2 Pedru 3:10 - ꞌRe Ihâimana Uꞌâsi Mono Zadawa Wasuꞌu

¹⁰ Wa za oto aima ãma romnhimiré'é za'ra wa'wa, waihu'u za'ra wa'aba da. Isipsaihuri hã sô idanhimipari õ zém na si, te za ãzé, 'ri para u hã. Tane, Wanhib'apito zô 're idanhimipari za'ra mono õ zém na si, te za wei mo apâ. Ãne wamhã, hâiwa te za ai'utõ. Rãrã'ã za'ẽtẽ uptabi di za. Uburé marĩ hã hâiwa na 're isimasa mono hã te za ai'uzâ. Danhipti'ai mono bâ, marĩ hã 're ihâimana za'ra mono hã te za si'utõrĩ.

2 Pedru 3:10 ပူးပေါင်းရင်းမြစ်များ

Salmu 102:26

Ti'a norĩ hã hâiwa me, za si'utõrĩ zahuré nherẽ, a hã te za tane nherẽ, õne u'â 're aihâimana mo. Ti'a norĩ hã hâiwa me, da'uza 're ihâi wasété za'ra mono ne, te za ai'utõrĩ zahuré. A hã, da'uza na da te ãma 're isaprĩ za'ra mono ne, te za ãma isaprĩ zahuré. Tahawa, te za tô oto õ norĩ hã iwabzu.

Zuéu 1:15

Wanhib'apito isiptete uptabi nhibâdâ iwa iwaptã'ãzéb u hã romhuture di oto, tinhiptete na za te te ida'a'uprosizéb da hã. Ta hã bâdâ hã pipa uptabi di za.

Zuéu 2:1

Asimnhihârâzé hã ma'ãpé hãsi aba, Siã na ẽtẽ nhisi ãma. Ma'ãpé duré ropire wa ãma dapo're pu'uzéb da, hãsi aba, 'Re ihâimana u'âsi mono te ẽtẽ'rãihâ ãma. Ã hã daza'rui 're, 're i'ai'ubumroi wa'aba mono norĩ, aipahi za'ra wa'aba wa, airẽrẽ'ẽ za'ra wa'aba, Uburé Danhib'apito nhibâdâ te te ipisudu hã za oto romhutu na wisi dâ'âsina.

Zuéu 2:31

Bâdâ hã te za titõmo 'rãdâ'â. Duré a'amo hã te za titõmo wapru, Uburé Danhib'apito nhibâdâ tô sena ipipa uptabi wisi wana ré hã.”

Zuéu 3:14

Tahawa, te za da'ahâ uptabi na tahâimana za'ra ni, Dasima Rowairébézém na romharé nhisi ãma. Romhuture di oto Uburé Danhib'apito nhibâdâ hã taha romharé ãma za marĩ te te i'manharĩzéb da hã.

Mateu 24:35

Nimahã na te za hâiwa norĩ hã ai'utõrĩ zahuré, ti'ai me. Si'utõrĩ zahuré nherẽ, ĩnhimirowasu'u hã si'utõrĩ waihu'u õ di za. Pire na te za dama 're hâimana u'âsi.

Marcu 13:31

Nimahã na te za hâiwa norĩ hã ai'utõrĩ zahuré, ti'ai me. Si'utõrĩ zahuré nherẽ, ĩnhimiroti hã si'utõrĩ waihu'u õ di za. Pire na te za dama 're hâimana u'âsi.

Luca 12:39

— Wa za duré ãma simiré'é, ãma rosa'rata za'ra wa'aba da. Dahâimana nhimiza'rese ãna, 're dahâimana za'ra mono ré, te za isipsaihuri norĩ hã danhibrob zô 're sisisi, 'ri para u hã. Bâdâ hã we isébrézé 'ri tede'wa te te waihu'u wamhã, te za tiwi 'madâ'â pese, sébré tõ da, 'ri para u.

Roma 8:20

'Re ihâimana u'âsi mono, marĩ te te i'apoto mono hã te wasété na 're hâimana za'ra, a'â. Tinhimipoto mono bâ, niha tãma 're ihâimana za'ra mono zéb da, te te tãma 're apisutu mono nherẽ, te te sina tãma ãma 're uwaimrami za'ra mono õ di. Siwa'ru te a'â 're hâimana za'ra, siwamnarĩ na. Tane nherẽ, ãne na si'uihâ na 're hâimana za'ra mono õ di. 'Re ihâimana u'âsi mono si, ma tô tãma pisutu za'ra, siwa'ru a'â 're hâimana za'ra mono da. Niwapsi uburé marĩ te te i'apoto mono hã wasété u'âsi 're ihâimana za'ra mono hawi, te za anho'reptu. Taha zô, wa sô 're wanhimipari u'âsi za'ra, siwamnarĩ ãna oto 're hâimana za'ra mono da. Tawamhã wasine, robzei u'âsi te za oto 're hâimana za'ra, 'Re ihâimana u'âsi mono 'ra, oto 're wanomro mono wa, rowẽ u'âsi 're iwahâimana za'ra mono ne.

1 Corĩtu 1:8

Wanhib'apito Zezu Cristu te za duré te te 're aipawaptob u'âsi za'ra wa'wa, asiptete sina ãma 're anomro aba mono da. Nimahã bâtâ na za we apâ imorĩzéb u, tiwi 're aipizari za'ra wa'aba mono tõ da, te za te te 're aipawaptob u'âsi za'ra wa'wa, ti'ab ré Zezusi hã 're udâ za'ra wa'aba mono wa, tô taha bâtâ na aiwasédé hã te te ai'ãma sa'ra za'ra wa'aba tõ da.

1 Tesalonita 5:2

Wanhib'apito nhibâdâ hã, bara na isimisaihuri zô 're danhimipari za'ra mono õ nherẽ, we datẽme imorĩ ne, te za tô iwa waptãrã. Ãne hã aima waihu'u pese za'ra wa'aba di.

1 Tesalonita 5:4

Wasiré isazei'wa norĩ, a norĩ wa'wa hã Wanhib'apito apâ wei imorĩzéb zô, te sô 're asimipari za'ra wa'aba mo. Tahawa, awa'awi za wei morĩ nherẽ, tãma a'rãmi za'ra wa'aba õ di za, bara na isimisaihuri norĩ ma, 're idasi'rãmi za'ra mono ne.

2 Pedru 3:11

Tawamhã uburé marĩ hã isi'utõrĩzém na hã aima waihu'u pese za'ra wa'aba wa, e niha te za tawamhã 're aihâimana za'ra wa'aba mo. Te za aiwẽ uptabi na 're aihâimana za'ra wa'aba mo, 'Re ihâimana u'âsi mono nhimiroti zarina si.

2 Pedru 3:12

Te za duré asimi'ẽ na sô 're asimipari za'ra wa'aba mo, 'Re ihâimana u'âsi mono bâdâ te te ipisutu zô. Bâdâ hã iwa waptã'ã su'u da, te za asiptete sina 're aihâimana wẽ za'ra wa'aba mo. Bâdâ iwa waptã'ã wamhã, te za hâiwa hã ai'utõ, unhama ro'o na. Duré uburé marĩ hã hâiwa na 're isimasa mono hã te za ai'utõ.

2 Pedru 3:7

Duré 'Re ihâimana u'âsi mono mreme zarina, hâiwa norĩ hã ti'ai me te za a'â 're hâimana zahuré. Bâdâ iwa iwaptã'ãzéb u, te za dahâimanazéb zarina dama arowairébé, 'Re ihâimana u'âsi mono hã. Tawamhã te za da'uprosi, 're idahâimana wasété za'ra mono norĩ hã. Duré unhama ro'o na te za oto hâiwa norĩ hã uprosi zahuré, ti'ai me.

Zuda 1:6

Tane duré, hâiwa ãma 'Re ihâimana u'âsi mono ma romhuri'wa norĩ hã, isipizari za'ra norĩ ãma, wa za duré ãma aipo're pu'u za'ra wa'wa. Ta norĩ hã ma tô 'Re ihâimana u'âsi mono hã pisutu za'ra aré, isadawa para niha na te te tãma 're romhuri za'ra mono da, pire na. Tane nherẽ, ma tô hâiwa ãma romhuri na tiwi ãma upa za'ra. Taha wamhã, 're ihâimana za'ra mono zé hã ma tô rẽme za'ra. Tahawa, ma tô oto 'Re ihâimana u'âsi mono hã satõrĩ za'ra, robra si 're isa'wari mono u, tame pawasisi ré 're simasab u'âsi mono da. 'Re ihâimana u'âsi mono hã ropsi'utõrĩzéb u za te te da'ãma irowairébézéb u, te za tame ta norĩ hã a'â 're hâimana u'âsi za'ra. Tawapsi te za oto wẽ'õ pese za'ra.

Apocalipsi 16:15

Tawamhã ãne danhotõ 'rowim ne, da te 're irosawẽrẽ za'ra mono ne, te azabui mono ré, wa tô Zezusihi mreme hã wapa ĩpo're na, tizazei'wa norĩ te te ipo're pu'uzé hã. Ãne te tinha: “Ma'ãpé, aipo're pu'u za'ra wa'aba. Isimisaihuri zô 're danhimipari za'ra mono õ nherẽ, danhorõwa u 're isisisi mono ne, wa za wei mo apâ. Ãté ni'wa hã tisiwadi zô simipari wamhã, sõtõ ãna te za sô rob'madâ'â u'âsi. Tawamhã i'uza hã te za i'rata nomro 'râwi, isiwadi hã we itẽme wisi wa, si'aba'ré na te te sisada âri da, ãma isi'uzazéb da hã. Tane asimiza'rese sina, ĩzô 're asimipari za'ra wa'aba mono ré, we ĩmorĩ wamhã, aima 're rowẽ uptabi za'ra wa'aba mono di za. Ni'wa hã datõmo nho'a ai'uréiwi 're morĩ wa, 're isisé mono ne, ĩma aséb za'ra wa'aba tõ da, asimiza'rese sina ĩzô 're asimipari za'ra wa'aba mono ré, we ĩmorĩ wamhã, aima 're rowẽ uptabi za'ra wa'aba mono di za.”

Apocalipsi 20:11

Tawamhã wa tô duré 'madâ, danhib'apito simasisizé irã hã, isa'ẽtẽ uptabi hã. Ãma isãmra hã wa tô duré 'madâ. Tawamhã uburé pese hã, ma tô ti'a hã ai'utõ, duré hâiwa zama. Taha wamhã, marĩ õ uptabi di oto. Tahawa, da te 're 'madâ'â zahuré mono õ di oto, ti'a norĩ hã hâiwa me. Tâibâ ma tô ai'utõrĩ pese zahuré.

Apocalipsi 21:1

Tawamhã wa tô duré 'madâ hâiwa ité hã, duré ti'a ité hã. Hâiwa i'rada hã ma tô ai'utõrĩ pese. Duré ti'a i'rata zama hã ma tô ai'utõrĩ pese. Â zama hã ma tô duré ai'utõrĩ pese.

Apocalipsi 3:3

Ma'ãpé duré ĩ'ãma 're anomro na'rata aba mono zém hawi ĩnhimiroti hã aipo're na 're iwapari za'ra wa'aba mono zém na, duré 're iwaihu'u za'ra wa'aba mono zém na, ĩ'ãma asipo're pu'u za'ra wa'aba. Ta hã ĩnhimiroti hã te za 're i'madâ'â pese za'ra wa'aba mo. Duré aiwasété wi te za 're aipizari za'ra wa'aba mo. Ãne na hã apâ ĩ'ãma asipo're pu'u za'ra wa'aba õ wamhã, wa za oto aihâ za'ra wa'wa. Nimahã na isimisaihuri norĩ hã sô 're danhimipari za'ra mono õ nherẽ, danhorõwa u 're isisisi mono ne, wa za atẽme ĩwisi 'wa, te aihâ za'ra wa'aba da hã. Bâdâ hã ãma atẽme ĩwisi za'ra wa'aba zéb da hã waihu'u za'ra wa'aba õ di za.

Apocalipsi 6:14

Tawamhã ma tô duré hâiwa nhirõno hã ai'ub'rã, ibaihâ da te 're i'ub'rã za'ra mono ne. Duré ti'a hã sãsã'ã wamhã, ẽtẽ 'rãihâ, daro mono bâ 're isimasa mono hã ma tô si'ré za'ra, 're isimasa mono zém nhiti. Rob'ré za'iti zama, ma duré uburé sina si'ré za'ra, 're isimi'wara mono zém nhiti.