1 Timotiu 4:1 - ꞌRe Ihâimana Uꞌâsi Mono Zadawa Wasuꞌu1 'Re ihâimana u'âsi mono hã, Tipẽ'ẽzani na ma tô ãne dama waihu'u: “Rob'rãsutuzéb u romhuture wapsi, te za ni'wam norĩ hã tinhimizaze rẽme za'ra, Zezu Cristuhu nhimiroti te te aré 're isaze za'ra mono zé hã. Ihâiba'õ norĩ nhimiroti hã tô sena newa te za te te 're wapari za'ra, wa'uburé norĩ nhimiroti zarina 're nomro mono da oto.” Ãne ma tô dama waihu'u. အခန်းကိုကြည့်ပါ။ |
1 Timotiu 4:1
64 ပူးပေါင်းရင်းမြစ်များ
Zahadu wapsi aipawaptob za'ra wa'aba 'wa da hã, te za we atẽme timorĩ za'ra wa'wa, 'Re ihâimana u'âsi mono pẽ'ẽzani hã. Tô sena uptabi, isimiroti hã. We atẽme wisi za'ra wa'aba wapsi, te za uburé roti tô sena uptabi hã te te aima 're waihu'u pese za'ra wa'wa. Si'uihâ na te te aima 're waihu'u za'ra wa'aba mono õ di za. Ĩnhimirowasu'u zarina si te za te te aima 're waihu'u za'ra wa'wa. Romhâ ré te za duré za iromhâimanazé hã te te aima 're waihu'u siromo za'ra wa'wa.
Tawamhã nimahã bâtâ na ma tô ta norĩ hã saihuri ãna asimro a'â, Wanhib'apito ãma wata za'ra da. Tahawa, ma tô 'Re ihâimana u'âsi mono pẽ'ẽzani hã ãne tãma waihu'u za'ra: — Banabé norĩ ma, wa tô romhuri hã pisutu zahuré, Sauluhu me. Te te ĩma 're romhuri zahuré mono da, wa tô ĩsima pisutu zahuré, ta norĩ hã. Tahawa, te ipisutu zahuré zéb zarina, te za oto tãma ipisutu za'ra wa'wa, asiti wa'aba oto neb zahuré da.
Zezusihi wasu'uwẽ na ma tô dama rowasu'u. Dâ'â nherẽ, apâ ihâiwa'utuzém na ma tô duré dama rowasu'u. Tahawa, Epiturezuhu nhimirowahutu zarina, duré etozitu norĩ nhimirowahutu zarina dama rowahutu'wa norĩ hã ma tô duré ãma sada'âbâ za'ra, Paulu hã. Tawamhã nima norĩ hã ma tô ãne sisadanharĩ za'ra ãma: — E marĩ na te wama rowasu'u za'ra. Simiza'rese bâ. Nima norĩ hã te duré ãne sima nharĩ za'ra: — Ãté ihâiba'õ norĩ wasu'u na te wama rowasu'u, iwaihu'upese hâiba amoi wasu'u na, wa te ãma 're saze za'ra mono da.
Watẽme wisi wi, ma tô Pauluhu usisizé hã tiwi waze. Taha wamhã, ma tô ãma sipara'õtõ wasisi. Ma tô duré ãma sipawasisi. Taha pari, ma tô wama rowasu'u za'ra, ãne: — 'Re ihâimana u'âsi mono pẽ'ẽzani hã ãne ma tô ĩma waihu'u: “Ã da'usisizép tede'wai ma, te za zudeu norĩ hã ãne 'manharĩ za'ra, Zeruzalẽ ãma 're isi'ubumroi mono hã. Zudeu'õ norĩ ma, te za hâiba nhomri za'ra.”
Ãne si, wa za duré aima ãma rowaihu'u za'ra wa'wa. Isazei'õ'wa norĩ hã wedeza ne na dasa te te 're zata za'ra mono wamhã, 'Re ihâimana u'âsi mono ma, ta norĩ hã ãma 're sõprub za'ra mono õ di. Wa'uburé norĩ ma si, te ta norĩ hã tãma ãma 're sõprub za'ra, ãma 're iwata za'ra mono da hã. Tahawa, a norĩ wa'wa hã dasa, ta norĩ ma, da te 're isõmri za'ra mono na ãma 're asaihuri aba mono wamhã, wa'uburé norĩ ãma si hã te za ãhã wamhã 're aihâimana za'ra wa'aba mo. Tahawa, ãne hã dame 're 'manharĩ za'ra wa'aba mono da, wa hã te ai'ãma 're rosa'rata za'ra wa'aba mono õ di. Mare di.
Wama si, ma tô tinhimiroti hã dama iwaihu'u'õ hã te te wama 're awaihu'u, 'Re ihâimana u'âsi mono hã. Tipẽ'ẽzani na si ma tô te te wama 're awaihu'u tô. 'Re ihâimana u'âsi mono pẽ'ẽzani ma si, waihu'u pese di tô, 'Re ihâimana u'âsi mono nhimiroti te te wama 're i'awaihu'u mono zéb da hã. E marĩ wa. Uburé marĩ hã tãma waihu'u pese wa, Ipẽ'ẽzani ma hã. 'Re ihâimana u'âsi mono, uburé te te sima 're i'aroti mono zé hã dama iwaihu'u'õ hã, tãma waihu'u pese di. Uburé marĩ na 're ihâimana mono zém na zama, tãma waihu'u pese di duré, Ipẽ'ẽzani ma hã.
Tane nherẽ, wa ĩhâtâ'â sina, te ai'ãma 're rosa'rata u'âsi za'ra wa'wa. E marĩ wa. Cristuhu ãma si, 're sasõmri pese za'ra wa'aba mono nherẽ, ãté ni'wam norĩ hã roti tô senai'õ na taré te te aima 're irowasu'u za'ra wa'aba mono zéb zarina, te za Cristuhu wasu'uwẽ hã irẽme za'ra wa'wa. Duréihã Wa'uburé hã wahi na sihâiba wa, Ewaha ma, sadawa nhipese na te te irowasu'u ne, te za tô ãté ni'wam norĩ hã te te aima 're rowasu'u za'ra wa'wa, roti tô senai'õ na hã.
Ãté ni'wam norĩ hã te za sadawa nhipese na dama 're siwasu'u za'ra, dama wapu na 're idahâimana za'ra mono norĩ na, 'râwi 're si'madâ'â ze za'ra mono nherẽ. Ãté te za duré ta norĩ hã hâiwa ãma romhuri'wa norĩ ãma si 're wata za'ra, 'Re ihâimana u'âsi mono upana. Tawamhã ãté ta norĩ hã te za aima roti za'ra wa'wa, ãne: “A norĩ wa'wa hã wasine 're aihâimana za'ra wa'aba mono õ wamhã, 'Re ihâimana u'âsi mono hã iwẽ uptabi hã te te aima 're sõmri za'ra wa'aba mono õ di za. Te za isimini za'ra wa'wa.” Ãne na ta norĩ hã te te aima 're nharĩ za'ra wa'aba mono wamhã, ãma 're saze za'ra wa'aba mono õ di za. Tô'ã. Ta norĩ hã marĩ aimawi hã dama iwaihu'u'õ hã sõtõ 'rowim ne, te te 're isabu za'ra mono na dama 're isiwasu'u za'ra mono na, te 're si'madâ'â ze za'ra, dama pire na 're hâimana za'ra mono newa, 'Re ihâimana u'âsi mono waihu'u'õ'wa norĩ nhimirosa'rata wasété zarina.
Duréihã ma tô ni'wam norĩ hã wahi'rata norĩ wazari 're hâimana za'ra, 'Re ihâimana u'âsi mono zadawa 'mahârâ'wa newa, senai'õ hã. Tane te za duré senai'õ na rowasu'u'wa norĩ hã aiwazari 're hâimana za'ra wa'wa. Ta norĩ nhimirowasu'u hã tô sena newa, da te ãma 're saze za'ra mono wamhã, te za dahâimana wẽ zé hã dawi 're si'utõrĩ za'ra. Wanhib'apito hã tidâ'âzém na te te 're wa'âbâ za'ra mono nherẽ, te za 're simrami za'ra, tinhib'apito zô, tô senai'õ na rowasu'u'wa norĩ hã. Tahawa, te za 'Re ihâimana u'âsi mono hã te te 're ahâ za'ra, 're dâ'â za'ra mono da.
Marĩ ipire na, wa za oto aima rowasu'u za'ra wa'wa, waihu'u za'ra wa'aba da. Rob'rãsutu u hã romhuture wamhã, te za ni'wam norĩ hã ãne 're hâimana za'ra. Marĩ iwasété zô si te za te te 're rowasutu za'ra. Ãne te za te te aima 're nharĩ za'ra wa'wa: “Oro apâ wei morĩ 'ruza Zezu Cristu hã, te te sina iropisutuzéb zarina. E mahãta tawamhã. Wamama norĩ hã ma tô wawi 're dâ'â za'ra. Tane nherẽ, te õhõ u'â zahadu 're ropsa'wari, Ropoto na'rata hawim haré.” Ãne te za te te aima 're nharĩ za'ra wa'wa.
Ĩ'ra norĩ, ĩma asawi pese za'ra wa'aba norĩ, ropsi'utõrĩzéb u hã romhuture di oto. Tame te za oto aibâ iwasédé hã dama sihâi'ré sõ'awi, Cristuhu zada 're ihâimana mono hã. Cristuhu newa te za isimiroti hã da te 're wapari za'ra. Taha wasu'u hã ma tô 're iwapari u'âsi za'ra wa'aba mo. Tane nherẽ, te duré ãhã na wanho'a 're hâimana za'ra ahâ uptabi na, za Cristuhu zada 're ihâimana mono ne. Tahawa, wama waihu'u pese za'ra di oto, ropsi'utõrĩzéb u iromhuture na hã.
Wa norĩ hã 'Re ihâimana u'âsi mono nhib'a'uwẽ, wa oto 're wanomro. Ni'wam norĩ hã 'Re ihâimana u'âsi mono hâimanazé hã 'râwi te te 're iwaihu'u za'ra mono hã, te ta norĩ si te te 're wawapari za'ra. Tanei õ di, 'Re ihâimana u'âsi mono nhib'a'uwẽ'õ norĩ, 're inomro mono norĩ te te 're wawapari za'ra mono õ di, 'Re ihâimana u'âsi mono wasu'u na hã. Tahawa, ni'wam norĩ hã 'Re ihâimana u'âsi mono wasu'u na te te 're wawapari za'ra mono õ wamhã, wa za wa te wasina 're waihu'u za'ra, Wa'uburé hawi roti tô senai õ zarina 're ihâimana za'ra mono na hã. Duré ni'wam norĩ hã 'Re ihâimana u'âsi mono wasu'u na te te 're wawapari ze za'ra mono wamhã, wa za duré wasina waihu'u za'ra ni, 'Re ihâimana u'âsi mono pẽ'ẽzani hawi roti sena uptabi zarina 're ihâimana za'ra mono na hã.
Ãne ma tô ta norĩ hã wama waihu'u siromo za'ra: “Nimahã na iropsi'utõrĩzéb u hã aibâ norĩ te za dawazari 're hâimana za'ra, iwasété norĩ hã. 'Re ihâimana u'âsi mono hã te te siwi 're wazé mono õ di za. Te za duré ai'ãma 're wa'ẽ za'ra wa'wa. Si'uihâ na marĩ hã te te sima 're iwẽ za'ra mono zéb uwaibaba si, te za te te 're 'manharĩ za'ra, iwasétére hã.” Ãne ma tô wama waihu'u siromo za'ra, Zezu Cristuhu zadawa wasu'u'wa norĩ hã.
E marĩ wa. Ni'wam norĩ hã, 'Re ihâimana u'âsi mono nhimiroti wẽ'õ'wa norĩ hã te aiwazari 're hâimana za'ra wa'wa. Sõ'awi te te 're rowahutu za'ra mono nherẽ, te ta norĩ hã roti na te te aiwi ãma 're upa za'ra wa'wa. Tahawa, isimiroti za'ra hã tô sena newa, te asiré isazei'wa norĩ hã te te 're wapari za'ra. Duré õ norĩ hã aibâ iwasété norĩ hã 'Re ihâimana u'âsi mono hã te te siwi 're wazé mono õ di. Duré Wanhib'apito Zezu Cristu hã misi uptabi 're ihâimana mono hã ma tô te te siwi 're wẽ'õ za'ra. 'Re ihâimana u'âsi mono nhimiroti hã te te duré 're 'madâ'â pese za'ra mono õ di. Aimawi na si te duré te te dama 're rowasu'u za'ra. Ãne isimiroti za'ra hã: “'Re ihâimana u'âsi mono hã te te 're da'azawi pese uptabi mono wa, te dawasédé hã te te dama 're apari. Tahawa, da te 're saze za'ra mono nherẽ, te za da te dasima 're iwẽ za'ra mono zéb uwaibaba, 're danomro wasété, 'Re ihâimana u'âsi mono nhimihâzém na dasina 're dapahi za'ra mono ãna.” Ãne isimiroti wasété za'ra hã, dama. Duréihã 'Re ihâimana u'âsi mono hã ma tô ta norĩ ãma waihu'u siro ibaihâ na hã, 're inomro wasété mono norĩ ãma, te te 're iwẽ'õ pese za'ra mono u'âbâ, za te te 're ihâ za'ra mono zém na hã.
Ãne 'Re ihâimana u'âsi mono hã ma tô tãma waprosi, â hawi ropoto siwamnarĩ nho'a te te 're romhõsi mono da. Ãne ma tô tinhimiromhõsi na dama 're sadawa nhipese, 'Re ihâimana u'âsi mono zadawa para newa, ti'ai ãma daro mono bâ 're idahâimana za'ra mono norĩ ma hã. Ma tô duré dama ti'ru, romhâiba, da te dasiwi 'manharĩ da, â hawi ropoto siwamnarĩ hâiba na, sib'ézé 'wapa na da te dasiwi wĩrĩ nherẽ, apâ ihâiwa'utu hâiba na.
Ta norĩ hã si'ubdatõ wa'uburé norĩ hã simiromhõsi waihu'u pese za'ra di. Ta norĩ hã niwamhã te za te te ropé daro mono bâ, dama ipire za'ra norĩ zô, da'wapéi'wa norĩ zô zama te te ubumroi mono da, 'Re ihâimana u'âsi mono hã te te siwi 'wapé da hã, bâdâ isa'ẽne, 'Re ihâimana u'âsi mono danhipai u isiptete uptabi nhimipisutu na.
Tawamhã mreme 'rãihâ na te 'mahâ. Ãne te 'mahâ: — Babilonia hã dahu nho'u dama isa'rese za'ẽne hã ma tô daré ai'utõ. Ma tô uprosi ni. Ahâ uptabi na te oto iwasété norĩ hã iwa 're hâimana za'ra, wa'uburé norĩ hã. Sipahutu norĩ zama, duré si'õmo norĩ zama te oto ahâ uptabi na iwa 're hâimana za'ra, uburé pese si iwasété norĩ hã.
Duré rob'uiwẽzé hã te te oto dama 're rob'uiwẽ za'ra mono õ di za, Babilonia ãma hã. Duré dasina 're damro za'ra mono õ di za oto. Babilonia ãma dama rowede'wa norĩ hã ma tô aré danhipai u sibro pese na 're hâimana za'ra, dama pire na. Iwa 're idahâimana za'ra mono norĩ hã ma tô simi'â na te te da'ãma 're romhuri za'ra, 'Re ihâimana u'âsi mono upana, isine marĩ zô si da te 're rob'ruiwapari pese za'ra mono da, õhõ na dama 're rowẽ za'ra mono da newa.
Tawamhã â hawi ropoto siwamnarĩ hã ma tô âri ni. Awaru irã 'mapraba'wa ma tô ti'â. 'Re ihâimana u'âsi mono zadawa wasu'u uptabi õ 'wa, 'Re ihâimana u'âsi mono nhimipisutu newa, romhõsi na dama 're isadawa nhipese mono, ma tô duré isiré hã ti'â. Ta hã ma tô aré â hawi ropoto siwamnarĩ nho'a te te 're romhõsi, dama isa'rese'õ na. Te te 're iromhõsi mono zém na ma tô dama 're sadawa nhipese aré, â hawi ropoto siwamnarĩ nhisi na ihâiba ui'éré mono hã, ihâiba 'manharĩ na romhâiba ãma 're idawata za'ra mono hã. Tawamhã awaru irã 'mapraba'wa hã ma tô â hawi ropoto siwamnarĩ norĩ hã, dama 're isadawa nhipese mono me wabzu. Unhama ro'o u'âsi u, ma tô hâiba ré wabzu, ẽtẽ ro'o nhizédé uzé pire u.
“Asimipari pese za'ra wa'aba wamhã, ma'ãpé ĩwapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari za'ra ãna Satanasihi ãma te te i'ai'uté za'ra norĩ hã ta norĩ hã 're idadâ'â zahu za'ra mono norĩ siré, te te 're robzépata za'ra mono õ di za, unhama ro'o u'âsi ãma hã. Robze na te za 're hâimana u'âsi za'ra. Ãne Ĩmama pẽ'ẽzani te te irotizé hã.”
“Asimipari pese za'ra wa'aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã ta norĩ ma, wa za dasa ise hã duréi te dama ihâi'ré'õ hã te tãma 're anhomri, mana na dasa nhisi hã. Duré ẽtẽ'a, wa za te tãma 're anhomri ihâiba mono bâ, isisi itém na ãma irob'ui'éré za'ra ré hã dama isa'rese'õ hã. Te te 're iwaibui mono norĩ ma si, za waihu'u pese di, isisi ité hã. Ãne Ĩmama pẽ'ẽzani te te irotizé hã.”
“A norĩ wa'wa hã asimipari pese aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã ta norĩ ma si, wa za tãma pisutu za'ra, rob'rãi u'â hã te te 're huri u'âsi mono da. Taha wede hã 'Re ihâimana u'âsi mono 're isãmra u'âsi mono zéb ãma te 're sa, rowẽ uptabi ãma hã, i'rã hã da te 're huri mono wa, dadâ'â ãna 're idanomro u'âsi mono zé hã. Ãne Ĩmama pẽ'ẽzani te te irotizé hã.”
Tawamhã watobro wamhã, daro mono bâ te za oto te te 're da'a'rãmi, sadawa nhipese na. Ti'ai ãma hã darom nhisi zahuré hã maparane za oto. Gogui na duré Magogui na darom nhisi zahuré hã. Tame te za Satanasi hã da'rã'õtõ, dasi'wapé da. Da'ahâ uptabi na te za da'a'rã'õtõ. Â poré zaihâ na supara 're isimi'wara mono ne, da'ahâ uptabi di za.
Tawamhã dahâiba ré idasi'atarẽme mono hã idadâ'â mono õ hã, 'râwi dasi'uihâ na 're dasisãmri za'ra mono õ di. Zahadu te wa'uburé norĩ ãma si 're dawata za'ra. Te duré zahadu ropoto hâiba 'manharĩ ãma si 're dawata za'ra, danhib'manharĩ nhipese na da te 're irob'manharĩ za'ra mono ãma, ẽtẽ waipo pré oru 'manharĩ ãma, duré ẽtẽ waipo prã prata 'manharĩ ãma, duré ẽtẽ topsada brõzi 'manharĩ ãma, duré ẽtẽ 'manharĩ ãma, duré wede 'manharĩ ãma. Zahadu da te rẽme mono õ di. Ropoto hâiba 'manharĩ hã te te rob'madâ'â õ nherẽ, duré simipari õ nherẽ, duré morĩ õ nherẽ, te zahadu ãma 're dawata za'ra, 'Re ihâimana u'âsi mono upana.
ကြော်ငြာတွေ