2 Corĩtu 12:2 - ꞌRe Ihâimana Uꞌâsi Mono Zadawa Wasuꞌu

² Duréihã 'Re ihâimana u'âsi mono, ma tô ĩzaprõ, hâiwa u, 're isãmra mono zéb u. Wa hã Cristuhu zazei'wa. Ĩnhotõ 'rowim ne, hâiwa u ĩmorĩzém na hã 14 na ma tô ĩ'ãma tiwahu oto. Ãté ĩhâiba u'âsi na, wa tô wi. Ãté ĩpẽ'ẽzani na si. Wa hã ĩsiwaihu'u õ di. 'Re ihâimana u'âsi mono ma si, waihu'u pese di, ãne hã.

2 Corĩtu 12:2 ပူးပေါင်းရင်းမြစ်များ

Luca 24:51

Tawamhã taha ré, ma tô tiwi timorĩ za'ra. Imama hã ma tô tiwi âri za'ra, hâiwa u.

Zuwã 6:56

Ĩhâiba na 're dasaihuri mono wamhã, duré ĩwapru, da te 're âhuri mono wamhã, te za ĩsiré 're dahâimana u'âsi za'ra. Wa hã wa za duré dasiré 're ĩmorĩ u'âsi za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:6

Tawamhã damreme te te sina wapari zahuré wamhã, ma tô dawi aimani zahuré, wara sina, Paulu norĩ hã. Tahawa Rica'oniza na danhipti'a nho'õmo nhisi u ma tô tineb zahuré. Tamomo neb zahuré wamhã, Risitira na 'ri nho'õmo nhisi u, ma tô aimasisi zahuré, duré Débi na 'ri nho'õmo nhisi amoi u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 22:17

— Tawamhã Zeruzalẽ u apâ ĩwisi wamhã, 'Re ihâimana u'âsi mono nhorõwa 'ri u, wa tô mo, tãma ĩmreme da. Tawamhã tãma ĩmreme sina, ĩnhotõ 'rowim ne, wa tô Wanhib'apito hã 'madâ. Imreme hã wa tô duré wapa. Te ĩma tinha, ãne: “Ai'aba'ré na aiwatobro Zeruzalẽ hawi, ãmemhã da te aiwapari za'ra õ wa za, ĩwasu'u na hã.”

Roma 16:10

Ma'ãpé duré asiwi ĩma sawi wa'aba, Aperi hã. Ta hã marĩ na da te 're pibui ahâ mono nherẽ, niwa Cristuhu wi sipi'rai waihu'u õ di. Duré asiwi ĩma sawi za'ra wa'aba, Aristoburuhu nhorõwa 're, 're ihâimana za'ra mono norĩ hã.

Roma 16:3

Ma'ãpé, duré ĩma sawi za'ra wa'aba za, Prisila norĩ hã Aquiraha me, te ãma isawi zahuré zéb zarina, rob'ui'éré na.

Roma 16:7

Duré asiwi ĩma sawi zahuré wa'aba, Ãdronicu norĩ hã, Zuniasihi me. Ta norĩ hã ĩsiré zudeu norĩ, ma tô ĩsiré tihâimana zahuré, dazazéb 'remhã. Cristuhu zadawa wasu'u'wa norĩ siré te te 're romhuri zahuré mono wa, tãma waihu'u pese za'ra di, isiré romhuri'wa norĩ ma hã. Ta norĩ hã ma tô ĩwana saze na'rata zahuré, Cristu hã.

Roma 16:9

Duré Urbanuhu zama asiwi ĩma sawi wa'aba, wasiré romhuri'wa hã Cristuhu ma. Estaqui hã ĩsiwadi zama te za duré asiwi ĩma isawi wa'wa, ĩma isawi pese uptabi hã.

Roma 8:1

Cristu Zezusihi ãma 're inomro mono norĩ hã, 'Re ihâimana u'âsi mono te te siwi 're i'awẽ'õ mono zé hã hâimana õ di oto. Taha zarina, te te duré oto 're ahâ za'ra mono õ di za.

1 Corĩtu 1:30

'Re ihâimana u'âsi mono nhimipisutuzéb zarina si, te oto Cristu Zezusihi ãma 're anomro aba mo. Cristuhu ãma si oto 're anomro aba mono wa, te tinhimirowaihu iwẽ hã te te aima 're waihu'u u'âsi za'ra wa'wa. Cristuhu dâ'âzém na si, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Taha zarina si, ma tô duré te te 're wa'apisutu, isib'a'uwẽ si oto tãma 're wahâimana wẽ za'ra mono da. Taha zarina si, ma tô duré wawasété hawi wa'anho'reptu, sitẽme te te 're wa'awaibui mono da.

2 Corĩtu 11:11

E marĩ wa, wa tô ĩnhiwari ãna aima romhuri za'ra wa'wa. E ĩma asawi za'ra wa'aba õ wa. Mare di. Ĩma asawi uptabi za'ra wa'aba di. Ãne na ma tô 'Re ihâimana u'âsi mono si ĩwaihu'u, 're ĩhâimana mono zém na hã.

2 Corĩtu 13:5

Aipẽ'ẽ 're, te za a'â 'râwi asi'madâ'â za'ra wa'wa, isazei'wa norĩ hâimanazéb zarina, tô sena 're aihâimana za'ra wa'aba mono zô. Ãne na asina tãma 're uwaimrami za'ra wa'aba mono wamhã, Zezu Cristu, aipẽ'ẽ 're, 're isãmra aba mono na, te za asina iwaihu'u za'ra wa'wa. E ãne hã asina 're waihu'u za'ra wa'aba mono õ di bété. Tane nherẽ, Cristu hã aipẽ'ẽ 're, 're sãmra aba mono õ wamhã, asina tãma 're i'uwaimrami za'ra wa'aba mono õ na, te za asina iwaihu'u za'ra wa'wa, asi'uihâ na 'râwi.

2 Corĩtu 5:17

Ni'wam norĩ hã Cristu te te 're saze za'ra mono wa, simisutu tihâiba na sina 're sitob za'ra mono wamhã, 're idapoto téb za'ra mono zéb ré si, te za oto 're hâimana za'ra. Tahawa, te za 're inomro 'rata mono zé hã tãma 're si'utõrĩ za'ra. Ãhã wamhã, 're ihâimana 'rata za'ra mono zé hã tâibâ za oto. Taha wa'rãmi, te za oto 're idahâimana téb za'ra mono zém na si 're hâimana za'ra, iwẽ na si.

2 Corĩtu 5:21

Cristu hã ti'ai ãma 're morĩ ré, ma tô wasété ãna 're hâimana u'âsi. Tiwasédé hã te te 'manharĩ õ nherẽ, 'Re ihâimana u'âsi mono hã ma tô uburé wawasédé, wa te 're i'manharĩ za'ra mono zém na hâiba wati'i, wa'upana za'ra, Cristuhu ãma 're wanomro mono wa, te te oto 're iwa'awẽsãmri mono da hã.

Galata 1:22

Zahadu te te siwi ĩhâiba pibu za'ra õ di, Zezusihi zazei'wa norĩ hã daza'rui mono bâ, Zudéa na danhipti'a nho'õmo nhisi ãma siré 're isi'rã'õtõ mono norĩ hã.

Galata 5:6

Simisutu Cristu Zezusihi nhib'a'uwẽ oto 're wanomro mono wamhã, 'Re ihâimana u'âsi mono hã te te 're wa'aba'a mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeu'õ na 're iwahâimana za'ra mono zém na hã, te te oto 're wa'awaihu'u mono õ di za. Zezu Cristu Danho'reptui'wa na, wa te wasina 're umnhasi za'ra mono wa, wanhimizawi pese na 're iwahâimana za'ra mono zém na si, te za oto te te 're wa'awaihu'u, 'Re ihâimana u'âsi mono hã.

Éfézu 4:10

Ti'ai u we imorĩ hã ma tô apâ mo, hâiwa nhipai u ropâ uburé da'madâ'â'wa dama 're hâimana mono da.

1 Tesalonita 4:17

Tawamhã wa norĩ hã isazei'wa norĩ, zahadu wahâiba ré 're iwahâimana za'ra mono norĩ hã, apâ ihâiwa'utu za'ra norĩ me, te za sitẽme wa'ubumro awa'awi, hâiwa'a ãma. Tawamhã Wanhib'apito ãhã wamhã wa za oto aihĩni sõpẽtẽ za'ra ni, hâiwa nho're ãma. Tawamhã i'rata wa za oto 're wahâimana u'âsi za'ra.

Hebreu 4:14

Sasedoti ipire uptabi na te tô ni'wa hã te te wa'ãma 're romhuri u'âsi. Ta hã Zezusi, 'Re ihâimana u'âsi mono 'ra. Timama u ma tô mo hâiwa u, 'râwi te te tiwi 're rowaptẽrẽ u'âsi mono da, wama za'ra. Tahawa, Zezusi, wa te 're isaze za'ra mono zém na tô sena dama 're iwasiwasu'u za'ra mono zéb zarina, wa za tô ta hawim haré wanhiptete sina ãma 're wahâimana u'âsi za'ra.

Hebreu 9:24

Ãhã wa, Cristu hã dâ'â pari oto duré hâiwa'utu wamhã, ti'ai ãma danhib'rata na da te 're i'ri za'ra mono 'remhã, sébré õ di, 'Re ihâimana u'âsi mono iwa 're isãmra mono zéb u hã. E marĩ wa. Ta hã ti'ai ãma 'ri hã, hâiwa ãma 'ri i'uptabi ne si 're hâimana mono wa, duré i'uptabi õ wa. Hâiwa ãma 'Re ihâimana u'âsi mono hã iwa 're isãmra mono zéb u si ma tô ãzé Cristu hã, tame te te oto wa'ãma 're romhuri u'âsi mono da, Timama nho'a.

Apocalipsi 1:10

Tawamhã tame ĩnhamra ré, Wanhib'apito nhibâtâ na 'Re ihâimana u'âsi mono pẽ'ẽzani hã ma tô ĩ'uihâ pi'ra. Te te ĩ'uihâ pi'rai wa, wa tô aimawi ĩhâiba, ĩhâiba waihu'u õ na. Tawamhã ĩhâiba waihu'u õ na ĩhâimana ré, wa tô ni'wai mreme hã wapa, ĩbabarãi hawi. Mreme 'rãihâ na te ĩma tinha, danhimnhihârâzé hârâ 'rãihâ na ne.

Apocalipsi 12:5

Tawamhã ma tô tãma waptãrã aibâ na, simiwada'uri nhiptete na za daro mono bâ te te 're ida'awada'uri mono da hã. Tawamhã ma tô tiwi âri ni, 'Re ihâimana u'âsi mono u, danhib'apito simasisizém na 're isãmra mono u, isiré danhib'apito na 're hâimana mono da.

Apocalipsi 4:2

Tawamhã 'Re ihâimana u'âsi mono pẽ'ẽzani hã ma tô duré ĩ'uihâ pi'ra, awa'awi. Te te ĩ'uihâ pi'rai wa, wa tô duré aimawi ĩhâiba, ĩhâiba waihu'u õ na. Tawamhã ma tô ĩzaprõ, hâiwa u. Hâiwa u, te te ĩzaprõni wamhã, danhib'apito simasisizé hã wa tô 'madâ. Ni'wa hã te ãma nhamra.