2 Corĩtu 1:12 - ꞌRe Ihâimana Uꞌâsi Mono Zadawa Wasuꞌu

¹² Ni'wam norĩ hã asiré 're hâimana za'ra wa'aba mono nherẽ, ma tô wahâimana nhipese na hã wa'ãma siwi tihi. Tane nherẽ, senai õ di ta hã. Wa norĩ hã 'râwi wapẽ'ẽ na 're wasiwẽ'õ mono õ di. E marĩ wa. Marĩ hã wa te ai'ãma 're 'manharĩ za'ra wa'aba mono õ wa, 're iwahâimana wẽ u'âsi mono zarina. Pi'uriwi aiwi 're wahâimana za'ra wa'aba mono õ di. Marĩ iwẽ si, wa tô wa te aima 're 'manharĩ za'ra wa'wa. Ti'ai ãma isazei'õ'wa norĩ nhimirowaihu'u pese zarina, 're wahâimana mono õ di. 'Re ihâimana u'âsi mono nhimizawi pese zéb zarina si, wa ãne na hã 're wahâimana oto.

2 Corĩtu 1:12 ပူးပေါင်းရင်းမြစ်များ

Zezusihi zadawa wasuꞌuꞌwa norĩ nhimiromhuri na robꞌuiꞌéré 23:1

Tawamhã zudeu norĩ ma roti'wa norĩ tẽme, te rob'madâ'â pese, Paulu hã. Tahawa te tãma nharĩ za'ra, ãne: — Wasiré Izaraéu nhihudu norĩ, wa hã wa tô 're ĩsi'madâ'â u'âsi, 're ĩmorĩ wẽ u'âsi da, 'Re ihâimana u'âsi mono nho'a. Tahawa, ĩpẽ'ẽ wapu na wa 'râwi ĩsi'remhã 're ĩsi'madâ'â u'âsi.

Zezusihi zadawa wasuꞌuꞌwa norĩ nhimiromhuri na robꞌuiꞌéré 24:16

Tahawa, iwẽ hã te 'manharĩ tõ da hã, ĩwa'a õ di, ĩpẽ'ẽ wapu na 're ĩsi'madâ'â u'âsi mono da si, 'Re ihâimana u'âsi mono nho'a, duré danho'a zama.

Roma 9:1

Tô sena, wa za aima rowasu'u za'ra wa'wa. Wa hã Cristuhu te, 're ĩmorĩ wa, 're ĩzadawa nhipese mono õ di. 'Re ihâimana u'âsi mono pẽ'ẽzani te te ĩma iwaihu'uzéb zarina, duré 'râwi ĩpẽ'ẽ na te ĩsi'ãma 're irosa'rata mono zéb zarina, wa tô waihu'u, dama 're ĩzadawa nhipese mono õ na hã.

1 Corĩtu 1:17

 dawabzuri hã te dama 're ab'manharĩ mono da, te te datẽme ĩzatõrĩ õ di, Cristu hã. Iwasu'uwẽ si te dama 're wasu'u mono da, ma tô datẽme ĩzatõ. Tahawa, ti'ai ãma danhimirowaihu'u na da te dama 're iroti za'ra mono nei õ di wa hã, te dama 're irowasu'u mono zé hã. Ti'ai ãma danhimirowaihu'u na Cristu te dama 're wasu'u mono 'wa'âhã, wedepo'o nhonhi'rãmi na dazada idâ'âzé wasu'u hã te aré wapu na dama 're hâimana. Tane 'wa'âhã, Cristuhu wasu'uwẽ hã marĩ dai õ di aré, da te ãma 're saze za'ra mono wa, 'Re ihâimana u'âsi mono te te ãma 're ida'anho'reptui mono da hã.

1 Corĩtu 12:8

'Re ihâimana u'âsi mono pẽ'ẽzani hã ni'wam norĩ si, te za te te 're pisutu za'ra, tô sena ta norĩ hã tinhimirosa'rata waihu'u pese na te te dama ãma 're roti wẽ za'ra mono da, hâiwa hawi dahâimanazém na rowaihu'u na hã. Ni'wam norĩ si, te za duré te te 're pisutu za'ra, rowaihu dama iwaihu'u'õ na, te te dama ãma 're roti wẽ u'âsi za'ra mono da.

1 Corĩtu 15:10

Tane nherẽ, 'Re ihâimana u'âsi mono hã tinhimizawi pese zéb zarina si, ma tô ĩma tinhopru, tô õhõ na si dama 're ĩhâimana mono da oto, Cristuhu zadawa wasu'u'wa na. E tawamhã, taré ma tô ĩma tinhopru, 'Re ihâimana u'âsi mono hã. Mare di. Wa tô te ĩsina tãma 're uwaimrami u'âsi. Uburé ĩsiré Cristuhu zadawa wasu'u'wa norĩ hã, wa tô romhuri na te 're 'rãnhipai u'âsi za'ra. Tane nherẽ, ĩsi'uihâ na te dama 're romhuri mono õ di. 'Re ihâimana u'âsi mono si, ma tô te te 're ĩpawapto, ãne na te dama 're romhuri mono da, ĩma isõprubzéb zarina si.

1 Corĩtu 2:13

Tahawa, wa norĩ hã ti'ai ãma danhimirowaihu'u pese zarina, wa te oto dama 're rowasu'u za'ra mono õ di. 'Re ihâimana u'âsi mono pẽ'ẽzani te te wama 're i'aroti mono zéb zarina si, wa oto wa te dama 're rowasu'u za'ra. Ipẽ'ẽ 're, Ipẽ'ẽzani tãma 're ihâimana za'ra mono norĩ ma si, wa isimiroti wẽ hã wa te tãma 're wasu'u za'ra, 'Re ihâimana u'âsi mono hâimanazé wasu'uwẽ na hã.

1 Corĩtu 4:4

Ãhã na hã, 'Re ihâimana u'âsi mono wi, te ãma i'upazém na hã marĩ õ di, ĩnhimirosa'rata 'remhã oto. E taha zarina, tãma ĩ'umnhasi sina, iwasu'uwẽ te dama 're iwasu'u mono zé, te wasu'u. Mare di. Wanhib'apito si te za ĩwaihu'u, tãma ĩ'umnhasi na hã, duré tãma ĩ'umnhasi õ na hã.

2 Corĩtu 1:17

Tane nherẽ, ãma atẽme ĩmorĩ aba zém na, te sahu õ di, Masédonia hawi apâ ĩmorĩ ré, ãma atẽme ĩsipai waihu'u za'ra wa'aba õ wa. Marĩ hã ĩma hâimana wa, wa tô ĩnhimirosa'rata na ãma saprĩ, ãma atẽme ĩmorĩ aba tõ da a'â. Ãne wa, ni'wam norĩ hã asiré 're ihâimana za'ra wa'aba mono norĩ hã ma tô ĩ'ãma rosa'rata wasété za'ra, ĩzadawa nhipese na hã, ĩmreme hã tô senai õ newa. E ĩnhimirosa'rata na 'râwi te ĩsiwi ro'wa'rutu wa, wa tô ãne hã ĩsima pisutu, ãma atẽme ĩmorĩ aba tõ da hã. Mare di. E isazei'õ'wa norĩ hã sima si 'râwi te te 're irosa'rata za'ra mono ne, wa tô ãne hã ĩsima pisutu. Mare di. Ãne wab õ di. Isazei'õ'wa norĩ hã marĩ na te te dama 're ropisutu za'ra mono wamhã, awa'awi te za te te dawi ãma 're saprĩ za'ra, simirosa'rata na saprĩ pese wa, ta norĩ hã. Isimiropisutu na ropsi'âri õ nherẽ, te za te te dama 're nharĩ za'ra, siwa'rãmi. E ãne, 're ĩhâimana mono zé hã, wa hã. Mare di. Ãnei õ di.

2 Corĩtu 11:3

Tane nherẽ, wa ĩhâtâ'â sina, te ai'ãma 're rosa'rata u'âsi za'ra wa'wa. E marĩ wa. Cristuhu ãma si, 're sasõmri pese za'ra wa'aba mono nherẽ, ãté ni'wam norĩ hã roti tô senai'õ na taré te te aima 're irowasu'u za'ra wa'aba mono zéb zarina, te za Cristuhu wasu'uwẽ hã irẽme za'ra wa'wa. Duréihã Wa'uburé hã wahi na sihâiba wa, Ewaha ma, sadawa nhipese na te te irowasu'u ne, te za tô ãté ni'wam norĩ hã te te aima 're rowasu'u za'ra wa'wa, roti tô senai'õ na hã.

2 Corĩtu 2:17

Ni'wam norĩ hã 're simarĩ ahâ za'ra mono da si, te 'Re ihâimana u'âsi mono zadawa wasu'u na te te dama 're romhuri za'ra. Tane nherẽ, wa norĩ hã ta norĩ ne, 're wahâimana za'ra mono õ di. Duré marĩ aimawi zô, wa te wasima 're romhuri za'ra mono õ di wa norĩ hã, 'Re ihâimana u'âsi mono zadawa wasu'u na hã. Cristuhu waihu'u pese zarina si, wa tô wa te dama 're rowasu'u za'ra sena na, 'Re ihâimana u'âsi mono nho'a, ãne da, te te sima wapisutu za'ra wa, ta hã.

2 Corĩtu 4:2

Ni'wam norĩ hã asiré 're hâimana za'ra wa'aba mono nherẽ, ma tô wawasédé hã wa'ãma sa'ra za'ra, wahâimana nhipese sina dawi 're wahâimana mono newa. Uburé marĩ hã pi'uriwi da te 're i'manharĩ wasété za'ra mono zé hã, wa tô wa te wasiwi 're awẽ'õ. 'Re ihâimana u'âsi mono zadawa wasu'u hã, wa te dawi ãma 're 'wa'rutu mono õ di. Õhõ si, wa tô sõ'awi wa te dama 're wasu'u u'âsi, sena na, 'Re ihâimana u'âsi mono nho'a. Ãhã zarina, te za 'râwi dapẽ'ẽ na da te 're wawaihu'u za'ra, wazadawa nhipese ãna, 're iwahâimana mono zém na hã.

2 Corĩtu 8:8

Ãne hã wa hã te ãma aima 'ru za'ra wa'aba õ di. Taré wa aima ãma roti za'ra wa'wa, ĩnhimiroti zarina, 'manharĩ za'ra wa'aba wamhã, 're idazawi pese za'ra wa'aba mono zém na, sena na da te 're aiwaihu'u za'ra wa'aba mono da. Masédonia ãma isazei'wa norĩ hã simi'ẽ na te te 're idapawaptob za'ra mono ne zô pé, wa ãne na taré ãma aipibu za'ra wa'wa.

Galata 6:4

Romhuri hã te wama 're hâimana za'ra wahâiba mono bâ, wa te wasina 're i'madâ'â pese za'ra mono da hã. Ãne wa, wa za aihĩni 'râwi wa te wasima 're rosa'rata pese za'ra, wa te wasina 're 'madâ'â pese za'ra mono da, wanhimiromhuri hã. Wa te wasina 're 'madâ'â pese za'ra mono wamhã, wa za 'râwi wapẽ'ẽ 're wasima 're wato za'ra. Danhimiromhuri hã wanhimiromhuri me aiwab õ na, wa te da'ãma 're rosa'rata za'ra mono õ di za.

Éfézu 6:14

Tahawa, te za asimiza'rese sina 're aihâimana za'ra wa'aba mo. Da'usisizé isa'ẽtẽ na, te za 're asi'usisi za'ra wa'aba mo. Da'usisizé isa'ẽne hã tô sena 're idahâimana za'ra mono zé, te wasu'u. Duré danho'utu'ubuzé itete na te za 're asisõ'utu ubu za'ra wa'aba mo. Danho'utu'ubuzé itede hã 're idanomro wẽ mono zé, te duré ta hã wasu'u.

Filipu 1:10

Tawapsi te za iwẽ si asima 're ipisutu u'âsi za'ra wa'aba mo, ãma 're anomro wẽ wa'aba mono da hã. Ãne wapsi, 'râwi aiwasété na 're asi'marõpãrĩ za'ra wa'aba mono õ di za, nimahã na Cristu apâ we imorĩzéb u hã. Ãhã zarina si, te za aiwasété wi, aihâimana nhiptete sina 're anomro u'âsi aba mo.

1 Tesalonita 2:10

A norĩ wa'wa hã ma tô iwawaihu'u za'ra wa'wa, asõ'a za'ra wa'aba, 're iwanomro mono zé hã. 'Re ihâimana u'âsi mono hã ma tô duré wawaihu'u za'ra, 're iwanomro wẽ mono zém na hã. Wawasédé hã wa te 'manharĩ za'ra õ di. Iwẽ na si wa tô wahâimana za'ra ni, asõ'a za'ra wa'aba. 'Re ihâimana u'âsi mono nhimiroti na hã duré ãma wasipa za'ra õ di. Ãne ãma 're iwanomro mono zé hã, tô ibâ na si.

1 Timotiu 1:5

E marĩ da, wa tô ãne hã aima waihu'u. Wa tô ĩsima aiwẽ, isazei'wa norĩ hã 're pawaptob za'ra mono wa, Wamama zawi pese 'wa, duré dazawi pese 'wa 're nomro mono da hã. Isazei'wa norĩ hã simirosa'rata wẽ ré si, te za 're nomro. Ãne wamhã, marĩ te te 're i'manharĩ wasété za'ra mono na, 'râwi 're siwẽ'õ za'ra mono õ di za. Wanhib'apito zazei uptabi 'wa, te za 're nomro. Tawamhã te aima iwaihu'uzéb zarina 're nomro mono wamhã, te za tô dasisawizé hã ipẽ'ẽ 're tãma 're hâimana za'ra.

Titu 2:7

A hã aihâimana wẽ na, te za dama ãma 're asanho mo, asirã zarina si 're danomro wẽ mono da. Dama 're rowahutu mono wamhã, aimreme tô sena na si, te za duré dama 're irowahutu mo.

Hebreu 13:18

Ma'ãpé, wa'ãma 're aimreme zusi u'âsi aba mono za, 'Re ihâimana u'âsi mono ma. 'Re iwanomro wẽ mono da si, wa tô wa norĩ hã wa te wasima 're wẽ u'âsi za'ra. Tahawa, marĩ na 're iwahâimana wasété za'ra mono zém na hã 'râwi wapẽ'ẽ na 're wasisãmri za'ra mono õ di oto, wama 're hâimana za'ra mono õ wa.

Tiagu 4:6

Ãne wa, Wamama zawi'wa 're wanomro mono da, te za te te 're wa'apawaptob u'âsi. Duréihã ma tô taha wasu'u na rob'ui'éré, isadawa wasu'u'wa hã, ãne: “Si'uihâ na 'râwi tinhimirosa'rata na 're isi'madâ'â ze za'ra mono norĩ zada, te za 're hâimana, Wamama hã. 'Râwi tinhimirosa'rata na 're isi'madâ'â za'ra mono õ norĩ si, te za te te 're apawapto.” Ãne ãma irob'ui'éré hã.

Zozué 24:14

Tawamhã Zozué ma te ãne timreme hã tãma 'rãsutu za'ra: — Tahawa te za ã hawim haré ãhã na hã 'Re ihâimana u'âsi mono, Uburé Danhib'apito hã 're iwazéb za'ra wa'aba mo, isib'a'uwẽ sena na ãma 're anomro aba mono da. Duré asisiti sãmra aba, aihi'rata norĩ Mezopotãmia ãma, duré Ezitu ãma, ihâiba'õ ãma waihu'u pese newa ãma 're iwata za'ra mono hã, Uburé Danhib'apito ãmap si 're anomro aba mono da oto.

1 Pedru 3:16

Aiwaimri te za 're asiwasu'u za'ra wa'aba mo, aimreme wasété ãna. Aihâimana wẽ na te za dama 're aihâimana za'ra wa'aba mo, asimirosa'rata wasété na 'râwi 're asiwẽ'õ za'ra wa'aba mono tõ da. Tawamhã dama 're aihâimana wẽ za'ra wa'aba mono wamhã, Cristuhu zazei'wa 're aihâimana za'ra wa'aba mono 'ru te, taré da te aima 're inharĩ wasété za'ra wa'aba mono niwĩ, te za dasimreme ma 'râwi 're danhiséb za'ra.

1 Pedru 3:21

Ta hã â hã, â dawabzuri, te wasu'u, danho'reptuzé. E da'u're wa, da'upsõzé, te â dawabzuri hã wasu'u. Mare di. 'Re ihâimana u'âsi mono ma, da te dasi'ãma 're iropisutu za'ra mono zé te wasu'u, â dawabzuri hã. Dawasédé te te dama 're apari mono wa, 'râwi 're dasiwaihu'u za'ra mono õ di oto, dawasété na hã. Tahawa, dama 're irowẽ za'ra mono zéb zarina, te za oto dasina da te tãma 're ropisutu za'ra, ãma 're idanomro mono zéb da hã. Zezu Cristu hã dâ'â uptabi nherẽ, Imama hã ab're hawi te te hâiwa'utu wa, duré apâ 're morĩ wa, te oto asõ'reptuzé hã aima tihâimana za'ra wa'wa.