2 Pedru 1:1 - ꞌRe Ihâimana Uꞌâsi Mono Zadawa Wasuꞌu

¹ Wa hã Sima Pedru, Zezu Cristuhu ma romhuri'wa, duré isadawa wasu'u'wa, wa ãma aima rob'ui'éré za'ra wa'wa, wasiré isazei'wa 're i'anomro aba mono norĩ ma. Wanhib'apito 'Re ihâimana u'âsi mono hã wẽ uptabi di. Duré wa'anho'reptui'wa Zezu Cristuhu zama wẽ uptabi di. Wẽ uptabi zahuré wa, ma tô te te 're aipawaptob za'ra wa'wa, wasine asina 're umnhasi za'ra wa'aba mono da, te te 're asõ'reptu za'ra wa'aba mono da.

2 Pedru 1:1 ပူးပေါင်းရင်းမြစ်များ

Mateu 10:2

Isisi za'ra hã, ãne: Sima, isisi amo hã Pedru na. Duré ino nhisi hã Ãdré na. Duré Tiagu, duré isisãnawã, Zuwã. Ta norĩ hã Zebedehe 'ra zahuré.

Mateu 4:18

Tawamhã Zezusi hã Galiléa na isõ'u nhisi zaihâi baba 're morĩ wamhã, ma tô aibâ norĩ hã sãmri zahuré, tepe mrami na romhuri'wa norĩ hã, tisisãnawãi me: Sima na isisi hã, Pedru na isisi amo hã. Duré ino hã Ãdré na isisi hã. Isõ'ui wa, te nasi ta norĩ hã abazipara hã wabzuri zahuré, tepe zô.

Luca 1:47

— Wanhib'apito ãma, wa za 're ĩwata u'âsi. 'Re ihâimana u'âsi mono hã Ĩnho'reptui'wa, te 're mo. Tãma ĩwapure nherẽ, ma tô ĩ'ãma rosa'rata. Tahawa, ĩpẽ'ẽ na, wa 're ĩto. 'Re ihâimana u'âsi mono hã iwaihu'u pe hã, iwẽ uptabi hã iwẽ na ma tô ĩma 'manha. Tahawa, iwẽ na te te ĩma i'manharĩ wẽ na, te za dasima hã da te 're ĩwasu'u u'âsi.

Zuwã 1:42

Tawamhã ma tô Zezusihi u we saprõ apâ. We te te itẽme ãwisi wamhã, Zezusi te Sima hã 'madâ. Te tãma tinha, ãne: — A hã Sima, Zuwãhã 'ra. Ãhã na wa za asisi na oto ãma saprĩ. Cefasi na asisi hã za oto. Ãma isaprĩ na hã Pedru na isisi hã.

Zuwã 12:26

Duré ni'wam norĩ hã te te ĩma 're romhuri za'ra mono da, te te sima 're ĩwẽ za'ra mono wamhã, 're ĩmorĩzém na si te za 're nomro, ĩnhirã zarina si. Tawamhã ĩ'rata te za 're hâimana u'âsi za'ra, hâiwa ãma. Te te ĩma 're romhuri pese za'ra mono wa, te za Ĩmama hã ãma 're wata za'ra. Te za duré te te tãma 're wa'âbâ za'ra, isimiromhuri hã.

Zuwã 20:21

Tawamhã Zezusi te duré tãma nharĩ za'ra: — Rowẽ na 're aihâimana za'ra wa'aba mono. Ĩmama we te te datẽme ĩzatõrĩ ne, wa za duré datẽme asatõrĩ za'ra wa'wa isine.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:14

Sima Pedru, ma tô wama rowasu'u pari za'ra, 'Re ihâimana u'âsi mono, tinhoprum na zudeu'õ norĩ ãma isime na'rata zém na. Tinhib'a'uwẽ da, ma tô ni'wam norĩ si te te 're awaibu, zudeu'õ norĩ hã.

Roma 1:1

Wa hã Paulu, Cristu Zezusihi ma romhuri'wa, wa ãma aima rob'ui'éré za'ra wa'wa, Roma ãma 're aihâimana za'ra wa'aba mono norĩ ma. 'Re ihâimana u'âsi mono hã ma tô ĩpisutu, isadawa wasu'u na te tãma 're romhuri mono da, Zezusihi wasu'uwẽ hã te te wama 're i'awaihu'u mono hã te dama 're wasu'u u'âsi mono da, isadawa para.

Roma 1:12

Atẽme ãma ĩwisi za'ra wa'aba wamhã, wa za aihĩni wasipawaptob za'ra ni, Zezusi wa te 're isazei pese za'ra mono zém na, wanhiptete na ãma 're wanomro mono da.

Roma 1:17

Zezusihi wasu'uwẽ na hã e marĩ, wa za wa te ãma 're waihu'u za'ra. 'Re ihâimana u'âsi mono, da te 're saze za'ra mono wapsi, dawasédé hã te te oto da'ãma 're i'ab'madâ'â mono õ zarina, te te 're ida'awẽsãmri mono zé, taha wasu'u. Duréihã 'Re ihâimana u'âsi mono zadawa 'mahârâ 'rata 'wa hã ma tô ãne na ãma rob'ui'éré, ibaihâ na: “Ni'wam norĩ hã, 'Re ihâimana u'âsi mono te te 're saze za'ra mono wamhã, ta norĩ si te za te te 're awẽsãmri, 'Re ihâimana u'âsi mono hã, iwasédé hã te te oto ãma 're i'ab'madâ'â mono õ zarina, po're'õ nherẽ, te te 're hâ za'ra mono tõ da. Ta norĩ si te za duré rowẽ u'âsi, ãma 're hâimana za'ra.”

1 Corĩtu 1:30

'Re ihâimana u'âsi mono nhimipisutuzéb zarina si, te oto Cristu Zezusihi ãma 're anomro aba mo. Cristuhu ãma si oto 're anomro aba mono wa, te tinhimirowaihu iwẽ hã te te aima 're waihu'u u'âsi za'ra wa'wa. Cristuhu dâ'âzém na si, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Taha zarina si, ma tô duré te te 're wa'apisutu, isib'a'uwẽ si oto tãma 're wahâimana wẽ za'ra mono da. Taha zarina si, ma tô duré wawasété hawi wa'anho'reptu, sitẽme te te 're wa'awaibui mono da.

1 Corĩtu 15:9

Wa hã uburé ĩsiré Zezusihi zadawa wasu'u'wa norĩ zapari, wa 're ĩhâimana, tãma ĩwapu za'ra na. E marĩ wa. Te sazei õ ré, wa tô 'Re ihâimana u'âsi mono nhib'a'uwẽ ma, te tãma 're rob'manharĩ wasété u'âsi za'ra. Tahawa, ibâi õ di aré, isadawa wasu'u'wa na, da te 're ĩwaptẽrẽ za'ra mono zé hã.

1 Corĩtu 9:1

Ni'wam norĩ hã ma tô te te ĩ'ãma 're rosa'rata za'ra, Zezusihi zadawa wasu'u'wa, sena na dama 're ĩhâimana mono õ na hã. Tane nherẽ, a norĩ wa'wa hã ma tô ĩ'ãma iwaihu'u za'ra wa'wa, sena na isadawa wasu'u'wa na 're ĩhâimana mono zém na hã. Wa hã danhimiroti zarina, 're ĩhâimana mono õ di. 'Re ihâimana u'âsi mono si, ma tô ĩpisutu, Zezusihi zadawa wasu'u'wa na dama 're ĩhâimana mono zéb da hã, isadawa para. Wanhib'apito Zezusi hã wa tô duré 'madâ, ĩtõmo na. A norĩ wa'wa hã bété. E 'wa simiroti zarina, ma tô 're isaze za'ra wa'aba mo. Wanhib'apito ma, te ai'ãma 're iromhuri za'ra wa'aba mono zéb zarina, ma tô 're isaze za'ra wa'aba mo. Tawamhã e marĩ te wasu'u, ã hã, Zezusi hã te aima 're iwasu'u za'ra wa'aba mono zéb zarina, 're isaze za'ra wa'aba mono zé hã. 'Re ihâimana u'âsi mono nhimipisutuzéb zarina, wa hã tô sena dama Zezusihi zadawa wasu'u'wa, te aima ĩwasu'u za'ra wa'wa.

2 Corĩtu 4:13

Duréihã apito Dawi hã ma tô ãne na ãma rob'ui'éré: “'Re ihâimana u'âsi mono hã wa tô te ĩsina 're umnhasi, te te 're ĩpawapto mono da. Tahawa, ĩmreme ãna 're ĩhâimana waihu'u mono õ di. Wa tô te dama 're wasu'u u'âsi, isimiroti hã tô sena wa.” Ãne duréihã apito Dawihi nhimi'ui'éré, ibaihâ na hã. Tane duré wanhimirosa'rada hã. 'Re ihâimana u'âsi mono hã wa te wasina 're umnhasi pese mono wa, duré wa te 're sazei pese mono wa, wa isadawa wasu'u na wa te aima 're rowasu'u u'âsi za'ra wa'wa.

2 Corĩtu 5:21

Cristu hã ti'ai ãma 're morĩ ré, ma tô wasété ãna 're hâimana u'âsi. Tiwasédé hã te te 'manharĩ õ nherẽ, 'Re ihâimana u'âsi mono hã ma tô uburé wawasédé, wa te 're i'manharĩ za'ra mono zém na hâiba wati'i, wa'upana za'ra, Cristuhu ãma 're wanomro mono wa, te te oto 're iwa'awẽsãmri mono da hã.

Galata 2:8

'Re ihâimana u'âsi mono hã ma tô Pedru hã te te 're pawapto tiwaihu'u pese na, tisiré zudeu norĩ ma, Cristu hã te te tãma 're iwasu'u za'ra mono zéb da hã, ta norĩ u si te te satõrĩ wa. Tane duré wa hã tiwaihu'u pese na ma tô te te 're ĩpawapto, zudeu'õ norĩ ma, Cristu te tãma 're iwasu'u za'ra mono zéb da hã, ta norĩ u si te te ĩzatõrĩ na dâ'âsina, wa hã.

Éfézu 3:5

Zudeu'õ norĩ ãma te te sima irotizé hã te te dama waihu'u õ di aré, 'Re ihâimana u'âsi mono hã. Ãhã na si duréihé ma tô Cristuhu zadawa wasu'u'wa norĩ ma waihu'u, te te sima da'ãma irotizé hã, Tipẽ'ẽzani na ta norĩ ma te te iwaihu'uzéb zarina. Duré marĩ hã te te tãma iwaihu'u za'ra zéb zarina, dama isadawa wasu'u'wa norĩ ma zama, ma tô tãma waihu'u za'ra, te te sima da'ãma irotizé hã.

Éfézu 4:11

Cristu hã ma tô ni'wam norĩ hã pisutu za'ra, isadawa wasu'u'wa 're nomro mono da. Ni'wam norĩ ma, ma tô duré pisutu za'ra, marĩ te te tãma iwaihu'u za'ra zéb zarina, 'Re ihâimana u'âsi mono te te 're sadawa wasu'u za'ra mono da, isazei'wa norĩ ma. Duré ni'wam norĩ hã ma tô pisutu za'ra, iwasu'uwẽ na te te 're dapo're pu'u za'ra mono da. Duré ni'wam norĩ hã ma tô pisutu za'ra, dama rowahutu'wa da, isimiroti na te te 're dapawaptob za'ra mono da, ãma 're dahâimana wẽ za'ra mono da.

Éfézu 4:5

Õhõ si, te Danhib'apito 're hâimana. Misi te dama i'umnhasi uptabi 're hâimana, da te ãma 're isaze za'ra mono zéb da hã. Õhõ zadawa parap si, te â dawabzuri hã da te 're 'manharĩ za'ra.

Filipu 1:1

Wa hã Paulu, Timotiuhu me, Cristu Zezusihi ma romhuri'wa norĩ, wa ãma aima rob'ui'éré za'ra wa'aba ni, Filipu na 'ri nho'õmo nhisi ãma uburé 'Re ihâimana u'âsi mono nhib'a'uwẽ 're i'aihâimana za'ra wa'aba mono norĩ ma. Uburé Cristu Zezusihi ãma si 're anomro aba mono norĩ ma, wa ãma aima rob'ui'éré za'ra wa'aba ni, duré isazei'wa norĩ 'madâ'â'wa 're ihâimana za'ra mono norĩ ma zama, duré dapawapto'wa na 're ihâimana za'ra mono norĩ ma zama hã.

Filipu 1:29

Tinhoprubzéb zarina ma tô aima pisutu za'ra wa'wa, Cristuhu si asina 're umnhasi za'ra wa'aba mono da, Danho'reptui'wa na. Ma tô duré aima pisutu za'ra wa'wa, Cristu dama 're wasu'u za'ra wa'aba mono wa, da'ãma 're irobzépata za'ra wa'aba mono zém hawi, Cristuhu si da te 're saze za'ra mono da hã.

Filipu 3:9

Misi haré Cristuhu ãma si oto 're ĩhâimana mono da, wa tô ĩhâimanazéb 'rada hã 'râwi ĩsiwi wẽ'õ pese. 'Re ihâimana u'âsi mono nhimiroti na Mozési te te ãma irob'ui'éré hã, ĩsi'uihâ na te 're i'madâ'â pese mono na 'Re ihâimana u'âsi mono te te ĩwẽsãmri da, ĩsina 're ĩnhimipari mono õ di oto. Cristu hã te ĩsina 're i'umnhasi mono zéb zarina si, 'Re ihâimana u'âsi mono te te ĩwẽsãmrizéb ré si, wa oto 're ĩhâimana, taha si te te ĩpisutu wa oto.

2 Timotiu 1:5

Duré Wanhib'apito zazei'wa na tô sena 're aihâimana mono na, wa ai'ãma po're puru. Ai'rada Loidi norĩ hã ma tô ana me hã Wanhib'apito zazei'wa na 're hâimana zahuré, Eunisihi me. Ta norĩ ne, tô sena Wanhib'apito zazei'wa 're i'aimorĩ na hã, tô ĩma aiwaihu'u pese di.

Titu 1:1

Wa hã Paulu, 'Re ihâimana u'âsi mono ma romhuri'wa, duré Zezu Cristuhu zadawa wasu'u'wa 're ĩmorĩ, wa ãma aima rob'ui'éré. Zezu Cristu hã ma tô ĩpisutu, te te datẽme ĩzatõrĩ da, 'Re ihâimana u'âsi mono nhib'a'uwẽ norĩ u, te tãma 're apawapto mono da, Wanhib'apito umnhasi sina 're hâimana za'ra mono da, duré Wanhib'apito wasu'u wẽ na te 're apawapto mono da, ãma 're nomro wẽ mono da. Taha da, ma tô datẽme ĩzatõ.

Titu 1:4

Titu, tahawa, wa ãma aima rob'ui'éré. Te i'aipawaptobzéb zarina, wasiré Wanhib'apito zazei'wa 're aimorĩ wa, wa ĩ'ra na asisi, asawi te. Wamama ma, wa ai'ãma 're ĩmreme u'âsi, 'Re ihâimana u'âsi mono ma, duré Wanhib'apito Cristu Zezusihi ma zama, isimizawizé hã ai'ãma 're hâimana u'âsi mono da, rowẽ u'âsi, ãma 're aimorĩ da.

Titu 2:13

Ãne wa za 're wanomro, Wa'anho'reptui'wa zô wanhimipari sina. Wa za rowẽ u'âsi 're wahâimana za'ra, wasina 're wanhimipari za'ra mono sina. Rowa'a za'ẽtẽ ré, apâ wei morĩ wapsi, wa za watõmo na 'madâ'â za'ra ni, danhipai u 're ihâimana mono hã, Wanhib'apito Zezu Cristu hã.

Tiagu 1:1

Wa hã Tiagu, 'Re ihâimana u'âsi mono ma romhuri'wa, duré Wanhib'apito Zezu Cristuhu ma romhuri'wa, wa 're mo. Uburé 'Re ihâimana u'âsi mono nhib'a'uwẽ norĩ, daro mono bâ 're aihâimana za'ra wa'aba mono norĩ hã, wa za ĩnhimi'ui'éré na ãma asawi za'ra wa'wa.

1 Pedru 1:1

Wa hã Pedru, Zezu Cristu nhimipisudu, isadawa wasu'u'wa na 're ĩmorĩ da. Ãhã na wa za ãma aima rob'ui'éré za'ra wa'wa, 'Re ihâimana u'âsi mono nhib'a'uwẽ norĩ ma. Airom nhiti te dawazari 're aihâimana za'ra wa'aba mo, danhipti'a nho'õmo mono bâ, Põtu ãma, duré Galasia ãma, duré Capadosia ãma, duré Azia ãma, duré Bitinia ãma.

1 Pedru 1:7

Wanhib'apito umnhasi sina 're aihâimana za'ra wa'aba mono zô, te za rowasédé hã asada 're hâimana za'ra wa'wa. Wanhib'apito Zezu Cristuhu ma, wẽ di, Wanhib'apito umnhasi sina 're i'aihâimana za'ra wa'aba mono zé hã. Ẽtẽ waipo pré oru hã dama isawi pese zém nhipai u, tãma wẽ di. Ẽtẽ waipo pré oru hã wa'âbâ za'ẽtẽ wa, dama sawi pese di, ta hã dama 're hâimana u'âsi mono dai õ nherẽ. Zata õ zô, te za unhama wa hiri ni, zata õ wa, da te iwaihu'uzéb da hã, oru uptabi na. Tane, a norĩ wa'wa hã rowasédé hã asada 're hâimana za'ra wa'aba mono nherẽ, Wanhib'apito umnhasi sina 're aihâimana u'âsi za'ra wa'aba mono wamhã, apâ wei morĩ wapsi, te za danho'a ai'ãma tiwata za'ra wa'wa, õhõ umnhasi sina ãma 're i'aihâimana u'âsi za'ra wa'aba mono zém na. Tame te za duré marĩ hã iwẽ hã aima sõmri za'ra wa'wa. Rowẽ uptabi hã te za duré aima pisutu za'ra wa'wa. Tawapsi, aima 're rowẽ uptabi za'ra wa'aba mono di za oto.

1 Pedru 2:7

Ẽtẽ na isisi hã aima sawi uptabi za'ra wa'aba di, Cristu hã, Danho'reptui'wa na asina 're umnhasi za'ra wa'aba mono wa. Da te dasina 're i'umnhasi za'ra mono õ norĩ ãma, ma tô 'ri'wa norĩ ãma simiré'é, 'Re ihâimana u'âsi mono zadawa 'mahârâ'wa hã. Ãne te ta norĩ ãma rowasu'u: “Ẽtẽ tomhâpâ wẽ, 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô pire uptabi na hã 're sa'wari u'âsi.”

1 Pedru 5:1

Da'madâ'â'wa norĩ, ãhã na wa za aima ĩsiwasu'u za'ra wa'wa. Wa hã da'madâ'â'wa, wa duré 're ĩhâimana. Cristu hã te te robzépata wamhã, wa tô ĩtõmo na 'madâ, te te irobzépatazé hã. Wa hã wa za duré isazei'wa norĩ siré, rowẽ uptabi hã ĩsina waihu'u hâiwa ãma, rowẽ uptabi hã sõ'awi te te wama pisutu za'ra wapsi, Wanhib'apito hã.

2 Pedru 1:4

Ãne zarina, te te wama 're i'aropisutu mono zéb zarina, ma tô marĩ iwẽ hã wapẽ'ẽ 're, te te wama 're anhomri, sa'ẽtẽ na. Wama wẽ uptabi di, wama 're isõprub za'ra mono zé hã. E marĩ da, ma tô wama 're sõprub za'ra. Isine wahâimana wẽ na oto ãma 're wahâimana za'ra mono da. Ãne wamhã, isazei'õ'wa norĩ ne, wawasété zô 're wasiwasutu u'âsi za'ra mono õ di za, wawasété na 're wahâimana za'ra mono da hã.

Zuda 1:1

Wa hã Zuda, Zezu Cristuhu ma romhuri'wa, Tiaguhu no, wa aima ãma rob'ui'éré za'ra wa'wa. 'Re ihâimana u'âsi mono hã ma tô te te 're aipisutu za'ra wa'wa, isib'a'uwẽ na oto tãma 're aihâimana za'ra wa'aba mono da. Tahawa, tãma asawi pese za'ra wa'aba di, Wamama ma hã. Duré Zezu Cristu hã te te oto 're ai'madâ'â pese za'ra wa'wa.