2 Timotiu 2:7 - ꞌRe Ihâimana Uꞌâsi Mono Zadawa Wasuꞌu

⁷ Ma'ãpé, ãma 're rosa'rata u'âsi mono, te aima irowasu'uzém na hã. Ãne wamhã, Wanhib'apito hã te za te te 're aipawapto, ãhã wasu'u na hã ãma 're awaihu'u mono da.

2 Timotiu 2:7 ပူးပေါင်းရင်းမြစ်များ

Salmu 119:125

Wa hã aima romhuri'wa. Tahawa, ma'ãpé ĩ'rãiwaihu'u wẽ ĩma 're sõmri mono, asimiroti te ãma 're iwaihu'u mono zéb da hã sena na.

Salmu 119:73

'Re ihâimana u'âsi mono, asib'rata na ma tô ĩpo. Ma'ãpé tahawa, ĩ'rã nhimiza'resezé hã ĩma sõmri, asimiroti te ãma iwaihu'uzéb da hã.

Provébiu 24:32

Tawamhã ta hã te 'madâ'â wamhã, wa tô ãma rosa'rata. Taha zarina wa tô duré waihu'u, ãne:

Daniéu 1:17

Tawamhã 'Re ihâimana u'âsi mono, ma tô rob'ui'éré zadaihu'uzé hã tãma sõmri za'ra, maparane si'uiwa na iprédupté ihâiba za'ra ma hã. Babilonia norĩ nhimirowaihu'uzéb zama ma tô duré tãma sõmri za'ra. Tane nherẽ, Daniéu ma si, ma duré aimawi tãma tisõ, da te 're irosawẽrẽ za'ra mono zém na duré danhotõ 'rowim ne, marĩ, da te 're i'madâ'â za'ra mono zé hã te te ãma dama 're azaprĩ mono da.

Luca 21:15

Wa hã wa za te 're aipawaptob za'ra wa'wa, danhib'apito norĩ ma, 're asiwasu'u za'ra wa'aba mono zéb da hã. Ãne wa, aimreme wẽ na te za aiwẽ'õ'wa norĩ hã 're isõwada za'ra wa'aba mo.

Luca 24:45

Tawamhã ma tô ãne tãma waihu'u za'ra, ibaihâ na rob'ui'éré zarina: — Romhâ ré ma tô ãne ĩ'ãma rob'ui'éré za'ra ni: “Danho'reptui'wa te za robzépata za'ẽtẽ, 'Re ihâimana u'âsi mono te te ipisudu hã. Tane nherẽ, bâdâ maparane ãma si'utõrĩ õ ré, te za hâiwa'udu apâ, ab're hawi.

Luca 9:44

— Wa za aima ĩsiwasu'u za'ra wa'wa. Aima ĩsiwasu'u za'ra wa'aba zém na, aipo're si'âri za'ra wa'aba õ di za. Ti'ai ãma Dasiré Ipodo hã te za dasima hâiba nhomri ni.

Zuwã 14:26

Zahadu wapsi Ĩmama wi, te waptẽrẽ wa, te za Tipẽ'ẽzani hã we atẽme satõrĩ za'ra wa'wa, aipawaptob za'ra wa'aba 'wa da hã. Wẽ uptabi di Ipẽ'ẽzani hã. Ta hã te za uburé marĩ hã te te aima 're waihu'u za'ra wa'wa. Uburé marĩ hã te aima 're iwaihu'u za'ra wa'aba mono zém na te za te te 're aipo're pu'u u'âsi za'ra wa'wa.

Zuwã 16:13

Zahadu wapsi aipawaptob za'ra wa'aba 'wa da hã, te za we atẽme timorĩ za'ra wa'wa, 'Re ihâimana u'âsi mono pẽ'ẽzani hã. Tô sena uptabi, isimiroti hã. We atẽme wisi za'ra wa'aba wapsi, te za uburé roti tô sena uptabi hã te te aima 're waihu'u pese za'ra wa'wa. Si'uihâ na te te aima 're waihu'u za'ra wa'aba mono õ di za. Ĩnhimirowasu'u zarina si te za te te aima 're waihu'u za'ra wa'wa. Romhâ ré te za duré za iromhâimanazé hã te te aima 're waihu'u siromo za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:10

Tahawa, te te irobzépata mono zéb sidâpâsi ma tô nasi pawapto, tiwi robzei'õ tõ da. Tawamhã apito Fara'oho nho're nasi hâimana wamhã, 'Re ihâimana u'âsi mono ma tô tiwaihu'u pe hã tãma tisõ, ihâimana wẽ zéb da hã. Tahawa, apito Fara'o hã ma tô wẽsã, Zuzé hã. Taha zarina ma tô tãma pisutu, Ezitu ãma roti'wa da oto, isadawa para. Isibro hã duré isõrõwa zama te te tãma 're 'madâ'â mono da zama, ma tô duré pisutu.

1 Corĩtu 12:8

'Re ihâimana u'âsi mono pẽ'ẽzani hã ni'wam norĩ si, te za te te 're pisutu za'ra, tô sena ta norĩ hã tinhimirosa'rata waihu'u pese na te te dama ãma 're roti wẽ za'ra mono da, hâiwa hawi dahâimanazém na rowaihu'u na hã. Ni'wam norĩ si, te za duré te te 're pisutu za'ra, rowaihu dama iwaihu'u'õ na, te te dama ãma 're roti wẽ u'âsi za'ra mono da.

Filipu 4:8

Ĩsisãnawã norĩ, ĩnhimiroti na wa za oto ãma aima 'rãsutu za'ra wa'wa, ãhã na te ãma aipo're pu'u za'ra wa'aba zém na hã. Uburé marĩ hã tô sena 're ihâimana za'ra mono na si te za asima 're irosa'rata za'ra wa'aba mo, duré marĩ hã da te dasima 're iwazéb za'ra mono na hã, duré uburé marĩ hã 'Re ihâimana u'âsi mono ma iwẽ uptabi na hã, duré marĩ hã wasété ãna 're ihâimana za'ra mono na hã, duré uburé marĩ iwẽ hã da te 're isawi pese za'ra mono na hã, duré uburé marĩ hã wẽ wa, ãma 're idatob'uzu za'ra mono na hã. Ãne na si te za uburé marĩ iwẽ uptabi na asima 're irosa'rata za'ra wa'aba mo, da te dasima 're iwasu'u wẽ za'ra mono na si.

Colosu 1:9

Tahawa, aiwasu'u wẽ hã wa te iwapari na'rata za'ra wa'aba zém hawim haré, wa tô õne u'âsi ai'ãma 're wamreme zusi u'âsi 'wa, 'Re ihâimana u'âsi mono ma. Ta hã te te sima 're aiwẽ za'ra wa'aba mono zéb uwaibaba, niha oto ãma 're aihâimana za'ra wa'aba mono da, duré te te aima 're waihu'u za'ra wa'aba mono da, wa tô wa te tiwi aima 're rowaptẽrẽ u'âsi za'ra wa'wa. Ipẽ'ẽzani hã te za tô te te 're aipawaptob u'âsi za'ra wa'wa, hâiwa hawi dahâimanazém na rowaihu iwẽ uptabi hã oto ãma waihu'u za'ra wa'aba da, taha zarina 'Re ihâimana u'âsi mono te te sima 're aiwẽ za'ra wa'aba mono zé hã asina 're waihu'u za'ra wa'aba mono da oto, 'râwi.

1 Timotiu 4:15

Uburé te aima i'awaihu'u mono zéb zarina, te za asina 're i'madâ'â u'âsi mo. Õhõ si te za asima 're ipisutu pese mo, asina 're i'uwaimrami mono zéb da si. Ãne wamhã, dapawaptom na rowaihu hã asima ãma 're isa'ẽtẽ mono na te za da te ai'ãma 're waihu'u za'ra.

2 Timotiu 2:6

Tane duré, buru na romhuri pese 'wa hã, amnho hã uburé da te ubumroi pari, imorĩ'rata na te za tite da hã âri 'rata.

2 Timotiu 2:8

Ma'ãpé, Zezu Cristuhu ãma 're rosa'rata pese mono. Ta hã dâ'â nherẽ, ma tô ab're hawi hâiwa'udu, Dawihi nhihudu hã. Wanhib'apito wasu'uwẽ na te 're da'apo're pu'u mono wamhã, taha wasu'u na wa tô te dama 're rowasu'u u'âsi.

Hebreu 12:3

Ma'ãpé ãma rosa'rata pese za'ra wa'aba, Zezusi hã ti'ab ré te te 're irobzépata mono na hã. Tiwasété si te te 're i'manharĩ za'ra mono norĩ hã te te 're 'ruiwapari za'ra mono wa, te te tãma 're irob'manharĩ wasété za'ra mono zém na, ma tô te te 're robzépata za'ẽtẽ, Zezusi hã. Tane nherẽ, siptete u'âsi ma tô 're hâimana. Tane duré a norĩ wa'wa hã te za marĩ iwasété wi 're asi'madâ'â pese za'ra wa'aba mo, asiptete sina 're aihâimana za'ra wa'aba mono da, aiwi 're robzei'õ za'ra wa'aba mono tõ da. Taha zarina, 'Re ihâimana u'âsi mono hã asina 're i'umnhasi za'ra wa'aba mono zé hã aiwi 're si'utõrĩ za'ra wa'aba mono tõ da, te za tô asiptete sina 're aihâimana za'ra wa'aba mo.

Hebreu 13:7

Ma'ãpé ãma asipo're pu'u za'ra wa'aba, 'Re ihâimana u'âsi mono zadawa wasu'u na isãna'rata hawi te te ãma aima 're irowasu'u za'ra wa'aba mono norĩ ãma hã, ai'madâ'â'wa za'ra wa'aba norĩ ãma hã. Ta norĩ 're ihâimana za'ra mono zém na, duré 're idâ'â za'ra mono zém na zama, te za ãma 're asipo're pu'u u'âsi za'ra wa'aba mo. Ta norĩ hã 'Re ihâimana u'âsi mono si te te sina 're i'umnhasi za'ra mono ne, te za duré a norĩ wa'wa hã isine asina 're i'umnhasi za'ra wa'aba mo, 'Re ihâimana u'âsi mono hã.

Hebreu 3:1

Ĩsisãnawã norĩ, a norĩ wa'aba zama ma tô 'Re ihâimana u'âsi mono hã aipisutu za'ra wa'wa, isib'a'uwẽ si oto 're anomro aba mono da, hâiwa ãma i'rata 're aihâimana u'âsi za'ra wa'aba mono da. Tahawa, te za Zezusihi ãma si 're irosa'rata u'âsi za'ra wa'aba mo, 'Re ihâimana u'âsi mono hã ti'ai u, we te te isatõrĩ na, duré dama isadawa wasu'u'wa na. Ta hã sasedoti ipire uptabi na te wa'ãma te te 're romhuri u'âsi, iwasu'uwẽ na wa te 're isaze za'ra mono zém na te te 're wa'apawapto mono da.

Hebreu 7:4

Mequizédéqui hã dama pire uptabi di. Ma'ãpé ãne na ãma rosa'rata pese za'ra wa'aba. Abra'ã wahi'rata uptabi hã ma tô danhibro hã Mequizédéquihi ma po'o, pire na dama 're hâimana mono wa, ta hã. Te te da'ãma ai'uté za'ra pari, danhibro te te apâ siré i'wasari hã tinhiptõmo hi za'ratazém hawi ma te misi po'o. Taha pari, ma tô, tô misi tãma tisõ, Mequizédéquihi ma hã.

Tiagu 1:5

'Re ihâimana u'âsi mono hawi, dahâimanazém na rowaihu'u ré 're aihâimana za'ra wa'aba mono õ wamhã, te za asima tiwi 're irowaptẽrẽ za'ra wa'aba mo, ta hã sõpru uptabi wa. Duré uburé ta hã dama marĩ wẽ nhomri'wa. Ãne wa, tiwi 're irowaptẽrẽ za'ra wa'aba mono zéb uwaibaba, te za te te aima 're sõmri za'ra wa'wa, dahâimanazém na rowaihu iwẽ uptabi hã.

Tiagu 3:17

Hâiwa hawi dahâimanazém na rowaihu'u ré, 're dahâimana za'ra mono wamhã, te za dawasété ãna 're danomro. Roti wẽ na te za da te 're dapawaptob za'ra, rowẽ na dasiré 're dahâimana za'ra mono da. Duré danhimizawi pese na, te za 're danomro. Duré danhimipari pese na, te za 're danomro. Duré te za da'ãma 're dapẽ'ẽzé za'ra. Te za duré dasina 're dapẽ'ẽzé za'ra. Duré marĩ iwẽ na te za 're dasipawaptob za'ra. Duré danhimizawizé hã da te dama 're ba'a za'ra mono õ di za. Duré dahâimana zadawa nhipese na 're dahâimana za'ra mono õ di za.

1 Zuwã 5:20

Ãne wa tô duré waihu'u za'ra ni. Zezusi hã, 'Re ihâimana u'âsi mono 'ra hã ma tô wei mo, ti'ai u. Ta hã ma tô tinhimiroti na te te 're wa'apawapto, 'Re ihâimana u'âsi mono hã tô sena uptabi hã wa te 're iwaihu'u pese za'ra mono zéb da hã. I'ra ãma, Zezu Cristuhu ãma 're wanomro mono wa, wa duré Imama ãma 're wanomro, tô sena uptabi 're ihâimana mono ãma. Zezusi hã, ta hã uburé Danhib'apito uptabi. Ta hã dapẽ'ẽ 're dadâ'â ãna 're idanomro u'âsi mono zé hã, te te dama 're i'apisutu mono. Ãne na wa tô wasiwi waihu'u pese za'ra ni.