1 Zuwã 1:9 - ꞌRe Ihâimana Uꞌâsi Mono Zadawa Wasuꞌu

⁹ Tane nherẽ, wawasédé hã wa te 're i'manharĩ za'ra mono na 'Re ihâimana u'âsi mono ma, 'râwi 're wasiwẽ'õ za'ra mono wamhã, te te dama 're i'aropisutu mono zéb zarina, te za te te wama ãma 're a'uwaimrami, te te wama ãma 're a'upai mono ãna. Tãma 're iwasiwasu'u za'ra mono zéb zarina, wawasédé hã wa te 're i'manharĩ za'ra mono hã te te wa'ãma 're ab'madâ'â mono õ di za oto. Te za tô te te wama 're apari, wawasédé hã.

1 Zuwã 1:9 ပူးပေါင်းရင်းမြစ်များ

Neemia 1:6

'Re ihâimana u'âsi mono, ma'ãpé we ĩ'madâ'â. Bâtâ na duré mara na zama ĩmreme na te aiwi 're irowaptẽrẽ mono zé hã ma'ãpé 're wapari mono, asib'a'uwẽ Izaraéu nhihudu norĩ hâiba na hã. Wa hã Izaraéu nhihudu norĩ me wawasédé wa te 're i'manharĩ za'ra mono na hã wa aima ĩsiwasu'u. Wahi'rata norĩ hawim na wa wawasété na hã 're wahâimana za'ra tô.

Salmu 19:12

E 'wa hã marĩ na te te 're i'upai mono zé hã te te sina 'madâ'â waihu'u pese bâ. Apito, ma'ãpé ĩpẽ'ẽ 'remhã ĩma pari, ĩwasédé te 're i'a'manharĩ mono zé hã, te waihu'u ãna.

Salmu 32:5

Tawamhã ĩwasété na wa tô aima ĩsiwẽ'õ. Ĩnhimi'manharĩ wasété zé hã te aiwi simi'uri õ di. Ĩwasédé hã te aima wasu'u da, wa tô ĩsima rowairébé. Tawamhã a hã uburé ĩwasédé hã ĩ'ãma 're a'madâ'â mono õ di oto.

Ezodu 34:7

Tahawa, danhihudu dasitébré mono sidâpâsi wa õne u'â ĩnhimiropisutuzém na hã te tãma ãma 're a'uwaimrami. Duré marĩ iwasédé da te 're i'manharĩ za'ra mono zém na hã, duré 're idawasété za'ra mono zém na hã te da'ãma 're ab'madâ'â mono õ di, nima norĩ ãma hã. Tane nherẽ, damama tiwasédé te te 're i'manharĩ za'ra mono u'âbâmhã i'ra norĩ ma hã, isihudu norĩ ma hã, isihudu 'ra norĩ ma hã, duré isihudu 'ra 'ra norĩ ma hã, ĩnhimihâzé hã te tãma 're ba'a waihu'u za'ra mono õ di.

Provébiu 28:13

Ni'wa tiwasédé te te sima 're tété u'âsi mono wamhã, rowẽzé tãma 're ihâimana mono da hã mare di. Tane nherẽ, ni'wa isiwẽ'õ zarina te te rẽme wamhã, te za 'Re ihâimana u'âsi mono hã ãma 're isiwamri mono zé hã sina uwaimra.

Mateu 3:6

Tahawa, dawasété na sõ'awimhã ma tô 're dasiwẽ'õ za'ra 'râwi, 'Re ihâimana u'âsi mono ma. Dawasété na 're dasiwẽ'õ za'ra mono sidâpâsi, ma tô Zuwã Batista â dawabzuri hã te te dama 're ab'manharĩ, Zodã pa ãma.

Marcu 1:5

Da'ahâ uptabi na te itẽme 're dasito, Zudéa na danhipti'a nho'õmo nhisi hawi. Zeruzalẽ na 'ri nho'õmo nhisi hawib zama, te itẽme 're dasito. Tawamhã dasisõ'a dawasété na, 'Re ihâimana u'âsi mono ma 're dasiwasu'u za'ra mono wamhã, ma tô â dawabzuri hã te te dama 're ab'manharĩ Zuwã hã, Zodã pa na â nhisi ãma.

Luca 22:57

Tane nherẽ, ma tô tiwi ai'udâ, ãne: — Mare di. Ĩma sa'rese õ di, ta hã.

Zuwã 17:25

Ĩmama, a hã aiwẽ uptabi na te 're asãmra mo. A hã we datẽme ĩzatõrĩ na te te 're asaze za'ra mono õ di, ĩzazei'õ'wa norĩ hã. Tazahã, ĩma aiwaihu'u pese di, we ĩzatõrĩ'wa na hã. Ãne na hã ĩzazei'wa norĩ ma zama, tãma aiwaihu'u pese za'ra di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 19:18

Ni'wam norĩ hã te te 're saze za'ra mono õ ré, abzé te te 're i'manharĩ za'ra mono zém na ma tô siwasu'u za'ra danho'a, tiwasédé te te 're i'manharĩ za'ra mono zém hawi isipizari za'ra na hã.

Roma 3:26

Tane nherẽ, ãhã na hã dawasédé hã da te 're i'manharĩ za'ra mono zém na, te te da'ãma 're ab'madâ'â mono ãna 're hâimana mono õ di oto. Te oto te te da'ãma 're ab'madâ'â u'âsi, uburé marĩ hã i'uwaibaba si te te 're i'ab'manharĩ wẽ mono na, da te dasina 're waihu'u za'ra mono da, duré uburé Zezusi hã da te 're isazei pese za'ra mono norĩ hã te te 're ida'awẽsãmri mono na, da te dasina 're waihu'u za'ra mono da.

1 Corĩtu 1:9

'Re ihâimana u'âsi mono hã wama umnhasi za'ra di, uburé te te wama 're i'aropisutu mono zéb zarina, te te wama ãma 're i'a'uwaimrami mono zéb da hã. Ta hã ma tô te te 're aipisutu za'ra wa'wa, i'ra siré 're anomro aba mono da, Wanhib'apito Zezu Cristuhu siré.

1 Corĩtu 6:11

Ãne na si, ma tô ni'wam norĩ a norĩ wa'wa aré 're aihâimana wasété u'âsi za'ra wa'aba mo, 're saze za'ra wa'aba mono õ ré hã. Tane nherẽ, 'Re ihâimana u'âsi mono hã Zezusihi dâ'âzém na, ma tô oto te te 're ai'upsõ za'ra wa'wa, aiwasété hawi. Ma tô duré te te 're aipisutu za'ra wa'wa, isib'a'uwẽ si oto ãma 're anomro wẽ wa'aba mono da. Aiwasédé hã te te oto ai'ãma 're i'ab'madâ'â aba mono õ zéb zarina, ma tô duré te te 're aiwẽsãmri za'ra wa'wa, Wanhib'apito Zezu Cristuhu zadawa para, 'Re ihâimana u'âsi mono pẽ'ẽzani nhimipawaptobzém na hã.

Éfézu 5:26

Marĩ hã â na da te 're i'upsõ za'ra mono ne, ma tô tinhimiroti na wawasété hawi te te 're wa'a'upsõi wẽ wapẽ'ẽ 're, 're wanomro wẽ mono da, isib'a'uwẽ si oto 're wahâimana za'ra mono da tãma.

1 Timotiu 1:15

Ti'ai u ma tô wei mo, Cristu Zezusi hã, 're idanomro wasété mono hawi te te 're da'anho'reptui mono da. Ãne te dasima da te 're rowasu'u za'ra. Danhimirowasu'u hã tô sena wamhã, aihĩni ãma 're idasisaze za'ra mono da hã, ĩma wẽ di. Wa hã dawasété nhipai u, ĩwasédé hã sa'ẽtẽ uptabi di.

Titu 2:14

Ta hã ma tô wazada sisõmri za'ra, wazada dâ'â za'ra da, 're iwanomro wasété mono hawi, te te 're wa'anho'reptui mono da, isib'a'uwẽ si 're wahâimana za'ra mono da oto. E marĩ da. Sena na 're wanomro mono da, duré wawa'a ãna iwẽ na si wa te oto 're dapawaptob za'ra mono da.

Hebreu 10:23

'Re ihâimana u'âsi mono hã wama umnhasi za'ra di, te te wama 're i'aropisutu mono zéb uwaibaba, te te wama ãma 're i'a'uwaimrami mono da hã. Tahawa, wanhiptete sina wa za iwẽ uptabi zô 're wanhimipari u'âsi za'ra, 'Re ihâimana u'âsi mono hã te te wama iropisutu za'ra zém na wa te 're wawã za'ra mono ãna, sena na za wama 're ihâimana za'ra mono na wa te dama 're iwasu'u za'ra mono zéb zarina.

Hebreu 11:11

Abra'ã hã 'Re ihâimana u'âsi mono si te te sina 're i'umnhasi mono zéb zarina, ma tô duré i'ra hã tãma podo, si'ihi pese nherẽ, duré imro hã Sara hã préduptéb ré, 'ra waihu'u õ nherẽ. 'Re ihâimana u'âsi mono te te tãma iropisutuzém na te te ãma sazei pese wa, ma tô i'ra hã tãma podo tô.

Hebreu 6:10

'Re ihâimana u'âsi mono hã taré te te dama 're aropisutu mono õ di. I'uwaibaba si te uburé marĩ hã te te dama 're ab'manharĩ, te te dawi ãma 're a'upai mono ãna. Tahawa, tãma 're iromhuri za'ra wa'aba mono zém na hã ãma 're po're si'âri waihu'u mono õ di za. Isib'a'uwẽ norĩ hã tãma 're ipawaptob za'ra wa'aba mono zém na hã, duré tãma 're isawi pese za'ra wa'aba mono zém na hã, ãma po're si'âri waihu'u õ di za. Te za tô ãma 're sipo're pu'u u'âsi, ta norĩ ãma hã.

1 Zuwã 1:7

Tane nherẽ, 'Re ihâimana u'âsi mono nhimiroti zarina 're wahâimana za'ra mono wamhã, rowa'a na 're ihâimana mono ne, wa za duré wa norĩ hã rowa'a na 're wahâimana za'ra. Taha zarina, wa za duré 'râwi wasiré ãma 're wahâimana za'ra, wasisawi pese za'ra sina. 'Re ihâimana u'âsi mono 'ra hã te za duré wawasédé hã te te wama 're apari tidâ'âzém na Zezusi hã, wawasété ãna oto ãma 're wanomro mono da.

Apocalipsi 15:3

Te duré tizadawa'a'a, Mozésihi nho'rezém na, 'Re ihâimana u'âsi mono ma romhuri'wa nho'rezém na, Ezitu hawi isib'a'uwẽ norĩ, 'Re ihâimana u'âsi mono te te dawi isõ'reptu za'ra zém na. Te duré tizadawa'a'a, Pone'ẽrebâ te te 're ida'anho'reptui mono zém na. Ãne te ãma tizadawa'a'a: “Uburé Danhib'apito uptabi, 'Re ihâimana u'âsi mono, aiwaihu'u pese uptabi di. 'Re i'ab'manharĩ mono zé hã wẽ uptabi di. A hã daro mono bâ uburé pese Danhib'apito. Tô sena uptabi na si te dama 're i'aroti wẽ uptabi mo. Upai ãna, te duré 're ida'ab'madâ'â wẽ mo.