2 Pedru 1:19 - ꞌRe Ihâimana Uꞌâsi Mono Zadawa Wasuꞌu

¹⁹ Marĩ, wa te isabu za'ra zéb zarina, wa tô waihu'u za'ra ni, tô sena na Danho'reptui'wa na 'Re ihâimana u'âsi mono zadawa 'mahârâ 'rata 'wa norĩ te te dama 're irowasu'u za'ra mono zém na hã. Awẽ u te za wasi wawẽ hã 're pusi, dama rowa'a'wa da, isimirowa'a zarina ãma 're danomro wẽ mono da. Tane wapawapto'wa da, te wama 're hâimana, isadawa 'mahârâ'wa norĩ nhimirowasu'u hã, ãma 're iwanomro wẽ mono zéb da hã. Ãne wamhã, te za ãma 're irosa'rata u'âsi za'ra wa'aba mo.

2 Pedru 1:19 ပူးပေါင်းရင်းမြစ်များ

Salmu 119:105

Aimreme hã ĩpara ma rob'uiwẽ'wa. Duré te te ĩma 're ibâdâdi uiwẽ mono 'wa.

Provébiu 6:23

E marĩ wa. Isimiroti zahuré zé hã rob'uiwẽzém ne te aima 're hâimana. Duré isimiwaihu'u zahuré zé hã 're idahâimana wẽ za'ra mono waihu'uzéb da, te aima 're hâimana.

Mateu 4:16

te uburé robra na 're dahâimana za'ra. Tane nherẽ, te za oto taha 'remhã rowa'a za'ẽne hã da te 're 'madâ'â za'ra. Te za oto duré dama rowa'a, dapẽ'ẽ 're robra na 're idanomro mono norĩ ma hã.”

Zuwã 5:39

A norĩ wa'wa hã te ãne asima 're irowasu'u za'ra wa'aba mo: “Wa norĩ hã wa wa te 're sõré u'âsi za'ra, 'Re ihâimana u'âsi mono mreme ui'éré hã. Tahawa, wa za ãma wasina uwaimrami za'ra ni, 're idanomro u'âsi mono zé hã.” Ãne te asima 're irowasu'u za'ra wa'aba mo. Ta hã te ĩwasu'u, 'Re ihâimana u'âsi mono mreme ui'éré hã. 'Re sõré u'âsi za'ra wa'aba mono nherẽ, asima 're ĩwẽ za'ra wa'aba mono õ di, 're ĩzaze za'ra wa'aba mono da hã. 'Re ĩzaze za'ra wa'aba mono 'wa'âhã, wa aré aima pisutu za'ra wa'wa, 're idanomro u'âsi mono zé hã asina uwaimrami za'ra wa'aba da.

Zuwã 8:12

Tawamhã Zezusi te duré dama tinha, ãne: — Wa hã uburé dama rob'uiwẽ'wa na wa ĩsiwasu'u. Ĩnhimiroti zarina 're danomro mono wamhã, dawasété na 're danomro mono õ di za, robra na. Rowa'a na si te za ĩ'ãma 're danomro u'âsi, rowẽ na.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:29

‘Danhimizama hã romhâiba 'manharĩ ãma 're dawata za'ra mono da, da te 're isimroi mono nhi hã 're huri aba mono õ di za. Duré iwapru hã 're âhuri aba mono õ di za. Duré danhimizama da te 're isõ'reti za'ra mono nhi hã 're huri aba mono õ di za. Duré siwa'ru aihâimanazé iwasédé hã 're 'manharĩ za'ra wa'aba mono õ di za, pi'õ na aibâ na zama.’ Ãne na si wanhimiroti za'ra hã, aima za'ra wa'aba hã. Ãne na wanhimiroti zarina 're anomro aba mono wamhã, aima 're rowẽ za'ra wa'aba mono di za. Wa ãma asawi za'ra wa'aba ni, irẽme ma.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:11

Beréa ãma 're isi'ubumroi mono norĩ nhimirosa'rada hã, wẽ di. Tesalonita ãma 're isi'ubumroi mono norĩ nhimirosa'rata nei õ di. Zezusihi wasu'uwẽ hã ma tô wapari pese za'ra. Awẽ sidâpâsi, ma tô 'Re ihâimana u'âsi mono zadawa wasu'u na rob'ui'éré 'rada hã da te 're sõré za'ra, Paulu norĩ nhimirowasu'u hã tô sena zô da te ãma 're rosa'rata pese za'ra mono da.

Hebreu 2:2

Duréihã 'Re ihâimana u'âsi mono nhimiroti hã, hâiwa ãma tãma iromhuri'wa norĩ hã wahi'rata norĩ ma, te te iwaihu'u za'ra zé hã tô sena na 're ihâimana mono na ma tô da te 're waihu'u za'ra. Duré ni'wam norĩ hã õhõ si te te 're 'madâ'â za'ra mono õ wa, duré isarina si 're nomro wẽ mono õ wa, ma tô 'Re ihâimana u'âsi mono hã isimi'manharĩ za'ra zéb zarina si te te 're hâ za'ra.

Tiagu 2:8

Ibaihâ na te tihâiba, Danhib'apito uptabi nhimiroti hã 'Re ihâimana u'âsi mono nhimiroti hã. Isimiroti hã ãne: “Dahâiba mono bâ te za 're idazawi pese za'ra wa'aba mo. Taha zarina marĩ iwẽ zô, asima 're asõpré wa'aba mono ne, te za duré uburé iwẽ zô dama zama 're asõpré wa'aba mo.” Ãne ãma irob'ui'éré hã, ibaihâ na hã. Tawamhã ãne na isimiroti hã 're 'madâ'â pese za'ra wa'aba mono wamhã, wẽ di.

1 Pedru 1:10

Duréihã aibâ norĩ hã te 're hâimana za'ra, 'Re ihâimana u'âsi mono zadawa 'mahârâ 'rata 'wa hã. Ta norĩ hã danho'reptuzé wasu'u te te waihu'u pese za'ra da, ma tô te te sô 're rosa'rata za'ra. Iwana ré ma tô te te dama 're rowasu'u siromo za'ra, danho'reptuzém na, 'Re ihâimana u'âsi mono za te te aima ãma 're i'a'uwaimrami za'ra wa'aba mono zém na.

1 Zuwã 5:10

Ni'wam norĩ hã, Zezusi, 'Re ihâimana u'âsi mono 'ra hã te te sina 're umnhasi za'ra mono wamhã, ta norĩ si te za tipẽ'ẽ na sena na te te 're waihu'u za'ra, â na ipotozé wasu'u na, duré iwapru, tiwi ipu'uzé wasu'u na. 'Re ihâimana u'âsi mono pẽ'ẽzani te te tãma 're i'awaihu'u mono zéb zarina si, te za sena na te te 're waihu'u za'ra, a'uwẽ hâiba na ipoto na, Zezusi hã. Tane nherẽ, ti'ra na Zezusi te te dama 're iwaihu'u mono zém na, ni'wam norĩ hã 'Re ihâimana u'âsi mono hã te te ãma 're saze za'ra mono õ wamhã, isadawa nhipe hã te te ãma 're sa'ra za'ra, ta norĩ hã.

3 Zuwã 1:6

Ta norĩ hã ma tô asimizawi pese zém na we te te 're aiwasu'u za'ra, ãme isazei'wa norĩ 're isi'rã'õtõ mono norĩ nho'a. Isazei'wa norĩ hã darob amoi hawi atẽme 're isihutu mono norĩ hã, aihawi nimomo 're nomro mono õ ré, marĩ na ãma 're aiwãrĩ za'ra mono wamhã, wẽ di, ubana 're nomro tõ mono da. Wẽ uptabi di. 'Re ihâimana u'âsi mono te te aima 're i'awẽ mono zéb zarina si te za ãma 're aiwãrĩ za'ra mo.

Apocalipsi 2:28

Duré awẽ u, wasi wawẽ 're ro'o pese mono ré, da'ãma 're i'awẽ za'ra mono ne, wa za romhâimanazép té, te tãma 're apisutu, rowẽ hã.

Apocalipsi 22:16

Tawamhã Zezusihi mreme hã wa tô duré wapa. Ãne te ĩma tinha: — Wa hã Zezusi, wa tô hâiwa ãma ĩma romhuri'wa hã we atẽme satõ, ã hã te i'awaihu'u mono hã te te aima awaihu'u mono da, 'ri nho'õmo mono bâ ĩzazei'wa norĩ, siré 're isi'rã'õtõ u'âsi mono norĩ ma, awaihu'u mono da, isipai u. Wa hã apito Dawihi nhihudu, za isine ĩpire na te 're ida'ab'madâ'â mono. Wa hã awẽ u, wasi wawẽ 're ro'o pese mono ré, da'ãma 're i'awẽ za'ra mono ne, wa za romhâimanazép té, te dama 're apisutu, Ĩmama nhib'a'uwẽ norĩ ma.