2 Timotiu 3:16 - ꞌRe Ihâimana Uꞌâsi Mono Zadawa Wasuꞌu16 Uburé isimiroti wẽ na rob'ui'éré hã, 'Re ihâimana u'âsi mono te te dama 're i'awaihu'u mono zéb zarina si, te dama 're hâimana za'ra. Ãne wa, isimiroti mono bâ wẽ di, roti tô sena na, da te ãma 're idapawaptob za'ra mono zéb da hã. Duré wẽ di, isimiroti hã, danhimiroti tô senai'õ na, da te dama ãma 're irowaihu'u za'ra mono zéb da hã. Duré wẽ di, isimiroti hã, dahâimanazém na da te 're upa za'ra mono wamhã, da te dama ãma 're iroti za'ra mono zéb da hã, ãma 're idahâimana wẽ za'ra mono da hã oto. အခန်းကိုကြည့်ပါ။ |
2 Timotiu 3:16
43 ပူးပေါင်းရင်းမြစ်များ
Tawamhã ãne te duré tãma rowasu'u za'ra, Zezusi hã: — Wa za duré aima ãma romnhimiré'é za'ra wa'wa, ãne. Ãté 'ri tede'wa te za marĩ iwẽ hã te te 're azani, 'ri 're wa'wa ãma 're iromnhimi'wara mono zém hawi, te te dama 're anhomri mono da. E tawamhã marĩ i'ratare si te za te te dama 're azani. Mare di. Marĩ itéb zama te za duré te te dama 're azani, te te dama 're anhomri mono da. Tane duré, ni'wam norĩ hã 'Re ihâimana u'âsi mono nhimiroti waihu'u pese 'wa norĩ hã da'ãma 're isib'a'uwẽ mono zé wasu'u te te waihu'u pese za'ra wamhã, ta norĩ hã te za isimiroti itéb zama te te dama 're waihu'u za'ra, isimiroti 'rata me.
Tawamhã Zezusi hã te oto sina ãma simiré'é ẽtẽ na, ãne: — Oro 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono za, aima waihu'u za'ra wa'aba õ di bété. Ãne ibaihâ na rob'ui'éré hã: “Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi. Uburé Danhib'apito hã ma tô ãne hã pisutu, 'ri na'rata uparizéb da, pire na 're isa'wari mono da hã. Tahawa, ãne na wa te ãma 're rosa'rata za'ra mono wamhã, wa ãma 're watob'uzu u'âsi za'ra, wa norĩ hã.”
Tawamhã Zezusi te duré tãma nharĩ za'ra, ãne: — Tane wamhã, ma'ãpé ãma rosa'rata pese za'ra wa'aba, ãne na hã. Duréihã apito Dawi hã ma tô tinhib'apito na sisi, Danho'reptui'wa da, 'Re ihâimana u'âsi mono te te ipisudu hã. 'Re ihâimana u'âsi mono pẽ'ẽzani nhimipawaptobzéb zarina, ma tô tinhib'apito na sisi. Oro Dawihi mreme wasu'u na rob'ui'éré hã, ãne hã nomro za:
Tawamhã Zezusi te asa tãma rowasu'u za'ra: — A norĩ wa'wa hã ma tô rosa'rata na ãma i'upa za'ra wa'wa, ab're hawi, za apâ 're idahâiwa'utu za'ra mono õ na hã. E marĩ wa. 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono nherẽ, aima waihu'u za'ra wa'aba õ wa, duré tiwaihu'u pese na, za ab're hawi apâ te te 're ida'ahâiwa'utu mono zé hã, aima waihu'u za'ra wa'aba õ wa.
Duréihã apito Dawi hã ma tô danho'reptui'wa na ãma rob'ui'éré, 'Re ihâimana u'âsi mono hã Tipẽ'ẽzani na te te tãma iwaihu'uzéb zarina. Ãne ãma irob'ui'éré hã: “'Re ihâimana u'âsi mono hã ma tô Ĩnhib'apito ma tinha, ãne: ‘Ĩ'rata te za 're asãmra mo, ĩnhimire niwĩ dama aipire na ĩsiré 're aihâimana u'âsi mono da. Asitob'ru norĩ nhiptetezé hã wa za te tiwi 're a'uprosi, wapu na aima 're hâimana za'ra mono da oto, duré aima sib'uwa na 're hâimana za'ra mono da oto.’ ”
— Wasiré Zezusihi zazei'wa norĩ, ĩwapari za'ra wa'aba. Zudaha wasu'u na wa za aima rowasu'u za'ra wa'wa. Duréihã, 'Re ihâimana u'âsi mono pẽ'ẽzani hã ma tô Zuda hã waihu'u siro, romhâ ré. Tahawa, Dawihi ma, ma tô tinha, dama roti'wai ma, te te iwaihu'u siromo zém na te te ãma rob'ui'éré da. Tawamhã Dawi hã ma tô Zudaha ãma rob'ui'éré siro, poto õ ré. Ãne ibaihâ na ãma irob'ui'éré hã: “Isõrõwa ãma hã 'ri baba di za oto. 'Ri baba na te za oto 're sa. Ni'wa hã iwa 're sãmra mono õ di za oto.” Ãne Zudaha dâ'âzé wasu'u na hã ma tô wama rob'ui'éré za'ra. — Rob'ui'éré na iwasu'u hã ma tô sina uwaimra Zuda hã, tidâ'âzé wasu'u hã te te sina waihu'u ãna. Siwi iwẽ'õ'wa norĩ hã ma tô te te sô simro, Zezusihi zô. Isiré 're wanomro mono nherẽ, wasiré romhuri, Zezusi te te tãma pisutu nherẽ, ma tô te te sô danhimro, te te dama hâiba nhomri da. Te te dama hâiba nhomri parip si, ma tô sima uipra ti'a hã, Zezusi te te dama isõmrizé wa'âbâ na. Tawamhã tame ma tô dârâ, tinhipti'ai 're, Zuda hã. Ma tô waptãrã, ti'ai wa. Waptã'ã wamhã, ma tô nomohaipo'o. Nomosipo'o wamhã, uburé isãna ma tiwi asa'wa. Ãne ma tô Zuda hã sina uwaimra, za idâ'âzé wasu'u na rob'ui'éré hã. — Tawamhã iwasu'u hã 'ri baba, ma tô te te ropé, Zeruzalẽ ãma. Tahawa, Asédama na ma tô isipti'a hã da te 're sisi za'ra, dasimremezém na. Wamreme na ãma isaprĩzé hã, dawapru za'warizém na darom nhisi na. — Duré ãne 'Re ihâimana u'âsi mono, te te iwaihu'u siromo zéb zarina ma tô rob'ui'éré siro, Dawi hã Zudaha wasu'u na: “Romhuri hã, itei õ di oto. Ni'wa te hã za oto, isõwa're'remhã.” Ãne ma tô ãma rob'ui'éré siro, Dawi hã.
Wanhib'apito 're imorĩ wẽ zém na ma tô da te tãma 're romnhoré za'ra. Tahawa, mreme nhiptete na ma tô i'uwaibaba si te te dama 're rowahutu, Zezusihi wasu'u na hã. Tane nherẽ, uburé Zezusihi wasu'u hã zahadu te te waihu'u õ di. Dawasété wi 're dasipizari za'ra mono da, Zuwã, â dawabzuri te te dama 're iwasu'u mono si ma tô waihu'u, Apolu hã.
Uburé 'Re ihâimana u'âsi mono nhimiroti 'rata na rob'ui'éré hã, e taré ma tô tinhimiroti hã te te dama 're apisutu, da te ãma 're irob'ui'éré za'ra mono zéb da hã. Mare di. Taré te te dama 're apisutu mono õ di. Isimiroti hã wa te 're waihu'u pese za'ra mono da, ma tô ãne hã te te dama 're apisutu. 'Re ihâimana u'âsi mono nhimiroti 'rata na rob'ui'éré hã wa te 're sõré u'âsi za'ra mono wamhã, wanhiptete sina wa za ãma 're wahâimana u'âsi za'ra, marĩ na uburé wa te 're robzépata za'ra mono nherẽ. Wa te 're sõré u'âsi za'ra mono wamhã, te za wama 're rowẽ za'ra, wawi 're robzei'õ za'ra mono ãna, 're iwahâimana za'ra mono zéb da hã. Õhõ umnhasi sina, wa za tô ãhã zarina si 're wahâimana za'ra, 'Re ihâimana u'âsi mono 'rata 're iwahâimana u'âsi za'ra mono zéb zô, wasina 're wanhimipari za'ra mono sina.
Duré 're idahâimana wẽ za'ra mono zéb da hã, da te 're iwaihu'u za'ra mono õ norĩ ma hã, wa wa te 're roti za'ra iwẽ na, duré ai'uté ne hâimana nhimiza'rese ãna 're ihâimana za'ra mono norĩ ma zama.” Ãne na te asi'ãma 're irosa'rata upa za'ra wa'aba mo. Duré 'Re ihâimana u'âsi mono nhimiroti 'rata na rob'ui'éré hã aima 're hâimana za'ra wa'aba mono wẽ te, te duré ãne na asi'ãma 're irosa'rata upa za'ra wa'aba mo: “Wa norĩ ma si, wama waihu'u pese za'ra di, uburé roti iwẽ hã tô sena uptabi hã.” Ãne na te duré asi'ãma 're aiwata za'ra wa'aba mo.
Mare di. Tô sena tãma hã, zudeu na 're aihâimana za'ra wa'aba mono zé hã. Tãma wẽ di, 'Re ihâimana u'âsi mono ma hã. E niha, wa za tawamhã ãne hã waihu'u za'ra ni, zudeu norĩ 're ihâimana za'ra mono zé hã. Duréihã 'Re ihâimana u'âsi mono hã ma tô zudeu norĩ si te te sima 're awẽ, isimiroti na rob'ui'éré 'rada hã uburé da'udâna te te 're 'madâ'â pese za'ra mono da, dawi simani tõ da.
Zahadu romhâ uptabi nherẽ, ma tô zudeu'õ norĩ ãma sima roti, 'Re ihâimana u'âsi mono hã. Ãne isimiroti hã: Zudeu'õ norĩ hã, Cristu Danho'reptui'wa na te te sina 're umnhasi za'ra mono wamhã, ta norĩ ma zama te za duré tãma 're irowẽ za'ra mono zéb da hã te te tãma 're apisutu, 'Re ihâimana u'âsi mono hã. Iwasédé hã te te oto ãma 're i'ab'madâ'â mono õ zéb zarina, te za te te 're awẽsãmri. Taha zarina wasété za'ra 'ru te, te te ahâ za'ra õ di za, rob'rãsutuzéb ãma hã. Ãne isimiroti hã zudeu'õ norĩ ãma hã. Tahawa, ma tô ãne Abra'ãhã ma waihu'u siro, 'Re ihâimana u'âsi mono hã: “Te aima iropisutuzém na asina ĩzazei pese zéb zarina, wa za dama 're irowẽ za'ra mono zéb da hã te dama 're apisutu, dapoto mono bâ.” Ãne ma tô iwasu'uwẽ na romhâ ré ãma po're pu'u siro.
Ni'wam norĩ hã isimiroti na sada 're hâimana za'ra mono wamhã, atãma te za tinhimiroti wẽ na te te 're pawaptob za'ra, tinhimirosa'rata na te te ãma saprĩ za'ra da, Wamama nhimiroti hã tô sena na te te sina waihu'u za'ra da oto, isimipawaptobzéb zarina. Wa'uburé norĩ nhib'apito hã ma tô aré tãma 're sadawa nhipese za'ra, te te sima 're ida'awẽ mono zéb uwaibaba, isimiroti na 're hâimana za'ra mono da. Tane nherẽ, a'uwẽ norĩ hã tinhimirosa'rata na te te ãma saprĩ za'ra wamhã, te za oto Wa'uburé nhimiroti hawi 're wairébé. Taha da, te za Wanhib'apito ma romhuri'wa hã atãma te te 're apawapto, tinhimiroti wẽ na hã.
E niha, 'Re ihâimana u'âsi mono, wa te wasina 're i'umnhasi za'ra mono zé hã. Ta hã te te wama 're i'apisutu mono zéb zarina, iwẽ uptabi zô si 're iwanhimipari u'âsi za'ra mono na, tô sena za te te wama ãma i'uwaimrami za'ra na, wa za wa te wasina 're waihu'u za'ra. Duré uburé marĩ hã watõmo na wa te 're i'madâ'â waihu'u za'ra mono õ zama, wa za duré wa te 're waihu'u za'ra, sena na 're ihâimana za'ra mono na hã. Ãne 'Re ihâimana u'âsi mono, wa te wasina 're i'umnhasi za'ra mono zé hã, te za wama 're hâimana za'ra.
Duréihã ni'wa hã ma tô 'Re ihâimana u'âsi mono pẽ'ẽzani zadawa para, ãne na ãma rob'ui'éré: “Ã bâtâ na, 'Re ihâimana u'âsi mono mreme hã wapari za'ra wa'aba wamhã, aipo're si'âri 're aihâimana za'ra wa'aba mono õ di za, ai'rã tete aba na. Duréihã aihi'rata norĩ wa'wa hã ma tô ãne na hã po're ãna sada tihâimana za'ra, 'Re ihâimana u'âsi mono da. Ta norĩ hã a'ubuni wi 're nomro mono ré, nimahã bâtâ na ma tô tiwasédé hã 'manharĩ za'ra, 'Re ihâimana u'âsi mono hã niha zô te te sina pibu za'ra da, niha te te pé tãma rob'manharĩ za'ra õ zô, ãma iwa'a su'u za'ra õ na hã.”
'Re ihâimana u'âsi mono zadawa wasu'u hã ihâiba ré ne, te tô wama 're hâimana u'âsi za'ra. Siptete uptabi di duré imreme hã, uburé marĩ hã i'uwaibaba si te te dama ãma 're i'ab'manharĩ mono zéb da hã, 'Re ihâimana u'âsi mono hã. Sib'ézé 'wa pa si'uiwa i'wa pese ne, te wama 're hâimana za'ra, isadawa wasu'u hã. Sib'ézé i'wa pese na te za romnhi hã da te 're nhizazari za'ra, ihi si da te 're urĩrĩ za'ra mono da hã. Tane duré, 'Re ihâimana u'âsi mono zadawa wasu'u hã wa te 're wapari za'ra mono wamhã, 'râwi wapẽ'ẽ na wanhimirosa'rada iwẽ hã duré iwasédé hã wa za wa te ãma 're waihu'u za'ra.
ကြော်ငြာတွေ