2 Corĩtu 3:18 - ꞌRe Ihâimana Uꞌâsi Mono Zadawa Wasuꞌu

¹⁸ Wa norĩ hã wasiré isazei'wa norĩ hã da'rã ubu ãna ne, wa oto 're wahâimana za'ra. Tahawa, Wanhib'apito 're imorĩ wẽ uptabi zé hã wama waihu'u pese za'ra di oto. Ipẽ'ẽzani te te 're iwa'apawapto mono zéb zarina, wa za oto 're iwanomro wẽ mono zém na, wa te wasima ãma 're sa'ẽtẽ za'ra, isine ãma 're iwahâimana za'ra mono zéb da hã.

2 Corĩtu 3:18 ပူးပေါင်းရင်းမြစ်များ

Zuwã 1:14

'Re ihâimana u'âsi mono mreme hã wa'rata 're sãmra mono da, ma tô sihâiba. Simizawi pese uptabi di. Isimiroti hã wẽ uptabi di. 'Re ihâimana u'âsi mono 'ra wa, õhõ si 're morĩ wẽ uptabi di. Misire i'ra hã. Õhõ si, waihu'u pese uptabi di. Wa norĩ hã wa tô wasiwi waihu'u za'ra ni, 're imorĩ wẽ uptabi na. Iwaihu'u pese na zama, wa tô duré wasiwi waihu'u ni.

Zuwã 12:41

Duréihã Izaia hã sõtõ 'rowi te te irosawẽrẽ ne, ma tô Wanhib'apito 'madâ, Zezusi hã. Ihâiba na hã rowa'a za'ẽtẽ di. Te te 'madâ'â wa, te ãne na rowasu'u siro.

Zuwã 17:22

A hã 're ĩzawi u'âsi mono wa, ĩma 're rowẽ u'âsi mono di. A hã 're ĩzawi pese mono ne, wa za ĩzazei'wa norĩ hã õne u'â te 're azawi pese. E marĩ da. Wasine 're sisawi u'âsi za'ra mono wa, tinhimirosa'rata na zama 're sisazei pese u'âsi za'ra mono da, ta norĩ ma zama 're rowẽ u'âsi za'ra mono da.

Zuwã 17:24

— Ti'ai õ ré te 're ĩzawi pese mo, marĩ õ uptabi ré. 'Re ĩzawi pese mono wa, ma tô ĩma ipisu, ĩ'ãma 're dawata u'âsi za'ra mono da, duré ĩhâiba na rowa'a za'ẽtẽ ré, 're ĩhâimana u'âsi mono da. Ĩmama, ãne na hã te te 're ĩ'madâ'â za'ra mono da hã, wa tô ĩsima wẽ za'ra, za 're ĩhâimana mono zéb ãma, ĩ'rata 're si'ubumroi u'âsi mono da, ĩma ipisutu za'ra norĩ hã.

Roma 12:2

Ti'ai ãma dahâimana wasété na 're idanomro mono norĩ ãma hã, 're sasõmri za'ra wa'aba mono õ di za. 'Re ihâimana u'âsi mono wi si, te za 're irowaptẽrẽ u'âsi za'ra wa'aba mo, asimirosa'rata wẽ na si, aipẽ'ẽ 're, 're aihâimana za'ra wa'aba mono zé hã te te aima 're pisutu za'ra wa'aba mono da, 're aihâimana za'ra wa'aba mono zép tém na si, oto 're anomro aba mono da. Tawapsi te za 'Re ihâimana u'âsi mono, te te aima 're ipisutu za'ra wa'aba mono hã asina 're iwaihu'u pese za'ra wa'aba mo, marĩ iwẽ si tãma 're i'manharĩ za'ra wa'aba mono zém na hã.

Roma 13:14

Siwa'ru 'râwi asima iwẽzéb zarina, aipẽ'ẽ 're asimirosa'rata wasété aba na ãma 're rosa'rata za'ra wa'aba mono õ di za. Wanhib'apito Zezu Cristu 're imorĩzém na si te za oto 're aihâimana za'ra wa'aba mo, isine.

Roma 8:29

Duréihã marĩ õ ré hã, 'Re ihâimana u'âsi mono te te sima ãma irotizéb zarina, te te sima 're iwa'apisutu mono norĩ hã, i'ra ne, tô Zezusihi ne, oto 're wahâimana za'ra mono da, ma tô duré te te 're wa'apisutu siro. Ta hã uburé isazei'wa norĩ dub'rada, 're hâimana mono da, ma tô ãne te te 're wa'apisutu siro, sima.

Roma 8:4

Ãne ma tô 'Re ihâimana u'âsi mono hã 'manha, isimiroti na rob'ui'éré hã wa te wasina 're i'uwaimrami za'ra mono zéb da hã, Ipẽ'ẽzani, wa te 're i'madâ'â pese za'ra mono zéb zarina, wapẽ'ẽ 're wanhimirosa'rata wasété na 're wahâimana za'ra mono õ wamhã.

Roma 8:7

Ni'wam norĩ hã siwa'ru 'râwi te te sima 're iwẽ za'ra mono zéb zarina si, te te 're rosa'rata wasété u'âsi za'ra mono wamhã, ta norĩ hã te za 'Re ihâimana u'âsi mono nhitob'ru 're hâimana za'ra. Ta norĩ hã 'Re ihâimana u'âsi mono nhimiroti te te 're 'madâ'â za'ra mono õ di. Te te duré 're 'madâ'â waihu'u za'ra mono õ di.

1 Corĩtu 13:12

Tane duré, wa norĩ hã dasi'madâ'âzé i'uzurire na ãma 're idasi'madâ'â pibui prã za'ra mono ne, 'Re ihâimana u'âsi mono hâimanazé hã wama waihu'u prã za'ra di, ti'ai ãma 're wahâimana za'ra mono ré hã. Tane nherẽ, nimahã na si, wa za 'râwi wa te 're 'madâ'â za'ra oto, 'Re ihâimana u'âsi mono hã. Tawapsi wama waihu'u pese za'ra di za oto, 'Re ihâimana u'âsi mono hâimanazé hã. 'Re iwahâimana za'ra mono zém na, te te 're iwa'awaihu'u pese mono ne, wama waihu'u pese za'ra di za oto duré.

1 Corĩtu 15:49

Wa norĩ hã, aibâ ti'ai 'manharĩ na ihâiba na'rata ne ré, wa ti'ab ré iré 're wahâimana za'ra. Tane, wa za duré niwapsi hâiwa hawi we imorĩ hâiba ne iré 're wahâimana u'âsi za'ra. Tahawa, wa za oto isine 're wahâimana u'âsi za'ra, õne u'âsi.

2 Corĩtu 3:17

Wanhib'apito si, wa te 're saze za'ra mono wamhã, Tipẽ'ẽzani ma, te za te te 're wa'apisutu, taha si te te 're wa'apawapto mono da, rowẽ na ãma 're wanomro mono da, marĩ na wasi'uihâ na wa te wasina tãma ãma 're i'uwaimrami za'ra mono zém na, 'râwi 're wasi'madâ'â za'ra mono tõ da, duré taha zarina, 'Re ihâimana u'âsi mono hã te te 're wa'anho'reptui mono da newa.

2 Corĩtu 4:4

Ta norĩ hã, Cristu te te 're saze za'ra mono õ wa, ma tô Wa'uburé hã ipo're'õ norĩ nhib'apito hã te te 're apo're nhito, tob'a ne 're hâimana za'ra mono da. Tahawa, Cristuhu wasu'uwẽ hã wẽ uptabi nherẽ, rob'uiwẽzém ne, te te dama 're rowa'a za'ra mono nherẽ, te te 're waihu'u za'ra mono õ di, ta norĩ hã. Cristu hã aiwa Timama ne 're morĩ wẽ uptabi nherẽ, ta norĩ hã te te siwi 're waihu'u za'ra mono õ di, sena na iwasu'uwẽ na hã.

2 Corĩtu 4:6

Duréihã ropoto na'rata hawimhã, 'Re ihâimana u'âsi mono ma tô tinha, ãne: “Ãhã na hã robra si 're asa'wari mono nherẽ, oto airowa'a na.” Ãne te tinha. Tane ma tô duré wapẽ'ẽ 're, te te wama 're arowa'a oto, isadawa wasu'u hã wa te oto ãma 're iwaihu'u pese za'ra mono zéb da hã. Cristu hã ma tô wama waihu'u za'ra, Imama 're imorĩ wẽ uptabi na hã.

2 Corĩtu 5:17

Ni'wam norĩ hã Cristu te te 're saze za'ra mono wa, simisutu tihâiba na sina 're sitob za'ra mono wamhã, 're idapoto téb za'ra mono zéb ré si, te za oto 're hâimana za'ra. Tahawa, te za 're inomro 'rata mono zé hã tãma 're si'utõrĩ za'ra. Ãhã wamhã, 're ihâimana 'rata za'ra mono zé hã tâibâ za oto. Taha wa'rãmi, te za oto 're idahâimana téb za'ra mono zém na si 're hâimana za'ra, iwẽ na si.

Galata 6:15

Danhihâiwata nhihâri ré si, 're idahâimana za'ra mono zé hã, marĩ dai õ di, 'Re ihâimana u'âsi mono ma hã. Duré danhihâiwata nhihâri ãna 're idahâimana za'ra mono zéb zama hã marĩ dai õ di, tãma hã. Dahâimanazép tém na, iwẽ na si oto 're idahâimana za'ra mono hã, taha si tãma hã iwẽ uptabi.

Colosu 3:10

Taha wa'rãmi, te oto 're idanomro mono zé itém na si 're anomro aba mo, iwẽ na. 'Re ihâimana u'âsi mono, ma tô te te 're aipoto téb za'ra wa'wa aipẽ'ẽ 're, isine 're aihâimana u'âsi za'ra wa'aba mono da oto, taha zarina õhõ si duré 're waihu'u pese za'ra wa'aba mono da.

1 Timotiu 1:11

Roti tô sena na si, wa tô te dama ãma 're aroti, Wanhib'apito wasu'uwẽ na te dama 're rowasu'u mono wamhã. Wẽ uptabi di, Wanhib'apito wasu'u hã. Taha da, ma tô ĩma pisutu, iwasu'uwẽ na te ãma 're da'apo're pu'u mono da, 'Re ihâimana u'âsi mono hã, rowẽ u'âsi 're imorĩ hã.

Titu 3:5

'Re iwanomro wasété mono hawi, ma tô te te 're wa'anho'reptu. E 're wanomro wẽ mono wa, duré e wa te dama 're rob'manharĩ wẽ za'ra mono wa, ma tô te te 're wa'anho'reptu. Mare di. Wa'ãma 're ipẽ'ẽzé mono zarina, ma tô te te 're wa'anho'reptu. Tipẽ'ẽzani te te wama 're i'anhomri mono na, ma tô wapẽ'ẽ 're te te 're wa'apoto té. Wawasété hawi, ma tô wapẽ'ẽ 're, te te 're wa'a'upsõ, ãma 're wanomro wẽ mono da oto.

Tiagu 1:23

Ãté aibâ hã rob'madâ'âzém na te za si'madâ. Tawamhã si'madâ'â pari, oto nimomo morĩ wamhã, awa'awi te za sina po're ha'â. Tane, 'Re ihâimana u'âsi mono mreme hã dapo're na da te 're wapari za'ra mono nherẽ, da te 're 'madâ'â za'ra mono õ wamhã, awa'awi te za ãma 're dapo're simrami za'ra.

1 Zuwã 3:2

Ĩsisãnawã norĩ, ĩma asawi pese za'ra wa'aba norĩ hã, 'Re ihâimana u'âsi mono 'ra, wa oto 're wahâimana za'ra. Tane nherẽ, za 're iwahâimana za'ra mono zéb da hã, zahadu wama waihu'u prã za'ra di. Cristu hã apâ wei wazô morĩ wamhã, isine wa za oto 're wahâimana za'ra. Ãhã si wama waihu'u pese za'ra di. E marĩ wa, wa za isine 're wahâimana za'ra. Tô sena Cristu hã 're ihâimana mono zém na 'râwi wa te oto wasiwi 're waihu'u za'ra mono wa, wa za oto tô isine 're wahâimana za'ra.