1 Samuéu 7:6 - ꞌRe Ihâimana Uꞌâsi Mono Zadawa Wasuꞌu

⁶ Tawamhã ãne ma tô uburé Izaraéu nhihudu norĩ hã si'rã'õtõ, Mispa ãma. Tahawa, ma tô â hã duré siwi waze. Ta hã ma tô duré siwi sa'wa, Uburé Danhib'apito ma tinhoprubzém na hã. Tawamhã si'upari ãna ma tô bâtâ bâre tihâimana za'ra. Tahawa, te ãne tãma siwẽ'õ za'ra, 'Re ihâimana u'âsi mono ma: — Uburé Danhib'apito, wa norĩ hã wa tô wawasédé hã 'manharĩ za'ra ni aiwi. Tawamhã tame ma tô Samuéu hã Izaraéu nhihudu norĩ ma si'ĩ'rãnho'u, Mispa ãma. Tame ma tô duré da'ãma rowairébé'wa na hã 're hâimana.

1 Samuéu 7:6 ပူးပေါင်းရင်းမြစ်များ

Zenezi 31:49

Mispa na zama isisi hã, Labã te te nharĩ wa ãne: — Uburé Danhib'apito, niha wasima wasiwãnhizari ré hã te te iwa'madâ'â da si tô iwẽ hã.

Neemia 9:27

Tahawa ma tô isitob'ru norĩ ma, isa'ré za'ra, te te ãma ai'uté za'ra da hã, duré te te 're iwati pese za'ra mono na tãma 're hâimana za'ra mono da hã. Tane nherẽ, te te oto 're irobzépata za'ra mono 'remhã, te te aiwi 're rowaptẽrẽ za'ra mono wamhã, ma tô duré hâiwa hawi ãma 're isada'âbâ za'ra mo. Tawamhã ãma i'aiwamri za'ẽtẽ za'ra zarina, isitob'ru norĩ hawi te te nasi sani za'ra da hã ma tô i'rãnho'õmo norĩ itẽme za'ra hã 're isatõrĩ za'ra mo.

Salmu 119:136

Ĩtõmo'u te panho'õmo ne ĩwi 're praba, asimiroti da te dasiwi 're 'madâ'â pese mono õ wa.

Zuéu 2:12

Uburé Danhib'apito te tinha ãne: “Tane nherẽ, ma'ãpé oto apâ ĩtẽme aipizari za'ra wa'aba, aipẽ'ẽ na, asai ãna aihâimana za'ra wa'aba sina, duré aiwawa za'ra wa'aba sina, duré ai'ru'ru wa'aba sina.

Luca 15:18

Tahawa, wa za oto mo, ĩmama u apâ. Ĩwisi wamhã, wa za ĩmama ma ĩsiwasu'u, ãne: ‘Ĩmama, ĩwasété na wa tô 're mo. 'Re ihâimana u'âsi mono nhimiroti hã, wa tô upa. Asimiroti zama, wa tô duré upa.

Zuize 10:10

Tahawa Izaraéu nhihudu norĩ, mreme 'rãihâ sina Uburé Danhib'apito wi te te rowaptẽrẽ za'ra wamhã, ma tô ãne tãma siwẽ'õ za'ra: — Uburé Danhib'apito, wa norĩ hã wa tô wawasédé hã wa te aiwi 're 'manharĩ za'ra. Duré wate 'Re ihâimana u'âsi mono, wa te wasiwi airẽme wa, wa tô ihâiba'õ norĩ Baau na iwamri ãmap si 're wawata za'ra.

Zuize 10:15

Tawamhã Izaraéu nhihudu norĩ, ma duré ãne ãma tãma wa'rãmi za'ra: — Tô sena, wa norĩ hã wa tô wawasété za'ra ni tô. Tahawa ma'ãpé asima iwẽzéb zarina, niha na wama rob'manharĩ za'ra na. Tane nherẽ, ma'ãpé wazawi na hã ãhã na wanho'reptu za'ra na.

Zuize 2:4

Tawamhã Uburé Danhib'apito ma, hâiwa ãma romhuri'wa ãne na te te tãma waihu'u za'ra parimhã, ma tô uburé Izaraéu nhihudu norĩ hã ti'ru'ru.

Zuize 20:26

Tahawa uburé Izaraéu nhihudu norĩ, ma tô Bétéu u apâ ai'aba'ré, 'ru'ru da hã. Tawamhã tame Uburé Danhib'apito nho're hâimana za'ra wamhã, saihuri ãna, ma tô tihâimana za'ra, ãma ihâiwahâ pese za'ra zéb u. Tawamhã tinhimizama zata na ma tô tãma tinhoprub za'ra, 'Re ihâimana u'âsi mono ma, danhoprubzé ãma irowẽ za'ẽtẽ na.

Zuize 3:10

Tawamhã Uburé Danhib'apito pẽ'ẽzani iwa sébré wa, ma tô Izaraéu nhihudu norĩ ma si'i'rãnho'u. Tawamhã Otonié, ma tô dasi'wapéi u watobro. Watobro wamhã, ma tô Uburé Danhib'apito hã pawapto, Mezopotãmia ãma apito na te te ai'uté da hã.

1 Samuéu 1:15

Tawamhã ma te ãma tãma wa'rã ãne: — Ma. Ĩsi'rãiwamnarĩ õ di, ĩnhib'apito. Duré te hâ'rẽne õ di, uwa 'rãi wa'u isé hã, duré âzaipro hã. Wa hã wa tô tãma mre, Uburé Danhib'apito nho'remhã, ĩma robzei õ uptabi wa. Duré wa tô tãma wasu'u, te irobzépatazé hã.

1 Samuéu 10:17

Tawamhã Samuéu ma tô uburé sô tihârâ za'ra, Izaraéu nhihudu norĩ zô, Mispa ãma si'rã'õtõ da.

1 Samuéu 12:10

Tahawa, ma tô nasi tiwi rowaptẽrẽ za'ra ãne te te pawaptob za'ra da, Wanhib'apito 'Re ihâimana u'âsi mono hã: “'Re ihâimana u'âsi mono, wa norĩ hã wa tô wawasété za'ra ni. Duré wa tô rẽme za'ra ni, ai'ãma 're iwawata za'ra mono zé hã, romhâibarĩ Baau na si ãma 're wawata za'ra mono da oto, 'ri nho'õmo mono bâ. Duré Asitaroti na romhâibarĩ nhisi na zama 're wawata za'ra mono da, wa tô ai'ãma 're iwawata za'ra mono zé hã wasiwi rẽme ni. Tane nherẽ, ãhã na wanho'reptu za'ra na wanhitob'ru za'ra wi, ai'ãma si 're wawata za'ra mono da oto apâ.”

1 Samuéu 7:15

Samuéu hã tihâimanazéb 'rãsutu u ma tô da'ãma rowairébé'wa na hã 're hâimana, Izaraéu nhihudu norĩ ma.