2 Corĩtu 4:10 - ꞌRe Ihâimana Uꞌâsi Mono Zadawa Wasuꞌu

^10-11 Da te dasiwi wapãrĩ da si, te da te wa'ãma 're rosa'rata u'âsi za'ra aré, Zezusi hã da te dasiwi iwĩrĩ ne da. Zezusihi wasu'uwẽ hã wa te dama 're wasu'u mono wa, wa wasina romnhimimnhasi na 're wahâimana. E marĩ te wasu'u tawamhã, da te wa'ãma 're rob'manharĩ wasété u'âsi mono nherẽ, wadâ'â'õzé hã. Cristu hã dâ'â nherẽ, apâ ihâiwa'utuzé, te wasu'u, sena na iwaihu'u pese zéb da hã.

2 Corĩtu 4:10 ပူးပေါင်းရင်းမြစ်များ

Zuwã 14:19

Suru na, wa za oto ai'rata ĩnhamra 'wa, irẽme ma. Taha ré hã te za duré a'â dasiwi ĩ'madâ'â ni. Taha parip si, da te dasiwi ĩzabu na sahu õ di za oto. A norĩ wa'aba si, te za duré ĩzabu za'ra wa'wa. Ĩdâ'â nherẽ, ab're hawi ĩhâiwa'utu wa, wa za oto ĩdâ'â ãna 're morĩ u'â. Tahawa, te za duré a norĩ wa'wa hã atâ'â ãna 're asimroi u'âsi aba mo, hâiwa ãma.

Roma 6:5

Wa norĩ hã Cristuhu siré, wa tô 're wadâ'â za'ra, wawasété zô, wa te oto 're rob'ruiwapari za'ra mono õ wa, 're dadâ'â za'ra mono wa, marĩ zô, da te oto 're irob'ruiwapari za'ra mono õ ne. Ãne hã simisutu ma tô 'Re ihâimana u'âsi mono hã wahâiba na atob za'ra, Cristuhu hâiba tẽme. Duré Cristu hã dâ'â uptabi nherẽ, Imama te te ihâiwa'utu ne, te za duré wa norĩ hã te te 're wa'ahâiwa'utu. Taha na te za duré Cristuhu hâiba tẽme wahâiba na hã atob za'ra, 'Re ihâimana u'âsi mono hã.

Roma 6:8

Tahawa, Cristuhu siré 're wadâ'â za'ra mono wa, wa za wa te wasina 're umnhasi za'ra tô sena na, za isine 're iwahâiwa'utu za'ra mono zéb da hã, duré isiré za 're iwahâimana u'âsi za'ra mono zém na hã.

Roma 8:36

Duréihã apito Dawi hã ma tô ãne na wa'ãma rob'ui'éré siromo za'ra, za wa te 're irobzépata za'ra mono zém na hã: “Wamama, 'Re ihâimana u'âsi mono, wa norĩ hã asib'a'uwẽ 're wanomro mono wa, wama romnhimimnhasi u'âsi na, wa 're wahâimana za'ra, da te 're wanhimroi mono õ'umnhasite. Pone'ẽrebâi ãma 're dapẽ'ẽzé za'ra mono ãna, dasazéb da, da te 're isimroi mono ne, te da te dasima 're wawẽ za'ra, da te 're wanhimroi mono da, da te 're wa'ruiwapari za'ra mono wa oto.”

2 Corĩtu 1:5

Wa norĩ hã Cristuhu zazei'wa 're wahâimana mono wa, wa wa te 're robzépata tô, ti'ab ré Cristu hã te te 're irobzépata mono ne. Isine, wa te 're robzépata mono nherẽ, ta hã te za te te 're wapawaptob u'âsi, wapẽ i're wama 're sa'wari mono da, wato sina duré 're wahâimana u'âsi mono da.

2 Corĩtu 1:9

Ãne, wa tô wasina rosa'rata ni aré: “Tô sena, wa za wadâ'â ni, romhutu na.” Tawamhã e marĩ da, ma tô ãne hã bété wazada hã tiromhâiba. 'Râwi wawaihu'u pese na 're wasi'madâ'â tõ mono da, 'Re ihâimana u'âsi mono si, wa te 're umnhasi pese mono da si, ma tô ãne hã wazada tiromhâiba. 'Re ihâimana u'âsi mono si waihu'u pese di, te te 're ida'ahâiwa'utu mono da hã. Duré tãma hã waihu'u pese di, te te 're ida'ab'madâ'â mono da hã, rowasédé dazada 're hâimana mono wamhã.

2 Corĩtu 13:4

Cristu hã wedepo'o nhonhi'rãmi na, da te dasiwi sasõmri wamhã, ihâiba hã sib'uware di. Tane nherẽ, 'Re ihâimana u'âsi mono nhiptetezém na ma tô apâ hâiwa'udu, 're hâimana u'âsi mono da oto. Tane, wa tô duré wa norĩ hã wanhib'uware na 're wahâimana. Tane nherẽ, 'Re ihâimana u'âsi mono nhiptetezém na, wa duré 're wahâimana, Cristuhu ne. Taha zarina, wa za niha aima rob'manharĩ za'ra wa'aba ni, wasi'uihâ nai õ nherẽ.

Galata 6:17

Wa hã Zezusihi ma romhuri'wa, wa 're ĩhâimana, isimiwada'urizéb zarina. Da te ĩma 're irob'manharĩ wasété za'ra mono zéb zarina, ĩhâiba hâ'ẽtẽ ré, 're ĩmorĩ wa, ĩpibui pese di, tãma iromhuri'wa 're ĩmorĩ na hã. Te te oto sahâri za'ra, aimawi tinhimiroti na te te ĩwi 're iro'wa'ré za'ra mono norĩ hã.

Colosu 1:24

Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.

2 Timotiu 2:11

Tô sena da te dasima 're irowasu'u za'ra mono zé hã ãne: “Cristuhu siré 're wadâ'â za'ra mono wa, duré ta hã dâ'â uptabi nherẽ, ab're hawi hâiwa'utu wa, wa za isiré 're wahâimana u'âsi za'ra.

1 Pedru 4:13

Cristu hã aiwana za'ra wa'aba, ma tô robzépata za'ẽtẽ. Tahawa, isine 're robzépata za'ra wa'aba mono wa, te za aipẽ'ẽ 're, 're ato za'ra wa'aba mo. E marĩ wa. Cristu hã tiwaihu'u pese na apâ wei morĩ wapsi, ato za'ẽne hã aima 're hâimana za'ra wa'aba mono wa.

1 Pedru 4:14

Ãté Cristuhu ãma si 're aihâimana za'ra wa'aba mono 'ru te, te za da te aima 're nharĩ wasété za'ra wa'wa. Tane nherẽ, aima 're rowẽ za'ra wa'aba mono di za. E marĩ wa. 'Re ihâimana u'âsi mono pẽ'ẽzani hã aipẽ'ẽ 're aima 're hâimana za'ra wa'aba mono wa oto, rowẽ uptabi zé hã.

Apocalipsi 1:17

Tawamhã õ hã te 'madâ'â wamhã, wa tô ipapara aime sa'ẽtẽ, ĩdâ'â ne, ĩpahi te. Tane nherẽ, ma tinhib'rata nhimire niwĩ ĩ'upi, ĩpahi tõ da. Ãne te ãhã wamhã ĩma tinha: — Ĩma aipahi tõ. Wa hã romna'rada duré rob'rãsudu.