1 Timotiu 6:9 - ꞌRe Ihâimana Uꞌâsi Mono Zadawa Wasuꞌu

⁹ Rob'uiprazéb zô, da te dasima 're rosa'rata siwamnarĩ u'âsi za'ra mono wamhã, ãté te za da te 're wapari za'ra, rob'uiprazém na wa'uburé te te dama 're i'aroti wasété mono zé hã. Ãne wamhã, ãté isimiroti hã da te 're rẽme waihu'u za'ra mono õ di za tô oto. Ãté rosa'rata ãna te za isimiroti zarina, marĩ zô si oto da te 're rob'ruiwapari za'ra, marĩ wasété zô zama. Ãne wamhã, te za oto dawi 're robzei'õ pese za'ra. Rowẽ u'âsi 're idanomro mono zé hã duré oto dama 're hâimana za'ra mono õ di za.

1 Timotiu 6:9 ပူးပေါင်းရင်းမြစ်များ

Provébiu 15:27

Ni'wa senai õ na 're ihâimana mono zéb zarina, marĩ zô si sima 're rĩtĩ mono wamhã, te za ropire hã isõrõwa 're, 're ihâimana za'ra mono norĩ ma hã te te 're azani. Tane nherẽ, ni'wa dama rowairébézéb da, dama ipire norĩ ma, pi'uriwi danhibzari te te siwi 're awẽ'õ mono wapsi, te za tô rowẽ na hã 're hâimana hâ.

Provébiu 20:21

Waptu na 're idasisimarĩ pese za'ra mono hã niwamhã te te ãma dama 're irowẽ zani za'ra mono da hã mare di.

Provébiu 21:6

Senai õ na dahâimanazéb zarina, marĩ da te dasima 're iwaibui mono hã awa'awi dawi 're isi'utõrĩ za'ra mono, dadâ'â da, 're idasisitob za'ra mono zém ne hã te dama 're hâimana, abaze mramizém ne.

Provébiu 22:16

Ni'wa, isimarĩ'õ norĩ te te 're iwati pese za'ra mono zarina, 're sisimarĩ pese mono wamhã, niha wamhã, isibro pese norĩ ma, taré ro te te tãma 're sõmri za'ra mono wamhã, te za 're sisimarĩ õ pese za'ra.

Provébiu 23:4

Asisibro pese da, 're asipãrĩ mono tõ, romhuri na hã. Asimiza'rese wẽ zarina te za ãma 're irosahâri mo.

Mateu 13:22

Duré ni'wam norĩ hã amnho wab'ru wazari irere'e mono ne, te aiwa 're hâimana za'ra. Wab'ru hã ro'wanhipré siré i'wanhipré mono, te te oto ubu mono wa, i'rã za'ra õ ne, 'Re ihâimana u'âsi mono zadawa wasu'u hã tipo're na te te 're wapari za'ra mono nherẽ, iwẽ hã te te 're i'manharĩ za'ra mono da, mare di za, ta norĩ hã. Tihâimanazém na si te za sina 're hâtâ'â u'âsi za'ra. Duré danhibro pe hã wẽ uptabi newa te za taha zô si sima te te 're rob'ruiwapari u'âsi za'ra. Tahawa, amnho 'wanhipré hã i'rã za'ra õ ne, 're nomro wẽ mono õ di za, ta norĩ hã.

Mateu 19:22

Tawamhã ãne hã aibâ iprédupté te te wapari wamhã, ma tô robzei ãna hã mo, tinhibro pese si te te sima sawi wa.

Mateu 26:15

Tawamhã ãne te sadanharĩ za'ra: — Zezusi hã ma tô asima iwẽ za'ra wa'wa, asiwi âri aba da. E ãne hã aima wẽ za'ra wa'aba di za, te aima ihâiba nhomri za'ra wa'aba da hã. Aima wẽ za'ra wa'aba wamhã, e niha te za ĩma iwa'âbâ za'ra wa'wa. Tawamhã ãne na ãma sisaze za'ra wamhã, ma tô rob'uiprazé isapotore hã tãma sa'rata za'ra, 30 na ẽtẽ waipo prã prata 'manharĩ hã. Taha pari, ma tô tãma sõmri za'ra, Zudaha ma.

Mateu 6:19

— Marĩ iwa'âbâ za'ẽne hã asima si 're ubumroi pese za'ra wa'aba mono õ di za, ti'a 're anomro aba mono ré. Ti'ai ãma marĩ na 're idanhimarĩ za'ra mono hã si'utõrĩ pese di, dawi 're u're su'u za'ra mono wa, duré zazahâi hâzapu'u'wa hã te te dawi 're hâiwasété za'ra mono wa. Isipsaihuri norĩ hã te za duré dawi sô 're sisisi, dawi ãma 're simisaihuri za'ra mono da, danhimarĩ na.

Marcu 4:19

Ãté marĩ na si te za duré te te 're rosa'rata za'ra. Ãté danhibro pese na si, te za te te sima 're rosa'rata za'ra, iwẽ uptabi newa. Ãté marĩ hã te za te te sima 're wẽ uptabi za'ra. Tawamhã rob're i'rãi õ ne, tãma 're hâimana wẽ za'ra mono õ di za, duré ta norĩ hã.

Luca 12:21

— Tane, danhimarĩ hã dasima si, da te 're ubumroi pese za'ra mono wamhã, 'Re ihâimana u'âsi mono ma, 're danhoprub za'ra mono ãna, te za taré da te dasima 're ubumroi pese za'ra, danhimarĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:20

Tawamhã Pedru te asa tãma tinha, ãne: — E niha ma tô irosa'rata wasé, rob'uiprazém na asima uipra da, 'Re ihâimana u'âsi mono hã tiwaihu'u pe te te wama isõmri hã. Mo oto aimorĩ ropipa u, ate rob'uiprazéb ré.

Éfézu 4:22

'Re anomro wasété aba mono da si, te aré asima 're irosa'rata za'ra wa'aba mo. Tahawa, te aré aiwi 're si'utõrĩ za'ra wa'wa, 're anomro wẽ wa'aba mono zé hã. Tane nherẽ, te za oto irẽme pese za'ra wa'wa, 're aihâimana wasété za'ra wa'aba mono zé hã.

1 Timotiu 1:9

E 're inomro wẽ mono norĩ ma, rotizéb da, te 're hâimana, Wamama nhimiroti hã. Mare di. Roti wẽ wẽ'õ'wa norĩ ma, rotizéb da, te 're hâimana. Duré rob'manharĩ wasété'wa norĩ ma zama, rotizéb da, te 're hâimana. Duré 'Re ihâimana u'âsi mono nhimiroti wẽ'õ'wa norĩ ma zama, rotizéb da, te 're hâimana. Duré iwasété norĩ ma zama, rotizéb da, te 're hâimana. Duré 'râwi pesere dasisô 're ida'a're nhi'oto za'ra mono norĩ ma zama, rotizéb da, te 're hâimana. Duré uburé romhuri Wamama te hã, te te ãma 're iwasété za'ra mono norĩ ma zama, rotizéb da, te 're hâimana. Duré timama te te 're isimroi mono norĩ ma zama, rotizéb da, te 're hâimana. Duré tina te te 're isimroi mono norĩ ma zama, rotizéb da, te 're hâimana. Duré dapãrĩ'wa norĩ ma zama, rotizéb da, te 're hâimana. Duré dahâiba na da'ãma 're isipsaihuri za'ra mono norĩ ma zama, rotizéb da, te 're hâimana. Duré aibâ si'uiwa dasina 're idanhipsaihuri za'ra mono norĩ ma zama, rotizéb da, te 're hâimana. Duré iwada'uri zarina si pawa'âbâ ãna dama romhuri'wa da, a'uwẽ hã da te dasiwi 're isimi'uri za'ra mono norĩ ma zama, rotizéb da, te 're hâimana. Duré 're isadawa nhipese za'ra mono norĩ ma zama, rotizéb da, te 're hâimana. Duré timreme hã tô sena na dama 're siwasu'u za'ra mono nherẽ, taré te te sina 're iroti za'ra mono norĩ ma zama, rotizéb da, te 're hâimana. Duré roti tô senai'õ na siwa'ru, ãma 're idanomro wasété mono norĩ ma zama, rotizéb da, te 're hâimana, 'Re ihâimana u'âsi mono nhimiroti hã.

1 Timotiu 3:7

Isazei'wa norĩ 'madâ'â'wai mono bâ te za dama 're hâimana wẽ za'ra. Ãne wamhã, dama 're ihâimana wẽ mono zém na te za isazei'õ'wa norĩ zama te te dama 're wasu'u wẽ za'ra. Dama 're hâimana wẽ za'ra mono õ wamhã, te za damreme hã te te sina 're 'rã'õtõ za'ra. Ãne wamhã, wa'uburé norĩ nhib'apito te te da'ãma sima iroti wasété zé hã te za te te sina 're 'mai'uwaimrami tãma, da'madâ'â'wa norĩ hã.

1 Timotiu 6:10

E marĩ wa. Rob'uiprazém na si, da te dasima 're rosa'rata za'ra mono wamhã, siwa'ru te za marĩ hã iwasédé hã da te 're 'manharĩ za'ra. Ni'wam norĩ hã roti wẽ hã aré te te 're isaze za'ra mono zém hawi, ma tô 're sipa za'ra, rob'uiprazéb zô si te te sima 're rob'ruiwapari za'ra mono wa. Ta norĩ hã te oto robzei'õ si hã te te 're sépata za'ra.

1 Timotiu 6:17

Ãne te za duré isibrob ahâ norĩ ma 're i'aroti mo, sibrob ahâ wẽ te, 'râwi sina 're wata tõ za'ra mono da. Danhibro hã dama 're hâimana u'âsi za'ra mono õ di za, dama ãma 're irowẽ za'ra mono zéb da hã. Tahawa, tinhibrop si te te 're 'madâ'â za'ra mono õ di za. 'Re ihâimana u'âsi mono zô si, te za 're simnhasi za'ra, taha si, marĩ wẽ na uburé wama 're sõpru mono wa, wama ãma 're irobze za'ra mono zéb da hã.

Titu 2:12

Ta hã te te 're wa'azawi pese mono wa, ma tô wama waihu'u, wa te 're rẽme pese za'ra mono da, isazei'õ'wa norĩ hâimanazé hã, dawẽ te, wawasété zô wa te 're rowasutu tõ za'ra mono da, ti'ab ré wasina 're wanhiptete za'ra mono da, 'Re ihâimana u'âsi mono ãma si oto 're wanomro wẽ mono da.

Zozué 7:11

Izaraéu nhihudu norĩ hã ma tô tiwasété za'ra. Te te sima 're tété za'ra mono da, ĩnhimiroti te i'manharĩzé hã ma tô siwi tirẽ. Te te siwi prub da, te tãma i'ru za'ra 'remhã ma tô marĩ hã tãma tihâimana za'ra. Ã hã ma tô ta norĩ hã simi'uri za'ra. Ma tô sadawa hapese za'ra. Tinhimarĩ wazari ma tô sa'ra za'ra.

2 Pedru 2:3

Tô senai'õ na rowasu'u'wa norĩ hã te za taré rob'uiprazéb zô, tinhimirosa'rata na si, marĩ na te te aima 're rowasu'u za'ra wa'wa. Tane nherẽ, ta norĩ hã iwasété na 'Re ihâimana u'âsi mono ma, waihu'u pese di. Tahawa, isimihâzé wi, 're sisõ'reptu waihu'u za'ra mono õ di za.

Zuda 1:11

Ta norĩ ma, tãma ropipa uptabi za'ra di za, duréihã Caĩ, 're ihâimana wasété mono zém ne, 're hâimana za'ra mono wa. Duré Balaã hã rob'uiprazéb zô 're imorĩ wasété ne, te te 're rob'ruiwapari za'ra mono wa, tãma 're ropipa uptabi za'ra mono di za. Duréihã Cora hã ma tô ti'madâ'â'wa hã wẽ'õ, 'Re ihâimana u'âsi mono nhimipisutu nherẽ. Tane te duré aibâ iwasété norĩ hã isazei'wa norĩ 'madâ'â'wa norĩ nhimiroti hã te te 're wẽ'õ pese za'ra, 'Re ihâimana u'âsi mono nhimipisutu nherẽ. Tahawa, Cora isi'utõrĩ ne te za duré ai'utõ za, aibâ iwasété norĩ hã.