2 Corĩtu 9:2 - ꞌRe Ihâimana Uꞌâsi Mono Zadawa Wasuꞌu

² E marĩ wa. Zudéa ãma isazei'wa norĩ hã asiwi pawaptob za'ra wa'aba da, asi'uihâ na ato sina, ãma asima rosa'rata za'ra wa'aba wa. Ãne na, wa tô wa hã ãma aiwaihu'u za'ra wa'wa, tô sena na. Ãme Masédonia ãma isazei'wa norĩ 're ihâimana za'ra mono norĩ ma, wa tô aiwasu'u wẽ za'ra wa'wa. Ãne, wa tô ta norĩ ma hã tãma aiwasu'u wẽ za'ra wa'wa: “Ataza ãma isazei'wa norĩ hã ma tô rob'uiprazé ubumro na sãna'rata za'ra, wahub 'rata na hã.” Ãne na, wa tô tãma aiwasu'u wẽ za'ra wa'wa. Rob'uiprazé hã ato sina, asiwi i'ubumro siromo za'ra wa'aba zéb zarina, ma tô ta norĩ zama sima ãma rosa'rata za'ra, to sina, aiwa asine wa'aba, te te siwi 'manharĩ wẽ da, aiwab da.

2 Corĩtu 9:2 ပူးပေါင်းရင်းမြစ်များ

Zezusihi zadawa wasuꞌuꞌwa norĩ nhimiromhuri na robꞌuiꞌéré 18:12

Tawamhã Galiu hã ma tô si'apito, Ataza na danhipti'a nho'õmo nhisi ãma. Romanu norĩ ma, roti'wa zadawa para, ma tô si'apito, tame te te dama 're roti mono da. Tawamhã zudeu norĩ hã ma tô Pauluhu zada si'rã'õtõ. Tahawa, ma tô siwi ti'â, da'ãma rowairébé'wai u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 24:17

Te duré tãma siwasu'u, ãne: — Zeruzalẽ nhiti 're ĩmorĩ ré, ma tô ĩ'ãma tiwahub ahâ. Tawamhã tamomo wa oto apâ mo, danhibzari hã te âri da, ĩsiré norĩ ma, te sõmri da. Duré danhimizama hã da te isimro hã 'Re ihâimana u'âsi mono ma, te sõmri da, ãma ĩwata da, wa tô apâ mo.

Roma 15:26

Masédonia na danhipti'a nho'õmo nhisi ãma, duré Ataza na danhipti'a nho'õmo nhisi ãma, zudeu'õ isazei'wa na oto 're ihâimana za'ra mono norĩ hã ma tô sima wẽ za'ra, rob'uiprazé hã te te siwi ubumro da, Zeruzalẽ ãma isazei'wa norĩ te te siwi ãma pawaptob za'ra da, simarĩ ãna 're ihâimana za'ra mono norĩ hã, zudeu norĩ hã. Ta norĩ nhoprub za'ra zé hã, ĩsi'uihâ na te tãma âri za'ra da Zeruzalẽ u, taha da, wa za a'â tamomop si hã mo.

1 Corĩtu 16:15

Estéfanasihi ãma, wa za oto aipo're pu'u za'ra wa'wa, isõrõwa ãma isiré 're ihâimana za'ra mono norĩ ãma zama. Ta norĩ hã ma tô sazei 'rata za'ra, Ataza na danhipti'a nho'õmo nhisi ãma, 're isi'ubumroi mono norĩ hã. Ta norĩ hã, 'Re ihâimana u'âsi mono nhib'a'uwẽ 're ihâimana za'ra mono norĩ hã simi'ẽ na te te 're pawaptob u'âsi za'ra mono da si, ma tô 're si'madâ'â za'ra. Ãne hã aima waihu'u pese za'ra wa'aba di. Tahawa, ĩsisãnawã norĩ, ta norĩ nhimiroti hã te za 're i'madâ'â pese za'ra wa'aba mo, isiré norĩ hã simi'ẽ na te te 're iromhuri pese za'ra mono norĩ nhimiroti zama.

2 Corĩtu 1:1

Wa hã Paulu, wa ãma aima rob'ui'éré za'ra wa'wa, Corĩtu ãma, iwasu'uwẽ u 're asi'rã'õtõ aba mono norĩ ma, asiré. Uburé Ataza na danhipti'a nho'õmo nhisi ãma, 'Re ihâimana u'âsi mono nhib'a'uwẽ 're aihâimana za'ra wa'aba mono norĩ ma zama, wa ãma aima rob'ui'éré za'ra wa'wa. 'Re ihâimana u'âsi mono hã ma tô ĩpisutu, Cristu Zezusihi zadawa wasu'u'wa na isadawa para dama 're ĩhâimana mono da, daro mono bâ, te te sima ĩwẽzéb uwaibaba. Wano hã te duré ãma ĩzadawa wapto, uburé te aima ãma irowasu'u za'ra wa'aba zém na hã, Timotiu na wano nhisi hã.

2 Corĩtu 7:14

Titu hã ãma atẽme morĩ aba õ ré, wa tô tãma aiwasu'u wẽ za'ra wa'wa, isõwa, te te aiwaihu'u siromo za'ra wa'aba da. Tahawa, taré te ãma tãma ai'umnhasi baba za'ra wa'aba õ di, isõwamhã. Wa norĩ hã wazadawa nhipese ãna, wa tô wanhimirowasu'u wẽ na si, wa te aima 're rowasu'u u'âsi za'ra wa'wa, tô sena na ãma 're iwawaihu'u za'ra wa'aba mono zéb da hã. Taha zarina, Tituhu ma, wa te i'aiwasu'u wẽ za'ra wa'aba zém na hã, tô sena na te za taha zarina si oto da te 're aiwaihu'u za'ra wa'wa, a norĩ wa'wa hã.

2 Corĩtu 7:4

A norĩ wa'wa hã ĩma ai'umnhasi za'ra wa'aba di oto. Wa aima 're ĩtoi u'âsi za'ra wa'wa. Aiwasu'u wẽ wa'aba na, ma tô asina ĩma 're irowẽ zani za'ra wa'aba mo. Rowasédé hã wazada 're wairébé u'âsi mono nherẽ, wa ĩtoi uptabi na 're ĩhâimana u'âsi.

2 Corĩtu 8:10

Ĩnhimirosa'rada hã wa za oto aima waihu'u za'ra wa'wa, rob'uiprazé asiwi i'ubumroi wa'aba zém na hã. Wahub 'rata na ma tô dawana asima ipisutu za'ra wa'wa, rob'uiprazé hã asiwi i'rã'õtõ aba zéb da hã. Dawana ma tô duré rob'uiprazé ubumro na ãma isãna'rata za'ra wa'wa. Tahawa, ma'ãpé asiwi uprosi wẽ wa'aba, rob'uiprazé ubumro hã. Ato sina, ãma asisaze za'ra wa'aba ne, te za oto ãhã na hã ãma i'uwaimrami za'ra wa'wa duré, rob'uiprazém na hã, aihâiba mono bâ aima 're ihâimana za'ra wa'aba mono zéb zarina, niha wamhã, isa'ẽtẽ zarina, niha wamhã, duré isuru zarina.

2 Corĩtu 8:19

Duré dama simiromhuri wẽ uptabi wa, ma tô isazei'wa norĩ hã siwi pisutu, Zeruzalẽ u isazei'wa norĩ nhoprubzéb ré, za iwasi'aba'ré siré, ãma wasiré morĩ da. Tawamhã Wanhib'apito ãma wawatazéb da, wa za tô ãne hã 'manharĩ ni, duré wato sina, wa te 're ida'apawapto mono zém na, da te wawaihu'u za'ra da.

2 Corĩtu 8:24

Tahawa, ma'ãpé iwẽ na si uburé marĩ na hã ãma tãma uwaimrami za'ra wa'aba za, asimizawi pese za'ra wa'aba zém na te te aiwaihu'u za'ra wa'aba da, duré sena na, wa te dama 're i'aiwasu'u wẽ za'ra wa'aba mono zém na, te te aiwaihu'u za'ra wa'aba da. Duré ãme isazei'wa norĩ, siré 're isi'rã'õtõ mono norĩ hã, ãne na te te aiwaihu'u za'ra wa'aba da, te za iwẽ na si tãma ãma i'uwaimrami za'ra wa'wa za.

2 Corĩtu 8:8

Ãne hã wa hã te ãma aima 'ru za'ra wa'aba õ di. Taré wa aima ãma roti za'ra wa'wa, ĩnhimiroti zarina, 'manharĩ za'ra wa'aba wamhã, 're idazawi pese za'ra wa'aba mono zém na, sena na da te 're aiwaihu'u za'ra wa'aba mono da. Masédonia ãma isazei'wa norĩ hã simi'ẽ na te te 're idapawaptob za'ra mono ne zô pé, wa ãne na taré ãma aipibu za'ra wa'wa.

1 Tesalonita 1:7

Taha na a norĩ wa'wa hã ma tô duré dama ãma asanho za'ra wa'wa, aihĩni isazei'wa norĩ, Masédonia na danhipti'a nho'õmo nhisi ãma 're isi'ubumroi mono norĩ ma, duré Ataza na danhipti'a nho'õmo nhisi ãma 're isi'ubumroi mono norĩ ma zama.

Hebreu 10:24

Wa za duré wasi'ãma hã 're wapo're pu'u u'âsi za'ra, marĩ na 're iwasipawaptob za'ra mono zéb da na, duré taha zarina 're iwasisawi pese za'ra mono zém na wa te wasima ãma 're i'uwaimrami za'ra mono zéb da na, duré marĩ wẽ na wa te wasima ãma 're iwa'rãmi wẽ za'ra mono zém na da zama.