1 Samuéu 7:3 - ꞌRe Ihâimana Uꞌâsi Mono Zadawa Wasuꞌu

³ Tawamhã Samuéu te Izaraéu nhihudu norĩ ma nharĩ za'ra ãne: — Uburé Danhib'apito u hã apâ aipẽ'ẽ 're itẽme aipizari za'ra wa'aba da, asima wẽ za'ra wa'aba wamhã, ma'ãpé sãmra za'ra wa'aba uburé wasiré'õ norĩ te ihâiba'õ norĩ hã, duré romhâibarĩ na pi'õi podo hã Asitaroti na isisi hã. Ma'ãpé duré 're asisõmri za'ra wa'aba mono, õhõ ãma si oto 're aiwata za'ra wa'aba mono da, Uburé Danhib'apito ãma. Tawamhã te za õ hã asõ'reptu za'ra wa'wa, filisteu norĩ nhiptetezé wi hã.

1 Samuéu 7:3 ပူးပေါင်းရင်းမြစ်များ

Zenezi 35:2

Tawamhã Zaco te uburé isõrõwa 're, 're ihâimana za'ra mono norĩ ma nharĩ za'ra, ãne: — Wasiré a'uwẽ'õ norĩ te, ihâiba'õ norĩ ma, romhâibarĩ na ãma 're idawata za'ra mono hã aima ihâimana za'ra wa'wa hã, te za asiwi isãmra 'wa. Ma'ãpé asipese za'ra wa'aba. Duré da'uza ihâi uptob'õ na te za asi'uza za'ra wa'wa.

Provébiu 16:1

Dapẽ'ẽ 're da te 're irowa'õtõ za'ra mono ré hã te za 're dahâimana za'ra. Tane nherẽ, te za Danhib'apito 'Re ihâimana u'âsi mono si niha hã te te dama 're apisutu.

Mateu 15:8

“Õ norĩ hã tô sena newa, te timreme na si taré ĩ'ãma 're wata za'ra. Tane nherẽ, te tipẽ'ẽ 're aimawi zô si sima te te 're rosa'rata u'âsi za'ra, ĩ'upana.

Mateu 4:10

Tawamhã Zezusi te asa tãma tinha ãne: — Satanasi, mo oto ĩnhiti aimorĩ. 'Re ihâimana u'âsi mono zadawa 'mahârâ'wa, ma tô ãne rob'ui'éré: “Uburé Danhib'apito uptabi ãma si, te za 're aiwata za'ra wa'aba mo, 'Re ihâimana u'âsi mono ãma si. Taha ma si te za 're iromhuri za'ra wa'aba mo, Asib'apito za'ra wa'aba ma si.” Ãne imreme na rob'ui'éré, ibaihâ na hã. — Ãne te rob'ui'éré 'rada hã tãma 'rãzarõtõ Zezusi hã, Satanasihi ma.

Mateu 6:24

— Dama romhuri'wa isib'apito maparane tãma 'maihâimana wamhã, aiwa te te tãma 're 'mairomhuri wẽ mono õ di za, tinhib'apito zahuré ma hã. Isib'apito maparane wamhã, sahuré te te 're sawi pese zahuré mono õ di za. Misi te za te te 're sawi pese. Ihâiba amo si te za te te siwi 're wẽ'õ. Duré sahuré te te 're wapari pese zahuré mono õ di za, romhuri'wa hã. Misi te za te te 're wapari pese. Ihâiba amo si te za te te 're 'ruiwapari. Tane, a norĩ wa'wa hã rob'uiprazéb zô si, asima 're romhuri za'ra wa'aba mono wamhã, 'Re ihâimana u'âsi mono ma, 're romhuri wẽ waihu'u za'ra wa'aba mono õ di za.

Luca 4:8

Tahawa, te Zezusi hã asa tãma tinha, ãne: — Mare di. 'Re ihâimana u'âsi mono zadawa 'mahârâ'wa, ma tô ãne rob'ui'éré, ibaihâ na hã: “Uburé Danhib'apito uptabi ãma si, te za 're aiwata za'ra wa'aba mo, 'Re ihâimana u'âsi mono ãma si. Taha ma si, te za 're iromhuri za'ra wa'aba mo, Asib'apito za'ra wa'aba ma si.” Ãne imreme na rob'ui'éré hã.

Zozué 24:14

Tawamhã Zozué ma te ãne timreme hã tãma 'rãsutu za'ra: — Tahawa te za ã hawim haré ãhã na hã 'Re ihâimana u'âsi mono, Uburé Danhib'apito hã 're iwazéb za'ra wa'aba mo, isib'a'uwẽ sena na ãma 're anomro aba mono da. Duré asisiti sãmra aba, aihi'rata norĩ Mezopotãmia ãma, duré Ezitu ãma, ihâiba'õ ãma waihu'u pese newa ãma 're iwata za'ra mono hã, Uburé Danhib'apito ãmap si 're anomro aba mono da oto.

Zozué 24:23

Zahadu te Zozué tãma nharĩ za'ra ãne: — Tane wamhã, pé tô sãmra za'ra wa'aba, asiré a'uwẽ'õ norĩ te, ihâiba'õ aima ihâimana za'ra wa'wa hã. Duré asina ropisutu za'ra wa'aba, sena na Uburé Danhib'apito, Izaraéu nhihudu norĩ te, 'Re ihâimana u'âsi mono ãma si 're i'anomro aba mono zém na hã za.

Zuize 10:16

Tahawa Izaraéu nhihudu norĩ, tisiré a'uwẽ'õ norĩ te ihâiba'õ norĩ hã ma tô oto siwi sãmra, Uburé Danhib'apito ãma si oto 're wata za'ra mono da. Tahawa ma tô oto duré itõmo na ãma aiwamri pese za'ra, ropire tãma 're ihâimana za'ra mono zém na.

Zuize 10:6

Tawamhã Izaraéu nhihudu norĩ, ma tô apâ Uburé Danhib'apito wi tiwasédé te te 're 'manharĩ za'ra. Ma tô ihâiba'õ Baauhu ãma, 'ri nho'õmo mono bâ 're wata za'ra, ihâiba'õ Asitaroti ãma, Siria norĩ te ihâiba'õ ãma, Sidõ norĩ te ãma, moabita norĩ te ãma, Amo norĩ te ãma, duré filisteu norĩ te ãmamhã. Tahawa ta norĩ, Uburé Danhib'apito te te siwi rẽme pese wa, ãma 're wata za'ra mono õ di oto.

Zuize 2:11

Tawamhã Izaraéu nhihudu norĩ, Uburé Danhib'apito wi, ma tô tiwasédé hã te te 're 'manharĩ za'ra. Ma tô duré cananeu norĩ te ihâiba'õ norĩ na ãma 're wata za'ra.

Zuize 2:13

Tahawa, Uburé Danhib'apito ãma 're inomro mono zé hã ma tô misi haré siwi tirẽ. Ãhã wa, romhâibarĩ Baau ãma si, te oto 're wata za'ra, Asitaroti na isisi ãma zama.

1 Samuéu 31:10

Romhâibarĩ na ãma 're iwata za'ra mono zé 'ri 'remhã, ma tô Sau nhimnhi'ã hã siwi sa'ra. Tawamhã duré Bete-Sã na 'ri nho'õmo nhisi ãma, ma tô 'ri'ahâ 'wawi wa'ra 'rãihâ na hã, ihâiba na ãma siwi romnhiptâ'â hâiwi sa'o da.