1 Zuwã 5:3 - ꞌRe Ihâimana Uꞌâsi Mono Zadawa Wasuꞌu

^3-4 Tawamhã 'Re ihâimana u'âsi mono hã wa te wasiwi 're sawi pese za'ra mono wamhã, e niha wa za tawamhã 're wahâimana za'ra. Isimiroti si wa za wa te 're 'madâ'â pese za'ra. E isimiroti hã wama pire za'ra di, wa te 're i'madâ'â pese za'ra mono zéb da hã. Mare di. 'Re ihâimana u'âsi mono 'ra, oto 're wanomro mono wa, wama waihu'u pese za'ra di, wa te tãma ãma 're i'uwaimrami za'ra mono zéb da hã. Tahawa, wanhiptete na wa za 'Re ihâimana u'âsi mono wẽ'õ'wa norĩ da, 're wahâimana za'ra, uburé marĩ iwasédé hã ti'ai ãma 're ihâimana za'ra mono wi. E niha wa za wanhiptete sina ãma 're wahâimana za'ra. Zezusi hã Wanho'reptui'wa na wa te wasina 're i'umnhasi pese za'ra mono zém na wa za wanhiptete sina dawi 're wahâimana za'ra.

1 Zuwã 5:3 ပူးပေါင်းရင်းမြစ်များ

Salmu 119:45

Ĩsima iwẽ na, wa za 're ĩhâimana, te ĩsima 're romnhimimnhasi mono ãna, asimiroti na si 're ĩmorĩ da, sô 're ĩsi'wapéi u'âsi mono wa.

Ezodu 20:6

Tane nherẽ, wa hã te te 're ĩzawi pese za'ra mono norĩ ma hã, duré ĩnhimiroti te te 're iwapari pese za'ra mono norĩ ma hã, wa iwẽ na hã tãma 're ĩhâimana za'ra. Duré ta norĩ u'âbâ isihudu mono sidâpâsi, wa iwẽ hã te tãma 're 'manharĩ u'âsi za'ra.

Provébiu 3:17

Te za dapẽ'ẽ 'remhã dahâimanazé iwẽ ise hã te te dama 're anhomri. Te za duré rowẽ na dasima iwẽ na 're idahâimana za'ra mono zé hã te te 're da'anhimro.

Daniéu 9:4

Ãne wa tô Ĩnhib'apito, ĩte 'Re ihâimana u'âsi mono ma ĩsiwẽ'õ sina hã tãma mre: — Uburé Danhib'apito 'Re ihâimana u'âsi mono, a hã asa'ẽtẽ uptabi di, duré asiptete uptabi di! A hã ma tô asimiropisutu zahi hã te te 're i'asawi pese za'ra mono norĩ ma, duré asimiroti te te 're iwapari pese za'ra mono norĩ ma, tãma 're i'madâ'â u'âsi za'ra mo. Õne u'â te duré ta norĩ ma asimizawizé hã tãma 're ihâi'ré u'âsi za'ra mo.

Mateu 23:4

Da te danhoihi waptob za'ra mono ãna, marĩ ipire uptabi da te 're 'wasari mono da, da te dama 're iromnhibu za'ra mono ne, te ta norĩ hã tinhimiroti na zama te te dama 're roti u'âsi za'ra, 'Re ihâimana u'âsi mono nhimiroti upana, taha na si 're danomro mono da, dama pire uptabi nherẽ, da te dasina 're i'uwaimrami za'ra mono zéb da hã. Tane nherẽ, ta norĩ hã te te 're dapawaptob za'ra mono õ di, ãma 're idanomro wẽ mono zéb da hã.

Zuwã 14:15

Tawamhã Zezusi te duré tãma rowasu'u za'ra, ãne: — 'Re ĩzawi pese za'ra wa'aba mono wamhã, ĩnhimiroti si te za 're i'madâ'â pese za'ra wa'aba mo.

Zuwã 15:10

Wa hã Ĩmama nhimiroti si, wa tô te 're 'madâ'â pese. Tahawa, Ĩmama te te 're ĩzawi pese mono zém na wa tô ĩsina te 're waihu'u u'âsi. Tane duré a norĩ wa'wa hã ĩnhimiroti si 're 'madâ'â pese za'ra wa'aba mono wamhã, te 're i'asawi pese za'ra wa'aba mono zém na, te za asina 're iwaihu'u u'âsi za'ra wa'aba mo.

Zuwã 15:14

Ĩnhimiroti si 're 'madâ'â pese uptabi za'ra wa'aba mono wamhã, ĩzawi pese 'wa, te za 're anomro aba mo.

Roma 7:12

Ta hã, isimiroti 'rata na Mozési te te irob'ui'éré hã wẽ uptabi di. Isarina si te wama 're hâimana za'ra, iwẽ uptabi si.

Roma 7:22

Wa hã 'Re ihâimana u'âsi mono nhimiroti wẽ wasu'u na hã 'râwi wa tô te ĩsima 're wẽ u'âsi, ĩpẽ'ẽ 'remhã.

Hebreu 8:10

Tane nherẽ, nimahã bâtâ na wa za te dama iropisutuzép té hã tãma pisutu za'ra Izaraéu nhihudu norĩ ma hã, duréihã te dama iropisutuzém nhowa're're. Ã hã, wa wa hã Danhib'apito uptabi hã aima wasu'u za'ra wa'wa, ĩnhimiroti tém na te dama iropisutuzé hã. Tawapsi wa za ĩnhimiroti hã ipẽ'ẽ 're te tãma 're anhomri, iré 're nomro u'âsi mono wa, te te 're 'madâ'â pese za'ra mono da. Ta norĩ nhib'apito, wa za oto tãma 're ĩhâimana za'ra. Tawamhã ĩnhib'a'uwẽ na si te za tô ta norĩ hã ĩma 're hâimana za'ra.

1 Zuwã 2:3

E niha, wa za tawamhã wasina waihu'u pese za'ra ni, 'râwi isiré 're iwahâimana za'ra mono na hã. 'Re ihâimana u'âsi mono nhimiroti hã wa te 're 'madâ'â pese za'ra mono wapsi, wa za wasina wa te 're waihu'u za'ra, 'râwi isiré 're iwahâimana za'ra mono na.

2 Zuwã 1:6

E niha tawamhã, ãma 're iwasisawi pese za'ra mono zé hã za. 'Re ihâimana u'âsi mono nhimiroti si wa za wa te 're 'madâ'â pese za'ra. Ãne ma tô isãna'rata hawimhã, isimiroti wasu'u hã 're iwapari za'ra wa'aba mo, ãma 're asisawi pese za'ra wa'aba mono sina ãma 're aihâimana u'âsi za'ra wa'aba mono da.