1 Timotiu 6:16 - ꞌRe Ihâimana Uꞌâsi Mono Zadawa Wasuꞌu

¹⁶ Õhõ si siwaprosi 're imorĩ u'â hã. Ta hã, rowa'a za'ẽtẽ na te 're hâimana u'âsi. Tahawa, ni'wa itẽme isébré da hã, mare di. Da te dasiwi ihâiba pibu da hã, mare di duré. Ta hã wẽ uptabi di. Waihu'u pese uptabi di duré. Tahawa, wa za ãma 're wawata u'âsi za'ra.

1 Timotiu 6:16 ပူးပေါင်းရင်းမြစ်များ

Salmu 104:2

Te duré rowa'a na 're asi'ubu mo. A hã ma tô duré hâiwa, romhâ 'manharĩ na 'ri, da te 're i'wani za'ra mono ne, i'wani misi haré.

Ezodu 3:14

Tahawa, 'Re ihâimana u'âsi mono te ãne sina tãma tinha: — WA HÃ, tô WA HÃ 'RE ĨHÂIMANA U'ÂSI MONO. Te duré zahadu tãma tinha ãne: — Te za duré tãma inharĩ za'ra za ãne: “Tô WA HÃ 'RE ĨHÂIMANA U'ÂSI MONO, ma tô we atẽme ĩzatõrĩ za'ra wa'wa.

Ezodu 33:20

Te duré zahadu ãne tãma tinha: — Taré oto tô ĩ'ubu 'madâ'â da hã te aima sa'réi õ di za. E marĩ wa. Ni'wa hã ĩ'ubu te te 'madâ'â wa, za tihâimanazém na hã te te uzusi dai õ wa.

Zuwã 1:18

Ti'ai ãma 're idanomro mono hã datõmo na da te 're 'madâ'â za'ra mono õ di, 'Re ihâimana u'âsi mono hã. Õhõ si, ma tô Timama hã 'madâ, siré 're simasisi u'âsi zahuré mono wa, Timama me. I'ra hã misire, 'Re ihâimana u'âsi mono 'ra hã. Ta hã ma tô te te dama 're wasu'u u'âsi Timama hã, da te 're waihu'u za'ra mono da.

Zuwã 14:9

Tawamhã Zezusi te asa tãma tinha, ãne: — Filipi, e zahadu ĩwaihu'u õ di, ai'rata 're ĩnhamra hâ za'ra wa'aba mono nherẽ. Ni'wam norĩ hã te te 're ĩ'madâ'â za'ra mono wamhã, ĩ'u'âbâ te za Ĩmama hã te te 're 'madâ'â za'ra. E niha te bété a hã ĩma inha, Ĩmama zô ĩhârâ da, 'madâ'â za'ra wa'aba da.

Zuwã 6:46

Ĩmama hã datõmo na da te 're 'madâ'â za'ra mono õ di. Ĩwétési wa tô te 're 'madâ'â, ihawi we ĩmorĩ wa.

Zuwã 8:58

— Tô sena, wa aima ĩsiwasu'u za'ra wa'wa. Abra'ã hã poto õ ré, wa 're ĩhâimana u'âsi. — Ãne Zezusi ma tô tãma siwasu'u za'ra, dama ipire norĩ ma.

Éfézu 3:21

Tahawa, isazei'wai mono bâ Zezu Cristuhu ãma 're iwanomro mono norĩ, Wamama ãma si 're wawata u'âsi za'ra wa'aba mono!

Filipu 4:20

Tahawa, Wanhib'apito 'Re ihâimana u'âsi mono ãma si, 're wawata u'âsi za'ra wa'aba mono, Wamama ãma si. Tane tô.

Colosu 1:15

Cristu hã 'Re ihâimana u'âsi mono ne, te tô 're mo, aiwa wa. Tane nherẽ, 'Re ihâimana u'âsi mono hã datõmo na da te dasiwi 're 'madâ'â waihu'u za'ra mono õ di. I'ra si ma tô da te dasiwi 're 'madâ'â za'ra datõmo na hã, ti'a 're morĩ ré. Ta hã duréihã marĩ õ uptabi ré hã, te tô 're hâimana u'âsi, i'ra hã. Uburé ropoto nhipai u, te ta hã pire uptabi na 're hâimana.

1 Timotiu 1:17

Tahawa, Danhib'apito uptabi ãma si wa za 're wawata u'âsi za'ra. Ta hã Apito u'â te dama 're sãmra, idâ'â'õ hã, ni'wa hã niwa te te i'madâ'â waihu'u õ hã. Õhõ si Danhib'apito uptabi, 'Re ihâimana u'âsi mono hã. Wẽ uptabi wa, wa za ãma 're wawata u'âsi za'ra.

Hebreu 13:8

Zezu Cristu hã tihâimanazém na te te ãma 're saprĩ waihu'u mono õ di. Ahâmhâ na duré ãhã na zama te tô õhõ u'âsi 're hâimana.

Tiagu 1:17

'Re ihâimana u'âsi mono hã hâiwa na rob'uiwẽ'wa 'manharĩ'wa hã, hâiwa hawi ma tô marĩ iwẽ na uburé we dama 're sõpru, iwẽ uptabi na si. Ta hã tihâimanazém na te te saprĩ õ di. Õne u'â, te hâimana wẽ u'âsi 're hâimana.

1 Zuwã 1:5

Zezu Cristu hã ma tô Timama hã te te wama 're sadawa wasu'u za'ra. Taha nhimirowasu'u hã wa te 're iwapari za'ra mono zém na wa oto aima rowasu'u za'ra wa'aba ni. E niha Timama hã te te wama 're isadawa wasu'u za'ra mono zé hã. Ãne na wa tô wa te 're wapari za'ra: Rowa'a wamhã oto, robra õ di. Tane, 'Re ihâimana u'âsi mono hã wẽ uptabi wa, marĩ iwasédé hã ãma 're hâimana mono õ di. Ãne Timama hã te te wama 're isadawa wasu'u za'ra mono zé hã.

1 Zuwã 1:7

Tane nherẽ, 'Re ihâimana u'âsi mono nhimiroti zarina 're wahâimana za'ra mono wamhã, rowa'a na 're ihâimana mono ne, wa za duré wa norĩ hã rowa'a na 're wahâimana za'ra. Taha zarina, wa za duré 'râwi wasiré ãma 're wahâimana za'ra, wasisawi pese za'ra sina. 'Re ihâimana u'âsi mono 'ra hã te za duré wawasédé hã te te wama 're apari tidâ'âzém na Zezusi hã, wawasété ãna oto ãma 're wanomro mono da.

1 Zuwã 4:12

'Re ihâimana u'âsi mono hã ni'wa titõmo na te te 'madâ'â õ di. Tane nherẽ, 're wasisawi pese za'ra mono wamhã, 'Re ihâimana u'âsi mono hã te za wa'rata 're sãmra u'âsi, 'râwi. Te te 're iwa'azawi pese mono zé hã wa za duré wa te wasina ãma tãma 're uwaimrami u'âsi za'ra.

Apocalipsi 1:6

Ma tô duré te te 're wa'apisutu, Imama ma, wa te da'ãma 're romhuri u'âsi za'ra mono da, sasedoti norĩ ne, Isib'apito ma hã. Ma tô duré te te 're wa'apisutu, isadawa para, wapire na 're wahâimana za'ra mono da. Ta hã Zezusi hã wẽ uptabi wa, duré waihu'u pese uptabi wa, wa za tô ãma 're wawata u'âsi za'ra.

Apocalipsi 1:8

'Re ihâimana u'âsi mono, dama isiwaihu'uzé hã, ãne: “Wa hã imorĩ'rata na, wa tô 're ĩhâimana u'âsi. Õne u'â, wa za duré 're ĩhâimana u'âsi. Uburé marĩ hã si'utõrĩ pese nherẽ, duré wa hã isarina za'ra ĩsi'utõrĩ da hã mare di za.”

Apocalipsi 21:3

Tawamhã damreme 'rãihâ hã wa tô duré wapa, danhib'apito simasisizém hawi we te te inharĩ hã. Ãne te we ĩma tinha: — Ma'ãpé, waihu'u. 'Re ihâimana u'âsi mono hã te za oto dasiré 're hâimana u'âsi, 'râwi. Isib'a'uwẽ te za oto 're dahâimana u'âsi za'ra. Te za tô oto duré dasiré 're hâimana u'âsi. Isib'apito za'ra te za oto 're hâimana, 'Re ihâimana u'âsi mono hã.

Apocalipsi 22:5

Tamemhã 're mara waihu'u mono õ di za. 'Re robra waihu'u mono õ na dâ'âsina, rob'uiwẽzém na da te 're rob'uiwẽ za'ra mono õ di za oto. Duré bâdâ hã te te 're rob'uiwẽ mono õ di za oto. Uburé Danhib'apito uptabi, 'Re ihâimana u'âsi mono si te za te te dama 're rowa'a. Tawamhã isib'a'uwẽ norĩ hã te za isadawa para pire na 're hâimana u'âsi za'ra, õne u'âsi.

Apocalipsi 4:11

Ãne te nasi ãma tiwata za'ra: “Wanhib'apito, 'Re ihâimana u'âsi mono, a hã aiwẽ uptabi di. Aiwaihu'u pese di. Aiwaihu'u pese na ma tô i'aropoto mo. Asima iwẽ zarina ma tô uburé pese i'aropoto mo. Asima iwẽ zarina te oto uburé marĩ hã 're hâimana za'ra, asimipoto mono bâ. Tahawa, uburé i'aropoto mono zéb zarina tô ibâre, wa ai'ãma si 're wawata u'âsi za'ra.”

Apocalipsi 7:12

Ãne te ãma tiwata za'ra: — Tô sena, wa ai'ãma si 're wawata u'âsi za'ra. Tô sena, aiwaihu'u pese uptabi di. Duré aiwẽ uptabi di. Duré asõprub uptabi di. Tô sena danhipai u uptabi dama aipire na te 're aihâimana mo. Tô sena, wa ãne ai'ãma wawata za'ra ni.