1 Timotiu 2:1 - ꞌRe Ihâimana Uꞌâsi Mono Zadawa Wasuꞌu

¹ Ãhã na marĩ ipire na wa za aima rowasu'u. 'Re ihâimana u'âsi mono ma 're damreme zusi mono wamhã, te za uburé da'ãma tãma 're damreme zusi, te te 're da'apawapto mono da. Marĩ zô dawi 're rowaptâ'â za'ra mono wamhã, uburé dama te za da te tiwi 're rowaptẽrẽ za'ra, marĩ hã te te dama 're anhomri mono da. Duré marĩ na dama 're sõpru mono wamhã, te za ãma 're dawata za'ra.

1 Timotiu 2:1 ပူးပေါင်းရင်းမြစ်များ

Esdra 6:10

Ãne te za ta norĩ hã te te 're 'manharĩ za'ra, 'Re ihâimana u'âsi mono hâiwa ãma 're isãmra mono ma, 're isõprub za'ra mono zé te te 're i'awẽsãmri mono zéb da hã. Duré ĩ'ãma 're mreme zusi mono da, ĩ'ra norĩ ãma zama, rowẽ na 're wahâimana za'ra mono da hã, te za te te 're 'manharĩ za'ra.

Salmu 72:19

Isisi iwẽ na õne u'â ãma 're wawata za'ra wa'aba mono! Isiptetezé hã duré ihawi rowẽ za'ẽtẽ zé hã, ropâ daro mono bâ te te dama 're i'aza'ẽtẽ mono da si, iwẽ hã! Tane tô! Tane tô!

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:30

'Re ihâimana u'âsi mono hã dama waihu'u ãna 're danomro mono ré, te te 're dahâ za'ra siromo mono õ di. Tane nherẽ, ãhã na ropâ 're idasi'ubumroi mono hã te za te te 're da'awada'uri, dawasété wi 're dasipizari za'ra mono da, isiniwĩ 're danomro mono da.

Roma 1:8

Ãhã na, wa za Ĩnhib'apito ãma uimrehẽne ĩwata, ĩmreme na, 'Re ihâimana u'âsi mono ãma, Zezu Cristuhu nhimipawaptobzéb zarina 're sazei pese za'ra wa'aba mono wa, aiwasu'u za'ra wa'wa hã daro mono bâ da te 're wapari za'ra mono wa.

Roma 6:17

Aiwasété na si, ma tô aré 're aihâimana u'âsi za'ra wa'aba mo, 're sahâri waihu'u za'ra wa'aba mono ãna. Tane nherẽ, ãne 're aihâimana za'ra wa'aba mono õ di oto. 'Re ihâimana u'âsi mono te te aima 're iroti za'ra wa'aba mono zép si, te oto 're i'madâ'â pese za'ra wa'aba mo. Tahawa, 'Re ihâimana u'âsi mono ãma si, wa za 're wawata za'ra.

1 Corĩtu 15:3

Zezusihi wasu'uwẽ hã danhipai u ipire uptabi hã, wa tô te aima 're wasu'u za'ra wa'wa, da te ĩma 're irowasu'u za'ra mono zéb zarina. Ãne, Zezusihi wasu'u hã ipire uptabi hã: Cristu hã ma tô, u, wazada dârâ, uburé wawasété na 're iwahâimana za'ra mono norĩ zada. Taha pari, ma tô dasiwi sẽrẽ ni, u, ab're 're. Tawamhã bâdâ maparane ãma si'utõrĩ õ ré, ma tô duré Imama hã, u, hâiwa'utu, 'Re ihâimana u'âsi mono hã. Ãne ma tô tãma tiromhâiba, duréihã 'Re ihâimana u'âsi mono zadawa 'mahârâ'wa norĩ hã ibaihâ na te te ãma irob'ui'éré siromo za'ra zéb zarina.

2 Corĩtu 8:6

Titu hã ãma atẽme morĩ 'rata aba wamhã, ma tô rob'uiprazé ubumro na sãna'rata, asõprub za'ra wa'aba zém na hã. Tahawa, wa tô tãma roti pese ni, duré ãma atẽme morĩ aba wamhã, rob'uiprazé ubumro na te te ãma sizusi da, romhuri hã wẽ uptabi na te te uprosi da.

Éfézu 3:13

Ãne wa, wa hã te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za. Cristuhu wasu'uwẽ hã wa tô te aima 're wasu'u za'ra wa'wa, aima 're irowẽ za'ra wa'aba mono zéb da hã. Tahawa, Cristuhu wasu'uwẽ hã te dama 're wasu'u mono 'ru te, iwasédé hã da te ĩma 're 'manharĩ za'ra mono nherẽ, ĩma 're rowẽ mono di. Ãne wa, te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za.

Éfézu 5:20

Wamama hã sõprub di, 'Re ihâimana u'âsi mono hã. Tahawa, uburé marĩ wẽ na wama 're isõprub za'ra mono zéb zarina, te za ãma 're aiwata u'âsi za'ra wa'aba mo, Wanhib'apito Zezu Cristuhu zadawa para.

Éfézu 6:18

Te aima iroti za'ra wa'aba zéb zarina, te za uburé 're i'manharĩ u'âsi za'ra wa'aba mo. Duré ipẽ'ẽzani te te wama 're i'awaihu'u mono zéb zarina, te za Wamama ma 're aimreme zusi aba mo. Te za tiwi 're irowaptẽrẽ u'âsi za'ra wa'aba mo, te te 're aipawaptob za'ra wa'aba mono da. Asimiza'rese sina te za 're aihâimana za'ra wa'aba mo, tãma 're aimreme zusi aba mono da. Aiwi 're robzei'õ za'ra wa'aba mono õ di za. 'Re ihâimana u'âsi mono nhib'a'uwẽ 're ihâimana za'ra mono norĩ ma, te za duré tiwi 're irowaptẽrẽ u'âsi za'ra wa'aba mo, te te 're apawaptob u'âsi mono da, daro mono bâ.

Filipu 1:3

Ai'ãma 're ĩpo're pu'u za'ra wa'aba mono sidâpâsi, wa 'Re ihâimana u'âsi mono ãma 're ĩwata u'âsi, Ĩnhib'apito ãma.

Filipu 4:6

Marĩ na 're aihâtâ'â za'ra wa'aba mono ãna, te za oto 're aihâimana za'ra wa'aba mo. 'Re ihâimana u'âsi mono ma, 're aimreme zusi aba mono zép sidâpâsi, te za duré tiwi 're irowaptẽrẽ za'ra wa'aba mo, uburé marĩ zô aiwi 're irowaptâ'â za'ra wa'aba mono zém na hã. Aipẽ'ẽ 're, ãma 're aiwata za'ra wa'aba mono sina, te za asi'ãma duré tãma 're aimreme zusi aba mo.

1 Tesalonita 3:12

Tô sena ma tô 're asisawi pese za'ra wa'aba mo. Uburé ma tô duré 're idazawi pese za'ra wa'aba mo. Tane tô, wẽ di. Tahawa, wa duré wa te tiwi 're rowaptẽrẽ za'ra, Wanhib'apito wi, te te 're aipawaptob za'ra wa'aba mono da, awẽ sidâpâsi asimizawi pese za'ra wa'aba zé hã, te te aima 're sa'ẽtẽ za'ra wa'aba mono da. Sa'ẽtẽ na, wa te 're i'asawi pese za'ra wa'aba mono zém ne, aiwa sa'ẽtẽ na 're dazawi pese za'ra wa'aba mono da, wa wa te tiwi 're rowaptẽrẽ za'ra.

2 Tesalonita 1:3

Wasisãnawã norĩ, 'Re ihâimana u'âsi mono ãma, wa 're wawata u'âsi za'ra, 're aihâimana wẽ za'ra wa'aba mono wa. Ta hã te te 're aipawaptob za'ra wa'wa, tiwaihu'u pese na. Tawamhã ma tô oto 're isazei pese za'ra wa'aba mo. Awẽ sidâpâsi 're isazei pese za'ra wa'aba mono zé hã, te ãma asima 're isa'ẽtẽ za'ra wa'aba mo. Aihâiba mono bâ, te 're asisawi za'ra wa'aba mo. Duré awẽ sidâpâsi 're asisawi pese za'ra wa'aba mono zé hã te ãma 're isa'ẽtẽ za'ra wa'aba mo. Tahawa, 'Re ihâimana u'âsi mono ãma, wa 're wawata u'âsi za'ra. Ãne, wa te 're 'manharĩ za'ra mono da, wama 're wẽ za'ra mono di. Tô i'uwaibaba na si.

1 Timotiu 5:5

Pi'õi mrotõ ma, sena na danhimipawaptobzé tãma ihâimana'õ hã te za 'Re ihâimana u'âsi mono zô si 're simnhasi, marĩ na te te 're pawapto mono da. Bâtâ na te za tãma 're mreme u'âsi, bara na zama, marĩ na te te 're pawapto mono da.

2 Timotiu 2:24

Ni'wa hã Wanhib'apito ma romhuri'wa na 're hâimana mono wamhã, timreme na te te 're da'a'wapéi mono õ di za. Simizawi pese na te za dama 're hâimana, aihĩni ma. Waimri na te za duré te te dama 're arowaihu'u, waptu na dazada 're sahi mono ãna.

Titu 2:11

'Re ihâimana u'âsi mono hã ma tô dama siwaihu'u, tinhimizawi pese zém na, uburé te te 're ida'anho'reptui mono zéb da hã.

Titu 3:2

Duré te te 're dabâsi wasété za'ra mono õ di za. Te te duré 're dazada'âbâ za'ra mono õ di za. Simizawi pese na si, te za 're hâimana za'ra. Duré waimri na te za uburé dama 're hâimana za'ra, hâimana wẽ na.

Hebreu 6:11

Wa tô ĩsima aiwẽ za'ra wa'wa, tô õhõ na si 'Re ihâimana u'âsi mono ma, 're aihâimana u'âsi za'ra wa'aba mono da, rob'rãsutu u, iwẽ uptabi zô 're asimipari za'ra wa'aba mono zé hã asina 're uwaimrami za'ra wa'aba mono da.

Tiagu 5:16

Ãne wa, Wanhib'apito hã aihâzé wa, te te 're aipese za'ra wa'aba mono da, marĩ 're 'manharĩ wasété za'ra wa'aba mono wamhã, te za asima 're asiwasu'u za'ra wa'aba mo. Te za duré asima tiwi 're irowaptẽrẽ za'ra wa'aba mo, Wanhib'apito wi. Tawamhã dahâimana wẽ sina, da te tiwi 're rowaptẽrẽ za'ra mono wamhã, da te tiwi 're irowaptẽrẽ za'ra mono zéb zarina, te za tô te te dama ãma 're a'uwaimrami, Wanhib'apito hã.