1 Zuwã 2:2 - ꞌRe Ihâimana Uꞌâsi Mono Zadawa Wasuꞌu

² Ta hã ma tô wazada dârâ, 'Re ihâimana u'âsi mono wawasédé hã te te wama 're i'apari mono zéb da hã. Tane nherẽ, wazada si dâ'â õ di. Uburé da'udâna dawasédé hã da te 're i'manharĩ za'ra mono norĩ da zama, ma tô dârâ, da'upana.

1 Zuwã 2:2 ပူးပေါင်းရင်းမြစ်များ

Luca 14:22

— Tawamhã we te te danhimroi mono pari, te tinhib'apito ma tinha ãne: “Apito, wa tô aimreme hã ãma uwaimra, aima. Zahadu da'masisi õ di.” Ãne te tãma tinha.

Zuwã 1:29

Tawamhã awẽ ma tô Zuwã Batista Zezusi hã tisã, itẽme morĩ ré. Te te sãmri wi, te dama 'mahâ, ãne: — Õhõta te we oto mo, Pone'ẽrebâ hã, 'Re ihâimana u'âsi mono te te ipisudu hã dawasédé te te dama 're apari mono da.

Zuwã 12:32

Hâiwi ĩza'o da, da te dasiwi ĩzasõmri wapsi, wa za ĩsitẽme te 're da'a'ubumro, ĩnhib'a'uwẽ 're dahâimana za'ra mono da, daro mono bâ.

Zuwã 4:42

Tawamhã te ãne pi'õi ma nharĩ za'ra, pi'õ nhimirowasu'u wapari'wa norĩ hã: — Asimirowasu'u hã wa te wapari za'ra wa, wa tô saze za'ra ni. Ãhã na wasi'uihâ na wa tô imreme hã wapari za'ra ni. Tahawa, wa oto waihu'u za'ra ni, õ hã Danho'reptui'wa te 're mo.

Hebreu 2:17

Tahawa, tisisãnawã norĩ me, aiwa uptabi a'â 're hâimana mono da, ma tô si'a'uwẽ Zezusi hã, sasedoti 'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi ne 're hâimana mono da, tãma umnhasi na te te tãma 're romhuri mono da, da'ãma pẽ'ẽzé uptabi sina. Taha da, ma tô si'a'uwẽ tô, taha zarina dawasédé hã te te oto dama 're apari mono da. Ta hã dasiré si'a'uwẽ õ 'wa'âhã, ãne hã te te aré sina uwaimrami waihu'u õ di, 'Re ihâimana u'âsi mono ma hã.

1 Pedru 2:24

Cristu hã wedepo'o nhonhi'rãmi na dâ'â wamhã, ma tô wawasété wa, wawa'âbâ za'ra, wawasédé hã wa te oto 're 'manharĩ tõ za'ra mono da, wahâimana wẽ na si oto 're wahâimana za'ra mono da. Ihâiba na da te tãma irob'manharĩ wasétézém na, ma tô robzépata za'ẽtẽ. Taha zarina, a norĩ wa'wa hã rowẽ na te oto 're aihâimana za'ra wa'aba mo.

1 Pedru 3:18

Misi haré ma tô Cristu hã dazada dârâ, 're idahâimana wasété za'ra mono hawi, te te 're da'anho'reptui mono da. 'Re imorĩ wẽ uptabi hã ma tô dârâ, 're idanomro wasété mono norĩ da, te te 're wa'anhimroi mono da, 'Re ihâimana u'âsi mono u. Cristu hã dâ'â uptabi nherẽ, ma tô Imama hã hâiwa'utu, apâ 're hâimana u'âsi mono da.

1 Zuwã 1:7

Tane nherẽ, 'Re ihâimana u'âsi mono nhimiroti zarina 're wahâimana za'ra mono wamhã, rowa'a na 're ihâimana mono ne, wa za duré wa norĩ hã rowa'a na 're wahâimana za'ra. Taha zarina, wa za duré 'râwi wasiré ãma 're wahâimana za'ra, wasisawi pese za'ra sina. 'Re ihâimana u'âsi mono 'ra hã te za duré wawasédé hã te te wama 're apari tidâ'âzém na Zezusi hã, wawasété ãna oto ãma 're wanomro mono da.

1 Zuwã 3:5

Tane nherẽ, Cristu hã ma tô we ti'ai u mo, dawasédé hã te te dama 're apari mono da. Ã hã aima waihu'u pese za'ra wa'aba di. Ta hã 're imorĩ wasété õ, duré marĩ iwasédé hã te te 're i'ab'manharĩ mono õ.

1 Zuwã 4:10

Wa norĩ hã 'Re ihâimana u'âsi mono, wama sawi pese za'ra di. Tane nherẽ, te taha nhipai u te te 're wa'azawi pese uptabi. Tahawa, ma tô ti'ra we satõ ti'ai u, wazada dâ'â da, wazada dâ'â wa, wawasété na te te oto 're wa'ab'madâ'â tõ mono da. Tô sena isimizawi pese zé hã siwaprosi te tãma 're hâimana, danhipai u.

1 Zuwã 4:14

Wamama hã ma tô ti'ra hã we satõ, Danho'reptui'wa da. Ta hã wa tô wa te 're 'madâ'â za'ra, watõmo na. Ãhã na wa oto wa te dama 're wasu'u za'ra, Danho'reptui'wa na, i'ra hã.

1 Zuwã 5:19

Ti'ai ãma uburé 'Re ihâimana u'âsi mono wẽ'õ'wa norĩ hã iwasété uptabi zadawa para te 're hâimana za'ra. Wa norĩ si 'Re ihâimana u'âsi mono nhib'a'uwẽ, wa 're wanomro. Ãne hã wama waihu'u pese za'ra di duré.

Apocalipsi 12:9

Tawamhã ho'orã hâiba ne ropoto siwamnarĩ hã ma tô siwi time ti'ai u, apâ morĩ tõ da. Ta hã Satanasi, wanhitob'ru. Ta hã duréihã wahi na isihâiba. Uburé tizadawa nhipese na te te 're ida'a'rãmi mono, 'Re ihâimana u'âsi mono zadawa para newa, ti'ai ãma daro mono bâ. Tawamhã wa'uburé norĩ zama isib'a'uwẽ zama ma tô isiré siwi sãmra ti'ai u, apâ si'aba'ré tõ da.