2 Corĩtu 6:16 - ꞌRe Ihâimana Uꞌâsi Mono Zadawa Wasuꞌu

¹⁶ Romhâiba 'manharĩ hã ãma 're idawata za'ra mono zé hã, e 'Re ihâimana u'âsi mono nhorõwa 'ri 're, te aré da te 're sa'ra, 'ri wa. Mare di. E marĩ wa. Aiwab õ wa, dama hã. Tane duré, wa norĩ hã 'Re ihâimana u'âsi mono ãma 're iwata za'ra mono õ norĩ siré, 're wahâimana waihu'u za'ra mono õ di za oto. E marĩ wa. 'Re ihâimana u'âsi mono hã wapẽ'ẽ 're, wa'ãma 're sõrõwa za'ra mono wa oto. Tahawa, 'Re ihâimana u'âsi mono nhorõwa ne, wa oto 're wahâimana za'ra wasiré isazei'wa norĩ hã, 'ri 'rãihâ wam ne, wapẽ'ẽ 're, 're sãmra mono wa oto. Duréihã 'Re ihâimana u'âsi mono zadawa 'mahârâ'wa norĩ hã ma tô imreme na rob'ui'éré za'ra, romhâ ré isib'a'uwẽ norĩ ãma hã, ãne: “Ĩnhib'a'uwẽ norĩ siré, wa za oto 're ĩhâimana u'âsi za'ra, 'râwi i'rata. Wa za duré tô isiré 're ĩmorĩ u'âsi za'ra. Isib'apito, wa za oto tãma 're ĩhâimana za'ra. Tawamhã ĩnhib'a'uwẽ te za duré ĩma 're hâimana za'ra.”

2 Corĩtu 6:16 ပူးပေါင်းရင်းမြစ်များ

Ezodu 20:3

— Aimawi ihâiba'õ ãma 're aiwata za'ra wa'aba mono õ di za. Ĩ'ãma si te za 're aiwata za'ra wa'aba mo.

Ezodu 25:8

Izaraéu nhihudu norĩ te za romhâ 'manharĩ na 'ri iwazéb zahi hã ĩma 'manharĩ za'ra, iwa'wab za'ra iwa 're ĩhâimana mono zéb da hã.

Ezodu 34:14

— Ihâiba'õ ãma hã 're aiwata za'ra wa'aba mono õ di za. E marĩ wa. Wa hã Uburé Danhib'apito 'râwi 're ĩsisisi mono hã ãne: Aimawi ihâiba'õ norĩ ãma dawatazéb zarina 're ĩnhiti'rui pusi mono. Tahawa wa aima ĩsi'ru za'ra wa'wa, ĩ'ãma si 're aiwata za'ra wa'aba mono da.

Mateu 16:16

Tawamhã Sima Pedru ma te ãne asa ãma sada'â: — A hã Cristu, 'Re ihâimana u'âsi mono te te i'aipisudu, Danho'reptui'wa da. A hã 'Re ihâimana u'âsi mono 'ra.

Mateu 6:24

— Dama romhuri'wa isib'apito maparane tãma 'maihâimana wamhã, aiwa te te tãma 're 'mairomhuri wẽ mono õ di za, tinhib'apito zahuré ma hã. Isib'apito maparane wamhã, sahuré te te 're sawi pese zahuré mono õ di za. Misi te za te te 're sawi pese. Ihâiba amo si te za te te siwi 're wẽ'õ. Duré sahuré te te 're wapari pese zahuré mono õ di za, romhuri'wa hã. Misi te za te te 're wapari pese. Ihâiba amo si te za te te 're 'ruiwapari. Tane, a norĩ wa'wa hã rob'uiprazéb zô si, asima 're romhuri za'ra wa'aba mono wamhã, 'Re ihâimana u'âsi mono ma, 're romhuri wẽ waihu'u za'ra wa'aba mono õ di za.

Luca 5:36

Tawamhã te duré ãma romnhimiré'é, ãne: — Zazahâ ihâiwẽ hã e te za sizâri ni, ihâ'ratare hã da te ãma hâiwa'aba da. Mare di. Ãne wamhã, te za aiwamna, ihâiwẽ hã. Duré ihâtém na da te hâiwa'aba wamhã, aiwab õ di, ihâ hã. Hâi wẽ hâ õ di.

Zuwã 14:23

Tawamhã Zezusi asa te duré tãma tinha, ãne: — Ni'wam norĩ hã te te 're ĩzawi pese za'ra mono wamhã, te za ĩnhimiroti si te te 're 'madâ'â pese za'ra. Tawamhã Ĩmama, te za duré asa hã te te 're sawi pese za'ra. Wa norĩ hã wa za itẽme 're wasihutu, i'rata 're wahâimana u'âsi za'ra mono da.

Zuwã 6:56

Ĩhâiba na 're dasaihuri mono wamhã, duré ĩwapru, da te 're âhuri mono wamhã, te za ĩsiré 're dahâimana u'âsi za'ra. Wa hã wa za duré dasiré 're ĩmorĩ u'âsi za.

Roma 8:11

'Re ihâimana u'âsi mono hã Zezusihi hâiwa'utu'wa hã, Ipẽ'ẽzani te aipẽ'ẽ 're, 're sãmra za'ra wa'wa. Tô õ hã Cristu te te ihâiwa'udu hã te za aihâiba hã niwamhã aiwi 're si'utõrĩ pese za'ra wa'aba mono nherẽ, te te 're aihâiwa'utu za'ra wa'wa, Ipẽ'ẽzani hã aipẽ'ẽ 're, 're isãmra za'ra wa'aba mono zéb zarina.

Roma 8:9

Tane nherẽ, a norĩ wa'wa hã aipẽ'ẽ 're, aiwasédé hã aima 're ihâimana za'ra wa'aba mono zéb zarina, 're anomro aba mono õ di oto. 'Re ihâimana u'âsi mono pẽ'ẽzani te te aima 're ipisutu za'ra wa'aba mono zéb zarina si, te oto 're aihâimana wẽ za'ra wa'aba mo, Ipẽ'ẽzani hã sena na aipẽ'ẽ 're, 're sãmra za'ra wa'aba mono wa. Ni'wam norĩ ma, Ipẽ'ẽzani, ipẽ'ẽ 're, tãma 're hâimana za'ra mono õ wamhã, ta norĩ hã Cristuhu nhib'a'uwẽ 're hâimana za'ra mono õ di za.

Roma 9:26

Tirob ãma 're si'ubumroi mono ré, wa tô aré te tãma 're nharĩ za'ra, ãne: A norĩ wa'wa hã ĩnhib'a'uwẽ'õ na te 're aihâimana za'ra wa'aba mo. Tane nherẽ, tame 're si'ubumroi mono ré, wa za oto ĩ'ra na te 're sisi za'ra, wa hã 'Re ĩhâimana u'âsi mono 'ra na.”

1 Corĩtu 10:21

A norĩ wa'wa hã Cristuhu zazei'wa oto 're anomro aba mono wa, te tô asiré 're asi'rã'õtõ aba mo, uwa 'rãi wa'u isé hã asiré 're âhuri aba mono da, hâsizém na, Wanhib'apito wi, iwapru tiwi pu'u wa, wazada idâ'âzém na ãma 're i'asipo're pu'u u'âsi za'ra wa'aba mono zéb da hã. Tahawa, wa'uburé norĩ ãma 're dawata za'ra mono da, marĩ hã dasiré da te 're âhuri mono wamhã, ãma dame 're aihâimana waihu'u za'ra wa'aba mono õ di za, ta norĩ nhimihâsizém na isiré 're âhuri aba mono tõ da. Duré Wanhib'apito hâiba, da te dasiwi hâibapru wa, wazada idâ'âzém na ãma 're asipo're pu'u za'ra wa'aba mono da, te duré i'u'ẽne hã asiré 're ihuri aba mo. E tawamhã i'uwaibaba, te za tô dame 're i'manharĩ za'ra wa'aba mo, isazei'õ'wa norĩ siré 're asaihuri aba mono wamhã, wa'uburé norĩ ãma 're dawata za'ra mono da, dasa hã da te dasima 're 'manharĩ za'ra mono wamhã. E tô i'uwaibaba ãne hã aima za'ra wa'aba hã.

1 Corĩtu 6:19

'Re ihâimana u'âsi mono pẽ'ẽzani si, te oto aipẽ'ẽ 're ai'ãma 're sõrõwa za'ra wa'wa. Aipẽ'ẽ 're, te oto aima 're hâimana u'âsi za'ra wa'wa. 'Re ihâimana u'âsi mono hã ma tô te te aima 're sõmri za'ra wa'wa. Tahawa, aihâiba za'ra wa'wa hã ate za'ra wa'aba õ di oto. 'Re ihâimana u'âsi mono te si, te oto aihâiba za'ra wa'wa hã 're hâimana za'ra. E ãne hã zahadu asina waihu'u za'ra wa'aba õ di.

Éfézu 2:20

Ẽtẽ 'manharĩ na wa za 'ri na ai'ãma simiré'é za'ra wa'wa. Ẽtẽ na'rata nhisiwi, da te dasiwi 're i'ri za'ra mono ne, ma tô Cristuhu wasu'uwẽ na te te 're aipawaptom na'rata za'ra wa'wa, isadawa wasu'u'wa norĩ hã. Duré Wamama pẽ'ẽzani, marĩ hã te te tãma iwaihu'u za'ra zéb zarina, duréihã 'Re ihâimana u'âsi mono te te dama 're isadawa wasu'u za'ra mono norĩ zama ma tô te te 're aipawaptob za'ra wa'wa. 'Ri uparizéb da, 'ri na'rata wẽ'ẽzéb ãma, ẽtẽ tõmo hâpâ wawẽ na, wa za Zezu Cristuhu ãma simiré'é, wapawapto uptabi 'wa wama 're hâimana za'ra mono wa, ta hã.

Éfézu 2:22

Tane a norĩ wa'wa hã, ẽtẽ ahâ na 'ri misi da, da te dasiwi i'ri ne, te za te te aima 're nharĩ u'âsi za'ra wa'wa, simisutu Wanhib'apito ãma 're aihâimana za'ra wa'aba mono da, isõrõwa misi tãma 're aihâimana za'ra wa'aba mono da oto, 'Re ihâimana u'âsi mono ma, Ipẽ'ẽzani hã aipẽ'ẽ za'ra wa'aba 're, 're ihâimana mono zéb zarina.

2 Timotiu 1:14

Roti tô sena hã te aima 're i'awaihu'u mono hã, wẽ uptabi wa, te za 're i'madâ'â pese mo, ãma 're ida'apawapto mono da hã, aimawi rowasu'u na da te ãma saprĩ za'ra tõ da. Taha da, te za te te 're aipawaptob u'âsi, 'Re ihâimana u'âsi mono pẽ'ẽzani hã, wapẽ'ẽ 're, 're ihâimana mono hã.

Hebreu 3:6

Tane nherẽ, te Cristuhu si tãma umnhasi na uburé isib'a'uwẽ norĩ hã te te tãma 're 'madâ'â pese za'ra, pire uptabi na, 'Re ihâimana u'âsi mono 'ra hã. Wa norĩ hã Cristuhu ãma si 're wanomro mono wa, da te wama 're rob'manharĩ wasété za'ra mono nherẽ, wapahi ãna wanhiptete sina ãma 're wanomro mono wamhã, wa za tô isib'a'uwẽ na tãma 're wahâimana u'âsi za'ra. 'Re ihâimana u'âsi mono hã iwẽ si, za te te wama ipisutu za'ra zéb zô, wama umnhasi sina sô 're iwanhimipari u'âsi za'ra mono zéb zarina, tiwi 're wasipizari za'ra mono õ wamhã, tawapsi wa za tô isib'a'uwẽ na tãma 're wahâimana u'âsi za'ra.

Hebreu 8:10

Tane nherẽ, nimahã bâtâ na wa za te dama iropisutuzép té hã tãma pisutu za'ra Izaraéu nhihudu norĩ ma hã, duréihã te dama iropisutuzém nhowa're're. Ã hã, wa wa hã Danhib'apito uptabi hã aima wasu'u za'ra wa'wa, ĩnhimiroti tém na te dama iropisutuzé hã. Tawapsi wa za ĩnhimiroti hã ipẽ'ẽ 're te tãma 're anhomri, iré 're nomro u'âsi mono wa, te te 're 'madâ'â pese za'ra mono da. Ta norĩ nhib'apito, wa za oto tãma 're ĩhâimana za'ra. Tawamhã ĩnhib'a'uwẽ na si te za tô ta norĩ hã ĩma 're hâimana za'ra.

Tiagu 4:5

Duréihã ma tô ãne imreme na rob'ui'éré, 'Re ihâimana u'âsi mono zadawa 'mahârâ'wa hã, ãne: “Wamama, Tipẽ'ẽzani te te wama 're isõmri mono hã, wapẽ'ẽ 're wama 're hâimana za'ra mono da, te te sima 're wa'awẽ uptabi, Wamama zawi'wa na oto 're wanomro mono da.” E taré ma tô ãne na hã rob'ui'éré, ibaihâ na hã. Mare di. Taré te te ãma rob'ui'éré õ di. Tô sena ma tô ãma rob'ui'éré.

1 Pedru 2:5

Ẽne ahâ nherẽ, 'ri hã da te dasiwi ãma i'ri ne, te za 'Re ihâimana u'âsi mono hã te te aima 're nharĩ za'ra wa'wa, isõrõwa na tãma 're aihâimana u'âsi za'ra wa'aba mono da. E marĩ da. Isõrõwa ãma tãma iromhuri'wa norĩ ne, sasedoti norĩ ne, tãma iromhuri'wa 're aihâimana za'ra wa'aba mono da, duré aihâiba na tãma 're asõprub za'ra wa'aba mono da. Zezu Cristu wazada idâ'âzéb zarina, tãma 're asõprub za'ra wa'aba mono wamhã, Wamama ma hã wẽ di, tãma 're i'asõprub za'ra wa'aba mono zé hã.

1 Zuwã 4:12

'Re ihâimana u'âsi mono hã ni'wa titõmo na te te 'madâ'â õ di. Tane nherẽ, 're wasisawi pese za'ra mono wamhã, 'Re ihâimana u'âsi mono hã te za wa'rata 're sãmra u'âsi, 'râwi. Te te 're iwa'azawi pese mono zé hã wa za duré wa te wasina ãma tãma 're uwaimrami u'âsi za'ra.

1 Zuwã 4:15

Ni'wam norĩ hã te za ãne te te dama 're wasu'u za'ra: “Zezusi hã 'Re ihâimana u'âsi mono 'ra. Ta hã ma tô 'Re ihâimana u'âsi mono hã we ti'ai u satõ, Danho'reptui'wa da.” Ãne na ni'wam norĩ hã te te dama 're wasu'u za'ra mono wamhã, ta norĩ 'ratap si te 'Re ihâimana u'âsi mono hã 're hâimana, 'râwi. Ta norĩ si te duré 'Re ihâimana u'âsi mono siré hã 're hâimana u'âsi za'ra, 'râwi.

Apocalipsi 2:1

Tawamhã Zezusi hã ĩtẽme iwi hã ma tô duré ĩma roti, ãne: — Zuwã, te za oto irob'ui'é, Éfézu na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã wa ĩsi'uihâ na aima roti za'ra wa'wa, wasi hã 7 na ihâiba za'ra hã ĩnhib'rata nhimire niwĩ te itété za'ra hã, duré 7 na rob'uiwẽzé sima'warazé wa'wa 're ĩmorĩ hã, oru 'manharĩ wa'wamhã.

Apocalipsi 21:3

Tawamhã damreme 'rãihâ hã wa tô duré wapa, danhib'apito simasisizém hawi we te te inharĩ hã. Ãne te we ĩma tinha: — Ma'ãpé, waihu'u. 'Re ihâimana u'âsi mono hã te za oto dasiré 're hâimana u'âsi, 'râwi. Isib'a'uwẽ te za oto 're dahâimana u'âsi za'ra. Te za tô oto duré dasiré 're hâimana u'âsi. Isib'apito za'ra te za oto 're hâimana, 'Re ihâimana u'âsi mono hã.

Apocalipsi 21:7

Ni'wam norĩ hã tidâ'âzéb u ĩwi sipizari ãna, Satanasihi ãma te te i'ai'uté za'ra norĩ hã ta norĩ ma, wa za Isib'apito za'ra na 're ĩhâimana. Ĩnhib'a'uwẽ si te za oto ta norĩ hã 're hâimana za'ra.