2 Corĩtu 1:19 - ꞌRe Ihâimana Uꞌâsi Mono Zadawa Wasuꞌu

¹⁹ Zezu Cristu hã bété, 'Re ihâimana u'âsi mono 'ra hã. Ta hã tinhimiroti ahâ na te te ãma 're azaprĩ mono õ di. Tô õhõ si isimiroti hã te tãma 're hâimana. Tane duré, wa norĩ hã isadawa wasu'u'wa norĩ hã, Sila norĩ me duré Timotiu, tô i'uwaibaba si, wa tô wa te aima 're wasu'u za'ra wa'wa. Ta norĩ me hã, wa tô wa te aima 're sadawa wasu'u za'ra wa'wa, Cristu hã.

2 Corĩtu 1:19 ပူးပေါင်းရင်းမြစ်များ

Salmu 2:7

Tawamhã apito te tinha ãne: “Uburé Danhib'apito te te ĩma iwaihu'uzé, wa za dama sadawa 'mahâ. Uburé Danhib'apito, te ĩma tinha ãne: ‘A hã, ĩ'ra. Ã bâtâ na wa tô aimama na aima 're ĩhâimana mono da hã ĩsi'ãma a'ube.

Ezodu 3:14

Tahawa, 'Re ihâimana u'âsi mono te ãne sina tãma tinha: — WA HÃ, tô WA HÃ 'RE ĨHÂIMANA U'ÂSI MONO. Te duré zahadu tãma tinha ãne: — Te za duré tãma inharĩ za'ra za ãne: “Tô WA HÃ 'RE ĨHÂIMANA U'ÂSI MONO, ma tô we atẽme ĩzatõrĩ za'ra wa'wa.

Mateu 17:5

Tawamhã ãne Pedru te te tãma nharĩ ré, ma tô hâiwa nhirõno hã we hâiba zuwa za'ra, Zezusi norĩ hã. Tawamhã hâiwa nhirõtõ zarob'a hawi, ma tô 'Re ihâimana u'âsi mono hã mre, ãne: — Ã hã ĩ'ra, te 're isawi pese mono. Tãma 're ĩto za'ẽtẽ mono di. Ma'ãpé isimiroti hã 're wapari pese za'ra wa'aba mono za.

Mateu 24:35

Nimahã na te za hâiwa norĩ hã ai'utõrĩ zahuré, ti'ai me. Si'utõrĩ zahuré nherẽ, ĩnhimirowasu'u hã si'utõrĩ waihu'u õ di za. Pire na te za dama 're hâimana u'âsi.

Mateu 27:40

Ãma dawa'ẽ sina, te duré nasi ãne tãma nharĩ za'ra ni: — Oro a hã asima roti za, 'ri hã sãmra da, 'Re ihâimana u'âsi mono nhorõwa hã, duré apâ 'ri da, si'ubdatõ bâdâ hã ai'ãma si'utõrĩ õ ré. A hã tô sena 'Re ihâimana u'âsi mono 'ra wamhã, ma'ãpé asisõ'reptu na. Duré ma'ãpé wedepo'o nhonhi'rãmi hawi we si'ra na, atâ'â tõ da.

Mateu 27:54

Tawamhã Zezusi te te dawi i'madâ'â za'ra norĩ hã da'wapéi'wa norĩ hã, duré da'wapéi'wa norĩ wada'uri'wai me, ti'a isãsã iwatobro hã te te 'madâ'â za'ra wamhã, duré uburé ropipa iwairébé mono te te 'madâ'â za'ra wamhã, ma tô tipẽ'ẽwara pese za'ra. Tawamhã ãne te sima nharĩ za'ra: — Nare õ hã, tô sena 'Re ihâimana u'âsi mono 'ra.

Mateu 3:17

Tawamhã hâiwa hawi te we tinha ãne: — Ã hã ĩ'ra. Ĩma sawi uptabi di. Tãma ĩto za'ẽtẽ uptabi di. — Ãne te we tinha, Imama hã.

Mateu 4:3

Tawamhã Wa'uburé ma tô itẽme wi. Itẽme wisi wamhã, te tãma tinha ãne: — Sena a hã 'Re ihâimana u'âsi mono 'ra wamhã, ma'ãpé ẽtẽ ma nharĩ, i'u'ẽtẽ wapu na aima si'manharĩ za'ra da.

Marcu 1:1

Ãhã na isãna'rata hawi, wa za aima rowasu'u za'ra wa'wa, Zezu Cristuhu wasu'uwẽ na, 'Re ihâimana u'âsi mono 'ra wasu'u na. Romhâ ré, ma tô ãma rob'ui'éré siro, Izaia hã, 'Re ihâimana u'âsi mono zadawa 'mahârâ 'rata 'wa hã. Duréihã 'Re ihâimana u'âsi mono hã, ti'ra ma, te te iwaihu'uzém na ma tô ãma rob'ui'éré, ãne: “Wa hã wa za satõ ĩzadawa wasu'u'wa hã, aiwana, te te asô ropese mono da. Ãne te za te te dama 're rob'mahârâ, mreme 'rãihâ sina, a'ubuni wi: Ni'wa hã te za te te dama 're rob'mahârâ, a'ubuni wi: Bâdâdi hã asiwi ropese aba, Wanhib'apito zô. Imana 'rãmi bâdâdi hã sô sa'ra wa'aba mono, awa'awi si da.”

Luca 1:35

Tawamhã asa te duré tãma tinha, ãne: — 'Re ihâimana u'âsi mono, te za we aipawapto, tiwaihu'u pese na aiwasã da, ai'ra da. Taha da, te za Tipẽ'ẽzani hã we atẽme satõ. Tahawa, 'Re ihâimana u'âsi mono 'ra na, te za ai'ra hã da te 're sisi za'ra.

Zuwã 1:34

Wa hã wa tô ãma 'madâ. Tô sena, wa aima rowasu'u za'ra wa'wa. Õ hã, 'Re ihâimana u'âsi mono 'ra.

Zuwã 1:49

Tawamhã Natãnaéu asa te duré tãma tinha, ãne: — Rowahutu'wa, a hã 'Re ihâimana u'âsi mono 'ra. A hã uburé Izaraéu nhihudu norĩ nhib'apito.

Zuwã 19:7

Tahawa, te asa tãma nharĩ za'ra, dama ipire norĩ hã, ãne: — Ti'ai ãma poto nherẽ, ma tô dama 're siwasu'u, 'Re ihâimana u'âsi mono 'ra na. Mreme wẽ'õre di. Wahi'rata norĩ hã ma tô dama roti za'ra, ãne ni'wa, 're siwasu'u mono wamhã, wa te wasiwi wĩrĩ da.

Zuwã 20:28

Tawamhã Tome te asa tãma tinha, ãne: — A hã, Ĩnhib'apito uptabi. A hã, 'Re ihâimana u'âsi mono. Ai'ãma si, wa za 're ĩwata u'âsi.

Zuwã 20:31

Danho'reptui'wa da, 'Re ihâimana u'âsi mono te te ipisutu na, Zezusihi si 're saze za'ra wa'aba mono da, duré 'Re ihâimana u'âsi mono 'ra na 're saze za'ra wa'aba mono da, ma tô rob'ui'éré'wa hã ãne na ãma romnhihâtâ. E marĩ da, te za Zezusihi si asina 're i'umnhasi za'ra wa'aba mo. Rowẽ u'âsi ãma 're anomro aba mono da, duré 're atâ'â za'ra wa'aba mono ãna 're aihâimana u'âsi za'ra wa'aba mono da, 'Re ihâimana u'âsi mono 'rata, hâiwa ãma. Taha da, te za Zezusihi si asina 're i'umnhasi za'ra wa'aba mo.

Zuwã 3:16

'Re ihâimana u'âsi mono ma, tãma dazawi pese uptabi wa, ma tô ti'ra hã misi nherẽ, we tisõ, dazada dâ'â da. Tawamhã i'ra, da te dasina 're umnhasi za'ra mono wamhã, dadâ'â ãna te za hâiwa ãma i'rata 're dasi'ubumroi u'âsi. Ropipa ãma isiti 're dasi'ubumroi mono õ di za.

Zuwã 6:69

'Re ihâimana u'âsi mono, ma tô we asatõ. Wa norĩ hã wa tô asaze za'ra ni. A hã 're aimorĩ wẽ uptabi di. Ãne na wa tô aiwaihu'u za'ra ni.

Zuwã 8:58

— Tô sena, wa aima ĩsiwasu'u za'ra wa'wa. Abra'ã hã poto õ ré, wa 're ĩhâimana u'âsi. — Ãne Zezusi ma tô tãma siwasu'u za'ra, dama ipire norĩ ma.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:22

Tawamhã Zezusihi zadawa wasu'u'wa norĩ hã, da'madâ'â'wa norĩ me, ma tô aihĩni ãma sisaze za'ra, isiré isazei'wa norĩ me, Ãtioquia u tisiré norĩ hã te te siwi 'mazatõrĩ zahuré da, Paulu norĩ siré 'maneb zahuré da, Banabéhé me. Tawamhã Zuda hã ma tô siwi pisutu, Basaba na isisi amo hã, isiré neb zahuré da, Silaha me. Ta norĩ hã simiroti prédub zahuré di, isazei'wa norĩ ma hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:1

Tawamhã Débi u ma tô aimasisi zahuré, Paulu norĩ hã. Taha pari, ma tô duré aimasisi zahuré, Risitira u. Tame te aibâ hã 're sãmra, Zezusihi zazei'wa hã, Timotiu na isisi hã. Ina hã zudeu, Zezusihi zazei'wa, ta hã. Tane nherẽ, imama hã zudeu õ di, gregu norĩ siré hã, ta hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 18:5

Tawamhã tamomo ma tô Sila norĩ hã itẽme aimasisi zahuré, Masédonia hawi, Timotiuhu me. Itẽme simasisi wamhã, Paulu hã ma tô Zezusihi wasu'uwẽ na si romhuri u'âsi oto. Zudeu norĩ ma, te Zezusi hã tãma wasu'u za'ra, õ hã Danho'reptui'wa da, 'Re ihâimana u'âsi mono te te ipisutu na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:36

Tawamhã bâdâdi na neb zahuré ré, ma tô â u aimasisi zahuré. Tawamhã aibâ hã ma tô â hã tãma 'mahâ, Filipihi ma: — Ãhãta â. E wanhimizahâri õ di za a'â, â dawabzuri hã ĩma 'manharĩ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:20

Tawamhã awa'awi ma tô iwasu'uwẽ na dama ãma sãna'rata oto, rowahutuzé mono bâ, Zezusi hã 'Re ihâimana u'âsi mono 'ra, 're ihâimana mono na hã.

2 Corĩtu 1:1

Wa hã Paulu, wa ãma aima rob'ui'éré za'ra wa'wa, Corĩtu ãma, iwasu'uwẽ u 're asi'rã'õtõ aba mono norĩ ma, asiré. Uburé Ataza na danhipti'a nho'õmo nhisi ãma, 'Re ihâimana u'âsi mono nhib'a'uwẽ 're aihâimana za'ra wa'aba mono norĩ ma zama, wa ãma aima rob'ui'éré za'ra wa'wa. 'Re ihâimana u'âsi mono hã ma tô ĩpisutu, Cristu Zezusihi zadawa wasu'u'wa na isadawa para dama 're ĩhâimana mono da, daro mono bâ, te te sima ĩwẽzéb uwaibaba. Wano hã te duré ãma ĩzadawa wapto, uburé te aima ãma irowasu'u za'ra wa'aba zém na hã, Timotiu na wano nhisi hã.

1 Tesalonita 1:1

Isazei'wa norĩ, wa hã Paulu, Sila norĩ, Timotiu norĩ me, wa ãma aima rob'ui'éré za'ra wa'aba ni, Tesalonita na 'ri nho'õmo nhisi ãma asiré 're asi'rã'õtõ aba mono norĩ ma. Wamama hã 'Re ihâimana u'âsi mono hã, duré Wanhib'apito Zezu Cristu hã te asina 're i'umnhasi za'ra wa'aba mo, isib'a'uwẽ, 're aihâimana za'ra wa'aba mono da. Wa norĩ hã, wa ta norĩ ma hã, ai'ãma 're wamreme zusi u'âsi 'wa, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da.

2 Tesalonita 1:1

Isazei'wa norĩ, wa hã Paulu, Sila norĩ me, Timotiu norĩ me, wa ãma aima rob'ui'éré za'ra wa'aba ni, Tesalonita na 'ri nho'õmo nhisi ãma asiré 're asi'rã'õtõ aba mono norĩ ma. Wamama hã 'Re ihâimana u'âsi mono hã, duré Wanhib'apito Zezu Cristu hã te asina 're i'umnhasi za'ra wa'aba mo, isib'a'uwẽ 're aihâimana za'ra wa'aba mono da. Wamama ma, wa ai'ãma 're wamreme zusi u'âsi 'wa, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, duré ãma 're anomro aba mono da.

1 Timotiu 3:16

Tô sena Zezu Cristuhu wasu'uwẽ hã wẽ uptabi di, aré dama sa'rese õ nherẽ, Wamama hã te te oto dama ihâi'ré hã wa te 're isaze za'ra mono zé hã, ãma 're iwanomro wẽ mono zéb da hã. Ãne te te dama iwaihu'uzé hã: “A'uwẽ na ma podo, ti'ai ãma. Duré tô sena i'ra 're imorĩ wẽ uptabi na, ma tô Tipẽ'ẽzani na dama waihu'u za'ra. Duré hâiwa ãma 'Re ihâimana u'âsi mono ma romhuri'wa norĩ hã ma tô titõmo na 'madâ'â za'ra. Duré a'uwẽ mono bâ 're idahâimana za'ra mono norĩ hã ma tô iwasu'uwẽ na da te 're dapo're pu'u za'ra, daro mono bâ. Ma tô duré da te dasina 're umnhasi za'ra. Duré rowẽ uptabi u ma tô mo, hâiwa u.”

Hebreu 1:11

Tane nherẽ, te za niwamhã ai'utõrĩ zahuré za, sahuré ta norĩ hã, da'uza hã dawi 're ihâsiwamnarĩ su'u za'ra mono ne. Duré da'uza pano pa hã dawi 're hâsiwamnarĩ za'ra mono wa, rob u da te oto 're sãmra mono da, da te 're ihânhinha za'ra mono ne, te za ta norĩ hã i'uprosi zahuré, itép si 'manharĩ zahuré da, isõwa're're. Da'uza 'rada hã da te oto dasiwi 're wẽ'õ za'ra mono wa, ihâtép si da te ãma 're isaprĩ za'ra mono ne, te za tô itép si i'manharĩ zahuré, ti'a norĩ hã, hâiwa me. Tane nherẽ, niwamhã ai'utõrĩ õ di za, a hã. Aiwétési te za 're aihâimana u'âsi mo. Nimahã na hã ãma saprĩ waihu'u õ di za, aihâimanazém na hã. Tô õhõ na si, 're i'aihâimana mono zé hã za.”

Hebreu 13:8

Zezu Cristu hã tihâimanazém na te te ãma 're saprĩ waihu'u mono õ di. Ahâmhâ na duré ãhã na zama te tô õhõ u'âsi 're hâimana.

1 Pedru 5:12

Sila hã ma tô ĩpawapto, aima ĩnhimiroti suru za'ra wa'aba nherẽ, te te aima rob'ui'éré za'ra wa'aba da. Ta hã ĩsisãnawã ne, te ĩma 're hâimana. Tahawa, ĩma umnhasi di. Wa hã wa tô ĩsima aiwẽ za'ra wa'wa, ĩnhimiroti na te aipawaptob za'ra wa'aba da, Wanhib'apito ãma si asiptete sina 're anomro aba mono da, 'Re ihâimana u'âsi mono nhimipawaptobzé hã asi'uihâ na asina 're waihu'u za'ra wa'aba mono da. Taha wasu'u na si, wa tô te aima 're rowasu'u za'ra wa'wa, tô sena wa ta hã. Tahawa, te te 're aipawapto wẽ za'ra wa'aba mono wa, te za asiptete sina ãma 're anomro aba mo.

2 Pedru 1:17

I'rata wa tô aimasam ni, Imama ãma wata wamhã, 'Re ihâimana u'âsi mono hã. Hâiwa hawi te we tãma tinha, rowẽ uptabi hawi, ãne: “Ã hã ĩ'ra, te 're isawi pese mono, tãma 're ĩto za'ẽtẽ mono.” Ãne te we tãma tinha. Wa norĩ hã wa tô ãne na hã wapari za'ra ni, 'Re ihâimana u'âsi mono hâiwa hawi we te te tãma inharĩ na, ẽtẽ 'rãihâ iwazéb zahi ãma, Wanhib'apito Zezusihi 'rata wasimasab ré.

1 Zuwã 1:3

E marĩ da, wa ãne aima rowasu'u za'ra wa'aba ni, wa te 're i'madâ'â za'ra mono zém na hã, duré wa te 're iwapari za'ra mono zém na zama. Wamama siré 'râwi 're iwahâimana za'ra mono ne, duré i'ra siré Zezu Cristuhu siré 'râwi 're iwahâimana za'ra mono ne, a norĩ wa'aba zama isiré 're aihâimana za'ra wa'aba mono da, wa ãne aima waihu'u za'ra wa'aba ni.

1 Zuwã 5:20

Ãne wa tô duré waihu'u za'ra ni. Zezusi hã, 'Re ihâimana u'âsi mono 'ra hã ma tô wei mo, ti'ai u. Ta hã ma tô tinhimiroti na te te 're wa'apawapto, 'Re ihâimana u'âsi mono hã tô sena uptabi hã wa te 're iwaihu'u pese za'ra mono zéb da hã. I'ra ãma, Zezu Cristuhu ãma 're wanomro mono wa, wa duré Imama ãma 're wanomro, tô sena uptabi 're ihâimana mono ãma. Zezusi hã, ta hã uburé Danhib'apito uptabi. Ta hã dapẽ'ẽ 're dadâ'â ãna 're idanomro u'âsi mono zé hã, te te dama 're i'apisutu mono. Ãne na wa tô wasiwi waihu'u pese za'ra ni.

2 Zuwã 1:9

Ni'wam norĩ hã Cristuhu nhimiroti si te te 're wapari za'ra mono õ wamhã, tinhimirosa'rata na te te ãma 're uzusi za'ra mono wamhã, ta norĩ hã 'Re ihâimana u'âsi mono siré 'râwi hã 're hâimana za'ra mono õ di. Tane nherẽ, ni'wam norĩ hã Cristuhu nhimiroti zarina si 're nomro mono wamhã, ta norĩ si te Wamama siré 're hâimana za'ra 'râwi, duré i'ra siré zama.

Apocalipsi 1:11

Ãne te tawamhã ĩma tinha: — Ãhã na marĩ hã te za i'ab'madâ'â mo. Tawamhã uburé i'ab'madâ'â mono hã te za ibaihâ na ãma irob'ui'é. Ãma rob'ui'éré parimhã, Zezusihi zazei'wa norĩ, 'ri nho'õmo mono bâ siré 're isi'rã'õtõ mono norĩ ma, te za ibaihâ hã isõmri za'ra, 'Ri nho'õmo nhisi mono bâ, ãne isisi norĩ ma: Éfézu, duré Esmina, duré Pegamu, duré Tiatira, duré Sadési, duré Filadéufia, duré Laudiséa. Ã norĩ ma, te za asimi'ui'éré hã tãma isõmri za'ra, isazei'wa norĩ ma, 7 na 'ri nho'õmo ãma 're isi'rã'õtõ mono norĩ ma hã.

Apocalipsi 1:17

Tawamhã õ hã te 'madâ'â wamhã, wa tô ipapara aime sa'ẽtẽ, ĩdâ'â ne, ĩpahi te. Tane nherẽ, ma tinhib'rata nhimire niwĩ ĩ'upi, ĩpahi tõ da. Ãne te ãhã wamhã ĩma tinha: — Ĩma aipahi tõ. Wa hã romna'rada duré rob'rãsudu.

Apocalipsi 1:8

'Re ihâimana u'âsi mono, dama isiwaihu'uzé hã, ãne: “Wa hã imorĩ'rata na, wa tô 're ĩhâimana u'âsi. Õne u'â, wa za duré 're ĩhâimana u'âsi. Uburé marĩ hã si'utõrĩ pese nherẽ, duré wa hã isarina za'ra ĩsi'utõrĩ da hã mare di za.”

Apocalipsi 2:18

— Te za oto irob'ui'é, Tiatira na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã 'Re ihâimana u'âsi mono 'ra, wa aima roti za'ra wa'wa. Ĩto hã te unhama ro'o si'ubuzi ne 're si'ubuzi zahuré. Duré ĩpara hã te ẽtẽ topsada brõzi ne 're si'ubuzi zahuré.