2 Corĩtu 4:8 - ꞌRe Ihâimana Uꞌâsi Mono Zadawa Wasuꞌu

⁸ Ropire wazô 're wairébé ahâ mono nherẽ, te te wa'ãma 're ai'uté waihu'u za'ra mono õ di. Duré wa'rã 'remhã rosa'rada wama ahâ za'ra nherẽ, 're wahâtâ'â za'ẽtẽ za'ra mono õ di.

2 Corĩtu 4:8 ပူးပေါင်းရင်းမြစ်များ

Provébiu 14:26

Ni'wa hã Uburé Danhib'apito te te 're wazé mono wamhã, te za isiptete uparizé hã tãma 're hâimana, duré i'ra norĩ 'wawi dasimapazéb zama.

Provébiu 18:10

Uburé Danhib'apito nhisi hã aiwa 'ri 'rãihâ dasimapazé isiptete ne hã te 're hâimana. Taha tẽme te sena na i'uwaibaba na si 're ihâimana za'ra mono norĩ hã 're nomro, sima iwẽ na iwa 're hâimana za'ra mono da hã.

Zuwã 14:18

— Te airẽme za'ra wa'aba õ di za, aimama za'ra wa'aba õ ne. Wa za we apâ atẽme ĩmorĩ 'wa.

1 Corĩtu 10:13

Tô sena, asiptete sina ãma 're anomro u'âsi aba mono zô, 'Re ihâimana u'âsi mono hã te te 're aipibu za'ra wa'aba mono wamhã, aimawi na te te 're aipibu za'ra wa'aba mono õ di za, ipire uptabi na hã. Tô õhõ na si te te 're ida'apibui mono zém na si, te za tô te te 're aipibu za'ra wa'wa. 'Re ihâimana u'âsi mono hã uburé wama umnhasi za'ra di, marĩ na uburé te te wama 're i'aropisutu mono zém na hã. E tawamhã, asiptetezém nhipai u, te za ipire uptabi na te te aipibu na 're sahu za'ra wa'wa, aiwasété u apâ tiwi 're airere'e aba mono da. Mare di. Tô sena, asiptete sina ãma 're anomro u'âsi aba mono zô, te te 're aipibu za'ra wa'aba mono wamhã, te za niha te te aima 're pisutu za'ra wa'wa, rowẽ ré ihawi 're aiwairébé aba mono zéb da hã, õne haré asiptete sina ãma 're anomro u'âsi aba mono da.

2 Corĩtu 12:10

Ĩsi'uihâ na marĩ da hã, ĩnhib'uware na 're ĩhâimana mono nherẽ, duré Cristuhu ma, te 're romhuri mono wa, da te ĩ'ãma 're wasété za'ra mono nherẽ, duré ĩma ropire na 're ĩhâimana mono nherẽ, duré da te ĩma 're rob'manharĩ wasété za'ra mono nherẽ, duré marĩ na te 're robzépata mono nherẽ, wa ĩto sina 're ĩhâimana u'âsi. E marĩ wa. Ĩsi'uihâ na marĩ da hã, ĩnhib'uware na 're ĩhâimana mono nherẽ, wa za taha wa'rãmi, ĩnhiptete sina 're ĩhâimana, Cristuhu nhimipawaptobzém na si.

2 Corĩtu 6:4

A norĩ wa'wa hã, 'Re ihâimana u'âsi mono ma, wa te 're iromhuri za'ra mono zém na si, asiwi wawaihu'u za'ra wa'aba da, wa uburé marĩ hã wẽ na wa te 're 'manharĩ za'ra. E niha tawamhã, 're iwahâimana za'ra mono zé hã. Uburé marĩ na, wa te 're robzépata za'ra mono nherẽ, duré rowasédé hã wazada 're wairébé u'âsi mono nherẽ, wa wanhiptete sina ãma 're wanomro u'âsi, wa te 're sazei'õ utõrĩ za'ra mono ãna.

2 Corĩtu 7:5

Masédonia u, we wasimasisi wamhã, wa te ãma ãpusi waihu'u õ di. Ãmemhã wazada hã ro'wa'rutu uptabi di, da'ahâ na wazada dahâimana za'ra wa. Duré ai'ãma wahâtâ'â za'ẽtẽ za'ra wa'aba di. E marĩ wa. Wanhib'apito wasu'uwẽ nhiti, aipizari za'ra wa'aba õ'umnhasite.

Galata 4:20

Ãhã na hã ĩhâtâ'â di, ai'ãma za'ra wa'aba hã. Ãhã wa, ĩnhimirosa'rada hã ahâ di, ai'ãma za'ra wa'aba hã. Ai'rata ĩhâimana za'ra wa'aba neza, ĩwaimri te oto aima rowaihu'u za'ra wa'aba da.

1 Samuéu 28:15

Tahawa, te Samuéu hã Sauhu ma tinha ãne: — E marĩ da, ma tô ĩzô irowasu. E marĩ da, ma tô ãne hã ĩma i'manha, apâ we ĩmorĩ da hã. Tawamhã Sau ma ãma tãma wa'rã ãne: — Ĩma ropire uptabi di ãhã na hã, filisteu norĩ hã te te siwi ĩ'wapéi u'âsi mono wa. Duré 'Re ihâimana u'âsi mono hã ma tô ĩma ai'ré, ĩme hâimana tõ da hã. Tahawa, marĩ na te te ĩzada'âbâ õ di, isadawa 'mahârâ'wa nhimirowasu'u na hã, duré ĩnhotõ 'rowim na hã. Tahawa, ãme ĩma rowasu'u da hã wa asô hâ, za marĩ te i'manharĩ da na hã.

1 Samuéu 30:6

Tawamhã Dawihi ma hã ropire uptabi di. E marĩ wa. Ite aibâ norĩ hã 'ra ãna oto hâimana za'ra wa, ma te oto isé pire hã sô tiwatobro za'ra. Tahawa, Dawi hã ẽtẽ na te te siwi wĩrĩ da te ãma sima robzanhamri pibu za'ra. Tane nherẽ, ma tô Uburé Danhib'apito ite 'Re ihâimana u'âsi mono nhimipawaptobzém na hã ipẽ'ẽ 'remhã aptete.

1 Samuéu 31:4

Tawamhã Sau ma tô tãma isimnhi'ãsi 'wapéi'wai ma tinha ãne: — Ma'ãpé ĩzada wazere ate sib'ézé 'wapa hã ãma ĩwĩrĩ da, filisteu iwasété norĩ hã ĩ'ãma sima to za'ra tõ da, duré ta norĩ hã te te siwi ĩwĩrĩ tõ da. Tane nherẽ, isimnhi'ãsi 'wapéi'wa ma tô tipahi pese. Tahawa, te te sima wẽ õ di, ãne hã te te tãma i'manharĩ da hã. Tahawa, ma tô Sau hã tite sib'ézé 'wapa hã ti'â. Tawamhã si'uihâ na itẽme simei wa, ma tô oto 'râwi taha na sima apese.