1 Timotiu 4:8 - ꞌRe Ihâimana Uꞌâsi Mono Zadawa Wasuꞌu

^8-9 Ãne wa za duré aima waihu'u. Ãté ni'wam norĩ hã te za te te sima 're pisutu za'ra, 're sihâiba wairob za'ra mono da, dahâiba wairobzé hã wẽ wa, dahâiba ma hã. Ãne hã dama 're rowẽ za'ra mono nherẽ, 'Re ihâimana u'âsi mono nhimiroti zarina 're danomro wẽ mono da, da te dasima 're pisutu pese za'ra mono wamhã, dama 're rowẽ uptabi za'ra mono di za. Rowẽ na te za ãma 're danomro, ti'ai ãma, hâiwa ãma zama. Tô sena wa tô aima rowaihu'u. Ãhã wasu'u hã tô sena wa, aihĩni te za da te ãma 're saze za'ra.

1 Timotiu 4:8 ပူးပေါင်းရင်းမြစ်များ

Provébiu 19:23

Ni'wa, Uburé Danhib'apito te te 're wazé mono wamhã, te za rowẽ na si 're hâimana hâ pese, sima iwẽ na.

Provébiu 22:4

Ni'wa, Uburé Danhib'apito te te 're wazé mono wamhã, duré wapu na dama 're si'madâ'â mono wamhã, te za tinhimarĩ hã te te sima 're azani. Taha zarina te za duré da te dasiwi 're wazé pese. Te za duré 're hâimana hâ, ta hã.

Mateu 12:32

Duré ni'wam norĩ hã dasiré ĩpoto ãma te te ĩ'ãma 're wasété za'ra mono wa, oto tiwasété na 'Re ihâimana u'âsi mono ma, 're siwasu'u za'ra mono wamhã, tãma waihu'u pese di, ãne hã iwasédé hã te te tãma 're i'apari mono zéb da hã, te te oto ãma 're 'madâ'â za'ra mono tõ da. Tane nherẽ, ni'wam norĩ hã 'Re ihâimana u'âsi mono pẽ'ẽzani ãma te te 're wasété za'ra mono wamhã, te za taha na iwasédé hã te te ãma 're a'madâ'â u'âsi, 'Re ihâimana u'âsi mono hã.

Mateu 19:29

Ãté ni'wam norĩ hã te za tinhorõwa hã te te 're rẽme pese za'ra, duré ãté tisisãnawã norĩ hã, duré ãté timama norĩ hã, duré ãté ti'ra norĩ hã, duré ãté tinhipti'a hã. Ãté ĩsiré 're nomro mono da, te za uburé marĩ hã te te 're rẽme pese za'ra. Ta norĩ ma, te za uburé marĩ te te 're irẽme za'ra mono zém nhipai u pese, 'Re ihâimana u'âsi mono te te tãma hã 're sõmri za'ra. Ta norĩ ma si te za duré dadâ'â ãna 're idanomro u'âsi mono zé hã te te tãma 're apisutu.

Mateu 6:33

'Re ihâimana u'âsi mono hã ãma 're isib'a'uwẽ za'ra mono norĩ ma, iwẽ uptabi hã te te tãma 're isõmri za'ra mono zéb zô si, te za asima 're asõpré u'âsi aba mo. 'Re ihâimana u'âsi mono te te sima 're aiwẽ za'ra wa'aba mono zéb zarina si, 're anomro wẽ wa'aba mono da, te za asima 're iwẽ u'âsi za'ra wa'aba mo. Tawamhã ãhã zô si 're asõpré wa'aba mono wamhã, marĩ zô aiwi 're irowaptâ'â za'ra wa'aba mono zéb uwaibaba, te za tô te te aima 're anhomri 'wa, Aimama 'wa hã.

Marcu 10:30

Ãne wamhã, ti'ai ãma 're morĩ ré, te za marĩ iwẽ uptabi hã ahâ na tãma 're hâimana za'ra, 'Re ihâimana u'âsi mono nhib'ratamhã, isõrõwa za'ra hã, isisãnawã norĩ hã, ihidiba norĩ hã, i'ra norĩ hã, duré isipti'a hã. Marĩ iwẽ hã tãma 're ihâimana za'ra mono zu, te za duré rowasédé hã tãma 're hâimana za'ra, taré da te 're i'ruiwapari za'ra mono zéb zarina. Niwapsi te za duré tãma pisutu, dâ'â ãna 're morĩ u'âsi da, rowẽ uptabi ãma, 'Re ihâimana u'âsi mono hã.

Luca 5:38

Itép si'uiwa 'rem na si te za rob'rãi wa'u isé tébre hã da te iwa 're 'masisi za'ra.

Roma 8:28

'Re ihâimana u'âsi mono zawi pese 'wa norĩ da, marĩ iwasédé hã ahâ na sada 're hâimana za'ra mono nherẽ, te za 'Re ihâimana u'âsi mono hã iwẽ si te te tãma 're apisutu iwa'rãmi, te te sima 're i'awẽ mono zéb zarina, tinhib'a'uwẽ da, te te sima 're i'apisutu mono norĩ ma hã. Ãne hã wama waihu'u pese za'ra di oto wa norĩ hã.

1 Corĩtu 8:8

Tazahã, dasa hã wa te 're ihuri mono zéb zarina, duré wa te 're ihuri mono õ zéb zarina, te te 're wa'awẽsãmri mono õ di za, 'Re ihâimana u'âsi mono hã. Marĩ hã wa te 're huri tõ mono da, wa te wasima 're ipisutu za'ra mono zéb zarina, te te siwi 're wa'awẽ'õ mono õ di za. Duré marĩ hã wa te 're huri mono da, wa te wasima 're ipisutu za'ra mono zéb zarina, te te 're wa'awẽsãmri mono õ di za.

1 Timotiu 4:7

Dahi'rata norĩ nhimirob'rãzarõtõ 'ratare hã 're wapari mono õ di za, ta hã isazei'õ'wa norĩ te hã, tarére wa, uptabi õre wa. Ta hã te za asima 're i'madâ'â pese mo, 're aihâimana wẽ mono da, Wamama nhimiroti zarina.

1 Timotiu 6:3

Ãté ni'wam norĩ hã aimawi na te za isazei'wa norĩ ma te te tãma 're rowasu'u za'ra. Ãté Wanhib'apito Zezu Cristuhu nhimiroti na, ta norĩ hã te te ãma 're saze za'ra mono õ di za, tô sena nherẽ, Wanhib'apito nhimiroti hã rowẽ na ãma 're idanomro mono zéb da hã, duré dawẽ na si ãma 're idanomro mono zéb da hã. Ãne wamhã, roti tô sena hã tãma waihu'u za'ra õ di za. Taré te za tinhimiroti wẽ na 'râwi sina 're wata za'ra. Ta norĩ ma, wẽ di, marĩ wasu'u na 'râwi ãma 're isisada'âbâ za'ra mono da hã, duré 'râwi timreme na 're isi'wapé za'ra mono da hã. Taha zarina, te za tisi'ruiwapari na te te sima ãma 're wa'rãmi za'ra, ãma 're sisada'âbâ za'ra mono da. Te za duré te te 're dawasu'u wasété za'ra. Te za duré si'ãma te te 're rosa'rata wasété za'ra. Roti tô sena hã tãma waihu'u pese za'ra õ wa, roti tô sena zarina si te te 're rosa'rata wẽ za'ra mono õ di za. Ta norĩ hã te te duré sima 're rosa'rata siwamnarĩ za'ra, isazei'wa norĩ hã rob'uiprazé hã te te tãma 're sõmri za'ra mono da, isimirowasu'u wa'rãmi, sibro pese na 're hâimana za'ra mono da.

1 Timotiu 6:6

'Re ihâimana u'âsi mono nhimiroti 'madâ'â'wa, 're wanomro mono wamhã, duré marĩ zô si wasima 're wanhopré mono ãna 're wanomro mono wamhã, wama 're rowẽ uptabi za'ra mono di za.

2 Timotiu 3:5

'Re ihâimana u'âsi mono nhimiroti na 're dahâimana wẽ za'ra mono da, da te dasima 're wẽ pese za'ra mono newa, te za 're dasiwasu'u za'ra. Tazahã, i'uptabi na hã da te dasima 're wẽ za'ra mono õ di za, tiwaihu'u pese na te te 're da'apawapto mono wa, ãma 're idahâimana wẽ za'ra mono zéb da hã. Tahawa, te za ta norĩ nhiti romhâ na 're aihâimana mo.

Titu 3:8

Te aima irowasu'uzé hã tô sena. Tahawa, te za isazei'wa norĩ ma 're i'aroti mo, marĩ wẽ na te te 're dapawaptob u'âsi za'ra mono da. Te aima 're irowasu'u mono zé hã wẽ uptabi di, dama 're irowẽ za'ra mono zéb da hã.

Hebreu 13:9

Cristuhu wasu'uwẽ upana, danhimiroti aimawi na da'ãma 're sasõmri za'ra wa'aba mono õ di za, senai'õ na da te dasima 're irowasu'u za'ra mono na hã. 'Re ihâimana u'âsi mono hã tinhoprubzéb zarina, iwẽ uptabi hã te te wama 're i'apisutu mono na si, wa za wapẽ'ẽ 're ãma 're wanhiptete u'âsi za'ra. Taha si wa norĩ hã wama iwẽ uptabi za'ra hã. Dasa hã da te dasiwi 're isawi za'ra mono na roti hã da te 're i'madâ'â za'ra mono na, ãma 're danhiptete waihu'u za'ra mono õ di, dapẽ'ẽ 'remhã. E marĩ wa. Taré na dasa hã 're hâimana mono wa. Taha na ãma 're dasipawapto waihu'u za'ra mono õ di tô, dasa da te dasiwi 're isawi za'ra mono na roti na hã.

1 Zuwã 2:25

Cristu hã ma tô ãne wama ropisutu siromo za'ra, 're wadâ'â za'ra mono ãna, i'rata 're iwasi'ubumroi u'âsi mono zéb da hã.

Apocalipsi 3:12

“Tawamhã ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã, wa za te 're pisutu za'ra, 'Re ihâimana u'âsi mono ãma hâimana nhiptete na 're hâimana u'âsi za'ra mono da, 'ri uparizé, rési ãna 're isimasab u'âsi mono ne. 'Ri uparizé hã marĩ te te 're rési za'ra mono ãna te 're simasa. Tane te za 'Re ihâimana u'âsi mono ma, simirosa'rata si'réi ãna, ãma 're wata u'âsi za'ra. Tahawa, wa za ihâiba na ãma ui'éré za'ra, Ĩnhib'apito nhisi hã. 'Re ihâimana u'âsi mono te, 'ri nho'õmo nhisi na, wa za duré ihâiba na rob'ui'éré za'ra. 'Re ihâimana u'âsi mono te, 'ri nho'õmo nhisi hã, Zeruzalẽ itém na isisi hã, hâiwa hawi za te te we isi'ra hã, 'Re ihâimana u'âsi mono hawi. Ĩnhisi tém na, wa za duré ihâiba na rob'ui'éré za'ra.

Apocalipsi 3:21

“Duré, ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã, ta norĩ hã wa za pisutu za'ra, danhib'apito 're ĩsimasisi mono zéb ãma, ĩzababa 're si'ubumroi u'âsi mono da. Wa hã ĩdâ'âzéb u ĩsipi'rai õ na Satanasihi ãma te ai'uté wa, taha pari Ĩmama zababa oto 're ĩnhamra u'âsi mono ne, te za ta norĩ hã ĩzababa 're si'ubumroi u'âsi.

1 Samuéu 15:22

Tawamhã Samuéu ma duré ãma tãma wa'rã ãne: — E ma hã tawamhã tãma iwẽ, Wanhib'apito 'Re ihâimana u'âsi mono ma hã. E dapo're pe. E abaze da te tãma 're izata za'ra mono na tãma danhoprubzé. 'Re ihâimana u'âsi mono, da te 're iwapari pese za'ra mono zé hã iwẽ uptabi, pone'ẽrebâ zéré mapure si'aibâ iwẽ na tãma 're idanhoprub za'ra mono zém nhipai u.