1 Zuwã 3:1 - ꞌRe Ihâimana Uꞌâsi Mono Zadawa Wasuꞌu

¹ Ma'ãpé, ãma aipo're pu'u za'ra wa'aba. Wamama 'Re ihâimana u'âsi mono hã, tô sena te te 're wa'azawi pese uptabi. Te te 're wa'azawi pese mono wa, te ti'ra na te te 're wa'anhisi. Tahawa, tô sena, wa oto i'ra na hã 're wahâimana za'ra, isazei'wai mono bâ. Dapo're'õ u'âsi 're idanomro mono norĩ hã, Wamama hã te te siwi 're waihu'u za'ra mono õ wa, wa norĩ zama i'ra na te te duré siwi 're wawaihu'u za'ra mono õ di, ta norĩ hã.

1 Zuwã 3:1 ပူးပေါင်းရင်းမြစ်များ

Luca 20:36

'Re ihâimana u'âsi mono ma romhuri'wa norĩ ne, te za dâ'â ãna 're hâimana u'âsi za'ra, dâ'â waihu'u ãna. 'Re ihâimana u'âsi mono 'ra, te za 're dahâimana za'ra, ab're hawi za te te da'ahâiwa'utu wamhã.

Zuwã 1:12

Ni'wam norĩ si ma tô sô 're tob'uzu za'ra. Ma tô duré te te ãma 're sasõmri za'ra. Tahawa, ma tô ta norĩ si pisutu za'ra, 'Re ihâimana u'âsi mono 'ra, 're hâimana za'ra mono da hã.

Zuwã 11:52

Zudeu norĩ zada si, dâ'â õ di za, Zezusi hã. Daro mono bâ 'Re ihâimana u'âsi mono, ti'ra da, uburé te te 're i'apisutu mono norĩ zada, te za dârâ, simisutu i'ra si 're danomro mono da oto.

Zuwã 15:21

We ĩzatõrĩ'wa na da te 're waihu'u za'ra mono õ di, 'Re ihâimana u'âsi mono hã. Tahawa, te za da te aima 're rob'manharĩ wasété za'ra wa'wa, ĩzazei'wa 're anomro aba mono wab zama.

Zuwã 16:3

'Re ihâimana u'âsi mono hã da te dasiwi 're waihu'u mono õ di, Ĩmama na. Ĩzama we te te ĩzatõrĩ na, da te dasiwi 're ĩzaze za'ra mono õ di. Tahawa, ĩzadawa wasu'u'wa 're anomro aba mono nherẽ, te za da te 're ai'ruiwapari u'âsi za'ra wa'wa.

Zuwã 17:25

Ĩmama, a hã aiwẽ uptabi na te 're asãmra mo. A hã we datẽme ĩzatõrĩ na te te 're asaze za'ra mono õ di, ĩzazei'õ'wa norĩ hã. Tazahã, ĩma aiwaihu'u pese di, we ĩzatõrĩ'wa na hã. Ãne na hã ĩzazei'wa norĩ ma zama, tãma aiwaihu'u pese za'ra di.

Zuwã 3:16

'Re ihâimana u'âsi mono ma, tãma dazawi pese uptabi wa, ma tô ti'ra hã misi nherẽ, we tisõ, dazada dâ'â da. Tawamhã i'ra, da te dasina 're umnhasi za'ra mono wamhã, dadâ'â ãna te za hâiwa ãma i'rata 're dasi'ubumroi u'âsi. Ropipa ãma isiti 're dasi'ubumroi mono õ di za.

Roma 5:8

Tanei õ di, 'Re ihâimana u'âsi mono nhimizawizé hã. Wa norĩ hã wawasété na 're wahâimana za'ra mono nherẽ, ma tô Cristu hã pisutu, wazada dâ'â da, wa'upana. Ãne hã ma tô 'Re ihâimana u'âsi mono hã te te wama 're awaihu'u, te te 're iwa'azawi pese mono zém na hã.

Roma 8:19

'Re ihâimana u'âsi mono hã uburé te te i'apoto mono hã, simisutu te umnhasi sina sô 're simipari za'ra, bâdâ iwa iwaptã'ãzéb zô, uburé ti'ra na sõ'awi za te te oto dama iwasu'u hâi'ré za'ra zô.

Roma 8:32

'Re ihâimana u'âsi mono hã ti'ra te te wawi sawi za'ra õ di, wazada dâ'â za'ra tõ da. Wa'udâna ma tô wama sõmri za'ra tô, te te wawi sawi za'ra ãna. E tawamhã uburé marĩ iwẽ hã te te wama 're anhomri mono õ di za. Te te wawi 're azawi mono ãna, te za tô te te wama 're anhomri, 'Re ihâimana u'âsi mono hã.

2 Corĩtu 6:18

Tawapsi, wa za duré Aimama za'ra wa'aba na hã aima 're ĩhâimana 'wa. Tawamhã ĩ'ra te za duré oto ĩma 're aihâimana za'ra wa'aba mo.”

Colosu 3:3

'Re anomro 'rata aba mono zé hã ma tô aima ai'utõrĩ za'ra wa'wa oto. 'Re ihâimana u'âsi mono ãma Cristuhu siré 're anomro aba mono zép tém na da te ai'ãma 're rosa'rata waihu'u za'ra wa'aba mono õ di zahadu. E marĩ wa. 'Re ihâimana u'âsi mono hã zahadu te te dama 're awaihu'u mono õ wa, ãne na hã.

1 Zuwã 3:10

E niha wa za bété waihu'u za'ra ni, 'Re ihâimana u'âsi mono 'ra norĩ hã, duré Wa'uburé 'ra norĩ hã. Ni'wam norĩ hã 're hâimana wẽ za'ra mono õ wamhã, duré te te 're dazawi pese za'ra mono õ wamhã, ta norĩ hã 'Re ihâimana u'âsi mono 'ra, 're nomro mono õ di za. Ãne na wa za ta norĩ hã Wa'uburé 'ra na wa te 're waihu'u za'ra.

1 Zuwã 3:2

Ĩsisãnawã norĩ, ĩma asawi pese za'ra wa'aba norĩ hã, 'Re ihâimana u'âsi mono 'ra, wa oto 're wahâimana za'ra. Tane nherẽ, za 're iwahâimana za'ra mono zéb da hã, zahadu wama waihu'u prã za'ra di. Cristu hã apâ wei wazô morĩ wamhã, isine wa za oto 're wahâimana za'ra. Ãhã si wama waihu'u pese za'ra di. E marĩ wa, wa za isine 're wahâimana za'ra. Tô sena Cristu hã 're ihâimana mono zém na 'râwi wa te oto wasiwi 're waihu'u za'ra mono wa, wa za oto tô isine 're wahâimana za'ra.

1 Zuwã 4:17

Niwapsi te za Zezusi hã dahâimanazém na da'awaihu'u, za te te da'ãma i'arowairébézéb ãma hã. Tawamhã 're ihâimana wasété za'ra mono norĩ si te za hâ za'ra oto. Cristu hã ti'ai ãma 're morĩ ré, sihâiba zawi ãna te te 're idazawi pese mono ne, ti'ab ré 're wasisawi pese za'ra mono wamhã, tawapsi, wasina wapahi za'ra õ di za, za da'ãma isipo'ozéb ãma hã oto. 'Re ihâimana u'âsi mono te te 're iwa'azawi pese mono zé hã wa te tãma ãma 're uwaimrami u'âsi za'ra mono wa, wa za wasina wapahi ãna isõ'a hã wahâimana za'ra ni.

Apocalipsi 21:7

Ni'wam norĩ hã tidâ'âzéb u ĩwi sipizari ãna, Satanasihi ãma te te i'ai'uté za'ra norĩ hã ta norĩ ma, wa za Isib'apito za'ra na 're ĩhâimana. Ĩnhib'a'uwẽ si te za oto ta norĩ hã 're hâimana za'ra.