2 Timotiu 1:8 - ꞌRe Ihâimana Uꞌâsi Mono Zadawa Wasuꞌu8 Ãne wamhã, 're asisé mono õ di za, Wanhib'apito wasu'uwẽ hã dama 're wasu'u tõ mono da hã. Duré 're asisé mono õ di za, ĩwasu'u na. Wanhib'apito wasu'uwẽ na te dama 're rowasu'u mono 'ru te, ma tô dasiwi ĩnherẽ ni, dazazéb 're. Tahawa, wa oto te 're robzépata. Ãne wa, ma'ãpé 'Re ihâimana u'âsi mono hã tinhiptede te te aima isõmri na, sada 're asiptete mono, ĩsine 're robzépata mono da. အခန်းကိုကြည့်ပါ။ |
2 Timotiu 1:8
48 ပူးပေါင်းရင်းမြစ်များ
Ãhã na da'ahâ na 'Re ihâimana u'âsi mono nhimiroti hã ma tô rẽme za'ra ni. Dawasété na si te oto 're danomro, ã nimosi dapoto té mono hã. Tawamhã ni'wam norĩ hã ĩzazei'wa na, duré ĩmreme wapari pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa ne. Taha wamhã, ti'ai ãma Dasiré Ipodo hã nimahã na za we apâ morĩ wamhã, Timama te ré rowa'a za'ẽtẽ ré, te za wei mo, hâiwa ãma tãma iromhuri'wa norĩ siré. Tawamhã apâ we morĩ wapsi, i'udâ'wa norĩ hã isazei'wa na te te waihu'u za'ra õ di za.
Ni'wam norĩ hã dapipa te, ĩzazei'wa na, duré ĩmreme 'madâ'â pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa newa. Ãne wamhã, nimahã na, ti'ai ãma Dasiré Ipodo hã ihâiba na rowa'a za'ẽtẽ na duré Timama te rowa'a za'ẽtẽ na duré hâiwa ãma tãma iromhuri'wa norĩ te rowa'a za'ẽtẽ na za we apâ morĩ wamhã, te za i'udâ'wa norĩ hã asa tizazei'õ'wa na sisi za'ra.
'Re ĩnhisé mono õ di, Zezusihi wasu'uwẽ hã te dama 're wasu'u tõ mono da. E marĩ wa. 'Re ihâimana u'âsi mono hã siptete uptabi wa, iwasu'uwẽ na te te ãma 're da'anho'reptui mono da, Zezusi te te sina 're i'umnhasi za'ra mono norĩ hã. Zudeu norĩ si ma tô isãna'rata hawimhã te te 're sõ'reptu za'ra aré. Tane nherẽ, te oto ãhã na hã zudeu'õ norĩ zama te te 're anho'reptu.
'Re ihâimana u'âsi mono ãma si, wa za 're wawata u'âsi za'ra. Taha ma si, tãma waihu'u pese di, te te 're iwa'apawapto mono zéb da hã, Zezu Cristuhu wasu'uwẽ hã wa te 're isaze za'ra mono zé hã wa te 're rẽme za'ra mono ãna, wanhiptete u'âsi ãma 're iwanomro mono zéb da hã. Taha wasu'uwẽ hã wa tô te dama 're wasu'u u'âsi. Duréihã iwasu'uwẽ hã, 'Re ihâimana u'âsi mono te te dama 're awaihu'u mono õ di. Iwasu'uwẽ hã dama sa'rese ãna, ma tô aré 're danomro. Tane nherẽ, ma tô 'Re ihâimana u'âsi mono hã iwasu'uwẽ hã dama waihu'u oto, isadawa 'mahârâ'wa norĩ nhimi'ui'éré hawimhã. Tahawa, te oto isimiwada'urizéb zarina si, da te 're waihu'u za'ra daro mono bâ, da te ãma 're isazei pese za'ra mono zéb da hã, duré da te 're iwapari pese za'ra mono zéb da hã oto.
Duréihã apito Dawi hã ma tô ãne na wa'ãma rob'ui'éré siromo za'ra, za wa te 're irobzépata za'ra mono zém na hã: “Wamama, 'Re ihâimana u'âsi mono, wa norĩ hã asib'a'uwẽ 're wanomro mono wa, wama romnhimimnhasi u'âsi na, wa 're wahâimana za'ra, da te 're wanhimroi mono õ'umnhasite. Pone'ẽrebâi ãma 're dapẽ'ẽzé za'ra mono ãna, dasazéb da, da te 're isimroi mono ne, te da te dasima 're wawẽ za'ra, da te 're wanhimroi mono da, da te 're wa'ruiwapari za'ra mono wa oto.”
Duréihã Izaia hã ma tô ãne na ãma rob'ui'éré, 'Re ihâimana u'âsi mono mreme na: “Ma'ãpé, ĩwapari pese za'ra wa'aba. Zeruzalẽ u, wa za ni'wa hã satõ, Siã na sa'a nhisi u. Ẽtẽ tõmo wawẽ hã bâdâdi wa, dawi 're isa'wari mono hã, te te 're da'marõpãrĩ za'ra mono wa, 're idasirẽme za'ra mono ne, 'Re ihâimana u'âsi mono 'rata 're idanomro u'âsi mono zé hã da te dasina 're uwaimrami za'ra mono õ di za, da te dasiwi 're wẽ'õ pese za'ra mono wa, 'Re ihâimana u'âsi mono Zeruzalẽ u te te isatõrĩ hã. Tane nherẽ, ni'wam norĩ hã te te sina 're umnhasi za'ra mono wamhã, taré te te sina 're umnhasi baba za'ra mono õ di za. Iwẽ hã te za tô te te tãma ãma 're a'uwaimrami, 'Re ihâimana u'âsi mono hã. Tahawa, tãma 're rowẽ u'âsi za'ra mono di za.” Ãne ma tô duréihã Izaia hã ãma rob'ui'éré siro, Cristu za da te dasiwi iwẽ'õzém na hã.
Iwasu'uwẽ hã wa tô, tô sena na hã wa te dama 're wasu'u za'ra. 'Re ihâimana u'âsi mono waihu'u pese zarina si, wa tô ãne na wa te dama 're romhuri za'ra. 'Re iwanomro wẽ mono zém na si, wa tô wanhitob'ru norĩ da, 're wahâimana za'ra, ta norĩ ãma, wa te 're ai'uté za'ra mono da. Taha na, wa duré ta norĩ ãma 're wasimanawawi u'âsi za'ra, wanhitob'ru norĩ ãma hã.
Ãne wa, wa hã te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za. Cristuhu wasu'uwẽ hã wa tô te aima 're wasu'u za'ra wa'wa, aima 're irowẽ za'ra wa'aba mono zéb da hã. Tahawa, Cristuhu wasu'uwẽ hã te dama 're wasu'u mono 'ru te, iwasédé hã da te ĩma 're 'manharĩ za'ra mono nherẽ, ĩma 're rowẽ mono di. Ãne wa, te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za.
Tahawa, wa za aima roti za'ra wa'wa, Wanhib'apito ma romhuri'wa 're ĩmorĩ 'ru te, dazazéb 're da te dasiwi 're ĩzai mono wa, 're ĩza mono ré. Ma'ãpé dama 're aihâimana wẽ za'ra wa'aba mono za, 'Re ihâimana u'âsi mono te te sima 're i'aiwẽ za'ra wa'aba mono zéb uwaibaba. Taha da, ma tô te te sima 're aipisutu za'ra wa'wa.
I'uwaibaba wa tô ãne na hã ai'ãma waihu'u za'ra wa'wa. E marĩ wa. Ĩpẽ'ẽ 're, ĩma asawi za'ra wa'aba zé hã ĩma 're hâimana u'âsi mono wa. Romhuri iwẽ uptabi hã, 'Re ihâimana u'âsi mono, tinhimizawi pese zéb zarina te te ĩma ipisutuzém na, ma tô ĩsiré tãma 're iromhuri za'ra wa'aba mo, tô. Ãhã na dazazéb 're, 're ĩhâimana mono ré, ma tô a norĩ wa'aba zama 're iromhuri za'ra wa'aba mo ĩsiré. Duré dazazéb 're, 're ĩhâimana mono õ ré hã ma tô duré ĩsiré dama 're iwasu'u za'ra wa'aba mo, Cristu hã. Taha wasu'uwẽ hã senai õ newa da te ĩma 're inharĩ za'ra mono ma, te dama 're anharĩ mono ré hã, ma tô ĩsiré 're iromhuri za'ra wa'aba mo, duré sena na da te 're waihu'u za'ra mono da, te dama 're wasu'u mono ré hã, damreme wa'rãmi.
Cristu hã 'râwi te iwaihu'u pese da si, wa tô oto ĩsima wẽ, wa hã. Ta hã dâ'â nherẽ, apâ hâiwa'utu wa, te oto siptete sina 're hâimana u'âsi. Tane duré, wa hã 're ĩhâimana 'rata mono zé hã oto ĩma si'utõrĩ wa, duré taha wa'rãmi ĩhâimanazép tém na si oto 're ĩhâimana mono wa, wa ĩsima wẽ, ĩnhiptete sina taha ãma si oto 're ĩhâimana mono da, isimipawaptobzé iwẽ ré si. Ãne hã wa tô duré ĩsima wẽ, Cristu hã ti'ab ré te te 're irobzépata mono ne, te 're irobzépata mono da si, isine. Cristu hã dazada idâ'â ne, 're ĩhâimana 'rata mono zé hã ĩma isi'utõrĩ da si, wa tô ĩsima wẽ, 'Re ihâimana u'âsi mono hã te te sima ĩwẽ wamhã, te te ĩma pisutu da, isiré 're ĩhâimana u'âsi mono zéb da hã.
Wa duré wa te tiwi aima 're rowaptẽrẽ u'âsi za'ra wa'wa, 'Re ihâimana u'âsi mono wi hã, tiwaihu'u pese na iwẽ uptabi na si te te 're aipawaptob za'ra wa'aba mono da, asiptete u'âsi ãma 're anomro aba mono da, taha na si. Ãne wamhã, te za tô ato sina asiptete sina ãma 're anomro aba mo. Duré ãne wamhã, uburé marĩ na 're robzépata za'ra wa'aba mono nherẽ, asa dama ãma 're wa'rãmi za'ra wa'aba mono õ di za.
Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.
Wanho'reptui'wa Cristu Zezusi we datẽme iwisizém na, ma tô oto wama sihâi'ré za'ra, tinhimipawaptobzém na. 'Re idadâ'â za'ra mono zé hã, siptete nherẽ, ma tô wama uprosi za'ra. Duré Wanho'reptui'wai wasu'uwẽ hã wa te 're isaze za'ra mono zéb zarina, ma tô wama waihu'u za'ra, rowẽ na 're idahâimana u'âsi za'ra mono zé wasu'u na hã.
Tahawa, te te ĩpisutuzéb zarina, te ĩsina uwaimrami wa, wa oto te 're robzépata. Tane nherẽ, 're ĩnhisé mono õ di, isadawa wasu'u'wa na 're ĩmorĩ tõ da. Wanhib'apito hã wa ĩsina te 're umnhasi, te te 're ĩpawaptob u'âsi mono da. Ta hã ĩma waihu'u pese di, iwaihu'u pese na hã. Wa hã wa tô tãma ĩsihâiba nho, tô sena tãma waihu'u pese wa, te te 're ĩ'madâ'â mono zéb da hã, bâdâ iwa waptã'ã õ ré, apâ we imorĩzéb u hã.
Onesifuruhu si ma tô tinhimipawaptobzém na nasi ĩma rowẽ zani. Tahawa, wa ĩsima wẽ, Wanhib'apito hã Onesifuru norĩ hã, duré isõrõwa ãma isiré 're ihâimana za'ra mono norĩ zama, iwẽ na te te 're apawapto mono da. Ta hã ĩma 're sisé mono õ di, ĩwasu'u na hã. Tahawa, Roma u wei wisi wamhã, ma tô te te ĩzô aba, te te ĩnhopẽtẽ da.
Tawamhã Wanhib'apito wasu'uwẽ na te dama 're rowasu'u mono 'ru te, wa oto te 're robzépata. Ĩwasédé hã te 're 'manharĩ mono newa, wa oto 're ĩza, dazazéb 're, isi'uwazi nhorõ rutu na ĩpawasisi ré. Tane nherẽ, 'Re ihâimana u'âsi mono zadawa wasu'u hã pawasisi ãna ne, te 're hâimana u'âsi. Te za da te dama ãma 're rowasu'u u'âsi za'ra.
Ta norĩ ne 're aihâimana mono õ di za. Asimiza'rese te za 're aihâimana mo. Te za duré aihâimanazém na ãma 're ipibui pese mo. Duré, Wanhib'apito zazei'wa 're aimorĩ 'ru te, da te dasiwi aima 're rob'manharĩ wasété mono nherẽ, 're asisawi mono õ di za, 're robzépata mono tõ da. Te za duré Wanhib'apito wasu'uwẽ na 're ida'apo're pu'u u'âsi mo, 'Re ihâimana u'âsi mono te te aima ipisutuzéb zarina, asimiromhuri na tãma ãma 're uwaimrami mono da.
'Re ihâimana u'âsi mono ãma si 're wawata u'âsi za'ra wa'aba mono. Taha si uburé Danhib'apito hã te 're hâimana, Wa'anho'reptui'wa hã. Wanhib'apito Zezu Cristu we te te wazada isõmrizém na ma tô ta hã te te 're wa'anho'reptu, tô wazada idâ'âzém na. Ta hã wẽ uptabi di. Wẽ uptabi wa, uburé wa te 're wazéb u'âsi za'ra wa'aba mono za. Waihu'u pese uptabi di duré. Danhipai u dama pire uptabi di, õhõ si. Ãne 'Re ihâimana u'âsi mono hã, marĩ õ ré 're ihâimana mono zé hã, duré ãhã na zama hã. Õne u'â te 're hâimana u'âsi, tiwaihu'u pese uptabi na. Tahawa, ãma 're wawata u'âsi za'ra wa'aba mono za. Taha ma, uburé marĩ hã tãma waihu'u pese di, te te 're aipawaptob za'ra wa'aba mono zéb da hã, 're rẽme za'ra wa'aba mono tõ da, aiwasété u 're aipizari za'ra wa'aba mono tõ da. Te za duré sitẽme aiwaibui wa'wa, aiwasété ãna isõ'a 're aihâimana u'âsi za'ra wa'aba mono da, duré ato sina i'rata 're anomro u'âsi aba mono da, rowẽ ãma. Tane tô.
Wa hã Zuwã, asisãnawãi wa'wa. A norĩ wa'wa hã Zezusihi ãma si 're anomro aba mono wa, danhimirob'manharĩ wasédé, 're isépata za'ra wa'aba mono ne, wa duré te 're robzépata, asine za'ra wa'aba, Zezusihi ãma si 're ĩmorĩ wa. Zezusihi ãma si wasiré 're wanomro mono wa, wa duré 'Re ihâimana u'âsi mono nhib'a'uwẽ 're wahâimana za'ra. Ta hã te za duré te te 're wa'apawaptob u'âsi, da te 're wa'ruiwapari za'ra mono wa, wa te 're robzépata za'ra mono nherẽ, wawasété u tiwi 're wasipizari za'ra mono tõ da, wanhiptete u'âsi ãma 're wanomro mono da. Wa hã wa tô te dama 're sadawa wasu'u, 'Re ihâimana u'âsi mono hã. Tô sena na Zezusihi zazei'wa na wa tô duré dama 're ĩsiwasu'u u'âsi. Tahawa, ma tô dasiwi ĩ'âri ni. Ma tô duré dasiwi ĩzatõrĩ ni, Patemusi na rob'ré za'iti nhisi u.
Pone'ẽrebâ hã dazada idâ'âzéb zarina, ma tô wasiré isazei'wa norĩ hã ãma ai'uté za'ra, Satanasihi ãma. Iwasu'uwẽ hã sena na te te dama 're isadawa wasu'u za'ra mono zém na zama, ma tô ãma ai'uté za'ra. Duré da te 're 'ruiwapari za'ra mono wa, dawi 're sihâiba zawi za'ra mono õ di, 're dâ'â tõ za'ra mono da. Tahawa, 'Re ihâimana u'âsi mono wi sipizari ãna, ma tô duré Satanasihi ãma ai'uté za'ra.
Tawamhã tô õ hã hâiwa ãma romhuri'wa papara, wa tô ĩhi'rãtitõ aime, ãma ĩwata da aré. Tane nherẽ, te ĩma tinha, ãne: — Tô'ã. Ãne hã 'manharĩ tõ. Wa hã asine hã, 'Re ihâimana u'âsi mono ma romhuri'wa, wa 're ĩhâimana, duré asisãnawã norĩ ne hã, duré asiré isazei'wa norĩ ne hã. Ta norĩ hã roti tô sena uptabi hã, Zezusi te te dama 're i'awaihu'u mono hã te te 're iwapari pese za'ra mono. Ta norĩ ne hã, wa 're ĩhâimana, wa hã. Ma'ãpé 'Re ihâimana u'âsi mono ãma si 're aiwata mono. 'Re ihâimana u'âsi mono zadawa 'mahârâ 'rata 'wa norĩ hã, Ipẽ'ẽzani te te tãma 're iwaihu'u za'ra mono zéb zarina si, te ta norĩ hã te te dama 're sadawa wasu'u za'ra. E marĩ na te bété te te dama 're sadawa wasu'u za'ra. Tô õhõ na, Zezusi, ti'ab ré uburé te te dama 're i'awaihu'u mono na si, te ta norĩ hã te te dama 're sadawa wasu'u za'ra, 'Re ihâimana u'âsi mono hã.
ကြော်ငြာတွေ