2 Corĩtu 3:3 - ꞌRe Ihâimana Uꞌâsi Mono Zadawa Wasuꞌu

³ Wanhimiromhuri zarina si, Cristu hã 're saze za'ra wa'aba mono wa, te taha na si da te 're wawaihu'u, Cristuhu zadawa para si, wa te dama 're iromhuri mono zém na hã, danhimirob'ui'éré hã da te 're sõré za'ra mono wa, marĩ hã da te ãma 're iwaihu'u za'ra mono ne. Tane nherẽ, marĩ na da te 're irob'ui'éré za'ra mono zéb zarina, 're saze za'ra wa'aba mono õ di, a norĩ wa'wa hã. 'Re ihâimana u'âsi mono hã isi'utõrĩ'õ pẽ'ẽzani nhimipawaptobzéb zarina si, ma tô 're isaze za'ra wa'aba mo. E ẽtẽ tõmo baihâ na rob'ui'éré zarina, ma tô 're isaze za'ra wa'aba mo. Mare di. 'Re ihâimana u'âsi mono pẽ'ẽzani hã marĩ hã aipẽ'ẽ 're te te aima 're iwaihu'u za'ra wa'aba mono zéb zarina si, ma tô oto 're isaze za'ra wa'aba mo, Cristu hã.

2 Corĩtu 3:3 ပူးပေါင်းရင်းမြစ်များ

Salmu 40:8

Ĩte 'Re ihâimana u'âsi mono, ĩma 're i'apisutu mono zéb zarina, marĩ te 're i'a'manharĩ mono da hã ĩma sei uptabi di! Asimiroti wa tô ĩpẽ'ẽ 'remhã te ĩsima 're tété u'âsi.”

Ezodu 24:12

Tawamhã Uburé Danhib'apito Mozésihi ma, te tãma tinha ãne: — Ĩhâimanazéb u, ma'ãpé ẽtẽ na we ĩtẽme sai'uri, ãme aihâimana da. Wa hã ĩnhimirotizém na te irob'ui'érézéb ré ẽtẽ baihâ po hã wa za aima tisõ, ãma dama 're iroti mono zéb da hã.

Ezodu 31:18

Tawamhã 'Re ihâimana u'âsi mono, Mozésihi ma, Sina'i na ẽtẽ nhisi ãma te te nharĩ mono parimhã, ma tô ẽtẽpo hã tãma sõmri zahuré, tinhiptõmo na tinhimiroti na te te ãma tãma irob'ui'éré ré hã.

Ezodu 32:15

Tawamhã Mozési ẽtẽ hawi ma tô si'ra. Te te si'rai wamhã, ma tô 'Re ihâimana u'âsi mono, maparane ẽtẽpo'o hâ su'u na isõ're niwĩ duré iba niwĩ tinhimiroti te te ãma tãma isihâtâ ré hã timra.

Ezodu 34:1

Tawamhã Uburé Danhib'apito, Mozésihi ma hã te tinha ãne: — Ma'ãpé iprub zahuré sine hã, ẽtẽpo maparane wa'õtõ zahuré na. Tawamhã wa hã, ta norĩ na wa za duré tô ĩmreme na hã apâ ãma rob'ui'éré zahu zahuré, imorĩ'rata na ẽtẽpo ihâimana zahuré na te ãma irob'ui'éré na hã.

Provébiu 3:3

Asimizawizé hã, duré dama ai'umnhasizé hã 're rẽme mono õ di za. Te za õne u'â aipẽ'ẽ na asima 're itété u'âsi mo.

Provébiu 7:3

Ma'ãpé aima ĩnhimirotizé hã aipẽ'ẽ na asima 're tété u'âsi mono, marĩ hã danhib'ratap si da te 're i'wasari mono ne, tãma danhimirẽme ãna.

Daniéu 6:26

Uburé a'uwẽ norĩ, ĩnhimi'madâ'âzéb 're daza'rui mono bâ 're i'aihâimana za'ra wa'aba mono ma, wa aima waihu'u za'ra wa'wa, ãne. Ma'ãpé Daniéu, 'Re ihâimana u'âsi mono ãma 're iwata mono hã asiwi 're wazé aba mono. E marĩ wa, õ hã 'Re ihâimana u'âsi mono idâ'â'õ, õne u'â 're ihâimana mono. Niwamhã duré dama i'rãnho'õmo na isimi'madâ'âzé hã isipru waihu'u õ. Duré niwamhã isiptetezé hã tiwi isi'utõrĩ waihu'u õ.

Mateu 16:16

Tawamhã Sima Pedru ma te ãne asa ãma sada'â: — A hã Cristu, 'Re ihâimana u'âsi mono te te i'aipisudu, Danho'reptui'wa da. A hã 'Re ihâimana u'âsi mono 'ra.

1 Corĩtu 3:5

Tazahã, ãhã zarina si te za wa'ãma 're irosa'rata u'âsi za'ra wa'aba mo. Wa norĩ hã 'Re ihâimana u'âsi mono ma si, wa te 're iromhuri mono, wa 're wahâimana. Iwasu'uwẽ na, wa te aima 're irowasu'u za'ra wa'aba mono zéb zarina, te oto asina 're i'umnhasi za'ra wa'aba mo, Wanhib'apito hã. Ta hã te te wama ipisutuzéb zarina si, wa wa te tãma 're romhuri pese. Taha da si, wa wa norĩ hã 're wahâimana.

2 Corĩtu 3:6

Taha si ma tô te te 're wapawapto, te te dama iropisutuzép téb zarina, wa te dama 're romhuri wẽ mono da. E niha tawamhã, 'Re ihâimana u'âsi mono te te dama iropisutuzép té hã. E 'Re ihâimana u'âsi mono nhimiroti 'rata na Mozésihi nhimi'ui'éré, te wasu'u, ã hã. Mare di. 'Re ihâimana u'âsi mono pẽ'ẽzani nhimipawaptobzéb zarina 're idanomro mono zép té, te wasu'u, ã hã. Mozésihi nhimi'ui'éré zarina 're danomro mono nherẽ, e taha zarina te za 're dasisõ'reptu za'ra, ropipa hawimhã. Mare di. Ni'wa hã te te sina uwaimrami waihu'u õ di, Mozésihi nhimi'ui'éré hã. 'Re ihâimana u'âsi mono te te dama iropisutuzép té hã da te 're saze za'ra mono wapsi, te za Ipẽ'ẽzani hã te te 're da'anho'reptu ropipa hawimhã, rowẽ na isiré 're dahâimana u'âsi za'ra mono da oto.

2 Corĩtu 3:7

Duréihã 'Re ihâimana u'âsi mono hã ma tô tinhimiroti na rob'ui'éré, ẽtẽ tõmo baihâ na, Mozésihi ma, te te sõmri da. Rowa'a za'ẽtẽ na ma tô 'Re ihâimana u'âsi mono hã itẽme wi, Mozésihi u hã. Tawamhã Mozési hã ẽtẽ tõmo baihâ na rob'ui'éré te te mrami pari, Izaraéu nhihudu norĩ u sa'a hawi apâ te te itẽme iré si'ra za'ra wamhã, i'ubu na hã rowa'a hã sa'ẽtẽ di. Sa'a hawi, morĩ ré, i'ubu na rowa'a hã suru na sipari nherẽ, tawamhã, Izaraéu nhihudu norĩ hã titõmo na te te 'madâ'â waihu'u za'ra õ di, Mozési hã. E marĩ wa. 'Re ihâimana u'âsi mono hawi wa, rowa'a hã. 'Re ihâimana u'âsi mono nhimiroti 'rada hã ẽtẽ tõmo baihâ na rob'ui'éré hã, isimirowa'a ré, Mozési hã te te datẽme ãwisi nherẽ, wẽ nherẽ, taha si, da te 're i'madâ'â za'ra mono zéb zarina, 're dasisõ'reptu waihu'u za'ra mono õ di. Isimiroti 'rada hã wẽ nherẽ, taha nhipai u wẽ uptabi di, Ipẽ'ẽzani nhimipawaptobzé hã, taha zarina, 'Re ihâimana u'âsi mono 'rata 're idanomro u'âsi mono zéb da hã, rowẽ uptabi ãma hã.

2 Corĩtu 6:16

Romhâiba 'manharĩ hã ãma 're idawata za'ra mono zé hã, e 'Re ihâimana u'âsi mono nhorõwa 'ri 're, te aré da te 're sa'ra, 'ri wa. Mare di. E marĩ wa. Aiwab õ wa, dama hã. Tane duré, wa norĩ hã 'Re ihâimana u'âsi mono ãma 're iwata za'ra mono õ norĩ siré, 're wahâimana waihu'u za'ra mono õ di za oto. E marĩ wa. 'Re ihâimana u'âsi mono hã wapẽ'ẽ 're, wa'ãma 're sõrõwa za'ra mono wa oto. Tahawa, 'Re ihâimana u'âsi mono nhorõwa ne, wa oto 're wahâimana za'ra wasiré isazei'wa norĩ hã, 'ri 'rãihâ wam ne, wapẽ'ẽ 're, 're sãmra mono wa oto. Duréihã 'Re ihâimana u'âsi mono zadawa 'mahârâ'wa norĩ hã ma tô imreme na rob'ui'éré za'ra, romhâ ré isib'a'uwẽ norĩ ãma hã, ãne: “Ĩnhib'a'uwẽ norĩ siré, wa za oto 're ĩhâimana u'âsi za'ra, 'râwi i'rata. Wa za duré tô isiré 're ĩmorĩ u'âsi za'ra. Isib'apito, wa za oto tãma 're ĩhâimana za'ra. Tawamhã ĩnhib'a'uwẽ te za duré ĩma 're hâimana za'ra.”

1 Tesalonita 1:9

Aiwasu'u wapari'wa norĩ hã, si'uihâ na te wama rowasu'u za'ra, atẽme iwasihutu aba zém na. Ma tô, u, asima iwawẽ za'ra wa'wa. Te duré wama aiwasu'u za'ra wa'wa, ãne: “Ta norĩ hã, 'Re ihâimana u'âsi mono te te 're sazei pese za'ra. Tahawa, romhâiba 'manharĩ ãma, nasi wata za'ra õ di oto. Te te tãma 're romhuri za'ra mono õ di duré oto. Ma tô rẽme pese za'ra. 'Re ihâimana u'âsi mono si, tô sena hã, u. Tahawa, isadawa wasu'u, ma tô saze za'ra. Tahawa, te taha na si te te tãma 're romhuri pese za'ra.

Hebreu 10:16

“Nimahã bâtâ na wa za, te dama iropisutuzép té hã dama pisutu, duréihã te dama iropisutuzém nhowa're're. Ãne, wa wa hã Danhib'apito uptabi hã aima wasu'u za'ra wa'wa, ĩnhimiroti tém na te oto dama iropisutuzém na hã. Tawapsi wa za ĩnhimiroti hã dapẽ'ẽ 're te dama 're anhomri, iré 're danomro u'âsi mono wa, da te 're 'madâ'â pese za'ra mono da, ĩmreme hã.”

Hebreu 8:10

Tane nherẽ, nimahã bâtâ na wa za te dama iropisutuzép té hã tãma pisutu za'ra Izaraéu nhihudu norĩ ma hã, duréihã te dama iropisutuzém nhowa're're. Ã hã, wa wa hã Danhib'apito uptabi hã aima wasu'u za'ra wa'wa, ĩnhimiroti tém na te dama iropisutuzé hã. Tawapsi wa za ĩnhimiroti hã ipẽ'ẽ 're te tãma 're anhomri, iré 're nomro u'âsi mono wa, te te 're 'madâ'â pese za'ra mono da. Ta norĩ nhib'apito, wa za oto tãma 're ĩhâimana za'ra. Tawamhã ĩnhib'a'uwẽ na si te za tô ta norĩ hã ĩma 're hâimana za'ra.

Hebreu 9:14

Ãne hã duréihã danhimizama wapru na dahâiba mana wawi marĩ na 're idasihâiba wasété za'ra mono parizéb da hã, wẽ nherẽ, taha nhipai u, Cristuhu wapru si siptete uptabi di, dawasété parizéb da hã oto. E marĩ wa. Taha si wasété ãna 're hâimana u'âsi mono wa. Tahawa, 'Re ihâimana u'âsi mono pẽ'ẽzani waihu'u pese zarina ma tô wazada sisõmri za'ra 'Re ihâimana u'âsi mono ma, wazada za'ra dâ'â da, tiwapru na te te 're wa'a'upsõi mono da, wapẽ'ẽ 're wadâ'â u'âsi ne 're iwanomro mono zéb zarina, wawasété si wa te 're 'manharĩ za'ra mono wa, 'râwi 're iwasiwẽ'õ u'âsi za'ra mono zé hã te te oto wama 're apari mono da. Taha zarina, wa za oto 'Re ihâimana u'âsi mono ma si, wa te 're romhuri za'ra, wawẽ na wahâimanazém na wa te oto 're upa za'ra mono ãna.

Zozué 3:10

Ãne wamhã, 'Re ihâimana u'âsi mono idâ'â'õ asiré ihâimana za'ra wa'aba na te za iwaihu'u za'ra wa'wa, sena na cananeu norĩ hã, hitita norĩ hã, heveu norĩ hã, perizeu norĩ hã, gigazeu norĩ hã, amoreu norĩ hã, duré zebuzeu norĩ hã za te te isani za'ra na zama.

Apocalipsi 2:1

Tawamhã Zezusi hã ĩtẽme iwi hã ma tô duré ĩma roti, ãne: — Zuwã, te za oto irob'ui'é, Éfézu na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã wa ĩsi'uihâ na aima roti za'ra wa'wa, wasi hã 7 na ihâiba za'ra hã ĩnhib'rata nhimire niwĩ te itété za'ra hã, duré 7 na rob'uiwẽzé sima'warazé wa'wa 're ĩmorĩ hã, oru 'manharĩ wa'wamhã.

Apocalipsi 2:12

— Te za oto irob'ui'é, Pegamu na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzéb zarina te za tãma irob'ui'é, ãne: “Wa hã sib'ézé 'wa si'uiwa 'wa pa pese ré ĩza hã, wa aima roti za'ra wa'wa, i'wa pese ré hã.

Apocalipsi 2:18

— Te za oto irob'ui'é, Tiatira na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã 'Re ihâimana u'âsi mono 'ra, wa aima roti za'ra wa'wa. Ĩto hã te unhama ro'o si'ubuzi ne 're si'ubuzi zahuré. Duré ĩpara hã te ẽtẽ topsada brõzi ne 're si'ubuzi zahuré.

Apocalipsi 2:8

— Te za oto irob'ui'é, Esmina na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã wa aima roti za'ra wa'wa, duréihã marĩ õ ré 're ĩhâimana mono. Uburé marĩ hã si'utõrĩ pese nherẽ, wa hã, marĩ zarina ĩsi'utõrĩ õ di za. Wa za 're ĩhâimana u'âsi. Wa tô dârâ aré. Ĩdâ'â nherẽ, wa tô apâ duré hâiwa'udu, 're ĩhâimana u'âsi mono da oto apâ.

Apocalipsi 3:1

— Te za duré irob'ui'é, Sadési na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzéb zarina te za tãma irob'ui'é, ãne: “Wa hã wasi hã 7 na ĩnhib'rata te itété za'ra hã, wa za oto aima waihu'u za'ra wa'wa. 'Re ihâimana u'âsi mono pẽ'ẽzani hã 7 na te te 're iromhuri mono zéb ré, te 're i'madâ'â mono, wa hã. Uburé marĩ hã 're i'manharĩ za'ra wa'aba mono zé hã, ĩma waihu'u pese di. Ĩnhimiroti na si 're anomro aba mono na, da te 're aiwasu'u za'ra wa'aba mono zahã, te aipẽ'ẽ 're, atâ'â ne 're anomro aba mo, ĩ'ãma 're anomro aba mono zahã.

Apocalipsi 3:14

— Te za oto irob'ui'é, Laudiséa na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã tô sena, ĩ'umnhasi sina, sena na 'Re ihâimana u'âsi mono te dama 're sadawa wasu'u wẽ mono da, 're ĩhâimana mono. Wa hã 'Re ihâimana u'âsi mono nhimiropoto waihu'u pese zarina, ropoto na'rata 'wa, 're ĩhâimana mono.

Apocalipsi 3:22

“Asimipari pese za'ra aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã.”

Apocalipsi 3:7

— Te za oto duré irob'ui'é, Filadéufia na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã 're ĩwasété mono õ, wa za oto aima roti za'ra wa'wa, ĩnhimiropisutuzéb zarina, sena na te dama ãma 're i'a'uwaimrami mono 'wa hã. Duréihã Dawi hã te 're hâimana, dama ipire hã. Isõrõwa hã i'ri za'ẽtẽ uptabi. Tame te ni'wa hã 're sãmra, 'ridawazéb ré hã, te te dama 're i'ridawa mono da hã, duré te te dawi 're i'ridawa nhito mono da hã. Tane wa hã, wa hâiwa ãma Ĩmama nhorõwa 'ridawazéb ré 're ĩhâimana u'âsi, ĩwétési. Wa hã te dama 'ridawa wamhã, ni'wa apâ te te dawi sito waihu'u õ di. Duré te 'ridawa nhito wamhã, ni'wa hã te te 'ridawa waihu'u õ di.

1 Samuéu 17:26

Tawamhã te Dawi hã dasi'wapéi 'manharĩ'wa norĩ, i'rata isimasam norĩ hã sadanharĩ za'ra ãne: — E marĩ te za ni'wa hã ti'â, ã hã filisteu te te wĩrĩ wa, taha zarina Izaraéu nhihudu norĩ ma te te ropese wa, te te anho'reptui wamhã. E 'wa bété ãhã, filisteu ihâimana wasédé hã. E tô ibâ 'Re ihâimana u'âsi mono te dasi'wapéi 'manharĩ 'wa norĩ zô ihârâ zahi za'ra zé hã.