1 Zuwã 3:7 - ꞌRe Ihâimana Uꞌâsi Mono Zadawa Wasuꞌu

⁷ Ĩ'ra norĩ, dahâimana wasété na 're idanomro mono na, da'ãma 're sasõmri za'ra wa'aba mono õ di za, danhimiroti senai'õ na dama 're ihâimana za'ra mono na zama. Ma'ãpé 'râwi asina 're asõpré pese aba mono. Ni'wam norĩ hã 're nomro wẽ mono wamhã, 'Re ihâimana u'âsi mono nhimiroti na sima ãma 're sipa za'ra mono õ wamhã, ta norĩ si hã 're hâimana wẽ za'ra mono di, Cristu hã 're imorĩ ne.

1 Zuwã 3:7 ပူးပေါင်းရင်းမြစ်များ

Salmu 45:7

Dawẽ na 're idanomro mono zép si, te 're isawi u'âsi mo. Dawasété na 're idanomro mono zép si hã te 're i'ruiwapari u'âsi mo. Tahawa, ate 'Re ihâimana u'âsi mono ma tô aipisutu. Taha zarina ma tô robzezé hã te te aima 're anhomri, uburé ti'ai ãma danhib'apito 're ihâimana za'ra mono norĩ nhipai u hã.

Mateu 5:20

Ãne wa za duré aima waihu'u za'ra wa'wa. Farizeu norĩ hâimanazém nhipai u, duré 'Re ihâimana u'âsi mono nhimiroti na rob'ui'éré na dama rowahutu'wa norĩ hâimanazém nhipai u, Wamama te te sima 're i'aiwẽ za'ra wa'aba mono zéb zarina si, 're aihâimana wẽ za'ra wa'aba mono wamhã, tawapsi, te za dame 're asisisi aba mo, 'Re ihâimana u'âsi mono, da'ãma 're isib'a'uwẽ mono zéb u hã.

Roma 2:13

E 'Re ihâimana u'âsi mono nhimiroti 'rata na rob'ui'éré hã, taré dapo're na da te 're wapari za'ra mono nherẽ, te za 'Re ihâimana u'âsi mono hã te te 're da'awẽsãmri. Mare di. Isimiroti zarina 're dahâimana wẽ za'ra mono wapsi, te za te te 're da'awẽsãmri, 'Re ihâimana u'âsi mono hã.

1 Corĩtu 6:9

Tiwasété si te te 're i'manharĩ u'âsi za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zé hã te te dame sina 're uwaimrami za'ra mono õ di za. E ãne hã, zahadu waihu'u za'ra wa'aba õ di bété. Ãne na hã taré 'râwi asima 're asadawa nhipese za'ra wa'aba mono õ di za. Dahâiba na dawasédé te te 're i'manharĩ za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zém na, dame 're hâimana za'ra mono õ di za, duré 'Re ihâimana u'âsi mono upana, romhâiba 'manharĩ ãma 're iwata za'ra mono norĩ hã, duré damro na dawi 're isimisaihuri za'ra mono norĩ hã, duré aibâ si'uiwa na si'ãma 're iwasété za'ra mono norĩ hã, duré danhibrom na dawi 're isipsaihuri za'ra mono norĩ hã, duré danhibrom na te te 're ida'ruiwapari za'ra mono norĩ hã, duré âzézei'wa 're ihâimana za'ra mono norĩ hã, duré te te da'ãma 're iwasété za'ra mono norĩ hã, duré danhibrob zô dapãrĩ'wa norĩ hã. Ta norĩ hã dasiré 're hâimana za'ra mono õ di za, 'Re ihâimana u'âsi mono, da'ãma 're isib'a'uwẽ mono zéb ãma hã.

Éfézu 5:6

Ta norĩ hã po're'õ u'âsi 're nomro mono wa, te za nimahã na tãma rob'manharĩ za'ra ipipa na, 'Re ihâimana u'âsi mono hã. Tane nherẽ, ãté ni'wam norĩ hã te za sadawa nhipese na te te aima 're rowasu'u za'ra wa'wa, za te te idahâ za'ra õ na hã. Ãne na te te aima 're rowasu'u za'ra wa'aba mono nherẽ, 're wapari za'ra wa'aba mono õ di za, isimirowasu'u tô senai'õ wa, ta norĩ hã.

Filipu 1:11

Tahawa, te za iwẽ si 're i'manharĩ u'âsi za'ra wa'aba mo, Zezu Cristuhu nhimipawaptobzéb zarina si. Ãne na ãma 're aihâimana wẽ za'ra wa'aba mono zém na da te 're aiwaihu'u za'ra wa'aba mono wamhã, 'Re ihâimana u'âsi mono ãma si te za 're dawata za'ra. Tane da, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma hã.

Hebreu 1:8

Tazahã, i'ra si dama pire uptabi na 're ihâimana mono zém na ma tô rowasu'u 'Re ihâimana u'âsi mono hã, ãne: “A hã Ropoto'wa. Da'ãma 're asib'a'uwẽ mono zé hã aiwi 're si'utõrĩ mono õ di za. Te za tô aima 're hâimana u'âsi. Duré marĩ na 're upai mono ãna, te za 're ida'ab'madâ'â u'âsi mo.

Hebreu 7:2

Tawamhã Abra'ã norĩ hã te te da'ãma ai'uté za'ra pari, danhibro te te i'wasari hã ma tô Abra'ã hã tinhiptõmo hi za'ratazém hawimhã misi waze, te te ipo hã. Taha parimhã, ma tô misi tãma tisõ, Mequizédéquihi ma. Mequizédéquihi nhisi hã: “Danhib'apito, sena na si da'madâ'â'wa” te wasu'u. Duré iwaptẽrẽzéb amo hã “Salẽ ãma danhib'apito”, iwaptẽrẽzéb amo hã. Salẽ hã “rowẽ” te wasu'u. Taha zarina, Salẽ ãma danhib'apito na iwaptẽrẽzé hã, “Danhib'apito, dama rowẽ nhomri'wa” te wasu'u.

Tiagu 1:22

Taré isimiroti hã aipo're na 're wapari za'ra wa'aba mono õ di za, imreme wapari pese 'wa na, taré 'râwi asima 're asadawa nhipese za'ra wa'aba mono tõ da. Tô sena te za isimiroti hã 're i'madâ'â za'ra wa'aba mo.

Tiagu 2:19

Misire uburé Danhib'apito uptabi hã te 're sãmra. Ãne na hã aima waihu'u pese di. Taha wasu'u na ma tô ãma isaze. Wa'uburé norĩ zama ma tô misire Danhib'apito uptabi wasu'u hã waihu'u za'ra. Tahawa, te pipa te, 're rẽrẽ'ẽ za'ra.

1 Pedru 2:24

Cristu hã wedepo'o nhonhi'rãmi na dâ'â wamhã, ma tô wawasété wa, wawa'âbâ za'ra, wawasédé hã wa te oto 're 'manharĩ tõ za'ra mono da, wahâimana wẽ na si oto 're wahâimana za'ra mono da. Ihâiba na da te tãma irob'manharĩ wasétézém na, ma tô robzépata za'ẽtẽ. Taha zarina, a norĩ wa'wa hã rowẽ na te oto 're aihâimana za'ra wa'aba mo.

1 Zuwã 2:1

Ĩ'ra norĩ, ĩma asawi pese za'ra wa'aba norĩ hã, e marĩ da, wa ãne na aima rob'ui'éré za'ra wa'wa. Aiwasété ãna oto ãma 're aihâimana za'ra wa'aba mono zéb da hã, wa ãne ĩnhimi'ui'éré na ãma aipo're pu'u za'ra wa'wa. Tane nherẽ, aiwasédé hã 're 'manharĩ za'ra wa'aba mono wamhã, 're 'manharĩ za'ra wa'aba mono nherẽ, Zezu Cristu hã 're imorĩ wẽ uptabi hã te za ai'ãma 're sisaprĩ za'ra wa'wa, tinhimiroti wẽ na. Timama ma, te za ãne te te 're aiwasu'u za'ra wa'wa, Zezusi hã: “Ã norĩ hã, tiwasédé te te 're 'manharĩ za'ra mono wa, asiwi 're awẽ'õ mono õ di za. Wa hã wa tô i'upana sada ĩdâ'â za'ra, uburé iwasédé hã te tãma 're i'apari mono zéb da hã.” Ãne te za Timama wi te te 're rowaptẽrẽ, ai'upana za'ra wa'aba.

1 Zuwã 2:26

E 'wam norĩ ãma, wa aima rob'ui'éré za'ra wa'wa. Sadawa nhipese na taré te te aima 're iroti za'ra wa'aba mono norĩ ãma, wa aima rob'ui'éré za'ra wa'wa. Isiniwĩ 're aipizari za'ra wa'aba mono da, te ta norĩ hã tinhimiroti tô senai õre na te te 're aipibui u'âsi za'ra wa'wa.

1 Zuwã 2:29

Cristu hã 're imorĩ wẽ uptabi na hã aima waihu'u pese za'ra wa'aba di oto, marĩ na 're isiwasété mono õ na hã. Tahawa, ni'wam norĩ hã 'Re ihâimana u'âsi mono te te dama 're i'apisutu mono zéb zarina si 're nomro wẽ mono wamhã, tawapsi te za oto iwaihu'u za'ra wa'wa, ta norĩ hã 'Re ihâimana u'âsi mono nhib'a'uwẽ, sena na 're inomro mono na hã.

1 Zuwã 3:18

Ĩ'ra norĩ, e wazadawa na si wa za wa te 're dazawi wapti za'ra. Mare di. Wamreme na si wa te 're dazawi wapti za'ra mono õ di za. Uburé wa za marĩ iwẽ na wa te 're dapawaptob za'ra, wanhimizawizé hã tô sena wama 're ihâimana za'ra mono zarina.

1 Zuwã 3:3

Õhõ zô rob'umnhasi sina, sô 're wanhimipari za'ra mono ré, wa za uburé marĩ iwasédé hã wa te wasiwi 're wẽ'õ pese za'ra 'râwi, iwẽ na si 're wahâimana za'ra mono da. Cristu hã wasété ãna 're imorĩ ne, wa za 're wahâimana za'ra.

1 Zuwã 4:17

Niwapsi te za Zezusi hã dahâimanazém na da'awaihu'u, za te te da'ãma i'arowairébézéb ãma hã. Tawamhã 're ihâimana wasété za'ra mono norĩ si te za hâ za'ra oto. Cristu hã ti'ai ãma 're morĩ ré, sihâiba zawi ãna te te 're idazawi pese mono ne, ti'ab ré 're wasisawi pese za'ra mono wamhã, tawapsi, wasina wapahi za'ra õ di za, za da'ãma isipo'ozéb ãma hã oto. 'Re ihâimana u'âsi mono te te 're iwa'azawi pese mono zé hã wa te tãma ãma 're uwaimrami u'âsi za'ra mono wa, wa za wasina wapahi ãna isõ'a hã wahâimana za'ra ni.