2 Corĩtu 10:1 - ꞌRe Ihâimana Uꞌâsi Mono Zadawa Wasuꞌu

¹ Ni'wam norĩ hã asiré wa'aba, 're ihâimana za'ra mono norĩ hã te ãne te te sima 're ĩbâsi za'ra: “Paulu hã wa'rata sãmra ré hã, waimri na ihâimana, duré wama za'ra hã isasi õ. Wanhiti romhâ na 're hâimana mono wapsi, te mreme pahi ãna te te wama 're anharĩ, tinhimi'ui'éré na si.” E ãne hã ĩma 're hâimana mono bâ. Mare di. Wa hã Paulu, wa za oto aima ãma roti za'ra wa'wa. Ĩwapari pese za'ra wa'aba za. Cristuhu nhisi na, wa za ãma aima roti za'ra wa'wa ãhã na hã, ta hã simizawi pese wa, duré atãma na 're hâimana u'âsi mono wa. Marĩ da, 're sisapẽtẽ waihu'u mono õ di, ta hã.

2 Corĩtu 10:1 ပူးပေါင်းရင်းမြစ်များ

Salmu 45:4

Aiwaihu'u pese zarina ma'ãpé awaru na dasisô 're idapra mono ne, da'ãma 're ai'uté mono da, dazô aiwatobro, sena na duré i'uwaibaba na asimiroti 'wawi 're aimapa mono da. Asiptete zarina te za duré da'ahâ ãma 're ĩ'ai'uté mo.

Mateu 11:29

Wa hã ĩpẽ'ẽ na ĩnhimizawi pese uptabi di. Atãma duré ĩhâimanazé hã. Tahawa, ma'ãpé ĩ'ãma 're sasõmri za'ra wa'aba mono, ĩ'ãma 're waihu'u pese za'ra wa'aba mono da. Tawapsi te za aipẽ i're aima 're simi'wara 'wa.

Mateu 21:5

“Ma'ãpé, tãma rowasu'u za'ra wa'aba, Siã na ẽtẽ 'rãihâ nhisi ãma 're idasi'ubumroi mono norĩ ma, ãne: ‘Õhõta te we oto atẽme timorĩ 'wa, asib'apito za'ra wa'wa hã. Ta hã dazada 're ihâimana mono õ isimizawi pe te we ãma mo, awaru po'repore na, ipréduptém na hã.’ ”

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:32

Rob'ui'éré te te isõré mono hã ãne: “Pone'ẽrebâ, da te wĩrĩ da, da te dasiwi isaprõni ne, ma tô dasiwi saprõni ni, da te dasiwi wĩrĩ da. Tawamhã dawi sisawi ãna ma tô dama mo. Duré pone'ẽrebâ 'ra hã da te séré nhihâri wamhã, isadari õ ne, ari'iwi ma tô tihâiba.

Roma 10:20

Izaia hã ma tô duré ãne na isa'u ãma rob'ui'éré, zudeu'õ norĩ wasu'u na hã. Zudeu norĩ hã te te siwi 're iwẽ'õ pese za'ra mono zém na, ma tô siptete sina ãma rob'ui'éré, 'Re ihâimana u'âsi mono mreme na: “Ni'wam norĩ hã aré ĩzô 're sõpré u'âsi mono õ nherẽ, ma tô te te siwi 're ĩsãmri za'ra. Ĩzô 're sinharĩ za'ra mono õ nherẽ, wa tô ta norĩ ma 're ĩsiwaihu'u za'ra.”

Roma 12:1

Ĩsisãnawã norĩ, 'Re ihâimana u'âsi mono hã e wa'ãma 're pẽ'ẽzé mono õ di, wa'ãma 're isiwãrĩ mono zéb da hã. Wa'ãma 're ipẽ'ẽzé mono zé hã, tãma sa'ẽtẽ uptabi di. Tahawa, wa za oto aima roti pese za'ra wa'wa, ãne na hã. 'Re ihâimana u'âsi mono ma si, te za 're asisõmri u'âsi za'ra wa'aba mo, tiwi 're asisawi za'ra wa'aba mono ãna. Taha ma si, te za aiwẽ uptabi na tãma 're aihâimana za'ra wa'aba mo, te te 're ai'madâ'â wẽ u'âsi za'ra wa'aba mono da. Ãhã zarina, ãma 're anomro wẽ u'âsi aba mono wamhã, taha si tô sena, ãma 're i'aiwata za'ra wa'aba mono zé hã.

Roma 15:15

Tane nherẽ, ãhã na ĩnhimi'ui'éré na, wa tô sõ'awi aima rowasu'u za'ra wa'wa, ĩsina ĩpahi ãna, rowasu'u ahâ na te ãma aipo're pu'u za'ra wa'aba da. Te aiwi udâ waihu'u za'ra wa'aba ãna, wa tô ĩnhimi'ui'éré na hã aima rowasu'u pese za'ra wa'wa, 'Re ihâimana u'âsi mono hã sõprum na te te ĩpisutu wa, Cristu Zezusihi ma si te oto 're romhuri mono da, zudeu'õ norĩ hã te tãma 're apawapto mono da. Sasedoti norĩ hã 'Re ihâimana u'âsi mono ma, te te da'ãma 're iromhuri za'ra mono ne, wa duré wa hã zudeu'õ norĩ ãma te 're romhuri u'âsi, 'Re ihâimana u'âsi mono ma, Zezusihi wasu'uwẽ na te 're pawaptob za'ra mono wa, te te 're isaze za'ra mono zéb zarina, 'Re ihâimana u'âsi mono te te 're wẽsãmri za'ra mono da. 'Re ihâimana u'âsi mono pẽ'ẽzani nhimipisutuzéb zarina, ta norĩ hã isib'a'uwẽ oto 're nomro mono wa, 'Re ihâimana u'âsi mono te te 're iwẽsãmri za'ra mono zéb da hã, wa ãne na hã te tãma 're romhuri u'âsi.

1 Corĩtu 2:3

Te ãma asabu za'ra wa'aba wamhã, ĩpẽ'ẽ 'remhã ĩnhib'uware di. Tahawa, wa tô duré ĩpahi te hã, rẽrẽ, ĩnhimiromhuri na 'Re ihâimana u'âsi mono ma, te ãma 're i'uwaimrami mono zém na hã te 're 'wanhi'riti mono õ'umnhasite.

1 Corĩtu 4:10

Cristuhu wasu'uwẽ na si, wa te dama 're rowasu'u za'ra mono wa, te isazei'õ'wa norĩ hã wanhimiza'rese'õ na 're iwahâimana za'ra mono na te te wa'ãma 're rosa'rata upa za'ra. E a norĩ wa'wa hã, 'Re ihâimana u'âsi mono nhimiroti, wanhipai u aima waihu'u pese za'ra wa'aba bâ, te ãne hã 'râwi asimirosa'rada hã asi'ãma 're i'manharĩ za'ra wa'aba mo, Cristuhu ãma 're aihâimana za'ra wa'aba mono na. Duré wa norĩ hã isazei'õ'wa norĩ ma, wawapure na 're iwahâimana za'ra mono na, te ta norĩ hã te te wa'ãma 're rosa'rata za'ra. E a norĩ wa'aba si, tãma aipire za'ra wa'aba bâ, te bété 'râwi ãne na asi'ãma 're irosa'rata za'ra wa'aba mo. Duré wa norĩ hã dama wawapure na 're iwahâimana za'ra mono na, da te wa'ãma 're rosa'rata za'ra mono wa, da te dasiwi 're wawazéb za'ra mono õ di. Ãté a norĩ wa'aba si, da te 're aiwazé pese za'ra wa'aba mono na, te 'râwi asi'ãma 're irosa'rata ze za'ra wa'aba mo. E ãne hã i'uwaibaba. Mare di.

1 Corĩtu 4:21

Ãne, wa tô aima ãma roti za'ra wa'wa. Tawamhã e ma hã te za asima iwẽ za'ra wa'wa. Atẽme ãma ĩmorĩ aba wamhã, e da'ra, da te 're ihâ za'ra mono ne, wa za ĩmreme na aihâ za'ra wa'wa, ĩnhimiroti hã 're wapari za'ra wa'aba mono õ 'ru te. Ãté wa za tô aihâ za'ra wa'wa, aihâimanazém na 're uwaimrami za'ra wa'aba mono õ wa. E ĩhâimanazém na atãma na wa za aima ĩhâimana za'ra wa'wa, ĩnhimizawi pese zéb zarina, ĩnhimiroti hã 're wapari pese za'ra wa'aba mono wẽ te. Ma'ãpé, 'râwi oto asi'uihâ na asima pisutu za'ra wa'aba, niha 're anomro aba mono zéb da hã.

2 Corĩtu 10:10

Ni'wam norĩ hã te duré te te sima 're ĩwasu'u za'ra, ãne: “Pauluhu nhimiroti hã pire uptabi di, tinhimi'ui'éré na si te te wama 're iroti za'ra mono zém na hã. Mreme tete sina, te za duré ãma wama roti pese za'ra, tinhimi'ui'éré na hã. Tane nherẽ, wa'rata sãmra wamhã, marĩ dai õ di. Wama mreme wapu za'rare di.” Ãne te ni'wam norĩ hã te te sima 're ĩbâsi za'ra, ĩza'rerap si.

2 Corĩtu 10:2

Ni'wam norĩ hã ma tô ãne na ĩma nharĩ za'ra, ĩhâiba na: “Paulu hã isazei'õ'wa norĩ ne, te 're hâimana.” Ãne te ni'wam norĩ hã te te ĩ'ãma 're rosa'rata upa za'ra. Tahawa, apâ ãma atẽme ĩmorĩ aba wamhã, ãté ĩmreme tete na, wa za tô oto aima roti za'ra wa'wa, ĩpahi ãna, ãne hã te ĩsima wẽ õ nherẽ. Tahawa, ĩwasu'u wasédé hã wapari za'ra wa'aba õ di za, ãne na te aima nharĩ za'ra wa'aba tõ da, asõ'a za'ra wa'aba.

2 Corĩtu 10:7

Atõmo na wahâiba mana wawi, asiwi 're iwa'madâ'â za'ra wa'aba mono zéb zarina si, ma tô asiwi 're iwawẽ'õ za'ra wa'aba mo. Ni'wam norĩ hã asiré wa'aba, 're ihâimana za'ra mono norĩ hã te ãne na te te si'ãma 're rosa'rata upa za'ra 'râwi: “Wa norĩ si, wa Cristuhu zadawa para, wa te 're romhuri za'ra.” Ãne na asi'ãma rosa'rata za'ra wa'aba ze te bâ, ma'ãpé apâ asi'ãma rosa'rata pese za'ra wa'aba. E marĩ wa. Wa norĩ zama, Cristuhu zadawa para dama romhuri'wai wa.

2 Corĩtu 11:21

Wa hã ãne, te aima 're i'manharĩ za'ra wa'aba mono da hã, ãté aré sada ĩnhib'uware di. Ta norĩ si hã tinhimirosa'rata na sina 're siptete za'ra mono di, ãne te te aima 're irob'manharĩ wasété za'ra wa'aba mono zéb da hã. E ãne da hã, 're ĩhâimana mono bâ, wa hã bété. Mare di. Ta norĩ hã marĩ wasu'u wẽ na, dama 're isiwasu'u za'ra mono zém na hã te te siwi ãma ĩwabzu za'ra õ di, Wanhib'apito wasu'uwẽ na te dama 're iromhuri wẽ mono zém na hã. Tane nherẽ, wa hã ãne na aima ĩsiwasu'u za'ra wa'aba 'wa'âhã, ãté tô ĩnhimiza'rese'õ ne, wa aré aima 're ĩhâimana za'ra wa'wa.

2 Corĩtu 11:30

Ãté niwapsi, wa za tô ãne na hã aima ĩsiwasu'u za'ra wa'wa, uburé marĩ na te 're irobzépata mono zém na si, taha zarina, marĩ da hã, ĩsi'uihâ na ĩnhib'uware na 're ĩhâimana mono zém na, asiwi ĩwaihu'u za'ra wa'aba da.

2 Corĩtu 12:5

Ãne na ĩma romhâimana wamhã, ãté ibâre, wa aré aima ĩsiwasu'u za'ra wa'wa, 'Re ihâimana u'âsi mono te te ĩwẽsãmrizém na hã. Tane nherẽ, taha na aima ĩsiwasu'u za'ra wa'aba õ di za. Ĩsi'uihâ na marĩ da, ĩnhib'uware na 're ĩhâimana mono zém na si, wa za aima ĩsiwasu'u za'ra wa'wa, asiwi ãma ĩwaihu'u za'ra wa'aba da hã.

2 Corĩtu 3:12

'Re ihâimana u'âsi mono te te dama iropisutuzép té hã, niwamhã wawi 're si'utõrĩ za'ra mono dai õ wa, wa taha umnhasi sina, wa te 're 'madâ'â u'âsi. Tahawa, wapahi ãna, wa tô wa te dama 're wasu'u u'âsi.

2 Corĩtu 5:20

Tahawa, ma tô Cristu hã datẽme wazatõrĩ za'ra, isadawa para, wa te dama 're sadawa wasu'u za'ra mono da. Ãne, wa wa te dama 're roti pese za'ra, Cristuhu nhisi na: “Ma'ãpé, 'râwi asi'madâ'â za'ra wa'aba, 'Re ihâimana u'âsi mono hã ai'ãma siwadi za'ra wa'aba da oto.” Ãne na ma tô wa'u'âbâ te te dama 're aroti pese, 'Re ihâimana u'âsi mono hã.

2 Corĩtu 6:1

Wa norĩ hã 'Re ihâimana u'âsi mono siré, wa te tãma 're iromhuri za'ra mono norĩ hã, wa za oto aima ãma roti pese za'ra wa'aba ni. 'Re ihâimana u'âsi mono, ma tô tinhimizawi pese zéb zarina, aima 're sõprub za'ra wa'wa, iwẽ na hã. Tahawa, isazei'wa na taré dama 're asiwasu'u za'ra wa'aba mono õ di za. 'Re aihâimana za'ra wa'aba mono zém na, te za asa iwa'rãmi asina tãma 're i'uwaimrami u'âsi za'ra wa'aba mo, 'Re ihâimana u'âsi mono ma hã.

2 Corĩtu 7:4

A norĩ wa'wa hã ĩma ai'umnhasi za'ra wa'aba di oto. Wa aima 're ĩtoi u'âsi za'ra wa'wa. Aiwasu'u wẽ wa'aba na, ma tô asina ĩma 're irowẽ zani za'ra wa'aba mo. Rowasédé hã wazada 're wairébé u'âsi mono nherẽ, wa ĩtoi uptabi na 're ĩhâimana u'âsi.

Galata 4:13

Ĩhâzé si ĩ'ãma watobro wa, wa tô ai'rata ĩnhamra za'ra wa'wa. Ãhã wa, wa tô Zezu Cristuhu wasu'uwẽ na aima rowasu'u na'rata za'ra wa'wa. Ãne na ma tô ĩ'ãma iwaihu'u za'ra wa'wa.

Galata 5:2

Ma'ãpé asina ĩwapari pese za'ra wa'aba za. Wa hã Paulu, marĩ hã wa za aima waihu'u za'ra wa'wa. Da te 're asihâiwata nhihâri za'ra wa'aba mono da, asizudeu za'ra wa'aba da, asina 're dazaze za'ra wa'aba mono wa, taha zarina 'Re ihâimana u'âsi mono te te 're asõ'reptu za'ra wa'aba mono da newa, e niha za tawamhã, ãne wamhã. Cristu hã wazada dâ'â za'ra nherẽ, te te 're wa'anho'reptui mono da, e taré te za ã hã bété 're hâimana, asada za'ra wa'aba idâ'âzé hã.

Éfézu 3:1

Tahawa, wa hã Paulu, wa 'Re ihâimana u'âsi mono wi hã, te tiwi 're rowaptẽrẽ u'âsi, aima za'ra wa'aba. Zudeu'õ norĩ, wa hã, Cristu Zezusihi zadawa wasu'u'wa wa 're mo, iwasu'uwẽ na te 're aipawaptob za'ra wa'aba mono da. Taha 'ru te, ma tô dasiwi ĩnherẽ ni, dazazéb 're, ĩzab da.

Éfézu 4:1

Tahawa, wa za aima roti za'ra wa'wa, Wanhib'apito ma romhuri'wa 're ĩmorĩ 'ru te, dazazéb 're da te dasiwi 're ĩzai mono wa, 're ĩza mono ré. Ma'ãpé dama 're aihâimana wẽ za'ra wa'aba mono za, 'Re ihâimana u'âsi mono te te sima 're i'aiwẽ za'ra wa'aba mono zéb uwaibaba. Taha da, ma tô te te sima 're aipisutu za'ra wa'wa.

Filipu 4:5

Aiwaimri te za dama 're aihâimana za'ra wa'aba mo, iwẽ na. E marĩ wa. Wanhib'apito hã za we apâ morĩ su'u na dâ'âsina.

Colosu 1:23

Tahawa, õne haré te za Cristuhu wasu'uwẽ si asina 're i'umnhasi za'ra wa'aba mo asiptete sina, 'ri hã ẽtẽ nhisiwi siptete na 're sa mono wa, simei waihu'u õ na 're isa mono ne. Te za tô ãma 're aihâimana u'âsi za'ra wa'aba mo, tiwi asina 're aipahâ za'ra wa'aba mono ãna. Imorĩ'rata na Cristuhu wasu'uwẽ hã wapari na'rata za'ra wa'aba wamhã, iwẽ uptabi hã hâiwa ãma asô 're isimi'wara aba mono wasu'u wi, tiwi asina 're ai'ré za'ra wa'aba mono õ di za, sô 're asimipari za'ra wa'aba mono wasu'u wi hã. Ãhã wasu'uwẽ hã ropâ ma tô da te dasima 're wasu'u za'ra, da te 're waihu'u za'ra mono da. Duré wa hã Paulu, wa ãhã wasu'uwẽ na te dama 're romhuri u'âsi.

2 Tesalonita 3:17

Ĩsi'uihâ na wa aima ãma rob'ui'éré za'ra wa'wa, ĩnhib'rata na, ãhã na hã: “Wa hã Paulu, wa asawi za'ra wa'wa.” Ãne u'âsi, wa nasi dama rob'ui'éré, ĩnhisi na. Ãne wa aima rob'ui'éré za'ra wa'wa.

Filemo 1:19

Tô sena, ĩmreme hã. Wa hã Paulu hã wa za aima wa'â. Ãne wa oto aima rob'ui'éré, waihu'u da. A hã, Zezusihi zazei'wa. Ãhã na Zezusihi wasu'uwẽ zarina, robze na te oto 're aimo, iwasu'uwẽ hã te aima waihu'u wa, wa hã.

Filemo 1:9

Ĩma asawi pese wa, wa hã Paulu, dazazéb 're ĩnhamra nherẽ, Cristu Zezusihi zadawa wasu'u'wai wa, wa za taré aiwi rowaptẽ, asi'uihâ na si marĩ hã 'manharĩ da.

1 Pedru 2:11

Ĩsisãnawã norĩ, ĩma asawi pese za'ra wa'aba norĩ hã, darom nhiti 're idahâimana za'ra mono ne, te 're aihâimana za'ra wa'aba mo, ti'ab ré. Tahawa, marĩ wasété na 'râwi asima 're rosa'rata za'ra wa'aba mono õ di za, asimirosa'rata wasété zarina 're 'manharĩ za'ra wa'aba mono tõ da, aiwasété 'wa hã.

Apocalipsi 1:9

Wa hã Zuwã, asisãnawãi wa'wa. A norĩ wa'wa hã Zezusihi ãma si 're anomro aba mono wa, danhimirob'manharĩ wasédé, 're isépata za'ra wa'aba mono ne, wa duré te 're robzépata, asine za'ra wa'aba, Zezusihi ãma si 're ĩmorĩ wa. Zezusihi ãma si wasiré 're wanomro mono wa, wa duré 'Re ihâimana u'âsi mono nhib'a'uwẽ 're wahâimana za'ra. Ta hã te za duré te te 're wa'apawaptob u'âsi, da te 're wa'ruiwapari za'ra mono wa, wa te 're robzépata za'ra mono nherẽ, wawasété u tiwi 're wasipizari za'ra mono tõ da, wanhiptete u'âsi ãma 're wanomro mono da. Wa hã wa tô te dama 're sadawa wasu'u, 'Re ihâimana u'âsi mono hã. Tô sena na Zezusihi zazei'wa na wa tô duré dama 're ĩsiwasu'u u'âsi. Tahawa, ma tô dasiwi ĩ'âri ni. Ma tô duré dasiwi ĩzatõrĩ ni, Patemusi na rob'ré za'iti nhisi u.