1 Timotiu 6:18 - ꞌRe Ihâimana Uꞌâsi Mono Zadawa Wasuꞌu

¹⁸ Ãne te za duré isibrob ahâ norĩ ma 're i'aroti mo, te te dama 're 'manharĩ wẽ u'âsi za'ra mono da. Te za duré uburé marĩ wẽ na dama 're sõprub za'ra. Te za duré simi'ẽ na marĩ na te te 're dazari u'âsi za'ra.

1 Timotiu 6:18 ပူးပေါင်းရင်းမြစ်များ

Salmu 112:9

Isimarĩ'õ norĩ ma, te za duré sõprum na tinhimarĩ hã te te 're anhomri. Õne u'â te za duré isimizawizé hã da'ãma 're hâimana. Ta hã dama pire di, duré dama iwazéb za'ẽne.

Mateu 5:42

Duré marĩ hã da te aiwi 're waptẽrẽ za'ra wa'aba mono wamhã, te za dama 're isõmri za'ra wa'aba mo. Duré marĩ hã asibro hã taré a'â da te aiwi 're waptẽrẽ za'ra wa'aba mono wamhã, dawi 're sawi za'ra wa'aba mono õ di za, asimarĩ 'wa hã. Te za tô taré dama 're isõmri za'ra wa'aba mo, a'â.

Luca 12:21

— Tane, danhimarĩ hã dasima si, da te 're ubumroi pese za'ra mono wamhã, 'Re ihâimana u'âsi mono ma, 're danhoprub za'ra mono ãna, te za taré da te dasima 're ubumroi pese za'ra, danhimarĩ hã.

Luca 3:11

Tawamhã asa te tãma nharĩ za'ra, ãne: — Te za 're asipawaptob za'ra wa'aba mo. Ni'wa hã, ti'uza isõ'utu'u hã maparane wamhã, te za tihâiba amoi ma misi tisõ, uza õ wa. Duré ni'wa hã, tisa hã te za tihâiba amoi ma tisõ, sai õ wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:38

'Re ihâimana u'âsi mono hã ma tô Tipẽ'ẽzani hã tãma tisõ, Zezusihi ma, Nazaré ãma aré 're isãmra mono ma. Tiwaihu'u pese zama ma tô tãma tisõ. Tahawa, wasiré Izaraéu nhihudu norĩ nhipti'ai wa'wai baba, ma tô 're mo, marĩ iwẽ hã te te dama 're ab'manharĩ mono da, dama i'manharĩ waihu'u'õ hã. Duré, Wa'uburé nhimiwada'uri nhiptete zarina 're ihâimana siwamnarĩ za'ra mono norĩ hã ma tô te te 're apese. Ãne ma tô iwẽ hã te te dama 're ab'manharĩ, Imama hã isiré 're morĩ u'âsi wa, 'Re ihâimana u'âsi mono hã. Ãne Zezu Cristu 're ihâimana mono zém na ma tô iwaihu'u za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:29

Tahawa, Zezusihi zazei'wa norĩ hã ma tô sima roti za'ra, isibro hã ihâiba mono bâ tãma 're ihâimana za'ra mono zéb zarina, te te po'o mono da, Zudéa ãma isazei'wa norĩ ma, te te tãma sõmri za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:36

Tawamhã pi'õ hã Zezusihi nhirã zarina 're imorĩ hã te 're hâimana, Zopi na 'ri nho'õmo nhisi ãma. Tabita na pi'õ nhisi hã. Gregu norĩ nhiminhisizém na Docasi na isisi amo hã. Isibrob'õ norĩ ãma te 're siwãrĩ u'âsi, Docasi hã. Marĩ iwẽ si te te dama 're ab'manharĩ u'âsi.

Roma 12:13

Asiré isazei'wa norĩ wi, marĩ zô tiwi 're irowaptâ'â za'ra mono zéb zarina, te za asimarĩ na 're ipawaptob za'ra wa'aba mo. Duré darob amoi hawi atẽme wa'aba 're dasihutu mono wamhã, te za sô 're atob'uzu za'ra wa'aba mo, asiré isazei'wa norĩ zô hã, asõrõwa u 're 'mazasi za'ra wa'aba mono da.

Roma 12:8

Duré ni'wam norĩ hã 'Re ihâimana u'âsi mono hã te te sima 're apisutu mono wamhã, te za isazei'wa norĩ ma, isimiroti zarina si te te 're rowahutu za'ra, te te 're wapari za'ra mono wa, pẽ'ẽ toi u'âsi, ãma 're hâimana za'ra mono da, siptete sina. Duré ni'wam norĩ hã tinhibrom na dama 're sõprub za'ra mono da, te te sima 're apisutu mono wamhã, te za tô ta norĩ hã dawi 're sõti za'ra mono ãna, dama ãma 're sõprub za'ra, sa'ẽtẽ na. Duré ni'wam norĩ hã isazei'wa norĩ 'madâ'â'wa da, te te 're apisutu mono wamhã, te za tô simi'ẽ na te te 're 'madâ'â u'âsi za'ra, ta norĩ zama. Duré ni'wam norĩ hã te te sima 're apisutu mono wamhã, ta norĩ zama te za da'ãma 're pẽ'ẽzé za'ra, dahâzé ré norĩ ãma, duré dawi 're irobzei'õ za'ra mono norĩ ãma. To sina, te za ãne zarina te te 're dapawaptob za'ra, ta norĩ hã. Ãne wa za wa te wasima 're rob'ma'wamarĩ, romhuri mono bâ, dahâiba hã misi nherẽ, dahâiba na marĩ hã ahâ na dama 're ihâimana za'ra mono hã tite mono bâ te te sima 're iromhuri za'ra mono ne.

1 Corĩtu 16:2

Dumigu sidâpâsi 're sãmra aba mono da, te za rob'uiprazé hã 're ipo'o u'âsi za'ra wa'aba mo, aihâiba mono bâ wa'aba. Aipawa'â hã suru na 're waibui wa'aba mono wamhã, suru na te za 're ipo'o za'ra wa'aba mo. Duré sa'ẽtẽ na 're waibui wa'aba mono wamhã, sa'ẽtẽ na te za duré 're ipo'o za'ra wa'aba mo. Atẽme ĩwisi aba wapsi, asiwi 'rã'õtõ aba da, asima rosa'rata za'ra wa'aba õ di za. Ĩwana ré, te za asiwi 're i'rã'õtõ u'âsi aba mo dumigu sidâpâsi, ĩzô nomro siromo da.

2 Corĩtu 8:12

Ato sina, ãma asõprub za'ra wa'aba wamhã, 'Re ihâimana u'âsi mono si te za asõprubzém na aiwẽsãmri za'ra wa'wa. Asimarĩ aba õ wa, tô suru na isõmri za'ra wa'aba zéb zarina, te za duré ãma aiwẽsãmri za'ra wa'wa, ato sina ãma asõprub za'ra wa'aba wa.

2 Corĩtu 8:9

Wanhib'apito Zezu Cristuhu nhimizawi pese zé hã aima waihu'u pese za'ra wa'aba di oto. Ta hã Timama siré robze na 're hâimana u'âsi mono nherẽ, ma tô hâiwa ãma tihâimanazé hã we tirẽ a'â, ti'ai ãma si'a'uwẽ da, te te a'â dame 're robzépata mono da. Asada za'ra wa'aba, ma tô dawazari si'a'uwẽ, taha zarina, a norĩ wa'aba zama 'Re ihâimana u'âsi mono 'rata 're asimroi u'âsi aba mono da, hâiwa ãma hã. Tahawa, Wanhib'apito hã sisawi ãna 're ihâimana mono ne, te za asisawi ãna dama asõprub za'ra wa'wa, ate rob'uiprazé wa'aba na hã.

Galata 6:10

Ãne wa, wama iwaihu'u pese zarina, wa za dahâiba mono bâ marĩ iwẽ na, wa te 're dapawaptob za'ra. Wa te 're idapawaptob za'ra mono zém nhipai u, wa za wasiré isazei'wa norĩ hã marĩ iwẽ na 're wasipawapto pese za'ra.

Éfézu 4:28

Danhibrom na dawi 're i'asimisaihuri za'ra wa'aba mono zém na hã, duré oto 're asimisaihuri za'ra wa'aba mono na hã ãma 're sahu za'ra wa'aba mono õ di za. Te za oto asib'rata na 're iromhuri za'ra wa'aba mo, aihâimana wẽ na oto 're aihâimana za'ra wa'aba mono da, duré asimiromhuri na isibrob'õ norĩ hã 're pawaptob za'ra wa'aba mono da, ãne na si hã wẽ wa.

Titu 2:14

Ta hã ma tô wazada sisõmri za'ra, wazada dâ'â za'ra da, 're iwanomro wasété mono hawi, te te 're wa'anho'reptui mono da, isib'a'uwẽ si 're wahâimana za'ra mono da oto. E marĩ da. Sena na 're wanomro mono da, duré wawa'a ãna iwẽ na si wa te oto 're dapawaptob za'ra mono da.

Titu 3:8

Te aima irowasu'uzé hã tô sena. Tahawa, te za isazei'wa norĩ ma 're i'aroti mo, marĩ wẽ na te te 're dapawaptob u'âsi za'ra mono da. Te aima 're irowasu'u mono zé hã wẽ uptabi di, dama 're irowẽ za'ra mono zéb da hã.

Hebreu 13:16

Marĩ iwẽ hã 're 'manharĩ za'ra wa'aba mono da dama, duré 're idapawaptob za'ra wa'aba mono zém na hã, ãma 're aipo're simrami za'ra wa'aba mono õ di za. Taha na zama te duré tãma 're asõprub za'ra wa'aba mo, taha na aima 're toi u'âsi za'ra wa'aba mono wa, 'Re ihâimana u'âsi mono hã.

Tiagu 2:5

Ĩsisãnawã norĩ, ĩma i'asawi pese za'ra wa'aba norĩ, ma'ãpé ĩwapari pese za'ra wa'aba. Ti'ai ãma, simarĩ ãna 're ihâimana za'ra mono norĩ, ma tô 'Re ihâimana u'âsi mono hã pisutu za'ra, te te sina 're i'umnhasi za'ẽtẽ za'ra mono na si, 're hâimana za'ra mono da, duré da'ãma 're isib'a'uwẽ mono zéb 're rowẽ uptabi na i'rata 're hâimana u'âsi za'ra mono da, isawi'wa norĩ ma, te te tãma iropisutu za'ra zéb zarina.

1 Pedru 3:11

Aiwasété wi 're aipizari za'ra wa'aba mono, iwẽ si dama 're 'manharĩ za'ra wa'aba mono da oto. Duré rowẽ na si asiré 're aihâimana za'ra wa'aba mono da si, te za asina 're irosa'rata pese za'ra wa'aba mo.

1 Zuwã 3:17

Ni'wam norĩ hã marĩ, tãma 're hâimana za'ra mono nherẽ, marĩ zô dawi 're iro'wanhi'riti za'ra mono na te te 're dawaihu'u za'ra mono nherẽ, da'ãma 're pẽ'ẽzé za'ra mono õ wamhã, e ta norĩ hã 'Re ihâimana u'âsi mono nhimizawi pese zéb ré te 're hâimana za'ra. Mare di. 'Re ihâimana u'âsi mono nhimizawi pese zé hã te te 're waihu'u za'ra mono õ di, ta norĩ hã.

3 Zuwã 1:11

Ĩsiwadi, ĩma asawi pe hã, dapo're ãna dawasédé da te 're i'manharĩ za'ra mono ne, 're aihâimana mono õ di za, õ aibâ hã 're imorĩ wasété ne. Marĩ iwẽ zô si te za asima 're irob'madâ'â u'âsi mo, 're idahâimana wẽ za'ra mono norĩ ne. Ni'wam norĩ hã marĩ iwẽ si te te sima 're 'madâ'â za'ra mono wamhã, ta norĩ si te 'Re ihâimana u'âsi mono nhib'a'uwẽ 're hâimana za'ra. Duré ni'wam norĩ hã tihâimana wasété si te te sima 're wẽ uptabi za'ra mono wamhã, ta norĩ hã 'Re ihâimana u'âsi mono hâimanazé hã 'râwi te te 're waihu'u za'ra mono õ di.