1 Timotiu 6:1 - ꞌRe Ihâimana Uꞌâsi Mono Zadawa Wasuꞌu

¹ Iwada'uri zarina si, pawa'âbâ ãna dama romhuri'wa norĩ hã te za ti'madâ'â'wa hã isimiroti na te te 're wazéb za'ra. Ãne 're hâimana za'ra mono õ wamhã, ãté te za 'Re ihâimana u'âsi mono nhisi na da te ãma 're wasété za'ra. Ãté wa'ãma zama te za duré da te 're wasété za'ra, isazei'wa norĩ ma, wa te 're roti wasété za'ra mono newa.

1 Timotiu 6:1 ပူးပေါင်းရင်းမြစ်များ

Zenezi 16:9

Tawamhã Uburé Danhib'apito ma, hâiwa ãma romhuri'wa, ma te ãne tãma waihu'u: — Apâ te za asib'apito u aimo. Isapari 're i'aihâimana mono na te za imreme 're iwapari pese mo.

Zenezi 24:12

Tawamhã ma tô mre ãne: — Uburé Danhib'apito, ĩnhib'apito Abra'ãhã te, 'Re ihâimana u'âsi mono, ma'ãpé uburé marĩ iwẽ na ĩma watobro da, ĩma 'manharĩ. Duré ĩnhib'apito ma, iwẽ si tãma 're 'manharĩ u'âsi mono.

Zenezi 24:2

Tawamhã nimahã bâtâ na duréi te te tãma 're iromhuri mono, uburé marĩ te te tãma 're i'a'madâ'â mono zô hã ma tô hâ. Tawamhã te ãne tãma tinha, taha ma: — Ma'ãpé asib'rada ĩzada'õtõ zahâpâ hiri, asimiropisudu ĩma 'manharĩ da.

Zenezi 24:27

Ãne te tinha: — Uburé Danhib'apito, Abra'ã ĩnhib'apito te, 'Re ihâimana u'âsi mono hã, iwẽ uptabi. Tô sena ma tô ĩnhib'apito ma, umnhasi sina ãma 're isiwãrĩ wẽ mono na hã tãma 're hâimana. Taha zarina ma tô isisãnawã norĩ nhorõwa u hã awa'awi u'âsi we ĩzaprõni wẽ.

Neemia 9:5

Tawamhã levita norĩ Zesua, Cadmi'é, Bani, Hasabnéia, Serebia, Hodia, Sebania, duré Petaia, ma tô 'Re ihâimana u'âsi mono ãma dawata za'ra da hã dazô tihârâ za'ra. Tahawa, ma tô ãne dama nharĩ za'ra: “Ma'ãpé hâiwi aipara na aimasa aba, Uburé Danhib'apito, ate 'Re ihâimana u'âsi mono ãma aiwata za'ra wa'aba da, õne u'â 'Re ihâimana u'âsi mono, 're ihâimana mono ãma! Duré isisi wẽ na uburé, ãma 're dawata za'ra mono, ãma 're idawata za'ra mono zém na da te iwab 're sa'ra mono dai õ nherẽ!”

Mateu 11:30

Marĩ iwapure, da te 're 'wasari mono wa, 're idazadâ'â wairébé mono õ ne, te za aipẽ'ẽ wapu na oto 're anomro aba mo, ĩnhimiroti zarina si.

Mateu 11:9

Ma'ãpé, ĩma wasu'u za'ra wa'aba za. E 'Re ihâimana u'âsi mono zadawa wasu'u'wai wa, te itẽme 're anomro aba mo, 're sabu za'ra wa'aba mono da. Tane tô. Õ hã uburé iwana 'Re ihâimana u'âsi mono zadawa 'mahârâ'wa norĩ nhipai u te pire na 're hâimana, Zuwã hã.

Luca 17:1

Tawamhã Zezusi te tãma nharĩ za'ra, tisiré 're inomro mono norĩ ma, ãne: — Ãté ni'wa simiroti zarina, te za ni'wam norĩ hã 're hâimana wasété za'ra. Tawamhã roti wasété'wai ma, 're ropipa za'ra mono di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:22

Tawamhã asa te tãma nharĩ za'ra, ãne: — Da'wapéi'wa norĩ wada'uri'wa hã ma tô wei wazatõrĩ za'ra atẽme, Coneliu na isisi hã. Ta hã aibâ iwẽ, 'Re ihâimana u'âsi mono ãma 're iwata u'âsi mono. Duré zudeu norĩ te te 're i'awẽsãmri mono. Hâiwa ãma 'Re ihâimana u'âsi mono ma romhuri'wa hã ma tô po're pu'u Coneliu hã, asô hârâ da, asimirowasu'u hã te te wapari da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:7

Tawamhã ãne na te te tãma rowasu'u pari, ma tô apâ mo ihawi, hâiwa ãma 'Re ihâimana u'âsi mono ma, romhuri'wa hã. Tahawa, te Coneliu hã sitẽme sô tihârâ zahuré, isõrõwa 're, tãma iromhuri'wa norĩ zô. Tizadawa zapari'wa zô zama te hâ, da'wapéi'wa zô. 'Re ihâimana u'âsi mono zadawa 'madâ'â'wa, da'wapéi'wa hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:10

E marĩ da, ma tô bété asima iwẽ za'ra wa'wa, 'Re ihâimana u'âsi mono hã pibu za'ra wa'aba da, niha te te aima irob'manharĩ za'ra wa'aba õ zéb zô. 'Re ihâimana u'âsi mono nhimiroti 'rata na Mozési te te ãma irob'ui'éré hã wa te tãma ãma 're uwaimrami waihu'u za'ra mono õ di, taha zarina 're iwasisõ'reptu za'ra mono da hã. Wahi'rata norĩ zama te te duré tãma ãma 're uwaimrami waihu'u za'ra mono õ di. Tahawa, e marĩ da, wa za bété wasiré isazei'wa norĩ ma, wa te 're roti za'ra, Mozésihi nhimi'ui'éré zarina 're nomro mono da, zudeu'õ nherẽ. Ni'wa hã marĩ ipire uptabi hã te te danhoihi waptob ãna, te te dama isibu 'rãihâ ne, ma tô a norĩ wa'wa hã ipire uptabi hã tãma ipisutu za'ra wa'wa, zudeu'õ isazei'wa norĩ ma hã. Tane nherẽ, tinhoprubzém na si ma tô Wanhib'apito Zezusi hã te te 're wa'anho'reptu. Õhõ na si te duré ta norĩ zama te te 're anho'reptu, zudeu'õ norĩ hã.

Roma 2:24

Ãne ma tô duréihã ai'ãma rob'ui'éré siromo za'ra wa'wa, 'Re ihâimana u'âsi mono zadawa 'mahârâ 'rata 'wa hã: “A norĩ wa'wa hã zudeu na 're aihâimana za'ra wa'aba mono, 'Re ihâimana u'âsi mono nhimiroti zarina si 're aihâimana za'ra wa'aba mono õ wa, te zudeu'õ norĩ hã 'Re ihâimana u'âsi mono ãma te te 're wasété za'ra.”

1 Corĩtu 10:32

Marĩ hã 're 'manharĩ za'ra wa'aba mono õ di za oto, da te ãma 're ai'madâ'â za'ra wa'aba mono wa, dawasété u 're darere'e mono tõ da. Ãne hã dazada 're 'manharĩ za'ra wa'aba mono õ di za, zudeu norĩ da, duré zudeu'õ norĩ da, duré 'Re ihâimana u'âsi mono nhib'a'uwẽ 're ihâimana za'ra mono norĩ da.

Galata 5:1

Zezu Cristu hã ma tô wa'anho'reptui pa, rowẽ na ãma 're wahâimana za'ra mono da. Tahawa, 'Re ihâimana u'âsi mono nhimiroti 'rata na rob'ui'éré zarina, wa te 're irob'manharĩ za'ra mono zém na, 're wanhopré mono õ di za oto, taha zarina te te õ hã 're wa'anho'reptui mono õ wa oto. Ãne wa, tô senai'õ na rowasu'u'wa norĩ wi 're asiptete za'ra wa'aba mono za oto, isimiroti na 're aihâimana za'ra wa'aba mono wa, apâ robzei'õ na 're anomro aba mono tõ da.

1 Timotiu 5:14

Tahawa, wa tô ĩsima wẽ za'ra, duré apâ timro na te te 're sahu za'ra mono da, pi'õi mrotõ hâiba tém norĩ hã. Te za duré apâ 're 'ra za'ra. Tawamhã tinhorõwa ãma te za ti'ra norĩ hã te te 're 'madâ'â pese za'ra. Ãne dama 're hâimana wẽ za'ra mono wamhã, damreme hã te te sina 're 'rã'õtõ za'ra mono õ di za, wazawi'õ'wa norĩ mreme hã.

Titu 2:5

Te za sina 're siptete za'ra, 're nomro wẽ mono da, i'ra ré norĩ hã. 'Ri 're, romhuri wẽ 'wa te za 're hâimana za'ra. Duré timro mreme te za te te 're 'madâ'â pese za'ra. Tawamhã da te tãma 're nharĩ wasété za'ra mono õ di za, 'Re ihâimana u'âsi mono nhimiroti na oto 're nomro wẽ mono wa, i'ra ré norĩ hã.

1 Pedru 2:12

A norĩ wa'wa hã Wanhib'apito zazei'õ'wa norĩ wazari, te 're aihâimana za'ra wa'aba mo. Tahawa, te za aihâimana wẽ na si dama 're aihâimana za'ra wa'aba mo. Tawamhã aihâimana wasété na, taré da te aima 're nharĩ za'ra wa'aba mono nherẽ, te za da te 're aiwaihu'u za'ra wa'wa, dama 're aihâimana wẽ za'ra wa'aba mono zém na. Tawamhã Cristu hã apâ wei morĩ wapsi, te za 'Re ihâimana u'âsi mono ãma tawata za'ra ni, isimiroti zarina aihâimana wẽ na, dama 're aihâimana za'ra wa'aba mono wa.

1 Pedru 3:16

Aiwaimri te za 're asiwasu'u za'ra wa'aba mo, aimreme wasété ãna. Aihâimana wẽ na te za dama 're aihâimana za'ra wa'aba mo, asimirosa'rata wasété na 'râwi 're asiwẽ'õ za'ra wa'aba mono tõ da. Tawamhã dama 're aihâimana wẽ za'ra wa'aba mono wamhã, Cristuhu zazei'wa 're aihâimana za'ra wa'aba mono 'ru te, taré da te aima 're inharĩ wasété za'ra wa'aba mono niwĩ, te za dasimreme ma 'râwi 're danhiséb za'ra.