2 Tesalonita 3:3 - ꞌRe Ihâimana Uꞌâsi Mono Zadawa Wasuꞌu

³ Wanhib'apito Zezusihi si, umnhasi za'ẽtẽ uptabi di. Tahawa, te za te te 're aipawaptob za'ra wa'wa, 're sazei utõrĩ za'ra wa'aba mono tõ da, aihâimana nhiptete sina ãma 're anomro aba mono da. Duré Wa'uburé wi, iwasété uptabi wi, te za tiwi aihâiba zawi za'ra wa'wa.

2 Tesalonita 3:3 ပူးပေါင်းရင်းမြစ်များ

Zenezi 48:16

Hâiwa ãma romhuri'wa uburé marĩ iwasété wi te te 're ĩpawapto mono 'wa hã, ã hã 'watébrémi norĩ iwẽ na te te 're ipawapto zahuré mono da si, ĩma iwẽ hã. Ĩnhisi na duré ĩmama norĩ Abra'ãhã nhisi na Izaquihi nhisi me ã norĩ hâiba u'âbâmhã ãma 're idasipo're pu'u u'âsi za'ra mono da si, ĩma iwẽ hã. Duré i'ra norĩ isihudu norĩ zama daro mono bâ isitébré za'ẽtẽ za'ra mono da hã wa aiwi waptẽ.”

Salmu 19:13

Duré ĩwasédé te ĩsima iwẽzéb zarina, te 're i'a'manharĩ mono hã ma'ãpé tiwi ĩzawi na. Õne u'â te te 're ĩwada'uri mono tõ da hã ma'ãpé tiwi 're ĩnhiptete mono. Tawamhã wa za sena na i'uwaibaba na si 're ĩhâimana. Wa za ĩwasédé ipire nhiti ĩsima iwẽ na oto 're mo, aimreme te 're iwapari mono õ zém na 're ĩhâimana mono nhiti hã.

Mateu 5:37

Marĩ hã dama 're 'manharĩ za'ra wa'aba mono da, asina dama 're ropisutu za'ra wa'aba mono wamhã, ãne si te za dama 're inharĩ za'ra wa'aba mo: “Ĩhe. Wa za tô 'manha.” Duré marĩ hã dama 're 'manharĩ za'ra wa'aba mono da, asima 're wẽ za'ra wa'aba mono õ wamhã, ãne si te za duré dama 're inharĩ za'ra wa'aba mo: “Mare di. Wa hã te 'manharĩ õ di za.” Ãne si te za dama 're inharĩ za'ra wa'aba mo. Ãne si dama 're nharĩ za'ra wa'aba mono õ wamhã, Wa'uburé nhimiwada'uri zarina te za aiwasédé hã 're i'manharĩ za'ra wa'aba mo.

Mateu 6:13

Duré, 're wa'ab'madâ'â nhimini mono õ di za, Wa'uburé hã te te 're wa'a'upi mono wa, wawasété u 're warere'e tõ mono da. Ma'ãpé, 're wa'anho'reptui u'âsi mono, iwasété uptabi wi.”

Luca 11:4

Dawasédé hã da te wa'ãma 're 'manharĩ za'ra mono wa, wa te wasina 're i'madâ'â za'ra mono õ zarina, a hã duré wa'ãma 're ab'madâ'â mono õ di za, wawasédé hã. Duré, 're wa'ab'madâ'â nhimini mono õ di za, Wa'uburé hã te te 're wa'a'upi mono wa, wawasété u 're warere'e tõ mono da.”

Zuwã 17:15

Ãne na hã te ãma aima wasu'u za'ra õ di, ĩzazei'õ'wa norĩ wi, ãma asitẽme waibu da. Wa'uburé wi, iwasété uptabi wi, ãma 're asisaprĩ u'âsi za'ra mono da, wa ãne ãma aima wasu'u za'ra.

1 Corĩtu 1:9

'Re ihâimana u'âsi mono hã wama umnhasi za'ra di, uburé te te wama 're i'aropisutu mono zéb zarina, te te wama ãma 're i'a'uwaimrami mono zéb da hã. Ta hã ma tô te te 're aipisutu za'ra wa'wa, i'ra siré 're anomro aba mono da, Wanhib'apito Zezu Cristuhu siré.

1 Corĩtu 10:13

Tô sena, asiptete sina ãma 're anomro u'âsi aba mono zô, 'Re ihâimana u'âsi mono hã te te 're aipibu za'ra wa'aba mono wamhã, aimawi na te te 're aipibu za'ra wa'aba mono õ di za, ipire uptabi na hã. Tô õhõ na si te te 're ida'apibui mono zém na si, te za tô te te 're aipibu za'ra wa'wa. 'Re ihâimana u'âsi mono hã uburé wama umnhasi za'ra di, marĩ na uburé te te wama 're i'aropisutu mono zém na hã. E tawamhã, asiptetezém nhipai u, te za ipire uptabi na te te aipibu na 're sahu za'ra wa'wa, aiwasété u apâ tiwi 're airere'e aba mono da. Mare di. Tô sena, asiptete sina ãma 're anomro u'âsi aba mono zô, te te 're aipibu za'ra wa'aba mono wamhã, te za niha te te aima 're pisutu za'ra wa'wa, rowẽ ré ihawi 're aiwairébé aba mono zéb da hã, õne haré asiptete sina ãma 're anomro u'âsi aba mono da.

1 Tesalonita 5:24

'Re ihâimana u'âsi mono hã tinhib'a'uwẽ da, te te 're i'aipisutu za'ra wa'aba mono hã, umnhasi uptabi wa, te za tô te te 're aipawaptob za'ra wa'wa, iwẽ na si 're anomro u'âsi aba mono da.

2 Timotiu 4:18

Tane te za Wanhib'apito hã duré rowasété hawi ĩnho'reptu, hâiwa u te te ĩ'ãwisi wẽ da, tinhib'a'uwẽ norĩ te te 're i'ab'madâ'â mono zéb u hã. Ta hã si wẽ uptabi wa, aihĩni wa za ãma 're wawata u'âsi za'ra.

1 Pedru 5:10

Tane nherẽ, 're robzépata hâ za'ra wa'aba mono õ ré, rowẽzé hã te za te te aima ãma 're a'uwaimrami 'wa, 'Re ihâimana u'âsi mono hã. Taha si te za te te 're asiptete u'âsi za'ra wa'wa, tiwaihu'u pese na, asiptete u'âsi ãma 're aihâimana za'ra wa'aba mono da. Õhõ ma si te isimizawizé hã sa'ẽtẽ na tãma 're hâimana. Tahawa, ma tô sitẽme asô tihârâ za'ra wa'wa, rowẽ isi'utõrĩ'õ ãma isiré 're aihâimana u'âsi za'ra wa'aba mono da, Cristuhu nhib'a'uwẽ oto 're anomro aba mono wa.

2 Pedru 2:9

'Re ihâimana u'âsi mono ma, waihu'u pese di, Lo hã te te isõ'reptuzéb da hã. Tane duré, Wanhib'apito ma waihu'u pese di, ro'wa'rutu hawi te te 're i'anho'reptui mono zéb da hã, isimiroti 'madâ'â pese 'wa norĩ hã. Duré tãma waihu'u pese di, te te 're ida'ahâ za'ra mono zéb da hã, 're idanomro wasété mono norĩ hã, bâdâ iwa iwaptã'ãzéb u hã, dahâimanazém na te te ida'awaihu'uzéb da hã. Tawapsi te za dahâimanazéb zarina te te dama 're arowairébé, rob'rãsutuzéb ãma.

Zuda 1:24

'Re ihâimana u'âsi mono ãma si 're wawata u'âsi za'ra wa'aba mono. Taha si uburé Danhib'apito hã te 're hâimana, Wa'anho'reptui'wa hã. Wanhib'apito Zezu Cristu we te te wazada isõmrizém na ma tô ta hã te te 're wa'anho'reptu, tô wazada idâ'âzém na. Ta hã wẽ uptabi di. Wẽ uptabi wa, uburé wa te 're wazéb u'âsi za'ra wa'aba mono za. Waihu'u pese uptabi di duré. Danhipai u dama pire uptabi di, õhõ si. Ãne 'Re ihâimana u'âsi mono hã, marĩ õ ré 're ihâimana mono zé hã, duré ãhã na zama hã. Õne u'â te 're hâimana u'âsi, tiwaihu'u pese uptabi na. Tahawa, ãma 're wawata u'âsi za'ra wa'aba mono za. Taha ma, uburé marĩ hã tãma waihu'u pese di, te te 're aipawaptob za'ra wa'aba mono zéb da hã, 're rẽme za'ra wa'aba mono tõ da, aiwasété u 're aipizari za'ra wa'aba mono tõ da. Te za duré sitẽme aiwaibui wa'wa, aiwasété ãna isõ'a 're aihâimana u'âsi za'ra wa'aba mono da, duré ato sina i'rata 're anomro u'âsi aba mono da, rowẽ ãma. Tane tô.