1 Samuéu 6:5 - ꞌRe Ihâimana Uꞌâsi Mono Zadawa Wasuꞌu

⁵ Tahawa, te za isizusi za'ra wa'wa, da'wa're tob'mai'ãsi na hã, duré 'rure na hã, wanhipti'ai 're te te iwa'awamnarĩ mono hã. Ã norĩ hã te za tãma isõmri za'ra wa'wa, Izaraéu nhihudu norĩ te, 'Re ihâimana u'âsi mono wazézéb da hã. Ãne wamhã, te za ãté sazâ, te te aima irob'manharĩ wasété za'ra wa'aba zé hã, ate za'ra wa'wa ihâiba'õ norĩ ma hã, duré asipti'a za'ra wa'aba ma hã.

1 Samuéu 6:5 ပူးပေါင်းရင်းမြစ်များ

Salmu 32:4

'Re ihâimana u'âsi mono, bâtâ na hã duré mara na hã, ma tô asib'rata na ĩ'azâri pirezém na hã ĩma irob'manha. Ĩnhiptetezé hã ma iwi ai'utõ, wahum na rowa'ro 're isa'wari mono ne.

Ezodu 12:12

— Tawamhã tô taha mara na wa za Ezitu na romnhisi nhisi baba 're mo. 'Re ĩmorĩ wamhã, aibâ dama ipoto'rata za'ra mono hã wa za te dawi hâ za'ra, dawi si'utõrĩ mono da. Duré danhimizama zama wa za te dawi hâ za'ra, aibâ na dama ipoto'rata za'ra mono hã, taha zama dawi si'utõrĩ mono da. Tawamhã hâiwa ãma, waihu'u pese uptabi newa, ãma 're idawata za'ra mono norĩ zama wa za hâ za'ra. E marĩ wa, wa za hâ za'ra. Tô sena, wa hã 'Re ihâimana u'âsi mono, Uburé Danhib'apito uptabi wa.

Ezodu 8:17

Tawamhã Arã tinhiwã na ti'a te te azâri wamhã, ma tô Ezitu ãma ti'a zaprum nherẽ, da'u na hã uburé si'manha. Ta hã ma tô nemo te te dazuwa za'ra. Duré danhimizama norĩ zama ma tô nemo te te suwa za'ra.

Ezodu 8:24

Tawamhã ãne Uburé Danhib'apito, 'Re ihâimana u'âsi mono te te rob'manharĩ wamhã, ma tô apito nhimiromhurizé 'ri 'rãihâ u ubu hã asisi. Duré tãma romhuri'wa norĩ nhorõwa u zama ma tô sisisi. Ahâ uptabi wa, te duré nemo 're si'ré. Tahawa uburé Ezitu ãma hã ma duré te te siwi rowamnarĩ.

Ezodu 8:5

Tawamhã te duré zahadu Mozésihi ma tinha ãne: — Ma'ãpé Arãhã ma nharĩ, pa nho'õmo mono nhisiwi, isipti mono nhisiwi, duré pu'u mono nhisiwi, tinhiwã hã te te wẽ mono da, uti hã ta norĩ hawi wairébé mono da rob u, Ezitu ti'a hã te te siwi i'ubu da hã.

Zuéu 2:25

Uburé wa za isimini za'ra wa'aba nhowa're'remhã apâ aima sõmri za'ra wa'wa, hâiwa'a za'ẽtẽ ne 'riti norĩ ma, te tãma rob'rui wa, dasi'wapéi 'manharĩ'wa norĩ ne, amnho tehâri hã te te i'uprosi za'ra wa'rãmimhã.

Zona 3:9

Ãté ãne wamhã, 'Re ihâimana u'âsi mono hã te za tinhimirosa'rata na saprĩ. Ãté isahi hã te za taré tiwi ai'utõ. Ãne wamhã, wasi'utõrĩ õ di za.”

Zuwã 9:24

Tawamhã farizeu norĩ hã te sô tihârâ za'ra, te te ito pese zô, apâ itẽme sébré za'ra da. Itẽme sébré za'ra wamhã, te tãma nharĩ za'ra, ãne: — Zezusi hã 're morĩ wasété di. Ãne wama waihu'u pese za'ra di, wa norĩ hã. Ma'ãpé 'Re ihâimana u'âsi mono ãma si aiwata, taha si te te ato pese wa.

Zozué 7:19

Tawamhã Acãhã ma, te Zozué tinha, ãne: — Ĩ'ra, sena na te za asiwẽ'õ, Uburé Danhib'apito, Izaraéu nhihudu norĩ te 'Re ihâimana u'âsi mono nho're. Ĩma wasu'u na, marĩ i'manharĩzé hã; duré rosa'rata tõ, asima i'udâ da hã.

Apocalipsi 11:13

Tawamhã zasi zahuré wi, awa'awi te za sa'ẽtẽ uptabi ti'a sãsã hã watobro. Watobro wamhã, 'ri hã nima norĩ hã te za sina, Zeruzalẽ ãma, 'ri nho'õmo 'remhã 're isimasa mono hã. 10 na 'ri 'maihâimana wamhã, te za misi si dawi rere'e. Te za duré 7 miu na tadâ'â za'ra ni, ti'a sãsã'ã na hã. Tawamhã dadâ'â ãna idasi'atarẽme mono hã te za tapahi uptabi za'ra ni. 'Re ihâimana u'âsi mono ãma te za tawata za'ra ni, hâiwa ãma 're isãmra mono ãma, simi'manharĩ waihu'u pese uptabi wa.

Apocalipsi 14:7

Ãne te mreme 'rãihâ na te te dama 'mahârâ: — 'Re ihâimana u'âsi mono nhimiroti hã 're wazé pese za'ra wa'aba mono. Duré wẽ uptabi wa, ãma 're aiwata pese u'âsi za'ra wa'aba mono. Ma tô iwa waptãrã, 'Re ihâimana u'âsi mono te te da'ãma i'arowairébézéb u da hã, uburé pese. Tahawa, te za Ropoto'wai ãma 're aiwata u'âsi za'ra wa'aba mo, hâiwa 'manharĩ'wai ãma, duré ti'ai 'manharĩ'wai ãma, duré â poré 'manharĩ'wai ãma, duré ub're 'manharĩ'wai ãma.

Apocalipsi 16:9

Ma tô duré te te dahâpré pese. Tawamhã ma tô 'Re ihâimana u'âsi mono hã 'ruiwapti za'ra ni, rob'manharĩ pipazém na te te dazada ãma 're rowairébé mono wa. Tane nherẽ, dawasété wi dasipizari za'ra õ di. Duré siptete uptabi nherẽ, 'Re ihâimana u'âsi mono ãma 're dawata za'ra mono õ di.

1 Samuéu 5:11

Tawamhã ma tô romreme 'wapéi'wa norĩ hã 'mazatõrĩ za'ra, uburé filisteu norĩ ma i'rãnho'õmo norĩ ma, te te tãma nharĩ za'ra da, ãne: — Apâ asiwi sõmri aba, Izaraéu nhihudu norĩ te, 'Re ihâimana u'âsi mono nhimiroti ré wedehâ're hã 're isa mono zéb u, te te wa'uprosi tõ da, duré wa'ra norĩ hã te te wawi sõ'rebzâri tõ da. Ãne ma tô tãma nharĩ za'ra, tamemhã 'Re ihâimana u'âsi mono nhimihâzé ipire na da'ahâ na 'ri nho'õmo 'remhã dasi'utõrĩ wa.

1 Samuéu 5:9

Tane nherẽ, te te siwi ãwisi parimhã, ma tô Uburé Danhib'apito hã duré tãma rob'manharĩ za'ra 'ri nho'õmo 'rem norĩ ma. Ma tô duré tapẽ'ẽwara za'ra ni, 'ri nho'õmo ãma 're idahâimana za'ra mono norĩ hã. Tawamhã uburé 'ri nho'õmo 'remhã ma tô dahâ 'rowi da'wa're tob'mai'ã hã te te daduri, dama ipire norĩ hã duré dama iwapu norĩ zama.

1 Samuéu 6:8

Tawamhã taha parip si te za oto Uburé Danhib'apito nhimiroti ré wedehâ're hã asiwi i'âri 'wa za, asiwi sẽrẽ aba da, wedewara zapore 'remhã. Tawamhã te za duré isababa oru 'manharĩ na isizusi za'ra wa'aba zéb ré wedehâ're hã asiwi isẽrẽ 'wa za, Izaraéu nhihudu norĩ te 'Re ihâimana u'âsi mono ma, za asiwi isõmri aba da hã aiwasété wa'âbâ za'ra wa'aba zéb da hã. Tawamhã te za asiwi izusi 'wa, si'uihâ na sisamro da, te te sima iwẽ zahuré zéb uwaibaba.