2 Corĩtu 1:6 - ꞌRe Ihâimana Uꞌâsi Mono Zadawa Wasuꞌu

⁶ Wa norĩ hã, Cristu, wa te dama 're sadawa wasu'u mono wa, te da te wama 're rob'manharĩ wasété u'âsi. Taha zarina, wa te 're robzépata mono nherẽ, tô wama 're rowẽ mono di. E marĩ wa. Wanhimiromhuri zarina 're isaze za'ra wa'aba mono zéb zarina, 'Re ihâimana u'âsi mono te te 're asõ'reptu za'ra wa'aba mono wa, duré isimipawaptobzéb zarina, aipẽ hã i're aima 're simi'wara aba mono wa. Wa norĩ hã wa te 're robzépata mono wamhã, te tô 'Re ihâimana u'âsi mono hã te te 're wapawapto, wapẽ i're wama 're sa'wari u'âsi mono da. Ãne hã aima waihu'u pese za'ra wa'aba wa, te za 'râwi asima 're inharĩ za'ra wa'aba mo, ãne: “Paulu norĩ hã te te 're robzépata zahuré mono nherẽ, 'Re ihâimana u'âsi mono te te 're ipawaptob u'âsi zahuré mono ne, te za duré te te 're wa'apawapto, wapẽ i're wama 're simi'wara u'âsi mono da.” Ãne te za 'râwi asima 're inharĩ za'ra wa'aba mo. Tahawa, wasine 're robzépata za'ra wa'aba mono wamhã, te za asiptete sina ãma 're anomro aba mo, 'Re ihâimana u'âsi mono ãma. Tawamhã te te 're iwapawapto mono ne, te za tô 'Re ihâimana u'âsi mono hã te te 're aipawaptob za'ra wa'wa, aipẽ i're aima 're simi'wara aba mono da.

2 Corĩtu 1:6 ပူးပေါင်းရင်းမြစ်များ

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:5

Tawamhã bâdâ hã wasi'aba'rézéb da hã iwa waptã'ã wamhã, isazei'wa norĩ hã ma tô wasiré ai'aba'ré, â zaihâ u, 'ri nho'õmo nhiti. Aihĩni ma tô wasiré ai'aba'ré, aibâ norĩ hã timro norĩ me, duré ti'ra norĩ me, te te wazawi za'ra da. Tame wa tô wahi'rãtitõ asimro ni, supara 'ré wa, wamreme zusi da.

Roma 8:28

'Re ihâimana u'âsi mono zawi pese 'wa norĩ da, marĩ iwasédé hã ahâ na sada 're hâimana za'ra mono nherẽ, te za 'Re ihâimana u'âsi mono hã iwẽ si te te tãma 're apisutu iwa'rãmi, te te sima 're i'awẽ mono zéb zarina, tinhib'a'uwẽ da, te te sima 're i'apisutu mono norĩ ma hã. Ãne hã wama waihu'u pese za'ra di oto wa norĩ hã.

2 Corĩtu 1:4

Wa norĩ hã, Timotiuhu me, uburé marĩ ipire wa te 're sépata mono wamhã, te za tô te te 're wapawapto, wapẽ i're wama 're sa'wari mono da hã. Tahawa, wama waihu'u pese di oto duré, isarina, wa te 're idapawapto mono zéb da hã, wasine 're dapẽ'ẽ nhimi'wara mono da, marĩ ipire hã da te 're sépata za'ra mono wamhã. 'Re ihâimana u'âsi mono te te 're iwapawapto mono ne, wa za tô wa norĩ zama wa te 're dapawaptob za'ra, dapẽ hã i're dama 're simi'wara mono da apâ.

2 Corĩtu 12:15

Tawamhã ãma atẽme ĩmorĩ za'ra wa'aba wamhã, ĩto sina, wa za uburé ĩnhimarĩ hã uprosi, te ãma aipawaptob za'ra wa'aba da, te ãma i'âri hã za. Taha da, wa za duré aima romhuri pese za'ra wa'wa, ĩwasutu uptabi nherẽ. Ãne na hã ĩma asawi pese za'ra wa'aba nherẽ, e te za ãne wa'rãmi ĩzawi za'ra wa'aba ãna da hã ĩwi asisawi za'ra wa'wa.

2 Corĩtu 5:5

'Re ihâimana u'âsi mono si, ma tô te te wama 're apisutu siro, ãne hã. Tipẽ'ẽzani hã ma tô te te wama 're anhomri, sena na wahâiba ité hã za te te wama 're i'anhomri mono na, wa te wasina 're waihu'u za'ra mono da.

Éfézu 3:1

Tahawa, wa hã Paulu, wa 'Re ihâimana u'âsi mono wi hã, te tiwi 're rowaptẽrẽ u'âsi, aima za'ra wa'aba. Zudeu'õ norĩ, wa hã, Cristu Zezusihi zadawa wasu'u'wa wa 're mo, iwasu'uwẽ na te 're aipawaptob za'ra wa'aba mono da. Taha 'ru te, ma tô dasiwi ĩnherẽ ni, dazazéb 're, ĩzab da.

Éfézu 3:13

Ãne wa, wa hã te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za. Cristuhu wasu'uwẽ hã wa tô te aima 're wasu'u za'ra wa'wa, aima 're irowẽ za'ra wa'aba mono zéb da hã. Tahawa, Cristuhu wasu'uwẽ hã te dama 're wasu'u mono 'ru te, iwasédé hã da te ĩma 're 'manharĩ za'ra mono nherẽ, ĩma 're rowẽ mono di. Ãne wa, te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za.

2 Timotiu 2:10

Te irobzépata da hã ĩma pire nherẽ, ĩsisawi õ di, te robzépata tõ da hã. Te 're robzépata mono nherẽ, 'Re ihâimana u'âsi mono hã tinhib'a'uwẽ da, te te sima ipisutu za'ra norĩ hã wa za te 're apawaptob u'âsi, Cristu Zezusi hã te te 're saze za'ra mono da, taha zarina tinho'reptuzé hã te te sina 're uwaimrami za'ra mono da, rowẽ na i'rata 're hâimana u'âsi za'ra mono da.