2 Corĩtu 11:8 - ꞌRe Ihâimana Uꞌâsi Mono Zadawa Wasuꞌu

⁸ Cristuhu wasu'uwẽ na te aipawaptob za'ra wa'aba da, ai'rata ĩnhamra aba ré, rob'uiprazém na ĩma asõprub za'ra wa'aba õ nherẽ, ma tô ai'upana za'ra wa'aba, isazei'wa norĩ hã ĩpawaptob za'ra, darob amoi ãma 're isi'ubumroi mono norĩ hã. Ta norĩ hã Wanhib'apito wasu'uwẽ na te pawaptob za'ra dai õ nherẽ, ma tô tite rob'uiprazém na ĩpawaptob za'ra, aima za'ra wa'aba si, te ãma iromhurizéb da hã.

2 Corĩtu 11:8 ပူးပေါင်းရင်းမြစ်များ

1 Corĩtu 4:12

Wahâimanazéb da hã, wawasutu nherẽ, wa wanhib'rata na wa te 're romhuri pese za'ra. Duré da te wa'ãma 're wasété za'ra mono nherẽ, wa da'ãma 're wamreme zusi u'âsi, 'Re ihâimana u'âsi mono ma, iwẽ hã te te dama 're anhomri mono da. Duré da te wama 're rob'manharĩ wasété za'ra mono nherẽ, wa wanhiptete na õhõ ãma si 're wahâimana za'ra, asa wa te dama ãma 're wa'rãmi za'ra mono ãna.

1 Corĩtu 9:6

Wa hã Paulu, duré ĩsiré romhuri'wa Banabé, Zezusihi zadawa wasu'u'wa norĩ siré, 're wahâimana mono nherẽ, e wa norĩ si, wa za wanhib'rata na wa te wasima 're romhuri pese, wasazéb da hã, ãma 're iwahâimana mono zéb da hã. E ãne hã i'uwaibaba bâ bété. I'uwaibaba õ di.

2 Corĩtu 11:9

Ai'rata ĩnhamra aba ré, asimarĩ zô, te aiwasutu za'ra wa'aba da, te nasi aiwi rowaptẽrẽ za'ra wa'aba õ di, marĩ zô ĩwi rowaptâ'â wamhã. Wasisãnawã norĩ si, ma tô uburé marĩ na siwi ĩpawapto, ãma ĩhâimana mono zéb da hã, Masédonia hawi, ãma ĩsiré isi'aba'ré norĩ hã. Tahawa, ai'rata ĩnhamra aba ré hã, ĩnhiwari na hã te nasi ropire hã aima 'manharĩ za'ra wa'aba õ di. Tane, wa za duré ĩhâimana, apâ ĩmorĩ na te sahu wamhã, ãma atẽme za'ra wa'aba.

Filipu 4:18

Ãme wa tô uburé marĩ hã ĩsima waibui wẽ, we asiwi ĩpawaptob za'ra wa'aba zé hã. Epafroditu hã ma tô we ĩma ãwisi wẽ, we ĩma asõprub za'ra wa'aba zé hã. Tahawa, marĩ zô ĩwi rowaptâ'â õ di oto. Sa'ẽtẽ na te za oto marĩ hã ĩma tihâiba. Ãne wa, wa ĩsina ai'uze za'ra wa'wa, we ĩma asõprub za'ra wa'aba zém na hã. Asõprub za'ra wa'aba zé hã wẽ uptabi di, 'Re ihâimana u'âsi mono ma hã. Wedewati isadaze hã 'Re ihâimana u'âsi mono ma, da te 're izata za'ra mono zéb zarina, tãma ãma 're irowẽ pusi mono ne, tãma wẽ uptabi di duré ãhã na hã, we ĩma asõprub za'ra wa'aba zé hã.