Taré asimizawizé hã aima 're hâimana za'ra wa'aba mono tõ da, te za tô sena na asimizawi pese zé hã aima 're hâimana u'âsi za'ra wa'wa. Uburé marĩ wasété nhiti, te za 're aihâimana za'ra wa'aba mo, asiwi 're wẽ'õ pese za'ra wa'aba mono sina. Uburé aihâimanazé iwẽ na si te za oto 're aihâimana za'ra wa'aba mo.
2 Corĩtu 6:6 - ꞌRe Ihâimana Uꞌâsi Mono Zadawa Wasuꞌu6 Ãne na, wa te 're robzépata za'ra mono nherẽ, wa tô 're wanomro wẽ u'âsi. 'Re ihâimana u'âsi mono nhimirowaihu'u si, wa tô oto wa te 're waihu'u pese za'ra. Tahawa, wawara sina hã duré oto dazada 're wazahi za'ra mono õ di oto. Wanhimizawi pese na si hã, wa oto duré 're wahâimana za'ra. 'Re ihâimana u'âsi mono pẽ'ẽzani nhimipawaptobzéb zarina si, wa duré wa te dama 're romhuri za'ra. Wazadawa nhipese ãna, wa sena na si, wa te 're dazawi pese za'ra. Ãne zarina, te za asiwi iwawaihu'u za'ra wa'wa, sena na 'Re ihâimana u'âsi mono zadawa 'mahârâ'wa, dama 're iwahâimana za'ra mono na hã. အခန်းကိုကြည့်ပါ။ |
2 Corĩtu 6:6
41 ပူးပေါင်းရင်းမြစ်များ
'Re ihâimana u'âsi mono pẽ'ẽzani hã tiwaihu'u pese na te te 're ĩpawapto mono zém na si, wa tô marĩ dama i'manharĩ waihu'u'õ hã te dama 're ab'manharĩ, zudeu'õ norĩ hã tô sena te te 're saze za'ra mono da, ta norĩ hã. Zeruzalẽ hawi, Iliriza u 're ĩmorĩ ré, wa tô daza'rui mono bâ te dama 're rowasu'u, Cristuhu wasu'uwẽ na hã.
'Re ihâimana u'âsi mono pẽ'ẽzani hã ni'wam norĩ si, te za te te 're pisutu za'ra, tô sena ta norĩ hã tinhimirosa'rata waihu'u pese na te te dama ãma 're roti wẽ za'ra mono da, hâiwa hawi dahâimanazém na rowaihu'u na hã. Ni'wam norĩ si, te za duré te te 're pisutu za'ra, rowaihu dama iwaihu'u'õ na, te te dama ãma 're roti wẽ u'âsi za'ra mono da.
E niha tawamhã, danhimizawi pese na, Cristuhu ãma za 're idahâimana za'ra mono zé hã. Isazei'wa norĩ hã simizawi pese na 're hâimana za'ra mono wamhã, marĩ na da'ãma 're wa'a su'u za'ra mono õ di za. Da'ãma 're ipẽ'ẽzé za'ra mono zarina, te za tô te te 're dapawaptob u'âsi za'ra, da'ãma 're isiwãrĩ za'ra mono na hã. Duré marĩ na 're si'ruiwapari za'ra mono õ di za. Duré tiwẽ na sina 're wata za'ra mono õ di za. Duré danhipai u pire na 're ihâimana za'ra mono na, 're si'madâ'â ze za'ra mono õ di za.
Duréihã 'Re ihâimana u'âsi mono zadawa 'mahârâ'wa hã ma tô ãhã wasu'u na ãma rob'ui'éré siro, ãne na hã: “E 'wa hã, Wanhib'apito nhimirosa'rada hã te te tiwi iwaihu'u da bâ bété. Duré e 'wa hã te te tãma iroti da bâ bété.” Tane nherẽ, wa tô wa norĩ hã Cristuhu nhimirosa'rada hã waihu'u pese za'ra ni, 'Re ihâimana u'âsi mono pẽ'ẽzani, wapẽ'ẽ 're, oto wama 're hâimana za'ra mono wa, te te wama 're i'awaihu'u mono zém na hã.
Zezusihi wasu'uwẽ, te aima 're wasu'u za'ra wa'aba mono wamhã, ti'ai ãma danhimirowaihu'u pese na da te dama 're iroti za'ra mono ne, te aima 're rowasu'u za'ra wa'aba mono õ di, ãma 're ĩzaze za'ra wa'aba mono da hã. 'Re ihâimana u'âsi mono pẽ'ẽzani hã tiwaihu'u pese na te te 're i'aipawaptob za'ra wa'aba mono na si, ma tô sena na 're isazei pese za'ra wa'aba mo, Zezusihi wasu'uwẽ hã.
Wa hã apâ ĩmorĩ wamhã, ãma atẽme ĩsipa za'ra wa'aba õ di tô, Corĩtu u hã. E marĩ wa. Marĩ hã 'manharĩ wasété za'ra wa'aba wa, te aihâ za'ra wa'aba tõ da, ãma atẽme ĩwisi aba õ di tô, apâ hã. Tô sena, wa ãne hã aima ĩsiwasu'u za'ra wa'wa, 'Re ihâimana u'âsi mono nho'a. Tahawa, ĩzadawa nhipese wamhã, 'Re ihâimana u'âsi mono te za tô ĩ'azâ pé niha hã wamhã.
Zezusihi wasu'uwẽ tô sena uptabi si, wa tô aré aima wasu'u za'ra wa'aba ni. Tawamhã taha wasu'u na, wa te aima irowasu'u za'ra wa'aba zéb zarina, ma tô isaze za'ra wa'wa. Taha zarina, ma tô duré asima iwẽ za'ra wa'wa, 'Re ihâimana u'âsi mono pẽ'ẽzani hã aipẽ'ẽ 're, aima 're hâimana u'âsi za'ra wa'aba mono da. Tane nherẽ, ni'wam norĩ hã Zezusihi wasu'uwẽ upana, tô senai'õ na te te aima 're rowasu'u za'ra wa'aba mono nherẽ, Wanhib'apito wasu'uwẽ ne, tô senai õ nherẽ, 'râwi asiwi 're wẽ'õ za'ra wa'aba mono õ di. Õne haré ma tô ãma 're isasõmri za'ra wa'aba mo. 'Re ihâimana u'âsi mono pẽ'ẽzani upana, ma tô ihâiba'õ mreme si asima 're iwẽ za'ra wa'aba mo.
Tawamhã ãma atẽme ĩmorĩ za'ra wa'aba wamhã, ĩto sina, wa za uburé ĩnhimarĩ hã uprosi, te ãma aipawaptob za'ra wa'aba da, te ãma i'âri hã za. Taha da, wa za duré aima romhuri pese za'ra wa'wa, ĩwasutu uptabi nherẽ. Ãne na hã ĩma asawi pese za'ra wa'aba nherẽ, e te za ãne wa'rãmi ĩzawi za'ra wa'aba ãna da hã ĩwi asisawi za'ra wa'wa.
Ãne wa, wa asiti ĩnhamra aba ré, aima ãma rob'ui'éré za'ra wa'wa, za ãma atẽme ĩwisi aba wa, asõ'a te aima nharĩ za'ra wa'aba tõ da, Wanhib'apito zadawa para te te ĩma ipisutuzéb zarina. Ma tô ĩma pisutu tô, isadawa para si te 're aipawapto wẽ za'ra wa'aba mono da. E tawamhã ĩnhimipawaptobzéb zarina, ãma 're anomro wẽ wa'aba mono zé hã te aiwi 're uprosi za'ra wa'aba mono da, ma tô ãne hã ĩma pisutu. Mare di. Taré isadawa para si, te 're aipawapto wẽ za'ra wa'aba mono zéb zarina, asiptete sina ãma 're anomro aba mono da si, ma tô ĩma pisutu tô, Wanhib'apito hã.
A norĩ wa'wa hã, dawasédé da te 're i'manharĩ za'ra mono zém na hã oto da'ãma 're 'madâ'â za'ra wa'aba mono tõ da, asima 're pisutu za'ra wa'aba mono wamhã, ĩzama te oto da'ãma 're ab'madâ'â mono õ di za tô. Tahawa, aibâ hã tiwasédé ipire hã tô sena te te 'manharĩ wamhã, wa za tô ĩsima pisutu, asarina wa'aba, iwasédé hã te oto ãma 're 'madâ'â tõ mono da, simisutu ato sina asiré 're aihâimana za'ra wa'aba mono da apâ. Cristuhu nho'a, wa ãne na hã aima ĩsiwasu'u za'ra wa'wa, iwasédé hã za te oto ãma 're i'madâ'â mono õ na hã, aibâ ãma.
Te ãma aima rob'ui'éré 'rata za'ra wa'aba wamhã, wa tô ai'ãma robzépata za'ẽtẽ za'ra wa'wa, ĩpẽ'ẽ 're. Ãne wa, ĩpẽ'ẽzé uptabi di. Tahawa, wa tô duré aiwa'õ. E tawamhã, aiwi robzei'õ za'ra wa'aba da, wa tô ãne na hã ãma aima rob'ui'éré za'ra wa'wa. Mare di. Ãne da hãi õ di. Ĩma asawi uptabi za'ra wa'aba zém na asiwi ĩwaihu'u za'ra wa'aba da si, wa tô ãne na hã ãma aima rob'ui'éré za'ra wa'wa.
Wanhimiromhuri zarina si, Cristu hã 're saze za'ra wa'aba mono wa, te taha na si da te 're wawaihu'u, Cristuhu zadawa para si, wa te dama 're iromhuri mono zém na hã, danhimirob'ui'éré hã da te 're sõré za'ra mono wa, marĩ hã da te ãma 're iwaihu'u za'ra mono ne. Tane nherẽ, marĩ na da te 're irob'ui'éré za'ra mono zéb zarina, 're saze za'ra wa'aba mono õ di, a norĩ wa'wa hã. 'Re ihâimana u'âsi mono hã isi'utõrĩ'õ pẽ'ẽzani nhimipawaptobzéb zarina si, ma tô 're isaze za'ra wa'aba mo. E ẽtẽ tõmo baihâ na rob'ui'éré zarina, ma tô 're isaze za'ra wa'aba mo. Mare di. 'Re ihâimana u'âsi mono pẽ'ẽzani hã marĩ hã aipẽ'ẽ 're te te aima 're iwaihu'u za'ra wa'aba mono zéb zarina si, ma tô oto 're isaze za'ra wa'aba mo, Cristu hã.
Duréihã ropoto na'rata hawimhã, 'Re ihâimana u'âsi mono ma tô tinha, ãne: “Ãhã na hã robra si 're asa'wari mono nherẽ, oto airowa'a na.” Ãne te tinha. Tane ma tô duré wapẽ'ẽ 're, te te wama 're arowa'a oto, isadawa wasu'u hã wa te oto ãma 're iwaihu'u pese za'ra mono zéb da hã. Cristu hã ma tô wama waihu'u za'ra, Imama 're imorĩ wẽ uptabi na hã.
Ma'ãpé, asiwi 're wazawi wẽ za'ra wa'aba mono, apâ 're wawaibui wẽ wa'aba mono da. Ni'wam norĩ hã asiré 're hâimana za'ra wa'aba mono nherẽ, ma tô wawasédé hã wa'ãma sa'ra. Tane nherẽ, duré wa te aima romhuri za'ra wa'aba ré hã, marĩ iwasédé hã wa te aima 'manharĩ za'ra wa'aba õ di, nimahã na hã. Duré wanhimiromhuri zarina, aihâimana wasété na 'râwimhã asi'marõpãrĩ za'ra wa'aba õ di. Duré rob'uiprazéb zô, marĩ taré, wa te aima 'manharĩ za'ra wa'aba õ di. Mare uptabi di.
Ma'ãpé we ĩma waihu'u za'ra wa'aba. E marĩ wa, ma tô 'Re ihâimana u'âsi mono hã Tipẽ'ẽzani hã we aima sõmri za'ra wa'wa, aipẽ'ẽ 're. E isimiroti 'rata na rob'ui'éré zarina, 're irob'manharĩ za'ra wa'aba mono zéb zarina, ma tô we Tipẽ'ẽzani hã aima sõmri za'ra wa'wa. Mare di. E Zezu Cristuhu wasu'uwẽ hã aipo're na wapari za'ra wa'aba pari, tô sena iwasu'uwẽ na asina 're saze za'ra wa'aba mono wa, ma tô we aima sõmri za'ra wa'wa. Ĩhe. Tahawa tô, ma tô we Tipẽ'ẽzani hã aima sõmri za'ra wa'wa, aipẽ'ẽ za'ra wa'aba 're, 're sãmra mono da oto.
Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.
Marĩ iwẽ na te za dama 're asõprub za'ra wa'aba mo, da'ãma 're aipẽ'ẽzé za'ra wa'aba mono sina. 'Re ihâimana u'âsi mono hã Cristu dazada dâ'â wa, te te ai'ãma 're 'madâ'â za'ra wa'aba mono õ di oto, 're i'manharĩ wasété za'ra wa'aba mono zé hã. Tahawa, a norĩ wa'aba ma, iwasédé hã da te aima 're 'manharĩ za'ra wa'aba mono nherẽ, isine dawasédé hã duré oto da'ãma 're 'madâ'â za'ra wa'aba mono õ di za.
'Re ihâimana u'âsi mono hã ma tô sima ãma roti, ãhã wasu'u hã iwẽ uptabi hã aré da te 're iwaihu'u za'ra mono õ hã te te oto dama awasu'u hâi'ré da sõ'awi, dapoto mono bâ da te oto 're waihu'u za'ra mono da, zudeu'õ norĩ zama. Ãhã wasu'u hã aré da te 're iwaihu'u za'ra mono õ hã, ãne: Cristu hã te oto aipẽ'ẽ 're, 're sãmra za'ra wa'wa. Tahawa, te za tô taha zô si 're asimipari za'ra wa'aba mo, 'Re ihâimana u'âsi mono, iwẽ uptabi hã za te te wama 're i'apisutu mono zô si. Ãne 'Re ihâimana u'âsi mono wasu'u hã, ã hã aré da te 're iwaihu'u za'ra mono õ.
Cristu hã rowasu'u dama iwaihu'u'õ na 'Re ihâimana u'âsi mono nhimiroti wẽ wasu'u waihu'u'wa, ta hã. Ẽtẽ'ubuzi iwa'âbâ za'ẽne hã ti'ai 'rowi 're simi'wara mono nherẽ, da te oto 're isõpẽtẽ za'ra mono ne, ma tô Cristu hã te te dama 're wasu'u hâi'ré sõ'awi, 'Re ihâimana u'âsi mono nhimiroti wẽ wasu'u hã.
A norĩ wa'wa hã 'Re ihâimana u'âsi mono nhib'a'uwẽ, te tô oto 're aihâimana za'ra wa'aba mo. Ta hã te te 're asawi pese za'ra wa'aba mono wa, ma tô sima aipisutu za'ra wa'wa, taha ma si tãma 're aihâimana za'ra wa'aba mono da oto. Tahawa, da te 're robzépata za'ra mono wamhã, te za tô oto da'ãma 're aiwamri za'ra wa'aba mo. Te za duré 're idapawapto wẽ za'ra wa'aba mo. Asiré norĩ ma, aipire na 're aihâimana za'ra wa'aba mono na, 'râwi 're asi'madâ'â ze za'ra wa'aba mono õ di za. Aiwaimri te za dama 're aihâimana za'ra wa'aba mo. Duré aiwara sina dazada 're asahi za'ra wa'aba mono õ di za.
A norĩ wa'wa hã ma tô iwawaihu'u za'ra wa'wa, asõ'a za'ra wa'aba, 're iwanomro mono zé hã. 'Re ihâimana u'âsi mono hã ma tô duré wawaihu'u za'ra, 're iwanomro wẽ mono zém na hã. Wawasédé hã wa te 'manharĩ za'ra õ di. Iwẽ na si wa tô wahâimana za'ra ni, asõ'a za'ra wa'aba. 'Re ihâimana u'âsi mono nhimiroti na hã duré ãma wasipa za'ra õ di. Ãne ãma 're iwanomro mono zé hã, tô ibâ na si.
Aihâiba prédu pese õ nherẽ, te za 're aimorĩ wẽ, aihâiba prédu pese õ wa, asimiroti na isazei'wa norĩ hã te te 're aiwẽ'õ za'ra mono tõ da. Te za dama 're asanho mo, aimreme wẽ na, duré dama aihâimana wẽ na, duré asimizawi pese na, duré asimirosa'rata wẽ na. Taha na, te za dama 're asanho u'âsi mo, asirã zarina 're nomro wẽ mono da, isazei'wa norĩ hã.
A hã ma tô ĩwaihu, ĩnhimiroti na, duré ĩhâimanazém na, duré dapawaptom na ĩnhimiromhuri na te ĩsina 're iroti mono zém na, duré Wanhib'apito umnhasi sina 're ĩhâimana mono zém na, duré da'ãma ĩwa'a su'u õ na 're ĩhâimana mono zém na, duré te 're ida'azawi pese mono zém na, duré marĩ ahâ na ĩzada 're hâimana mono nherẽ, Wanhib'apito ãma ĩsina ĩnhiptete sina 're ĩhâimana mono zém na zama. Ma tô duré iwaihu, da te ĩma 're irob'manharĩ wasété za'ra mono zém na hã, duré te 're irobzépata mono zém na hã. Ma tô duré iwaihu, marĩ hã ĩzô 're iwairébé mono zém na hã, Ãtioquia na 'ri nho'õmo nhisi ãma, duré Iconizu ãma, duré Risitira ãma. Ipipa na da te ĩ'ãma 're rob'manharĩ wasété za'ra mono wa, wa tô te 're robzépata za'ẽtẽ. Tane nherẽ, ĩdâ'â tõ da, ma tô Wanhib'apito hã nasi a'â ĩnho'reptu.
Hâiwa hawi dahâimanazém na rowaihu'u ré, 're dahâimana za'ra mono wamhã, te za dawasété ãna 're danomro. Roti wẽ na te za da te 're dapawaptob za'ra, rowẽ na dasiré 're dahâimana za'ra mono da. Duré danhimizawi pese na, te za 're danomro. Duré danhimipari pese na, te za 're danomro. Duré te za da'ãma 're dapẽ'ẽzé za'ra. Te za duré dasina 're dapẽ'ẽzé za'ra. Duré marĩ iwẽ na te za 're dasipawaptob za'ra. Duré danhimizawizé hã da te dama 're ba'a za'ra mono õ di za. Duré dahâimana zadawa nhipese na 're dahâimana za'ra mono õ di za.
'Re ihâimana u'âsi mono, ma tô duré ãne hã tãma waihu'u siromo za'ra: “Aima wa'aba si, te waihu'u za'ra wa'aba õ di, danho'reptui'wai wasu'u hã. Ai'uirĩ na wa'aba, za 're idahâimana za'ra mono norĩ pibu ma, wa tô ãne hã aima waihu'u siromo za'ra wa'wa.” Ãne ma tô tãma waihu'u za'ra, aipibu ma za'ra wa'aba zama. Wanhib'apito zadawa wasu'u'wa norĩ hã ma tô oto rowasu'uwẽ na aipo're pu'u za'ra wa'wa, Cristu te te 're ida'anho'reptui mono zém na. Hâiwa hawi, Wanhib'apito pẽ'ẽzani nhimipawaptobzéb zarina, tô sena Cristuhu wasu'uwẽ na ma tô aipo're pu'u za'ra wa'wa. Taha wasu'u hã wẽ uptabi wa, te oto hâiwa ãma romhuri'wa norĩ hã te te sima 're wẽ uptabi za'ra, te te 're waihu'u pese za'ra mono da.
Wanhib'apito nhimiroti hã, tô sena. A norĩ wa'wa hã ma tô isimiroti hã 're iwapari pese za'ra wa'aba mo. Tahawa, marĩ iwasété na asima 're rosa'rata za'ra wa'aba mono õ di oto. Aiwẽ na 're anomro aba mono da si, te oto asima 're irosa'rata za'ra wa'aba mo. Dazawizé hã tô sena te oto aima 're hâimana za'ra wa'wa, asiré Wanhib'apito zazei'wa norĩ ãma. Tahawa, te za õne u'âsi 're asisawi pese za'ra wa'aba mo.
ကြော်ငြာတွေ