2 Corĩtu 10:13 - ꞌRe Ihâimana Uꞌâsi Mono Zadawa Wasuꞌu

¹³ Tane nherẽ, wa norĩ hã tô ibâre, wa aima wasiwasu'u za'ra wa'aba ni. 'Re ihâimana u'âsi mono te te wama ipisutuzém nhipai u, aima wasiwasu'u za'ra wa'aba õ di. Romhuri hã, 'Re ihâimana u'âsi mono te te wama ipisutuzéb zarina si, wa tô wa te dama 're romhuri, a norĩ wa'aba ma zama. Taha na si, wa aima wasiwasu'u za'ra wa'aba ni, wa te dama 're iromhuri wẽ mono zém na si.

2 Corĩtu 10:13 ပူးပေါင်းရင်းမြစ်များ

Salmu 19:4

Tane nherẽ, iwasu'uzé hã ma tô uburé ti'ai mono bâ te te datẽme ropé. Duré 'Re ihâimana u'âsi mono hã ma tô bâdâ 're isa mono zéb da, ro te te tãma ipisutu ãma tisã.

Provébiu 25:14

Ni'wa te te ropisutu nherẽ, tinhibzari te te dama isõmri õ hã, aiwa hâiwa nhirõtõ hawi rowa'u tã 're ta'a mono da, te te 're isani mono õ ne hã.

Roma 10:18

E zudeu norĩ hã zahadu iwasu'uwẽ hã te te 're wapari za'ra mono ã bâ bété. Iwasu'uwẽ hã ma tô te te 're wapari za'ra aré ta norĩ hã, tô sena na. Duréihã Dawi hã ma tô ãne na ãma rob'ui'éré: “Isadawa wasu'u'wa norĩ mreme hã ma tô daro mono bâ te te 're ropé. Ta hã ma tô ropâ dapo're na hã da te 're wapari za'ra.”

Roma 12:3

'Re ihâimana u'âsi mono hã tinhimizawi pese zéb zarina, ma tô ĩpisutu, isadawa wasu'u'wa na oto 're ĩhâimana mono da. Tahawa, wa za oto ãne na aima roti pese za'ra wa'wa. Dama aipire na, duré dama aiwẽ na 're aihâimana za'ra wa'aba mono õ nherẽ, 'râwi aipire na 're asi'madâ'â za'ra wa'aba mono õ di za. 'Re ihâimana u'âsi mono, ma tô te te sima 're aipisutu za'ra wa'wa, õhõ ãma si oto 're anomro aba mono da. Tane nherẽ, aihĩni isazei'wa, asiré 're anomro aba mono nherẽ, ni'wam norĩ si te isazei pese 'wa hã 're hâimana za'ra. Duré ni'wam norĩ hã isazei prãi 'wa, te 're hâimana za'ra. Isazei prãi 'wa norĩ hã 're sazei pese za'ra wa'aba mono newa, 'râwi asi'ãma 're rosa'rata za'ra wa'aba mono õ di za, 're sazei pese za'ra wa'aba mono õ nherẽ.

Roma 12:6

Tahawa, 'Re ihâimana u'âsi mono hã simizawi pese uptabi wa, romhuri te te wama 're i'apisutu mono zéb zarina, wasipu'u pese na, wa za wa te tãma 're romhuri za'ra, wate mono bâ, ãma 're iwasipawaptob za'ra mono zéb da hã. 'Re ihâimana u'âsi mono zadawa wasu'u na, sena na isazei'wa norĩ ma si te te ãma 're irowasu'u za'ra mono zéb da, te te sima 're wa'apisutu mono wamhã, taha zarina si, wa za tô ãma 're wasipawaptob u'âsi za'ra. Isimiroti zarina si, wa za wa te 're sadawa wasu'u za'ra, wasiré isazei'wa norĩ ma.

Roma 15:20

Wa hã wa tô ãne hã te ĩsima 're rosa'rata u'âsi, Cristuhu wasu'uwẽ hã zahadu dapo're na da te 're iwapari za'ra mono õ norĩ u si, 're ĩmorĩ da, daza'rui mono bâ iwasu'uwẽ na te ãma 're da'apo're pu'u mono da. Wanhib'apito wasu'uwẽ na danhimi'u'ẽi 'rata u 're ĩzasi tõ mono da, wa tô ãne na te ĩsima 're rosa'rata u'âsi.

1 Corĩtu 12:11

Tô õhõ si te misi nherẽ, 'Re ihâimana u'âsi mono pẽ'ẽzani hã romhuri te te dama 're apisutu, isazei'wai mono bâ, te te sima 're ida'awẽ mono zéb zarina, ãma 're idasipawaptob za'ra mono zéb da hã.

Éfézu 4:7

Cristu hã ma tô marĩ iwẽ na i'madâ'â waihu'u õ na wama 're sõprub za'ra, wahâiba mono bâ, te te wama 're i'apisutu mono zéb zarina, wa te tãma 're idapawaptob za'ra mono zéb da hã.

1 Pedru 4:10

'Re ihâimana u'âsi mono hã sõpru wa, ma tô aihâiba mono bâ dama 're iromhuri za'ra wa'aba mono zéb da hã, aima sõmri za'ra wa'wa, sipu'u pese na. Taha zarina te za oto ate aba mono bâ dama ãma 're i'uwaimrami za'ra wa'aba mo, asimiromhuri za'ra wa'aba na hã.