1 Zuwã 4:9 - ꞌRe Ihâimana Uꞌâsi Mono Zadawa Wasuꞌu

⁹ 'Re ihâimana u'âsi mono hã ma tô tinhimizawi pese zé hã wama waihu'u za'ra. E niha ma tô wama waihu'u za'ra. Ti'ra hã misi nherẽ, ma tô we satõ ti'ai u, taha ãma si rowẽ na 're wanomro u'âsi mono da oto.

1 Zuwã 4:9 ပူးပေါင်းရင်းမြစ်များ

Zenezi 22:2

Tawamhã 'Re ihâimana u'âsi mono te ãne tãma tinha: — Misi uptabi ai'ra si'aibâ Izaqui, 're isawi pese mono hã ma'ãpé saprõni, Moria na romnhisi u. Tawamhã tame ẽne te aima ihâi'ré ãma, te za ai'ra unhama na iza, ĩma ãma asõprub da hã.

Salmu 2:7

Tawamhã apito te tinha ãne: “Uburé Danhib'apito te te ĩma iwaihu'uzé, wa za dama sadawa 'mahâ. Uburé Danhib'apito, te ĩma tinha ãne: ‘A hã, ĩ'ra. Ã bâtâ na wa tô aimama na aima 're ĩhâimana mono da hã ĩsi'ãma a'ube.

Marcu 12:6

Tawamhã buru tede'wai 'ra si te oto i'rata 're hâimana, danhowa're're te te isatõrĩ da hã, iburu na romhuri'wa norĩ u. I'ra hã tãma sawi pese uptabi di. Tãma sawi nherẽ, ma tô satõ, buru na romhuri'wa norĩ u, morĩ da. Ãne te imama hã sima rosa'rata: “Ĩ'ra si'aibâ hã te itẽme satõrĩ za'ra wamhã, ãté te za siwi hâiba wazé.”

Luca 4:18

“'Re ihâimana u'âsi mono, ma tô ĩma tisõ, Tipẽ'ẽzani hã. Ta hã ma tô ĩpisutu, iwasu'uwẽ na, isibrob'õ norĩ hã te 're apo're pu'u mono da. Ma tô we ĩzatõ, dama romhuri'wa da, da te iwaibu za'ra norĩ hã te 're apawapto mono da, apâ oto 're nomro mono da, robze u'âsi. Duré itob'a hã te 're ato pese mono da, ma tô we ĩzatõ, datõmo wẽ na apâ oto 're danomro mono da, robze na. Duré ma tô we ĩzatõ, da te tãma 're i'manharĩ wasété za'ra mono zém hawi, te 're da'awaibui mono da.

Zuwã 10:10

E marĩ da, te isimisaihuri norĩ hã wa'ra u 're sisisi. Pone'ẽrebâ zô te 're nomro, te te dawi 're waibui mono wa, te te dawi 're simroi mono da. Tanei õ di, wa hã. Wa hã wa tô we datẽme mo, robzei u'âsi ĩ'ãma 're danomro mono da, duré 're dadâ'â za'ra mono ãna, 're dasi'ubumroi u'âsi mono da, hâiwa ãma.

Zuwã 14:6

Tawamhã Zezusi ma te asa ãma tãma wa'rã ãne: — Wa hã bâdâdi uptabi na, wa ĩsiwasu'u, duré tô sena na rowaihu'u wẽ nhomri'wa na, duré 're idanomro u'âsi mono zé nhomri'wa na. Tahawa, ni'wa hã ĩ'ãma 're morĩ õ nherẽ, Ĩmama u hã wisi waihu'u õ di za.

Zuwã 3:16

'Re ihâimana u'âsi mono ma, tãma dazawi pese uptabi wa, ma tô ti'ra hã misi nherẽ, we tisõ, dazada dâ'â da. Tawamhã i'ra, da te dasina 're umnhasi za'ra mono wamhã, dadâ'â ãna te za hâiwa ãma i'rata 're dasi'ubumroi u'âsi. Ropipa ãma isiti 're dasi'ubumroi mono õ di za.

Zuwã 3:18

— Ni'wam norĩ hã i'ra te te sina 're umnhasi za'ra mono wamhã, e 'Re ihâimana u'âsi mono hã te za te te tãma 're nharĩ za'ra, ãne: “Aiwẽ'õ za'ra wa'aba wa, wa za te 're aihâ za'ra wa'wa.” Ãne na hã te te tãma 're anharĩ mono õ di za. Tizazei'õ'wa norĩ ma si te za ãne na te te tãma 're anharĩ, i'ra te te sina 're umnhasi za'ra mono õ wa. Duré tiwasédé te te sima 're sawi pese za'ra mono wa, te za ãne na te te tãma 're anharĩ. 'Re imorĩ wẽ uptabi hã ti'ai u ma tô wei mo, rowa'a iwẽ hã. Ta hã wẽ nherẽ, da te dasiwi 're sawi pese za'ra mono õ di. Dapo're'õ u'âsi 're danomro mono wa, te robra si da te dasima 're sawi pese za'ra.

Zuwã 6:29

Tawamhã te Zezusi hã asa tãma nharĩ za'ra, ãne: — 'Re ihâimana u'âsi mono, ma tô we ĩzatõ, da te dasina 're ĩ'umnhasi za'ra mono da. Tawamhã asina 're ĩ'umnhasi za'ra wa'aba mono wamhã, te za tãma ãma 're i'uwaimrami za'ra wa'aba mo, te te sima 're iwẽ mono zéb uwaibaba, 're ĩzaze za'ra wa'aba mono wa.

Zuwã 6:51

Wa hã dasa na wa tô ĩsiwasu'u, hâiwa hawi we ĩmorĩ wa. Ni'wam norĩ hã ĩ'ãma 're saihuri u'âsi mono wamhã, te za dâ'â ãna 're hâimana u'âsi za'ra, hâiwa ãma. Taha da, wa za ĩhâiba hã dama tisõ, dazada ĩdâ'â da.

Zuwã 6:57

Ĩmama hã ma tô we ĩzatõ, 're imorĩ u'â hã. Ta hã 're hâimana u'âsi mono wa, wa za duré wa hã 're ĩhâimana u'âsi. Tahawa, ĩ'ãma 're dasaihuri mono wamhã, te za ĩsine 're dahâimana u'âsi za'ra hâiwa ãma, 're dadâ'â za'ra mono ãna.

Zuwã 8:29

We ĩzatõrĩ'wa hã te te ĩma 're iroti mono zéb zarina si, wa tô te tãma ãma 're uwaimrami u'âsi. Tahawa, ĩ'rata te 're sãmra u'âsi. Te te 're ĩrẽme mono õ di.

Zuwã 8:42

Tawamhã Zezusi hã te duré asa tãma nharĩ za'ra, ãne: — Tô sena 'Re ihâimana u'âsi mono hã, Aimama za'ra wa'aba 'wa'âhã, te aré asiwi 're ĩzawi pese za'ra wa'aba mo. E marĩ wa. Ihawi we ĩmorĩ wa, atẽme za'ra wa'aba. Ĩsi'uihâ na we ĩmorĩ õ di. Ta hã ma tô we ĩzatõ.

Zuwã 9:3

Tawamhã te Zezusi hã asa tãma nharĩ za'ra, ãne: — Mare di. Tiwasédé te te 'manharĩ wab õ di. Imama norĩ zama, duré tiwasédé hã te te 'manharĩ zahuré wab õ di. Rowẽ na 're morĩ wa za, ma tob'a na podo, iwaihu'u pese na da te waihu'u za'ra da, 'Re ihâimana u'âsi mono hã.

Roma 8:32

'Re ihâimana u'âsi mono hã ti'ra te te wawi sawi za'ra õ di, wazada dâ'â za'ra tõ da. Wa'udâna ma tô wama sõmri za'ra tô, te te wawi sawi za'ra ãna. E tawamhã uburé marĩ iwẽ hã te te wama 're anhomri mono õ di za. Te te wawi 're azawi mono ãna, te za tô te te wama 're anhomri, 'Re ihâimana u'âsi mono hã.

Hebreu 1:5

Duréihã 'Re ihâimana u'âsi mono mreme hã ãne: “A hã ĩ'ra te ĩme 're aihâimana mo. Tahawa, wa za oto ĩ'ra na te 're asisi, dama aipire na 're aihâimana mono da oto.” Ãne duré imreme amo hã: “Wa hã Imama na wa za tãma 're ĩhâimana. Tahawa, ĩ'ra na te za duré 're hâimana.” Tawamhã e hâiwa ãma tãma iromhuri'wa norĩ ãma zama, ma tô ãne na hã tinha, 'Re ihâimana u'âsi mono hã. Mare di. Zezusihi ãma si, ma tô ãne na hã tinha.

1 Zuwã 3:16

E niha wa za, 're idasisawi pese za'ra mono zé hã waihu'u pese za'ra ni. Ãne wa za waihu'u pese za'ra ni. Cristu hã te te 're wa'azawi pese mono wa, ma tô sisawi ãna wazada tidâ'â za'ra. Taha zarina wa za duré wa norĩ hã 're wasipawaptob za'ra, 're wasisõ'reptu za'ra mono da. 'Re wadâ'â za'ra mono da nherẽ, wa za tô 're wasipawaptob za'ra, 're wasihâiba zawi za'ra mono ãna. Ãne 're idasisawi pese za'ra mono zé hã za oto.

1 Zuwã 4:10

Wa norĩ hã 'Re ihâimana u'âsi mono, wama sawi pese za'ra di. Tane nherẽ, te taha nhipai u te te 're wa'azawi pese uptabi. Tahawa, ma tô ti'ra we satõ ti'ai u, wazada dâ'â da, wazada dâ'â wa, wawasété na te te oto 're wa'ab'madâ'â tõ mono da. Tô sena isimizawi pese zé hã siwaprosi te tãma 're hâimana, danhipai u.

1 Zuwã 4:16

'Re ihâimana u'âsi mono hã simizawi pese uptabi di. Tane ni'wam norĩ hã te te 're dazawi pese za'ra mono wamhã, ta norĩ si te 'Re ihâimana u'âsi mono ãma 're hâimana za'ra, 'râwi. Ta norĩ 'ratap si te duré 'Re ihâimana u'âsi mono hã 're sãmra, 'râwi. 'Re ihâimana u'âsi mono te te 're iwa'azawi pese mono zé hã wama waihu'u pese za'ra di oto. Taha na wa te wasiwi ãma 're wawã za'ra mono õ di za oto.

1 Zuwã 5:11

E niha 'Re ihâimana u'âsi mono hã, ti'ra te te dama 're iwaihu'u mono zé hã. Ta hã ma tô te te wama 're apisutu, i'ra wazada idâ'âzém na ãma 're iwanomro u'âsi mono zéb da hã.

1 Zuwã 5:13

E marĩ da, wa ãne aima rob'ui'éré za'ra wa'wa, 'Re ihâimana u'âsi mono 'ra, asina 're i'umnhasi za'ra wa'aba mono norĩ ma. Aipẽ'ẽ 're, atâ'â ãna 're anomro u'âsi aba mono zém na sena na asina waihu'u pese za'ra wa'aba da, wa ãne aima rob'ui'éré za'ra wa'wa.