1 Zuwã 1:8 - ꞌRe Ihâimana Uꞌâsi Mono Zadawa Wasuꞌu

⁸ Ãté wa za taré 'râwi wasi'ãma wa te 're rosa'rata za'ra, ãne: “Wa norĩ hã wawasété ãna, wa 're wahâimana za'ra.” Ãne wasi'ãma wa te 're rosa'rata za'ra mono wamhã, wa za 'râwi wasima 're wazadawa nhipese za'ra, wawasété õ na wasina 're iwawata za'ra mono na. 'Re ihâimana u'âsi mono nhimiroti hã tô sena uptabi hã wapẽ'ẽ 're, wama 're hâimana za'ra mono õ di, ãne wamhã.

1 Zuwã 1:8 ပူးပေါင်းရင်းမြစ်များ

Provébiu 20:9

E 'wa ãne hã te te nharĩ waihu'u pese di: “Wa tô ĩsipese, ĩpẽ'ẽ 'remhã; tahawa ĩwasété ãna wa oto 're ĩhâimana.”

Zuwã 8:44

Aimama za'ra wa'wa hã, Wa'uburé. A norĩ wa'wa hã i'ra te 're anomro aba mo. Te te sima 're iwẽ mono zém na si, te asima 're iwẽ za'ra wa'aba mo, tãma ãma 're uwaimrami za'ra wa'aba mono da. Ta hã dapoto na'rata hawi dapãrĩ'wa te 're mo. Sadawa nhipese u'âsi wa, tô sena te te dama 're rowasu'u mono õ di. Tizadawa nhipese na ma tô sãna'rata. Simirosa'rata wasété u'âsi wa, sadawa nhipese u'âsi di. Tahawa, i'ra 're anomro aba mono wa, ĩnhimirowasu'u hã tô sena nherẽ, ãma 're ĩzaze za'ra wa'aba mono õ di.

Roma 3:10

Duréihã ma tô ãne na ni'wam norĩ hã ãma rob'ui'éré za'ra: “Ni'wam norĩ hã si'uihâ na 're inomro wẽ mono zém na, 'Re ihâimana u'âsi mono te te 're iwẽsãmri za'ra mono zéb da hã, robaba di. Uburé te 're danomro wasété, 're idahâimana za'ra mono hã.

Roma 3:23

Uburé te dawasété na a'uwẽ mono bâ 're danomro. Tahawa, te 'Re ihâimana u'âsi mono 're imorĩ wẽ uptabi zém nhiti 're dahâimana za'ra, 'râwi da te dasina 're tété waihu'u za'ra mono ãna.

1 Corĩtu 3:18

A norĩ wa'wa hã aihâimanazé senai'õ na, taré 'râwi asima 're asadawa nhipese za'ra wa'aba mono õ di za. Ni'wam norĩ hã asiré 're aihâimana za'ra wa'aba mono nherẽ, te rosa'rada hã te te si'ãma 're upa za'ra, waihu'u pese newa, ti'ai ãma isazei'õ'wa norĩ nhimirowaihu'u pese si te te 're waihu'u za'ra mono nherẽ, te te sima 're i'ruiwapari za'ra mono hã. 'Re ihâimana u'âsi mono nhimiroti iwẽ uptabi hã ta norĩ te te 're waihu'u za'ra mono õ nherẽ, te 'râwi waihu'u pese newa, te te si'ãma 're rosa'rata upa za'ra, asiré 're i'aihâimana za'ra wa'aba mono norĩ hã. Tahawa, 'Re ihâimana u'âsi mono nhimiroti iwẽ uptabi zô si, te za asima 're asõpré u'âsi aba mo, asimiza'rese sina 're aihâimana za'ra wa'aba mono da. Isazei'õ'wa norĩ hã asimiza'rese ãna 're aihâimana za'ra wa'aba mono newa, te za te te ai'ãma 're rosa'rata upa za'ra wa'wa. Tane nherẽ, te za tô 're aihâimana wẽ za'ra wa'aba mo, asimiza'rese sina.

Galata 6:3

Ãté ni'wa hã simiroti pire newa, te za 'râwi tinhimiroti pire na 're si'madâ'â ze. Ãne wamhã, 'râwi te za tipẽ'ẽ na sima 're sadawa nhipese.

2 Timotiu 3:13

Iwasété norĩ hã, duré ihâimana nhipese norĩ hã te za 're siwasété pese za'ra. Isadawa nhipese na te za da te ãma 're sasõmri za'ra. Te za duré dapẽ'ẽ 're dasima 're dazadawa nhipese za'ra.

Tiagu 1:22

Taré isimiroti hã aipo're na 're wapari za'ra wa'aba mono õ di za, imreme wapari pese 'wa na, taré 'râwi asima 're asadawa nhipese za'ra wa'aba mono tõ da. Tô sena te za isimiroti hã 're i'madâ'â za'ra wa'aba mo.

Tiagu 1:26

Ãté ni'wam norĩ hã te za taré te te sina 're rosa'rata za'ra, 'Re ihâimana u'âsi mono nhimiroti 'madâ'â'wa na, tô sena ãma 're nomro mono newa, ta norĩ hã. Tane nherẽ, ãté 'râwi siwi 're simi'rãmi waihu'u za'ra mono õ di za, 're mreme wasété tõ za'ra mono da hã. Ãne wamhã, tô sena 'Re ihâimana u'âsi mono nhimiroti 'madâ'â'wa na 're hâimana za'ra mono õ di za. Taré te za tinhimirosa'rata na 'râwi sima 're sadawa nhipese za'ra.

Tiagu 3:2

Uburé wa norĩ hã wa wahâimanazém na wa te 're upa za'ra. Ni'wa hã timreme na te te 're upai mono õ 'wa'âhã, aré 're hâimana wẽ mono di. Duré tiwasédé hã te te 're 'manharĩ tõ mono da hã, te aré 'râwi siwi 're simi'rãmi, tãma waihu'u pese wa.

1 Zuwã 1:10

Duréihã 'Re ihâimana u'âsi mono hã ma tô da'ãma waihu'u siro, uburé 're idahâimana wasété za'ra mono zém na hã. Tahawa, wa norĩ hã wawasété ãna 're iwahâimana za'ra mono na dama 're wasiwasu'u za'ra mono wamhã, 'Re ihâimana u'âsi mono ãma, wa isadawa nhipe hã wa te ãma 're sa'ra za'ra. Tawamhã 'Re ihâimana u'âsi mono nhimiroti hã wapẽ'ẽ 'remhã, wama 're hâimana za'ra mono õ di za.

1 Zuwã 1:6

Ãté wa za wawasété na 're wahâimana za'ra. Tawamhã wawasété na 're wahâimana za'ra mono wamhã, robra u'âsi wa za 're wahâimana za'ra, wapẽ'ẽ 'remhã. Tawamhã robra u'âsi 're wahâimana za'ra mono nherẽ, oto 'Re ihâimana u'âsi mono siré, 'râwi 're iwahâimana za'ra mono na dama 're wasiwasu'u za'ra mono wamhã, wazadawa nhipese na wa za tô 're wahâimana za'ra, wapẽ'ẽ 're, robra u'âsi 're wahâimana za'ra mono nherẽ. Ãne wamhã, tô senai õ di, 're iwahâimana za'ra mono zé hã.

1 Zuwã 2:4

Ãté ni'wa te za ãne dama 're siwasu'u: “Wa hã, 'Re ihâimana u'âsi mono hâimanazé hã ĩma waihu'u pese di.” Ta hã isimiroti hã te te 're 'madâ'â pese mono õ nherẽ, te za taré dama 're siwasu'u, sadawa nhipese sina. Duré taha ma, 'Re ihâimana u'âsi mono nhimiroti hã tô sena uptabi hã ipẽ'ẽ 're, tãma 're hâimana mono õ di.

1 Zuwã 4:20

Ãté ni'wam norĩ hã te za taré ãne dama 're siwasu'u za'ra: “'Re ihâimana u'âsi mono hã wa wa te 're sawi pese za'ra.” Ãne dama 're siwasu'u za'ra mono nherẽ, te te oto 're da'ruiwapari u'âsi za'ra mono wamhã, sadawa nhipese na te ta norĩ hã 're hâimana za'ra. Titõmo na 'râwi te te 're i'madâ'â za'ra mono norĩ hã te te 're sawi pese za'ra mono õ nherẽ, e niha te za tawamhã 'Re ihâimana u'âsi mono hã dahâiba u'âbâ hã te te siwi 're sawi pese, titõmo na te te siwi 're 'madâ'â mono õ nherẽ. Ãne wamhã, tãma sawi waihu'u za'ra õ di, ta norĩ ma hã.

2 Zuwã 1:2

Iwasu'uwẽ hã tô sena uptabi hã wasiré wa te 're 'madâ'â pese za'ra mono wa, wa wa te 're asawi pese za'ra wa'wa. Õne u'âsi te za iwasu'uwẽ hã wasiré 're hâimana u'âsi.

3 Zuwã 1:3

'Re aihâimana mono zém hawi, ma tô wasisãnawã norĩ hã we ĩtẽme 're sihutu. We 're sihutu mono sidâpâsi, ma tô siparabâsi te te ĩma 're aiwasu'u wẽ za'ra, 'Re ihâimana u'âsi mono nhimiroti zarina si 're i'aihâimana wẽ mono na hã. Tahawa, aiwasu'u ma hã ĩtoi uptabi di. Õhõ na si te tô 're aihâimana u'âsi mo, rẽme waihu'u ãna.