1 Zuwã 2:1 - ꞌRe Ihâimana Uꞌâsi Mono Zadawa Wasuꞌu

¹ Ĩ'ra norĩ, ĩma asawi pese za'ra wa'aba norĩ hã, e marĩ da, wa ãne na aima rob'ui'éré za'ra wa'wa. Aiwasété ãna oto ãma 're aihâimana za'ra wa'aba mono zéb da hã, wa ãne ĩnhimi'ui'éré na ãma aipo're pu'u za'ra wa'wa. Tane nherẽ, aiwasédé hã 're 'manharĩ za'ra wa'aba mono wamhã, 're 'manharĩ za'ra wa'aba mono nherẽ, Zezu Cristu hã 're imorĩ wẽ uptabi hã te za ai'ãma 're sisaprĩ za'ra wa'wa, tinhimiroti wẽ na. Timama ma, te za ãne te te 're aiwasu'u za'ra wa'wa, Zezusi hã: “Ã norĩ hã, tiwasédé te te 're 'manharĩ za'ra mono wa, asiwi 're awẽ'õ mono õ di za. Wa hã wa tô i'upana sada ĩdâ'â za'ra, uburé iwasédé hã te tãma 're i'apari mono zéb da hã.” Ãne te za Timama wi te te 're rowaptẽrẽ, ai'upana za'ra wa'aba.

1 Zuwã 2:1 ပူးပေါင်းရင်းမြစ်များ

Salmu 4:4

Nimahã na asiti'ru za'ra wa'aba wamhã, ma'ãpé taha zarina 're aiwasété za'ra wa'aba mono tõ. Duré asiwaprosi asimiwaptâ ãma ari'iwi pese 're asimi'wara aba mono wamhã, te za asimirosa'rata na 'râwi 're asi'madâ'â za'ra wa'aba mo.

Luca 10:22

— Ĩmama ma tô ĩma waihu'u, uburé 're ihâimana mono zé hã. Ni'wam norĩ hã si'uihâ na te te 're ĩwaihu'u za'ra mono õ di, 're ĩhâimana mono zém na hã. Ĩmama si ma tô ti'ra na ĩwaihu'u pese, 're ĩhâimana mono zém na hã. Duré dasi'uihâ na Ĩmama, da te 're waihu'u za'ra mono õ di za. Ĩwétési wa tô Ĩmama hã waihu'u pese, 're ihâimana mono zém na hã. Te ĩsima 're i'awẽ mono zéb uwaibaba si, wa za ni'wam norĩ ma, te 're awaihu'u, ta norĩ zama Ĩmama hã te te waihu'u za'ra da, 're ihâimana mono zém na.

Zuwã 13:33

Ĩno norĩ, suru na wa za oto ai'rata ĩnhamra 'wa. Ai'rata 're ĩnhamra u'âsi aba mono da, te za asima 're ĩwẽ za'ra wa'aba mo. Tane nherẽ, wa za mo. Nimomo ĩmorĩ wamhã, ãma ĩtẽme 're anomro waihu'u aba mono õ di za a'â. Ãne na hã wa tô dama waihu'u aré.

Zuwã 14:16

Tawamhã Ĩmama wi, wa za waptẽ, Tipẽ'ẽzani hã te te aima sõmri za'ra wa'aba da, ĩsine te te 're aipawaptob u'âsi za'ra wa'aba mono da, ai'rata 're sãmra u'âsi za'ra wa'aba mono da. Tô sena na te za ĩnhimiroti hã te te aima 're waihu'u u'âsi za'ra wa'wa, Ipẽ'ẽzani hã. Ĩzazei'õ'wa norĩ hã te te waihu'u za'ra õ di, Ĩmama pẽ'ẽzani hã. Tahawa, te te sima 're wẽ za'ra mono õ di, i'rata 're sãmra u'âsi za'ra mono da. A norĩ wa'aba si ma tô iwaihu'u za'ra wa'wa, Ipẽ'ẽzani hã ai'rata 're sãmra aba mono wa. Zahadu wapsi te za aipẽ'ẽ 're, 're sãmra u'âsi za'ra wa'wa.

Zuwã 14:6

Tawamhã Zezusi ma te asa ãma tãma wa'rã ãne: — Wa hã bâdâdi uptabi na, wa ĩsiwasu'u, duré tô sena na rowaihu'u wẽ nhomri'wa na, duré 're idanomro u'âsi mono zé nhomri'wa na. Tahawa, ni'wa hã ĩ'ãma 're morĩ õ nherẽ, Ĩmama u hã wisi waihu'u õ di za.

Zuwã 21:5

Tawamhã ma tô 'mahârâ za'ra, ãne: — Ĩsisãnawã norĩ, e ma tô i'mai'âri za'ra wa'wa, tebe hã. Tawamhã asa ma tô ãma sada'âbâ za'ra, ãne: — Mare di. Wa te 'mai'âri za'ra õ di. Â baba di.

Zuwã 5:14

Tawamhã 'ri 'wawi wa'ra 're, ma tô aibâ hã sõpẽtẽ Zezusi hã, 'Re ihâimana u'âsi mono nhorõwa ãma. Te te sõpẽtẽ wamhã, ãne te aibâ ma tinha, Zezusi hã: — Ma tô oto aséptâ, ãhã na hã. Tahawa, aiwasédé hã 're 'manharĩ mono õ di za oto, 're 'manharĩ u'âsi mono wa, marĩ iwasété uptabi aima 're hâimana mono õ'umnhasite.

Zuwã 6:27

Dasa hã siwamnarĩ su'u di. Tahawa, taha zô si 're romhuri za'ra wa'aba mono õ di za. Dasa ne isi'utõrĩ'õ zô si, te za 're irob'ruiwapari za'ra wa'aba mo, wẽ na 're ihâimana u'âsi mono zô si. Ta hã rowẽ u'âsi dadâ'â ãna 're idahâimana u'âsi za'ra mono zé, te wasu'u. Wa hã ti'ai ãma dasiré ĩpoto wa, ma tô Ĩmama hã ĩpisutu, isadawa para te dama 're anhomri mono da, rowẽ u'âsi 're idahâimana u'âsi za'ra mono zé hã.

Zuwã 8:11

Tawamhã te pi'õ hã asa tãma tinha, ãne: — Maze di. Ni'wa hã sab õ di, te te dama ĩ'ru da, da te dasiwi ĩwĩrĩ da hã. Tahawa, Zezusi te duré asa tãma tinha, ãne: — Tane tô. Wa hã te duré dama ai'rui õ di za, da te dasiwi aiwĩrĩ da hã. Mo oto aimorĩ. Aiwasédé hã 're 'manharĩ zahu mono õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:52

Aihi'rata norĩ wa'wa hã ma tô sada 're sib'ru za'ra, 'Re ihâimana u'âsi mono zadawa 'mahârâ 'rata 'wa norĩ zada. 'Re imorĩ wẽ uptabi hã za we iwisi wana, ma tô aré te te dama 're wasu'u za'ra, isadawa wasu'u'wa norĩ hã. Tane nherẽ, ma tô aihi'rata norĩ wa'wa hã te te 're simro, ta norĩ hã. Aihi'rata norĩ wa'wa hã ãne te te 're i'manharĩ za'ra mono ne, ma tô duré a norĩ wa'aba zama dama isa'ré za'ra wa'wa, 're imorĩ wẽ uptabi hã da te dasiwi wĩrĩ da.

Roma 5:10

'Re ihâimana u'âsi mono nhitob'ru, wa aré 're wanomro. Tane nherẽ, ti'ra dâ'âzém na ma tô wa'ãma 're siwadi za'ra oto. Tawamhã isiwadi oto 're wahâimana za'ra mono wa, te za tô oto Zezusi hã te te 're wa'anho'reptu, dâ'â nherẽ, apâ hâiwa'utu wa, dâ'â ãna 're hâimana u'âsi mono wa za oto.

Roma 6:15

Tawamhã ãté ãne te za asima 're inharĩ za'ra wa'aba mo: “'Re ihâimana u'âsi mono nhimiroti na Mozési te te irob'ui'érézé hã wa te 're i'madâ'â pese za'ra mono zéb zarina, te te sima wa'ãma 're aroti mono õ di, taha zarina wawasédé hã te te oto wa'ãma 're ab'madâ'â tõ mono da, taha zarina te te 're wa'awẽsãmri mono da. Tinhimizawi pese zéb zarina si, ma tô te te 're wa'awẽsãmri, wawasété na 're wahâimana za'ra mono nherẽ, wa'ãma 're pẽ'ẽzé za'ra mono wa. Tahawa, wa za wawasédé hã duré apâ wa te 're 'manharĩ u'âsi za'ra õne u'â, 'Re ihâimana u'âsi mono hã dawasété nherẽ, simizawi pese wa.” Ãne na asima 're rosa'rata za'ra wa'aba mono õ di za. Tô'ã.

1 Corĩtu 15:34

Ni'wam norĩ hã asiré 're ihâimana za'ra wa'aba mono norĩ hã 'Re ihâimana u'âsi mono hã 'râwi te te 're waihu'u za'ra mono õ di. E ãne na 're siséb za'ra mono ãna. Asimiza'rese ãna 're aihâimana za'ra wa'aba mono zém hawi, te za oto aipizari za'ra wa'wa, aiwasédé hã rẽme pese za'ra wa'aba da, aiwẽ uptabi na si 're anomro aba mono da oto.

2 Corĩtu 5:21

Cristu hã ti'ai ãma 're morĩ ré, ma tô wasété ãna 're hâimana u'âsi. Tiwasédé hã te te 'manharĩ õ nherẽ, 'Re ihâimana u'âsi mono hã ma tô uburé wawasédé, wa te 're i'manharĩ za'ra mono zém na hâiba wati'i, wa'upana za'ra, Cristuhu ãma 're wanomro mono wa, te te oto 're iwa'awẽsãmri mono da hã.

Galata 4:19

Ĩ'ra norĩ, ĩma asawi pese za'ra wa'aba norĩ, pi'õ tiwasã te te 're isépata za'ra mono ne, wa tô wa hã ĩpẽ hã te ai'ãma 're sépata za'ra wa'wa, Zezu Cristu 're imorĩzém na 're anomro aba mono õ wa. Ãma 're anomro wẽ wa'aba mono wapsi, ĩma 're rowẽ mono di za.

Éfézu 2:18

Cristu hã wazada dâ'â wa, duré wama 're hâimana za'ra mono wa, te za oto Ipẽ'ẽzani hã simisutu te te 're wa'apawapto, Wamama u 're iwasihutu mono zéb da hã wanhimirosa'rata na. Tawamhã tãma 're wamreme zusi mono wamhã, te za te te 're wa'awapari u'âsi, zudeu norĩ hã, zudeu'õ norĩ me.

Éfézu 4:26

Nimahã na 're asiti'ru za'ra wa'aba mono wamhã, 're aiwasété za'ra wa'aba mono õ di za, aiwasédé hã 're 'manharĩ za'ra wa'aba mono tõ da. Duré asiti'rui ré bâdâ hã wahuré ai'ãma 're si'utõrĩ za'ra wa'aba mono tõ da, te za asiwi 're iwẽ'õ za'ra wa'aba mo, Wa'uburé nhimiwada'uri zarina aiwasédé hã 're 'manharĩ za'ra wa'aba mono tõ da dama.

1 Timotiu 2:5

Misire hâiwa ãma 're ihâimana mono si, uburé Danhib'apito uptabi hã. Misire da'ãwisi wẽ 'wa Wamama u hã. Ta hã Cristu Zezusi, aibâ na 're ihâimana mono.

1 Timotiu 3:14

Atẽme ãma ĩwisi su'u da hã ĩma wẽ nherẽ, ãma ĩwisi su'u õ na dâ'âsina, wa ãne na ãma aima rob'ui'éré. E marĩ da. Niha dama 're iwahâimana za'ra mono zéb da na waihu'u da. Wa norĩ hã 'Re ihâimana u'âsi mono 'ra, wa 're wanomro. Isib'a'uwẽ, wa oto 're wahâimana za'ra, daro mono bâ wa te 're isaze za'ra mono hã. Wanhib'apito nhimiroti hã tô sena wa, isazei'wai mono bâ wa za wa te 're 'madâ'â u'âsi za'ra. Õne haré te za dama 're hâimana u'âsi, da te ãma 're isaze za'ra mono zéb da hã.

Hebreu 9:24

Ãhã wa, Cristu hã dâ'â pari oto duré hâiwa'utu wamhã, ti'ai ãma danhib'rata na da te 're i'ri za'ra mono 'remhã, sébré õ di, 'Re ihâimana u'âsi mono iwa 're isãmra mono zéb u hã. E marĩ wa. Ta hã ti'ai ãma 'ri hã, hâiwa ãma 'ri i'uptabi ne si 're hâimana mono wa, duré i'uptabi õ wa. Hâiwa ãma 'Re ihâimana u'âsi mono hã iwa 're isãmra mono zéb u si ma tô ãzé Cristu hã, tame te te oto wa'ãma 're romhuri u'âsi mono da, Timama nho'a.

Tiagu 1:27

Ãne 're hâimana za'ra mono õ di za, 'Re ihâimana u'âsi mono nhimiroti 'madâ'â pese 'wa norĩ hã. Ãne te za ta norĩ hã 're hâimana za'ra. Imama'õ norĩ hã duré ina'õ norĩ hã te za te te 're pawaptob za'ra. Pi'õi mrotõ norĩ zama te za duré te te 're pawaptob za'ra, ropire hã tãma 're hâimana za'ra mono wamhã. Tihâimanazém na te za duré 're sipibui pese za'ra, Wanhib'apito zazei'õ'wa norĩ nhimirosa'rata zarina 're hâimana wasété za'ra mono tõ da. Ãne wamhã, te za Wamama hã te te 're da'awaihu'u, tô sena isimiroti 'madâ'â pese 'wa 're idahâimana za'ra mono na hã.

Tiagu 3:9

Wanhoto na wa za uburé Danhib'apito uptabi ãma 're wawata za'ra, duré Wamama ãma hã. Wa za duré wa te da'ãma 're wasété za'ra, wanhoto ihâiba amo na, 'Re ihâimana u'âsi mono hã te te 're wa'apoto mono nherẽ, isine 're wanomro mono da.

1 Pedru 2:22

Cristu hã marĩ na tiwasédé te te 'manharĩ õ uptabi di. Duré niwamhã sadawa nhipese na te te inharĩ waihu'u õ.

1 Pedru 3:18

Misi haré ma tô Cristu hã dazada dârâ, 're idahâimana wasété za'ra mono hawi, te te 're da'anho'reptui mono da. 'Re imorĩ wẽ uptabi hã ma tô dârâ, 're idanomro wasété mono norĩ da, te te 're wa'anhimroi mono da, 'Re ihâimana u'âsi mono u. Cristu hã dâ'â uptabi nherẽ, ma tô Imama hã hâiwa'utu, apâ 're hâimana u'âsi mono da.

1 Zuwã 3:18

Ĩ'ra norĩ, e wazadawa na si wa za wa te 're dazawi wapti za'ra. Mare di. Wamreme na si wa te 're dazawi wapti za'ra mono õ di za. Uburé wa za marĩ iwẽ na wa te 're dapawaptob za'ra, wanhimizawizé hã tô sena wama 're ihâimana za'ra mono zarina.

1 Zuwã 3:5

Tane nherẽ, Cristu hã ma tô we ti'ai u mo, dawasédé hã te te dama 're apari mono da. Ã hã aima waihu'u pese za'ra wa'aba di. Ta hã 're imorĩ wasété õ, duré marĩ iwasédé hã te te 're i'ab'manharĩ mono õ.

1 Zuwã 3:7

Ĩ'ra norĩ, dahâimana wasété na 're idanomro mono na, da'ãma 're sasõmri za'ra wa'aba mono õ di za, danhimiroti senai'õ na dama 're ihâimana za'ra mono na zama. Ma'ãpé 'râwi asina 're asõpré pese aba mono. Ni'wam norĩ hã 're nomro wẽ mono wamhã, 'Re ihâimana u'âsi mono nhimiroti na sima ãma 're sipa za'ra mono õ wamhã, ta norĩ si hã 're hâimana wẽ za'ra mono di, Cristu hã 're imorĩ ne.

1 Zuwã 4:4

Ĩ'ra norĩ, a norĩ wa'aba si te oto 'Re ihâimana u'âsi mono nhib'a'uwẽ 're aihâimana za'ra wa'aba mo. 'Re ihâimana u'âsi mono zadawa wasu'u uptabi 'wa newa, tô senai'õ na te te dama 're iroti za'ra mono norĩ da, ma tô asiptete sina 're aihâimana za'ra wa'aba mo, asimirosa'rata na. E marĩ wa. Aipẽ'ẽ 're, 're isãmra aba mono hã, Wa'uburé ma tiwaihu'u pese na siptete uptabi wa, ti'ai ãma dawada'uri wasété 'wai ma.

1 Zuwã 5:21

Ĩ'ra norĩ, ĩma asawi pese za'ra wa'aba norĩ hã, 'Re ihâimana u'âsi mono upana waihu'u pese newa, marĩ na 're idawata za'ra mono norĩ wi, te za 're asi'madâ'â pese za'ra wa'aba mo 'râwi, da'ãma 're sasõmri za'ra wa'aba mono tõ da.

3 Zuwã 1:4

Ãne hã ĩ'ra norĩ ãma te 're wapari wẽ za'ra mono wa, ĩma 're rowẽ uptabi mono di, Wanhib'apito wasu'uwẽ na te ãma 're ipo're pu'u za'ra mono zéb zarina te te 're isazei pese za'ra mono norĩ ãma. Ĩ'ra norĩ 're ihâimana wẽ za'ra mono wasu'u te 're wapari mono wamhã, ĩma 're rowẽ uptabi mono di. Marĩ na uburé rowasu'u hã te 're wapari wẽ mono nherẽ, te te siwi ãma 're wabzu mono õ di, ĩ'ra norĩ wasu'u te 're iwapari zei mono zé hã.