õ norĩ hã. Ta norĩ nhimirowasu'u hã dama i'uwaibaba õ di. Tizadawa nhipese na te ta norĩ hã te te dama 're rob'rãmi za'ra. Ãne te 're dahâimana za'ra da'ahâ na, zudeu na 're idapoto za'ra mono hã.

Titu 1:16

Ta norĩ hã te 're siwasu'u za'ra, 'Re ihâimana u'âsi mono te te iwaihu'u za'ra na. Tane nherẽ, 're nomro wasété mono wa, tô senai õ di, 're isiwasu'u za'ra mono zé hã. Te te 're ida'ruiwapari za'ra mono zép si, te tãma 're hâimana za'ra. Te duré po're'õ u'âsi hã 're nomro. Marĩ iwẽ hã te te 're 'manharĩ waihu'u za'ra mono õ di, duré ta norĩ hã.

2 Pedru 2:14

Senai'õ na rowasu'u'wa norĩ hã te pi'õ iwasété norĩ zô te te 're rob'madâ'â u'âsi za'ra. Ta norĩ ma hã wẽ za'ra di, tiwasédé hã te te ãma 're i'manharĩ u'âsi za'ra mono zéb da hã. Hâimana nhipese na te ta norĩ hã 're nomro, da te ãma 're sasõmri za'ra mono da. Tawamhã ni'wam norĩ hã siptete sina Wanhib'apito ãma 're nomro mono õ wamhã, te za ta norĩ ãma te te 're sasõmri za'ra. Duré senai'õ na rowasu'u'wa norĩ hã te tinhimarĩ wẽ zô si, te te sima 're rob'ruiwapari u'âsi za'ra. Tahawa, ta norĩ hã tãma wẽ õ di, 'Re ihâimana u'âsi mono ma hã.

1 Zuwã 2:18

Ĩ'ra norĩ, ĩma asawi pese za'ra wa'aba norĩ, ropsi'utõrĩzéb u hã romhuture di oto. Tame te za oto aibâ iwasédé hã dama sihâi'ré sõ'awi, Cristuhu zada 're ihâimana mono hã. Cristuhu newa te za isimiroti hã da te 're wapari za'ra. Taha wasu'u hã ma tô 're iwapari u'âsi za'ra wa'aba mo. Tane nherẽ, te duré ãhã na wanho'a 're hâimana za'ra ahâ uptabi na, za Cristuhu zada 're ihâimana mono ne. Tahawa, wama waihu'u pese za'ra di oto, ropsi'utõrĩzéb u iromhuture na hã.

1 Zuwã 4:1

Ĩsisãnawã norĩ, ĩma asawi pese za'ra wa'aba norĩ hã, ãté ni'wam norĩ hã te za ãne aima 're siwasu'u za'ra wa'wa: “'Re ihâimana u'âsi mono ma tô Tipẽ'ẽzani hã te te wama 're anhomri. Ipẽ'ẽzani te te wama 're i'awaihu'u mono zéb zarina si, wa tô wa te dama 're sadawa wasu'u za'ra.” Ãne ni'wam norĩ hã aima 're siwasu'u za'ra wa'aba mono nherẽ, isimirowasu'u na 're saze su'u za'ra wa'aba mono õ di za, a'â. Ãhã na hã 'Re ihâimana u'âsi mono zadawa wasu'u uptabi 'wa newa, roti tô senai'õ na te te dama 're iroti za'ra mono norĩ hã ahâ uptabi na te oto 're hâimana za'ra. Daro mono bâ te dawazari 're hâimana za'ra. Tahawa, te za uburé roti hã tô sena zô 're ipibui u'âsi za'ra wa'aba mo, 'Re ihâimana u'âsi mono pẽ'ẽzani hawib zô si.

Apocalipsi 2:20

Tane nherẽ, marĩ hã misi te ĩwi ro'wa'ré, te ai'ãma iwaihu'u za'ra wa'wa hã. Pi'õ iwasédé hã te ai'rata 're hâimana za'ra wa'wa, Zézabéu na isisi hã. Ta hã 'Re ihâimana u'âsi mono zadawa 'mahârâ'wa na te dama 're siwasu'u, taré. Ãne dama 're siwasu'u mono nherẽ, te ĩzazei'wa norĩ ma, simiroti wasété na te te 're roti. Taha zarina, te ta norĩ hã pi'õ aimawi na mro ré nherẽ, ãma dawi 're simisaihuri za'ra. Duré pi'õ, mro ré nherẽ, aibâ aimawi na te ãma dawi 're simisaihuri za'ra. Duré romhâiba 'manharĩ ãma 'Re ihâimana u'âsi mono upana 're dawata za'ra mono da, danhimizama da te tãma 're isõmri za'ra mono hã te duré te te 're huri. Ta hã, pi'õ hã e niha te simiroti wasété nherẽ, ai'rata 're hâimana za'ra wa'wa. E asiwi wẽ'õ za'ra wa'aba ãna.

Apocalipsi 2:6

Duré, misi asimirosa'rata za'ra wa'wa hã, tô ĩma iwẽ hã. Nicora'ihi nhimiroti wasédé hã te te 're iwapari za'ra mono norĩ hã te 're hâimana wasété za'ra. 'Re ihâimana wasété za'ra mono zé hã ĩma wẽ õ di, wa hã. Ta hã ĩsine 're wẽ'õ pese za'ra wa'aba mono wa, tahawa, ai'ãma ĩma 're rowẽ za'ra wa'aba mono di.