1 Zuwã 4:2 - ꞌRe Ihâimana Uꞌâsi Mono Zadawa Wasuꞌu

² E niha te za tawamhã iwaihu'u pese za'ra wa'wa, ni'wam norĩ hã 'Re ihâimana u'âsi mono pẽ'ẽzani ré sena na te te dama 're isadawa wasu'u za'ra mono na hã. Ãté ni'wam norĩ hã te za ãne sena na aima 're siwasu'u za'ra wa'wa, 'râwi tipẽ'ẽ hawim na te te 're irosa'rata za'ra mono hã: “Zezusi hã ta hã Cristu, tô sena Danho'reptui'wa da, 'Re ihâimana u'âsi mono te te ipisudu. Ta hã ti'ai ãma dawazari poto wa, ma tô si'a'uwẽ.” Ãne aima 're siwasu'u za'ra wa'aba mono wamhã, tô sena na te za ãma 're iwaihu'u za'ra wa'aba mo oto, 'Re ihâimana u'âsi mono zadawa wasu'u uptabi 'wa na, duré Ipẽ'ẽzani ré 're ihâimana za'ra mono na zama.

1 Zuwã 4:2 ပူးပေါင်းရင်းမြစ်များ

Zuwã 1:14

'Re ihâimana u'âsi mono mreme hã wa'rata 're sãmra mono da, ma tô sihâiba. Simizawi pese uptabi di. Isimiroti hã wẽ uptabi di. 'Re ihâimana u'âsi mono 'ra wa, õhõ si 're morĩ wẽ uptabi di. Misire i'ra hã. Õhõ si, waihu'u pese uptabi di. Wa norĩ hã wa tô wasiwi waihu'u za'ra ni, 're imorĩ wẽ uptabi na. Iwaihu'u pese na zama, wa tô duré wasiwi waihu'u ni.

1 Corĩtu 12:3

Tane nherẽ, wa ĩsima aiwẽ za'ra wa'wa, aimawi roti hã waihu'u za'ra wa'aba da oto. Ãté ni'wam norĩ hã te za ãne na Zezusi hã te te dama 're wasu'u za'ra: “Zezusihi ma, marĩ iwasétére si tãma 're hâimana mono neza, 'Re ihâimana u'âsi mono nhimirob'manharĩzém na.” Ãne na hã ni'wam norĩ hã 'Re ihâimana u'âsi mono pẽ'ẽzani nhimipawaptobzéb ré, 're inomro mono norĩ hã, te te dama 're wasu'u waihu'u za'ra mono õ di. Mare di. Duré ãté ni'wam norĩ hã te za ãne na te te dama 're wasu'u za'ra, Zezusi hã: “Zezusi hã, taha Wanhib'apito, danhipai u.” Ni'wam norĩ hã 'Re ihâimana u'âsi mono pẽ'ẽzani nhimipawaptobzéb zarinai õ nherẽ, ãne na tô sena te te dama 're wasu'u waihu'u za'ra mono õ di.

1 Timotiu 3:16

Tô sena Zezu Cristuhu wasu'uwẽ hã wẽ uptabi di, aré dama sa'rese õ nherẽ, Wamama hã te te oto dama ihâi'ré hã wa te 're isaze za'ra mono zé hã, ãma 're iwanomro wẽ mono zéb da hã. Ãne te te dama iwaihu'uzé hã: “A'uwẽ na ma podo, ti'ai ãma. Duré tô sena i'ra 're imorĩ wẽ uptabi na, ma tô Tipẽ'ẽzani na dama waihu'u za'ra. Duré hâiwa ãma 'Re ihâimana u'âsi mono ma romhuri'wa norĩ hã ma tô titõmo na 'madâ'â za'ra. Duré a'uwẽ mono bâ 're idahâimana za'ra mono norĩ hã ma tô iwasu'uwẽ na da te 're dapo're pu'u za'ra, daro mono bâ. Ma tô duré da te dasina 're umnhasi za'ra. Duré rowẽ uptabi u ma tô mo, hâiwa u.”

1 Zuwã 1:2

Duréihã marĩ õ ré hã Wamama siré te 're hâimana u'âsi, ta hã. Tawamhã ma tô we datẽme sihâi'ré, sõ'awi na ãma 're idanhopré mono da hã oto. Wa norĩ hã wa tô wa te 're 'madâ'â za'ra. Tahawa, sena na wa aima wasu'u za'ra wa'aba ni, 're idanomro u'âsi mono zé te te dama 're i'apisutu mono hã.

1 Zuwã 2:23

Ni'wam norĩ hã 'Re ihâimana u'âsi mono 'ra, te te dawi 're udâ za'ra mono wamhã, ta norĩ hã Imama siré 'râwi 're hâimana za'ra mono õ di. Ni'wam norĩ si, Zezusi hã Wamama hawi we imorĩ na te te 're isaze za'ra mono na tô sena dama 're isiwasu'u za'ra mono norĩ si, te Wamama siré 'râwi 're hâimana za'ra, rowẽ na.

1 Zuwã 4:15

Ni'wam norĩ hã te za ãne te te dama 're wasu'u za'ra: “Zezusi hã 'Re ihâimana u'âsi mono 'ra. Ta hã ma tô 'Re ihâimana u'âsi mono hã we ti'ai u satõ, Danho'reptui'wa da.” Ãne na ni'wam norĩ hã te te dama 're wasu'u za'ra mono wamhã, ta norĩ 'ratap si te 'Re ihâimana u'âsi mono hã 're hâimana, 'râwi. Ta norĩ si te duré 'Re ihâimana u'âsi mono siré hã 're hâimana u'âsi za'ra, 'râwi.

1 Zuwã 4:3

Tane nherẽ, ni'wam norĩ Zezusi hã Danho'reptui'wa da, ti'ai ãma dawazari isi'a'uwẽ na te te dawi 're udâ za'ra mono wamhã, ta norĩ hã 'Re ihâimana u'âsi mono pẽ'ẽzani ré 're hâimana za'ra mono õ di, tô sena na. Zezusihi zada, 're ihâimana mono nhimirosa'rata zarina si te te 're rosa'rata za'ra, tipẽ'ẽ na hã. Ma tô iwaihu'u siromo za'ra wa'wa, Zezusihi zada, 're ihâimana mono nhimiroti wasété na, za daro mono bâ dasima da te ãma 're iropéi mono na hã. Ãhã na isõwam nherẽ, te isimiroti wasété na 're dahâimana za'ra duré.

1 Zuwã 5:1

Ni'wam norĩ hã, Zezu Cristu, Danho'reptui'wa da, 'Re ihâimana u'âsi mono te te ipisutu na te te 're sazei pese za'ra mono wamhã, ta norĩ si te 'Re ihâimana u'âsi mono 'ra, 're hâimana za'ra. Ni'wa hã aibâ hã wama sawi pese za'ra wamhã, taha u'âbâ, wa za duré i'ra norĩ hã wa te 're sawi pese za'ra.

2 Zuwã 1:7

'Re ihâimana u'âsi mono zadawa wasu'u uptabi 'wa newa, roti tô senai'õ na te te dama 're iroti za'ra mono norĩ hã ahâ uptabi na te oto 're hâimana za'ra. Daro mono bâ te dawazari 're hâimana za'ra. Zezu Cristu hã, a'uwẽ hâiba na dasiré ipoto õ na, te ta norĩ hã sô 're simrami za'ra dama, 'Re ihâimana u'âsi mono hã Danho'reptui'wa da, te te ipisudu hã. Ni'wam norĩ hã ta norĩ ne 're hâimana za'ra mono wamhã, te za iwaihu'u za'ra wa'wa, roti tô senai'õ na te te dama 're iroti za'ra mono hã. Te za duré iwaihu'u za'ra wa'wa, Cristuhu zada 're ihâimana za'ra mono na hã.