2 Corĩtu 10:2 - ꞌRe Ihâimana Uꞌâsi Mono Zadawa Wasuꞌu

² Ni'wam norĩ hã ma tô ãne na ĩma nharĩ za'ra, ĩhâiba na: “Paulu hã isazei'õ'wa norĩ ne, te 're hâimana.” Ãne te ni'wam norĩ hã te te ĩ'ãma 're rosa'rata upa za'ra. Tahawa, apâ ãma atẽme ĩmorĩ aba wamhã, ãté ĩmreme tete na, wa za tô oto aima roti za'ra wa'wa, ĩpahi ãna, ãne hã te ĩsima wẽ õ nherẽ. Tahawa, ĩwasu'u wasédé hã wapari za'ra wa'aba õ di za, ãne na te aima nharĩ za'ra wa'aba tõ da, asõ'a za'ra wa'aba.

2 Corĩtu 10:2 ပူးပေါင်းရင်းမြစ်များ

Roma 8:1

Cristu Zezusihi ãma 're inomro mono norĩ hã, 'Re ihâimana u'âsi mono te te siwi 're i'awẽ'õ mono zé hã hâimana õ di oto. Taha zarina, te te duré oto 're ahâ za'ra mono õ di za.

Roma 8:4

Ãne ma tô 'Re ihâimana u'âsi mono hã 'manha, isimiroti na rob'ui'éré hã wa te wasina 're i'uwaimrami za'ra mono zéb da hã, Ipẽ'ẽzani, wa te 're i'madâ'â pese za'ra mono zéb zarina, wapẽ'ẽ 're wanhimirosa'rata wasété na 're wahâimana za'ra mono õ wamhã.

Roma 8:5

Ni'wam norĩ hã 're ihâimana wasété za'ra mono ma si, tihâiba te te 're isõmri u'âsi za'ra mono norĩ hã ta norĩ hã te siwa'ru 'râwi te te sima 're iwẽ za'ra mono zéb zarina si, te te 're rosa'rata wasété u'âsi za'ra. Tane nherẽ, ni'wam norĩ hã 'Re ihâimana u'âsi mono pẽ'ẽzani nhimiroti zarina si 're ihâimana za'ra mono norĩ hã, ta norĩ si te te sima 're rosa'rata wẽ u'âsi za'ra, Ipẽ'ẽzani te te tãma 're iwẽ za'ra mono zéb zarina si.

2 Corĩtu 1:17

Tane nherẽ, ãma atẽme ĩmorĩ aba zém na, te sahu õ di, Masédonia hawi apâ ĩmorĩ ré, ãma atẽme ĩsipai waihu'u za'ra wa'aba õ wa. Marĩ hã ĩma hâimana wa, wa tô ĩnhimirosa'rata na ãma saprĩ, ãma atẽme ĩmorĩ aba tõ da a'â. Ãne wa, ni'wam norĩ hã asiré 're ihâimana za'ra wa'aba mono norĩ hã ma tô ĩ'ãma rosa'rata wasété za'ra, ĩzadawa nhipese na hã, ĩmreme hã tô senai õ newa. E ĩnhimirosa'rata na 'râwi te ĩsiwi ro'wa'rutu wa, wa tô ãne hã ĩsima pisutu, ãma atẽme ĩmorĩ aba tõ da hã. Mare di. E isazei'õ'wa norĩ hã sima si 'râwi te te 're irosa'rata za'ra mono ne, wa tô ãne hã ĩsima pisutu. Mare di. Ãne wab õ di. Isazei'õ'wa norĩ hã marĩ na te te dama 're ropisutu za'ra mono wamhã, awa'awi te za te te dawi ãma 're saprĩ za'ra, simirosa'rata na saprĩ pese wa, ta norĩ hã. Isimiropisutu na ropsi'âri õ nherẽ, te za te te dama 're nharĩ za'ra, siwa'rãmi. E ãne, 're ĩhâimana mono zé hã, wa hã. Mare di. Ãnei õ di.

2 Corĩtu 11:21

Wa hã ãne, te aima 're i'manharĩ za'ra wa'aba mono da hã, ãté aré sada ĩnhib'uware di. Ta norĩ si hã tinhimirosa'rata na sina 're siptete za'ra mono di, ãne te te aima 're irob'manharĩ wasété za'ra wa'aba mono zéb da hã. E ãne da hã, 're ĩhâimana mono bâ, wa hã bété. Mare di. Ta norĩ hã marĩ wasu'u wẽ na, dama 're isiwasu'u za'ra mono zém na hã te te siwi ãma ĩwabzu za'ra õ di, Wanhib'apito wasu'uwẽ na te dama 're iromhuri wẽ mono zém na hã. Tane nherẽ, wa hã ãne na aima ĩsiwasu'u za'ra wa'aba 'wa'âhã, ãté tô ĩnhimiza'rese'õ ne, wa aré aima 're ĩhâimana za'ra wa'wa.

2 Corĩtu 13:10

Ãne wa, wa asiti ĩnhamra aba ré, aima ãma rob'ui'éré za'ra wa'wa, za ãma atẽme ĩwisi aba wa, asõ'a te aima nharĩ za'ra wa'aba tõ da, Wanhib'apito zadawa para te te ĩma ipisutuzéb zarina. Ma tô ĩma pisutu tô, isadawa para si te 're aipawapto wẽ za'ra wa'aba mono da. E tawamhã ĩnhimipawaptobzéb zarina, ãma 're anomro wẽ wa'aba mono zé hã te aiwi 're uprosi za'ra wa'aba mono da, ma tô ãne hã ĩma pisutu. Mare di. Taré isadawa para si, te 're aipawapto wẽ za'ra wa'aba mono zéb zarina, asiptete sina ãma 're anomro aba mono da si, ma tô ĩma pisutu tô, Wanhib'apito hã.

2 Corĩtu 13:2

Maparane ãma, ĩmorĩ na te ãma atẽme sahu za'ra wa'aba wamhã, wa tô aima waihu'u siromo za'ra wa'wa, aiwasédé 're i'manharĩ u'âsi za'ra wa'aba mono norĩ, za te i'aihâ za'ra wa'aba zém na hã. Ĩnhimi'ui'éré na, wa za oto ãne na aima ãma sahu za'ra wa'wa, asiti za'ra wa'aba ĩhâimana nherẽ. Ãma atẽme ĩmorĩ aba wamhã, ĩnhimi'ahârizé hã te aima ba'a za'ra wa'aba õ di za, aiwasédé 're i'manharĩ u'âsi za'ra wa'aba mono norĩ ma hã, duré ĩza'u si tiwasété zô 're isipizari za'ra mono norĩ ma zama.