2 Corĩtu 6:4 - ꞌRe Ihâimana Uꞌâsi Mono Zadawa Wasuꞌu4 A norĩ wa'wa hã, 'Re ihâimana u'âsi mono ma, wa te 're iromhuri za'ra mono zém na si, asiwi wawaihu'u za'ra wa'aba da, wa uburé marĩ hã wẽ na wa te 're 'manharĩ za'ra. E niha tawamhã, 're iwahâimana za'ra mono zé hã. Uburé marĩ na, wa te 're robzépata za'ra mono nherẽ, duré rowasédé hã wazada 're wairébé u'âsi mono nherẽ, wa wanhiptete sina ãma 're wanomro u'âsi, wa te 're sazei'õ utõrĩ za'ra mono ãna. အခန်းကိုကြည့်ပါ။ |
2 Corĩtu 6:4
48 ပူးပေါင်းရင်းမြစ်များ
Sasedoti norĩ, a norĩ wa'wa hã 'Re ihâimana u'âsi mono nhorõwa 'ri zahâpâ, tãma 're iromhuri za'ra wa'aba mono hã te za ai'ru'ru wa'wa. Te za duré tãma aimreme zusi 'wa ãne: “'Re ihâimana u'âsi mono, rob'manharĩ tõ, asib'a'uwẽ norĩ ma hã. Wasiré a'uwẽ'õ norĩ nho'remhã wanhiséb za'ra tõ da, waza'ré za'ra tõ, wa'ãma wa'ẽ za'ra sina, te te duré wazada nharĩ za'ra tõ da ãne: ‘E mahã, ate za'ra wa'wa 'Re ihâimana u'âsi mono.’ ”
Ãne na wa tô aima rowasu'u za'ra wa'wa, ĩ'ãma 're aihâimana za'ra wa'aba mono wa, rowẽ na 're aihâimana za'ra wa'aba mono da. Tane nherẽ, ĩzazei'õ'wa norĩ hã te za tô te te 're ai'ruiwapari u'âsi za'ra wa'wa. Tahawa, te za 're irobzépata za'ra wa'aba mo. Tane nherẽ, te za asiptete sina ĩ'ãma 're anomro aba mo. Wa hã ĩzazei'õ'wa norĩ ma, ĩnhiptete uptabi wa, wa tô ãma ai'uté za'ra.
Tawamhã Pedru hã ma tô duré ãma uzusi, tinhimirowasu'u na, ãne: — Wasiré Izaraéu nhihudu norĩ, ĩwapari pese za'ra wa'aba za. Zezusi hã Nazaré ãma aré 're isãmra mono hã, ta hã, 'Re ihâimana u'âsi mono zadawa para, ma tô te te 're da'apawapto, danho'a. Marĩ iwẽ hã dama i'manharĩ waihu'u'õ hã ma tô te te dama 're ab'manharĩ. Tô sena, õ hã 'Re ihâimana u'âsi mono zadawa para, te te dama 're i'ab'manharĩ mono zém na da te 're waihu'u za'ra mono da, ma tô Timama waihu'u pese zarina marĩ iwẽ hã te te dama 're ab'manharĩ. Ai'rata 're hâimana za'ra wa'aba mono wa, ma tô ãne na hã ãma asiwi i'madâ'â waihu'u 'wa.
Ni'wam norĩ hã te ãne na te te si'ãma 're rosa'rata upa za'ra: “Wa norĩ hã wahâimana wasété na si, wa za oto 're wahâimana za'ra, 're iwanomro wasété uptabi mono na, da te 're wawaihu'u za'ra mono wa, 'Re ihâimana u'âsi mono si wasété ãna 're imorĩ wẽ uptabi na, da te 're waihu'u za'ra mono da, wanhipai u. Tawamhã wahâimana wasété na 're wahâimana za'ra mono nherẽ, e te za te te 're wa'ahâ za'ra, 'Re ihâimana u'âsi mono hã. Mare di. Te te 're wa'ahâ za'ra mono õ di za.” Ãne te ni'wam norĩ hã te te si'ãma 're rosa'rata upa za'ra.
Tazahã, ãhã zarina si te za wa'ãma 're irosa'rata u'âsi za'ra wa'aba mo. Wa norĩ hã 'Re ihâimana u'âsi mono ma si, wa te 're iromhuri mono, wa 're wahâimana. Iwasu'uwẽ na, wa te aima 're irowasu'u za'ra wa'aba mono zéb zarina, te oto asina 're i'umnhasi za'ra wa'aba mo, Wanhib'apito hã. Ta hã te te wama ipisutuzéb zarina si, wa wa te tãma 're romhuri pese. Taha da si, wa wa norĩ hã 're wahâimana.
Wa hã Paulu, Apoluhu me, duré ni'wam norĩ me, wa Cristuhu ma si, wa te 're romhuri za'ra. Iwasu'uwẽ hã dama iwaihu'u'õ hã, i'uwaibaba si, wa te dama 're wasu'u za'ra mono da, ma tô wapisutu za'ra, 'Re ihâimana u'âsi mono hã. Taha na si, wanhimiromhurizéb za'ra hã. Tahawa, te za ãne na si wa'ãma 're irosa'rata za'ra wa'aba mo.
Tane duré, robzuri'wa norĩ hã ro ubuni ré te te 're irobzuri za'ra mono ne, wa tô Cristuhu wasu'uwẽ na wa te 're aipawaptom na'rata za'ra wa'wa. E tawamhã ãne hã ibâi õ di, aima za'ra wa'aba hã, wanhimipawaptobzé wa'rãmi, marĩ zô aiwi 're iwanhimnhasi za'ra wa'aba mono hã, wasazéb zô, ãma 're iwahâimana za'ra mono zéb da hã. Wa za tô 're wanhimnhasi za'ra, i'uwaibaba wa.
Cristuhu ma romhuri'wa na, te duré ta norĩ hã aima 're siwasu'u u'âsi za'ra wa'wa. Tane nherẽ, wa wa hã ta norĩ nhipai u, Cristuhu ma romhuri'wa na hã 're ĩhâimana. (Ãté ĩnhimiza'rese õ na 're ĩhâimana mono na, ĩ'ãma rosa'rata za'ra wa'aba da nherẽ, wa za tô ãne na aima ĩsiwasu'u za'ra wa'wa.) E marĩ wa, wa merẽ ta norĩ nhipai u Cristuhu ma romhuri wẽ 'wa na hã 're ĩhâimana. Wa tô te tãma 're romhuri pese uptabi, ta norĩ nhipai u. Dazazéb 're, ma tô da te dasiwi 're ĩzai u'âsi, ta norĩ 're ihâimana za'ra mono zém nhipai u. Ma tô duré da te dasiwi 're ĩ'ahâri u'âsi, powawẽ hânhorõ na, senai'õ na rowasu'u'wa norĩ hã da te dasiwi 're ihâ za'ra mono zém nhipai u. Ãne wa, wa tô aré 're ĩdâ'â u'âsi, te ĩsina 're romnhimimnhasi za'ẽtẽ mono wa.
Duré ãma 're ĩhâimana mono zéb da hã, wa tô te ĩsima 're romhuri pese, ĩnhib'rata na. Bâtâ ahâ na wa tô duré ĩnhotõ ãna hã ĩza'wari. Mram na zama hã te duré robzépata ahâ di, duré 'rubu na zama. Ĩsai ãna te 're iromhuri mono zém na hã, wa tô duré te 're robzépata. Ĩ'uza ãna 're ĩhâimana mono zém na zama, wa tô duré te 're robzépata.
Ai'rata ĩnhamra aba ré, asimarĩ zô, te aiwasutu za'ra wa'aba da, te nasi aiwi rowaptẽrẽ za'ra wa'aba õ di, marĩ zô ĩwi rowaptâ'â wamhã. Wasisãnawã norĩ si, ma tô uburé marĩ na siwi ĩpawapto, ãma ĩhâimana mono zéb da hã, Masédonia hawi, ãma ĩsiré isi'aba'ré norĩ hã. Tahawa, ai'rata ĩnhamra aba ré hã, ĩnhiwari na hã te nasi ropire hã aima 'manharĩ za'ra wa'aba õ di. Tane, wa za duré ĩhâimana, apâ ĩmorĩ na te sahu wamhã, ãma atẽme za'ra wa'aba.
Ĩsi'uihâ na marĩ da hã, ĩnhib'uware na 're ĩhâimana mono nherẽ, duré Cristuhu ma, te 're romhuri mono wa, da te ĩ'ãma 're wasété za'ra mono nherẽ, duré ĩma ropire na 're ĩhâimana mono nherẽ, duré da te ĩma 're rob'manharĩ wasété za'ra mono nherẽ, duré marĩ na te 're robzépata mono nherẽ, wa ĩto sina 're ĩhâimana u'âsi. E marĩ wa. Ĩsi'uihâ na marĩ da hã, ĩnhib'uware na 're ĩhâimana mono nherẽ, wa za taha wa'rãmi, ĩnhiptete sina 're ĩhâimana, Cristuhu nhimipawaptobzém na si.
Ni'wam norĩ hã 're simarĩ ahâ za'ra mono da si, te 'Re ihâimana u'âsi mono zadawa wasu'u na te te dama 're romhuri za'ra. Tane nherẽ, wa norĩ hã ta norĩ ne, 're wahâimana za'ra mono õ di. Duré marĩ aimawi zô, wa te wasima 're romhuri za'ra mono õ di wa norĩ hã, 'Re ihâimana u'âsi mono zadawa wasu'u na hã. Cristuhu waihu'u pese zarina si, wa tô wa te dama 're rowasu'u za'ra sena na, 'Re ihâimana u'âsi mono nho'a, ãne da, te te sima wapisutu za'ra wa, ta hã.
Taha si ma tô te te 're wapawapto, te te dama iropisutuzép téb zarina, wa te dama 're romhuri wẽ mono da. E niha tawamhã, 'Re ihâimana u'âsi mono te te dama iropisutuzép té hã. E 'Re ihâimana u'âsi mono nhimiroti 'rata na Mozésihi nhimi'ui'éré, te wasu'u, ã hã. Mare di. 'Re ihâimana u'âsi mono pẽ'ẽzani nhimipawaptobzéb zarina 're idanomro mono zép té, te wasu'u, ã hã. Mozésihi nhimi'ui'éré zarina 're danomro mono nherẽ, e taha zarina te za 're dasisõ'reptu za'ra, ropipa hawimhã. Mare di. Ni'wa hã te te sina uwaimrami waihu'u õ di, Mozésihi nhimi'ui'éré hã. 'Re ihâimana u'âsi mono te te dama iropisutuzép té hã da te 're saze za'ra mono wapsi, te za Ipẽ'ẽzani hã te te 're da'anho'reptu ropipa hawimhã, rowẽ na isiré 're dahâimana u'âsi za'ra mono da oto.
Ti'ab ré, wa za tô wa te 're robzépata a'â. Tane nherẽ, ta hã wama wapure di. E marĩ wa. Taha wa'rãmi, te za 'Re ihâimana u'âsi mono iwẽ uptabi na hã duré ipire uptabi na hã te te wama 're wa'âbâ, isi'utõrĩ'õ na. Ti'ab ré, wa te 're robzépata za'ẽtẽ mono nherẽ, taha nhipai u wẽ uptabi di za, iwẽ na te te wama iropisutu siromo zé hã.
Ni'wam norĩ hã asiré 're hâimana za'ra wa'aba mono nherẽ, ma tô wawasédé hã wa'ãma sa'ra za'ra, wahâimana nhipese sina dawi 're wahâimana mono newa. Uburé marĩ hã pi'uriwi da te 're i'manharĩ wasété za'ra mono zé hã, wa tô wa te wasiwi 're awẽ'õ. 'Re ihâimana u'âsi mono zadawa wasu'u hã, wa te dawi ãma 're 'wa'rutu mono õ di. Õhõ si, wa tô sõ'awi wa te dama 're wasu'u u'âsi, sena na, 'Re ihâimana u'âsi mono nho'a. Ãhã zarina, te za 'râwi dapẽ'ẽ na da te 're wawaihu'u za'ra, wazadawa nhipese ãna, 're iwahâimana mono zém na hã.
Ma'ãpé, ãne na ãma asipo're pu'u za'ra wa'aba, 'Re ihâimana u'âsi mono te te sima aiwẽ za'ra wa'aba zéb zarina, aiwi irobzei'õ pese za'ra wa'aba zém na hã. Taha zarina, ma tô oto asiwaihu'u za'ra wa'wa, uburé iwasédé hã 'râwi asiwi wẽ'õ pese za'ra wa'aba da. Tahawa, ma tô oto asima iwẽ uptabi za'ra wa'wa, aiwasédé hã 're i'manharĩ za'ra wa'aba mono zém na ĩma asiwasu'u za'ra wa'aba da, apâ asima ropese za'ra wa'aba da. Ma tô duré asiwẽ'õ pese za'ra wa'wa, aiwasédé hã aima ihâimana za'ra wa'aba zém na hã. 'Re ihâimana u'âsi mono nhimihâzém na, isadawa para ĩmreme na te aihâ za'ra wa'aba õ'umnhasite, ma tô ĩma aipahi za'ra wa'wa. Tane nherẽ, ma tô asima ĩwẽ za'ra wa'wa oto, apâ ãma atẽme ĩmorĩ aba da, wasisabu su'u za'ra da. I'uwaibaba na si, niha ãma rosa'rata za'ra wa'aba da, ma tô asi'madâ'â za'ra wa'wa, aibâ hã tiwasédé te te i'manharĩzém na hã asiwi wẽ'õ za'ra wa'aba da. Tahawa, aiwasédé hã ãma 'manharĩ za'ra wa'aba õ di. Ãne, wa tô ã hawim nherẽ ãma aiwaihu'u za'ra wa'wa.
Wa duré wa te tiwi aima 're rowaptẽrẽ u'âsi za'ra wa'wa, 'Re ihâimana u'âsi mono wi hã, tiwaihu'u pese na iwẽ uptabi na si te te 're aipawaptob za'ra wa'aba mono da, asiptete u'âsi ãma 're anomro aba mono da, taha na si. Ãne wamhã, te za tô ato sina asiptete sina ãma 're anomro aba mo. Duré ãne wamhã, uburé marĩ na 're robzépata za'ra wa'aba mono nherẽ, asa dama ãma 're wa'rãmi za'ra wa'aba mono õ di za.
Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.
Wasiré isazei'wa norĩ, wa za duré aima roti za'ra wa'aba ni. Ni'wam norĩ hã 're wa'a za'ra mono wamhã, te za tãma 're iroti pese za'ra wa'aba mo, simi'ẽ na si'uihâ na te te tô sima 're romhuri za'ra mono da. Duré ni'wam norĩ hã robzei ãna 're hâimana za'ra mono wamhã, te za tô duré 're ipawaptob za'ra wa'aba mo, robzei'õ u'âsi 're nomro mono tõ da. Duré ni'wam norĩ hã, 'Re ihâimana u'âsi mono zadawa wasu'u te te waihu'u za'ra nherẽ, iwẽ na si 're nomro tõ mono da, te te sima 're rosa'rata za'ra mono õ wamhã, te za 're ipawaptob za'ra wa'aba mo. Da'ãma 're aiwa'a za'ra wa'aba mono õ di za. Aiwaimri te za 're aihâimana za'ra wa'aba mo, sada.
Tane nherẽ, pi'õi mono bâ hâimana wẽ na 're hâimana za'ra mono wamhã, tãma 're rowẽ za'ra mono di za. Wanhib'apito umnhasi sina, te za 're hâimana za'ra. Te za duré te te 're dazawi pese za'ra. Hâimana wẽ uptabi na te za dama 're hâimana za'ra. Tawamhã iwasã hã ãma 're sépu'u za'ra mono wamhã, i'ra hã tãma 're rere'e wẽ mono da, te za Wamama hã te te 're anho'reptu, pi'õ norĩ hã.
Tawamhã uburé te aima i'awaihu'uzéb zarina si, te za wasiré isazei'wa norĩ ma 're i'awaihu'u mo. Ãne wamhã, Cristu Zezusihi ma, romhuri wẽ 'wa, te za tô 're aimo. Wanhib'apito nhimiroti hã wa te 're isaze za'ra mono zéb zarina, 're aimorĩ u'âsi sina, te za tãma 're iwaihu'u u'âsi za'ra mo, roti tô sena zarina zama, ãma 're aimorĩ u'âsi ne. Õhõ na si 're aimorĩ wamhã, asiptete sina te za 're aihâimana mo, Wanhib'apito ãma hã.
A hã 'Re ihâimana u'âsi mono ma romhuri'wa. Tahawa, ta norĩ ne 're aimorĩ õ di za. Te za 're aihâimana wẽ u'âsi mo, 'Re ihâimana u'âsi mono nhimiroti zarina si. Õhõ si te za 're i'madâ'â pese mo, 'Re ihâimana u'âsi mono si, ai'ãma 're siwãrĩ u'âsi mono da. Te za duré 're ida'azawi pese mo. Rowasédé hã taré da te aima 're 'manharĩ za'ra mono nherẽ, asiptete sina te za Wanhib'apito ãma 're aimorĩ u'â. Atoi u'âsi te za duré 're aimo. Taha na si 're aimorĩ da, te za asina 're i'madâ'â u'âsi mo.
Ãne wamhã, 're asisé mono õ di za, Wanhib'apito wasu'uwẽ hã dama 're wasu'u tõ mono da hã. Duré 're asisé mono õ di za, ĩwasu'u na. Wanhib'apito wasu'uwẽ na te dama 're rowasu'u mono 'ru te, ma tô dasiwi ĩnherẽ ni, dazazéb 're. Tahawa, wa oto te 're robzépata. Ãne wa, ma'ãpé 'Re ihâimana u'âsi mono hã tinhiptede te te aima isõmri na, sada 're asiptete mono, ĩsine 're robzépata mono da.
Ta norĩ ne 're aihâimana mono õ di za. Asimiza'rese te za 're aihâimana mo. Te za duré aihâimanazém na ãma 're ipibui pese mo. Duré, Wanhib'apito zazei'wa 're aimorĩ 'ru te, da te dasiwi aima 're rob'manharĩ wasété mono nherẽ, 're asisawi mono õ di za, 're robzépata mono tõ da. Te za duré Wanhib'apito wasu'uwẽ na 're ida'apo're pu'u u'âsi mo, 'Re ihâimana u'âsi mono te te aima ipisutuzéb zarina, asimiromhuri na tãma ãma 're uwaimrami mono da.
Duréihã ni'wam norĩ hã 'Re ihâimana u'âsi mono te te sina 're i'umnhasi za'ra mono zéb zarina, danho'a 're inomro wẽ mono norĩ hã ahâ uptabi na 'râwi wamana wawi 're isimasab u'âsi mono ne, wa za ta norĩ ãma 're wasipo're pu'u u'âsi za'ra. Tahawa, wa za uburé marĩ iwasédé hã wa te wasiwi 're wẽ'õ pese za'ra, 're iwanomro wẽ mono zé wi, te te 're wanhowada za'ra mono tõ da, te te 're iwawasutu u'âsi za'ra mono hã, wawasédé hã. Dawara na 're dasipibu za'ra mono wa, dahâiba wapu na 're dasisa'rei mono da, marĩ ipire hã dahâiba na dama 're ihâimana za'ra mono hã da te dasisa 're isani za'ra mono ne, wa za wawasédé hã wa te wasiwi 're wẽ'õ pese za'ra. Tawamhã wanhiptete na wa za tô ãma 're wahâimana za'ra Cristuhu ãma si, tiwi 're wasipizari za'ra mono ãna. Dawara na 're dasipibu za'ra mono wamhã, dawara tete haré dasiwi 're idasisa'rei mono ne, wa za tô wanhiptete na ãma 're wahâimana u'âsi za'ra, Cristuhu ãma si.
Wa hã Zuwã, asisãnawãi wa'wa. A norĩ wa'wa hã Zezusihi ãma si 're anomro aba mono wa, danhimirob'manharĩ wasédé, 're isépata za'ra wa'aba mono ne, wa duré te 're robzépata, asine za'ra wa'aba, Zezusihi ãma si 're ĩmorĩ wa. Zezusihi ãma si wasiré 're wanomro mono wa, wa duré 'Re ihâimana u'âsi mono nhib'a'uwẽ 're wahâimana za'ra. Ta hã te za duré te te 're wa'apawaptob u'âsi, da te 're wa'ruiwapari za'ra mono wa, wa te 're robzépata za'ra mono nherẽ, wawasété u tiwi 're wasipizari za'ra mono tõ da, wanhiptete u'âsi ãma 're wanomro mono da. Wa hã wa tô te dama 're sadawa wasu'u, 'Re ihâimana u'âsi mono hã. Tô sena na Zezusihi zazei'wa na wa tô duré dama 're ĩsiwasu'u u'âsi. Tahawa, ma tô dasiwi ĩ'âri ni. Ma tô duré dasiwi ĩzatõrĩ ni, Patemusi na rob'ré za'iti nhisi u.
Da te aima 're rob'manharĩ wasété za'ra wa'aba mono nherẽ, te aima iroti za'ra wa'aba zéb zarina, ĩmreme na si 're anomro aba mono wa, ma tô asina i'uwaimrami za'ra wa'wa, ĩnhimiroti hã. Tahawa, ropsi'utõrĩzéb u, za marĩ ipipa hã iwairébé mono na hã wa za aima ba'a za'ra wa'wa, iwasété norĩ, za te te ida'apibui mono zéb ãma hã, ti'ai ãma daro mono bâ 're idahâimana za'ra mono norĩ hã.
ကြော်ငြာတွေ