1 Timotiu 5:17 - ꞌRe Ihâimana Uꞌâsi Mono Zadawa Wasuꞌu17-18 Aibâ norĩ hã isazei'wa te te 're 'madâ'â wẽ za'ra mono wamhã, te za iwa'rãmi marĩ iwẽ hã te te tãma 're sõmri za'ra, isazei'wa norĩ, siré 're isi'rã'õtõ mono norĩ hã. Cristuhu wasu'uwẽ na te te tãma 're rowasu'u za'ra mono wamhã, duré isimiroti wasu'u na te te 're pawaptob za'ra mono wamhã, marĩ hã iwẽ hã sa'ẽtẽ na te te tãma 're isõmri za'ra mono da hã, wẽ di. Ãne hã wa tô waihu'u za'ra ni, 'Re ihâimana u'âsi mono nhimiroti 'rata hawimhã, ãne: “Powawẽ hã amnho trigu 'rã, tipara na dasazéb da, te te aima 're sub za'ra wa'aba mono ré hã, 're wata wasisi za'ra wa'aba mono õ di za, 're saihuri tõ mono da.” Duré isimiroti hâiba amo hã ãne: “Romhuri'wa norĩ hã te te dama 're romhuri za'ra mono wamhã, tô i'uwaibaba te za da te 're pawa'âbâ za'ra.” Taha zarina te za isazei'wa norĩ hã da'madâ'â'wa norĩ hã te te 're pawaptob za'ra asa, marĩ na. အခန်းကိုကြည့်ပါ။ |
1 Timotiu 5:17
41 ပူးပေါင်းရင်းမြစ်များ
Datẽme 're aihutu aba mono wamhã, 'ri baba 're anomro aba mono õ di za. 'Re aihutu aba mono zéb ãma si, te za 're aihâimana za'ra wa'aba mo. Tame te za danhipi hã da te aima 're isõmri za'ra wa'aba mono na 're asaihuri aba mo. Tame te za duré 're i'âhuri aba mo. Romhuri'wa pawa'â hã tãma 're iwairébé mono ne, te za taré asa hã da te aima 're sõmri za'ra wa'wa, wa'âbâ ãna asimirowasu'u wa'rãmi wa'aba.
Tahawa, te Wanhib'apito hã asa ãma romnhimiré'é, Zezusi hã ãne: — Dama romhuri'wa i'umnha hã duré isimiroti wẽ hã, e niha 're ihâimana mono zé hã. Ãne hã 're hâimana mono wamhã, te za isib'apito hã nimomo tiwi morĩ õ ré, tãma pisutu, uburé tãma iromhuri'wa norĩ hã isa'u nherẽ, te te sô 'madâ'â za'ra da. Te za duré tãma pisutu, bâtâ pisutuzém na isazéb da hã, te te tãma ãma uwaimrami za'ra da, tãma iromhuri'wa norĩ ma.
Ĩnhimiromhuri pese na wa tô aima ãma asanho za'ra wa'wa, sib'uware na 're ihâimana za'ra mono norĩ hã wanhimiromhuri na wa te ãma 're pawaptob za'ra mono da. Wanhib'apito Zezusihi mreme na te za 're aipo're pu'u u'âsi za'ra wa'aba mo. Ãne ma tô wama waihu'u za'ra: “Dama marĩ nhomri'wai ma, rowẽ uptabi di, dawi marĩ âri'wai ma, irowẽ nhipai u.”
Duré ni'wam norĩ hã 'Re ihâimana u'âsi mono hã te te sima 're apisutu mono wamhã, te za isazei'wa norĩ ma, isimiroti zarina si te te 're rowahutu za'ra, te te 're wapari za'ra mono wa, pẽ'ẽ toi u'âsi, ãma 're hâimana za'ra mono da, siptete sina. Duré ni'wam norĩ hã tinhibrom na dama 're sõprub za'ra mono da, te te sima 're apisutu mono wamhã, te za tô ta norĩ hã dawi 're sõti za'ra mono ãna, dama ãma 're sõprub za'ra, sa'ẽtẽ na. Duré ni'wam norĩ hã isazei'wa norĩ 'madâ'â'wa da, te te 're apisutu mono wamhã, te za tô simi'ẽ na te te 're 'madâ'â u'âsi za'ra, ta norĩ zama. Duré ni'wam norĩ hã te te sima 're apisutu mono wamhã, ta norĩ zama te za da'ãma 're pẽ'ẽzé za'ra, dahâzé ré norĩ ãma, duré dawi 're irobzei'õ za'ra mono norĩ ãma. To sina, te za ãne zarina te te 're dapawaptob za'ra, ta norĩ hã. Ãne wa za wa te wasima 're rob'ma'wamarĩ, romhuri mono bâ, dahâiba hã misi nherẽ, dahâiba na marĩ hã ahâ na dama 're ihâimana za'ra mono hã tite mono bâ te te sima 're iromhuri za'ra mono ne.
Ta norĩ hã zudeu'õ isazei'wa norĩ hã si'uihâ na ma tô sima pisutu za'ra, te te siwi ãma ipawaptob za'ra zéb da hã, zudeu norĩ hã. Ãne hã tô i'uwaibaba ma tô siwi ãma pawaptob za'ra. E marĩ wa. Duréihã zudeu norĩ ma, ma tô 'Re ihâimana u'âsi mono hã tiwasu'uwẽ na tãma siwaihu'u na'rata za'ra, tipẽ'ẽ na robzei u'âsi ãma 're nomro mono da. Taha na ma tô zudeu'õ norĩ hã te te siwi ãma 're pawaptob za'ra iwasu'uwẽ na, aiwapsi oto õhõ ãma si 're hâimana za'ra mono da. Ãne wa'rãmi, te za tô zudeu'õ norĩ hã tinhimarĩ na te te siwi 're pawaptob za'ra, zudeu norĩ hã, tô isarina si.
Tane nherẽ, 'Re ihâimana u'âsi mono hã tinhimizawi pese zéb zarina si, ma tô ĩma tinhopru, tô õhõ na si dama 're ĩhâimana mono da oto, Cristuhu zadawa wasu'u'wa na. E tawamhã, taré ma tô ĩma tinhopru, 'Re ihâimana u'âsi mono hã. Mare di. Wa tô te ĩsina tãma 're uwaimrami u'âsi. Uburé ĩsiré Cristuhu zadawa wasu'u'wa norĩ hã, wa tô romhuri na te 're 'rãnhipai u'âsi za'ra. Tane nherẽ, ĩsi'uihâ na te dama 're romhuri mono õ di. 'Re ihâimana u'âsi mono si, ma tô te te 're ĩpawapto, ãne na te dama 're romhuri mono da, ĩma isõprubzéb zarina si.
Wa norĩ hã 'Re ihâimana u'âsi mono siré, wa te tãma 're iromhuri za'ra mono norĩ hã, wa za oto aima ãma roti pese za'ra wa'aba ni. 'Re ihâimana u'âsi mono, ma tô tinhimizawi pese zéb zarina, aima 're sõprub za'ra wa'wa, iwẽ na hã. Tahawa, isazei'wa na taré dama 're asiwasu'u za'ra wa'aba mono õ di za. 'Re aihâimana za'ra wa'aba mono zém na, te za asa iwa'rãmi asina tãma 're i'uwaimrami u'âsi za'ra wa'aba mo, 'Re ihâimana u'âsi mono ma hã.
Tahawa, rowasu'u iwẽ uptabi hã te za dama 're isõmri za'ra wa'aba mo, ãma 're idanomro wẽ u'âsi mono zéb da hã. Ãne hã dama 're 'manharĩ wẽ u'âsi za'ra wa'aba mono wamhã, wa za aima 're ĩto za'ra wa'wa, Cristu za we apâ imorĩzéb ãma hã. E marĩ wa, wa za aima 're ĩto za'ra wa'wa tamemhã. Ti'ab ré, ai'rata 're ĩnhamra aba mono ré, taré te ai'ãma 're iromhuri pese za'ra wa'aba mono õ zém na hã, ĩsiwaihu'u wa za wa hã, wa za tame aima 're ĩto za'ra wa'wa, Cristu za apâ we imorĩzéb ãma hã.
Tahawa, ma'ãpé ãma atẽme wisi aba wamhã, asiwi sawi wẽ za'ra wa'aba za Epafroditu hã, ato sina za'ra wa'aba, wasiré Wanhib'apito zazei'wa oto 're wahâimana za'ra mono na dâ'âsina, duré oto wasi'ãma 're wasisãnawã za'ra mono wa. Te za duré asiwi ihâimana wazéb za'ra wa'wa. Ni'wam norĩ hã isine 're ihâimana wẽ za'ra mono norĩ zama, te za duré asiwi ihâimana wazéb za'ra wa'wa. E marĩ zarina, te za asiwi ihâimana wazéb za'ra wa'wa, Epafroditu hã. Ta hã tãma romnhimimnhasi nherẽ, ma tô sisawi ãna romhuri pese, Cristuhu ma. Taha na, te aré dârâ. A norĩ wa'wa hã romhâ na asimroi wa'aba wa, asiwi ĩpawapto waihu'u aba õ wa, ma tô õhõ si ĩpawapto pese, ai'upana za'ra wa'aba. Ãne wa, te za ato sina apâ asiwi i'âri wẽ wa'wa, atẽme wisi za'ra wa'aba wẽ te duré.
Duré a hã ĩpawapto wẽ 'wa na 're i'aihâimana mono hã, ma'ãpé ã pi'õ norĩ hã pawaptob zahuré na. Ta norĩ hã ma tô ĩsiré te te 're romhuri pese zahuré, Cristuhu wasu'uwẽ na wa te dama ãma 're iropéi mono na hã. Clemetihi siré zama ma tô te te 're romhuri zahuré, duré uburé ĩsiré romhuri'wa norĩ siré zama. Uburé te ã norĩ nhisi hã dame 're hâimana za'ra ibaihâ na hã, 'Re ihâimana u'âsi mono 'rata za 're idahâimana u'âsi za'ra mono norĩ nhisi ré, ibaihâ 're ihâimana mono na hã.
Taha da, wa za sada 're wanhiptete u'âsi za'ra, wa te 're dapawaptob za'ra mono da, da te ãma 're saze za'ra mono da. 'Re morĩ u'âsi wa, wa tô wasina wa te 're umnhasi za'ra, te te 're wapawaptob u'âsi za'ra mono da. Ta hã uburé Danho'reptui'wa, te 're hâimana. Isazei'wai mono bâ te za tô te te 're wa'anho'reptu.
Marĩ iwẽ hã ma tô Wamama hã aipẽ'ẽ 're aima tisõ, ãma 're idapawapto mono zéb da hã. Hâiwa hawi te te tãma iwaihu'u za'ra zém na, ma tô isadawa wasu'u'wa norĩ hã aima waihu'u za'ra, iwẽ hã za te te aima isõmri na. Duré ma tô da'madâ'â'wa norĩ hã, tinhib'rada hã ai'ãma sa'ra za'ra, ai'rã nhisiwi. Taha ré ma tô 'Re ihâimana u'âsi mono hã iwẽ hã aima tisõ. Taha zarina, te za asina tãma 're i'uwaimrami u'âsi mo, dapawaptom na, asimiromhuri hã Wamama ma.
Tawamhã uburé te aima i'awaihu'uzéb zarina si, te za wasiré isazei'wa norĩ ma 're i'awaihu'u mo. Ãne wamhã, Cristu Zezusihi ma, romhuri wẽ 'wa, te za tô 're aimo. Wanhib'apito nhimiroti hã wa te 're isaze za'ra mono zéb zarina, 're aimorĩ u'âsi sina, te za tãma 're iwaihu'u u'âsi za'ra mo, roti tô sena zarina zama, ãma 're aimorĩ u'âsi ne. Õhõ na si 're aimorĩ wamhã, asiptete sina te za 're aihâimana mo, Wanhib'apito ãma hã.
Ãté da'madâ'â'wai ãma te za ni'wa hã iwasédé hã ãma tihi. Tawamhã siwaprosi te te ãma hiri wamhã, wapari õ di za, imreme hã. Ãté si'ubdatõ te za ãma sisadawa waptob za'ra, ãma i'madâ'â'wa norĩ hã. Ãté maparane te za ãma sisadawa waptob zahuré. Ãne wamhã, da'madâ'â'wa zô te za aihâ, ihâimanazém na sadawa pibu da.
Asiré isazei'wa 'madâ'â'wa norĩ nhimiroti hã te za 're iwapari pese za'ra wa'aba mo. Te te aima 're iroti za'ra wa'aba mono zéb zarina, te za marĩ hã 're i'manharĩ za'ra wa'aba mo. Ta norĩ hã niwapsi te za 'Re ihâimana u'âsi mono ma siwasu'u za'ra, te te ai'ãma 're iromhuri za'ra wa'aba mono zém na hã. Tahawa, te ta norĩ hã ai'ãma 're hâtâ'â u'âsi za'ra wa'wa, te te 're i'ai'madâ'â za'ra wa'aba mono zém na hã, Cristuhu zazei'wa 're ihâimana za'ra mono zém na si 're anomro aba mono da. Ta norĩ nhimiroti hã 're wapari pese za'ra wa'aba mono wamhã, to sina te za tô ta norĩ hã te te ai'ãma 're romhuri za'ra wa'wa. Tane nherẽ, 're wapari za'ra wa'aba mono õ wamhã, robzei ãna te za te te 're romhuri za'ra. Ãne wamhã, te te 're aipawapto waihu'u za'ra wa'aba mono õ di za, ta norĩ hã.
Ma'ãpé uburé ai'madâ'â za'ra wa'aba 'wa norĩ hã wama sawi za'ra wa'aba za. Uburé 'Re ihâimana u'âsi mono nhib'a'uwẽ, tame 're ihâimana za'ra mono norĩ zama, wama sawi za'ra wa'aba za duré. Italia na danhipti'a nho'õmo nhisi hawi 're iwairébé mono norĩ zama te ãma asawi za'ra wa'wa duré, isazei'wa norĩ, siré 're isi'ubumroi mono norĩ hã.
Ma'ãpé ãma asipo're pu'u za'ra wa'aba, 'Re ihâimana u'âsi mono zadawa wasu'u na isãna'rata hawi te te ãma aima 're irowasu'u za'ra wa'aba mono norĩ ãma hã, ai'madâ'â'wa za'ra wa'aba norĩ ãma hã. Ta norĩ 're ihâimana za'ra mono zém na, duré 're idâ'â za'ra mono zém na zama, te za ãma 're asipo're pu'u u'âsi za'ra wa'aba mo. Ta norĩ hã 'Re ihâimana u'âsi mono si te te sina 're i'umnhasi za'ra mono ne, te za duré a norĩ wa'wa hã isine asina 're i'umnhasi za'ra wa'aba mo, 'Re ihâimana u'âsi mono hã.
ကြော်ငြာတွေ