1 Timotiu 1:7 - ꞌRe Ihâimana Uꞌâsi Mono Zadawa Wasuꞌu

⁷ Ta norĩ hã te te sima 're wẽ za'ra, 'Re ihâimana u'âsi mono nhimiroti 'rata na rob'ui'éré na dama rowahutu'wa, 're nomro mono da. Tane nherẽ, tãma waihu'u pese za'ra õ di, isimiroti hã. Tãma waihu'u pese za'ra newa, tazahã tãma pibu prã za'ra di, te te dama 're irowasu'u za'ra mono zé hã.

1 Timotiu 1:7 ပူးပေါင်းရင်းမြစ်များ

Mateu 15:14

Farizeu norĩ ãma 're aihâtâ'â za'ra wa'aba mono õ di za. Tô si'uihâ na 're hâimana za'ra mono. Ni'wa hã tob'a na 're ihâimana mono hã te za tisiré itob'a hã saprõ. Te te saprõni wamhã, te za ab're 're siré tiwaptã'ã zahuré. Tane te farizeu norĩ hã itob'a ne hã te te 're danhimro.

Mateu 21:27

Tawamhã Zezusihi ma, te oto asa nharĩ za'ra, ãne: — Wa norĩ hã wa te waihu'u za'ra õ di, ni'wa sadawa para, Zuwã Batista hã â dawabzuri te te dama 're i'ab'manharĩ mono zé hã. Tawamhã Zezusi hã asa ma tizadawa na tãma ãma wa'rãmi za'ra, ãne: — Tane tô. A norĩ wa'wa hã ĩma waihu'u za'ra wa'aba õ nherẽ, wa hã te duré aima waihu'u za'ra wa'aba õ di za, ni'wa sadawa para marĩ hã te dama 're i'ab'manharĩ mono na hã.

Luca 2:46

Tawamhã si'ubdatõ bâdâ ãma ne wapsi, ma tô sõpẽtẽ zahuré, 'Re ihâimana u'âsi mono nhorõwa 'ri ãma, dame sãmra ré. Zudeu norĩ ma, rowahutu'wa norĩ me, te dame nhamra. Tame te Zezusi hã da'awapa, roti na. Te duré roti na da'azadanha, roti hã te te tãma waihu'u pese za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:1

Tawamhã aibâ norĩ hã ma tô aihutu Ãtioquia u, Zudéa hawi. Taha wamhã, te isazei'wa norĩ ma, roti za'ra, ãne: — Zudeu'õ norĩ hã, Mozési wahi'rata norĩ ma, te te ipisutu zarina, 're sisihâiwata nhihâri za'ra mono õ nherẽ, 'Re ihâimana u'âsi mono te te 're sõ'reptu za'ra mono õ di za.

Roma 1:22

Dapo're'õ na 're idanomro mono norĩ hã uburé marĩ hã te te 're waihu'u pese za'ra mono newa, te taré sina 're wata za'ra, dama. Tane nherẽ, te ta norĩ hã simiza'rese ãna 're nomro.

Galata 3:2

Ma'ãpé we ĩma waihu'u za'ra wa'aba. E marĩ wa, ma tô 'Re ihâimana u'âsi mono hã Tipẽ'ẽzani hã we aima sõmri za'ra wa'wa, aipẽ'ẽ 're. E isimiroti 'rata na rob'ui'éré zarina, 're irob'manharĩ za'ra wa'aba mono zéb zarina, ma tô we Tipẽ'ẽzani hã aima sõmri za'ra wa'wa. Mare di. E Zezu Cristuhu wasu'uwẽ hã aipo're na wapari za'ra wa'aba pari, tô sena iwasu'uwẽ na asina 're saze za'ra wa'aba mono wa, ma tô we aima sõmri za'ra wa'wa. Ĩhe. Tahawa tô, ma tô we Tipẽ'ẽzani hã aima sõmri za'ra wa'wa, aipẽ'ẽ za'ra wa'aba 're, 're sãmra mono da oto.

Galata 4:21

Uburé õ nherẽ, ma tô asima iwẽ za'ra wa'wa, 'Re ihâimana u'âsi mono nhimiroti 'rata na rob'ui'éré zarina, 're rob'manharĩ za'ra wa'aba mono da, taha zarina si 'Re ihâimana u'âsi mono hã te te 're asõ'reptu za'ra wa'aba mono da newa. E aima waihu'u za'ra wa'aba õ di bété, 'Re ihâimana u'âsi mono wasu'uwẽ hã, Abra'ãhã 'ra norĩ ãma hã.

2 Timotiu 3:7

Pi'õ norĩ hã, ni'wam norĩ nhimirowasu'u te te 're wapari ze za'ra mono nherẽ, roti tô sena hã niwa te te iwaihu'u za'ra da hã, mare di za.

Tiagu 3:1

Ĩsisãnawã norĩ, Wanhib'apito zazei'wa norĩ ma rowahutu'wa da hã, ãté ai'umro na si te za 're asirowahutu'wa za'ra wa'aba mo. E marĩ wa, wa ãne aima waihu'u za'ra wa'wa. Nimahã bâtâ na te za wahâimanazém na wa'awaihu'u, Wanhib'apito hã. Tawamhã wa norĩ hã dama rowahutu'wa nherẽ, marĩ, wa te 're i'manharĩ wasété za'ra mono zém na, te za sa'ẽtẽ wama nharĩ za'ra, Wanhib'apito hã, wasiré isazei'wa norĩ nhipai u.

2 Pedru 2:12

Tanei õ di, aibâ norĩ hã senai'õ na rowasu'u'wa norĩ hã. Roti hã uburé tãma waihu'u za'ra õ wamhã, te roti ma te te 're nharĩ wasété za'ra, wẽ nherẽ, roti hã. Ta norĩ hã abaze ne, te rosa'rata ãna 're hâimana za'ra, simiza'rese ãna. Taha zarina, abaze hã da te 're simroi mono wa, 're irere'e mono ne, te za ta norĩ hã 'Re ihâimana u'âsi mono hã te te 're hâ za'ra, 're ihâimana wasété za'ra mono zé wa'rãmi. Ta norĩ hã te marĩ hã te te sima 're wẽ ahâ za'ra. Siséb ãna, te rowa'a na te te 're rob'manharĩ wasété za'ra. Tahawa, ta norĩ wazari, 're asaihuri aba mono wa, te ai'ãma 're mreme wasété za'ra wa'wa, isazei'õ'wa norĩ hã.